1. Uuwanawa wuni hatu mono, sho hatu kala pedhimbuluko lyeso lyaKristus omumvo kehe?

 ODHOSHILI kutya otamu shi zimine kutya ekuliloyambo oli li omagano ge na ondilo. (2 Kor. 9:15) Molwaashoka Jesus okwa sa omolwetu, oto vulu okukala nekwatathano lyopothingo naJehova Kalunga. Oto vulu wo okukala netegameno lyoku ka kala nomwenyo sigo aluhe. Onkene oshili pandunge okupandula Jehova, ngoka a inyengithwa kohole, opo e tu pe ekuliloyambo. (Rom. 5:8) Opo e tu kwathele tu kale tu na aluhe olupandu lwekuliloyambo, Jesus okwe tu pa oshipango tu kale hatu dhimbulukwa eso lye, omumvo kehe. — Luk. 22:19, 20.

2. Oshike tatu ka kundathana moshitopolwa shika?

² Omvula ndjino, edhimbuluko otali ka kala ko mOlyomakaya, yomasiku 12 gaApilili, 2025. Kapu na omalimbililo kutya atuheni otwa ilongekidha oku ka kala po. Otatu ka mona uuwanawa ngele otwa kongo ethimbo, pethimbo lyoomwedhi dhEdhimbuluko, tu tedhatedhe a kwaashoka Jehova nOmwana yetu ningila. Moshitopolwa shika, otatu ka kundathana shoka ekuliloyambo tali tu longo kombinga yaJehova nosho wo yOmwana. Moshitopolwa tashi landula, otatu ka kwathelwa tu uve ko nkene tatu  vulu okumona mo uuwanawa mekuliloyambo, nankene tatu vulu okuulika olupandu.

SHOKA EKULILOYAMBO TALI TU LONGO KOMBINGA YAJEHOVA

3. Ongiini eso lyomulumentu gumwe, lya vulu okumangulula ko aantu omamiliyona kuulunde? (Tala wo ethano.)

³ Ekuliloyambo otali tu longo kutya Jehova omuyuuki. (Deut. 32:4) Ngiini mbela? Tala kwaashika: Molwaashoka Adam ina vulika, otwa thigulula uulunde kuye, nohatu si. (Rom. 5:12) Jehova okwa tumu Jesus e li ekuliloyambo, opo e tu mangulule ko kuulunde neso. Ihe mbela ongiini eyambo lyomuntu gumwe a gwanenena, tali vulu okumangulula ko aantu omamiliyona, kuulunde neso? Omuyapostoli Paulus okwe shi yelitha a ti: “Ngaashi aantu ayehe ya ningi aalunde omolwokwaavulika kwomuntu gumwe, ano osho tuu oyendji otaa ningwa aayuuki koshipala shaKalunga omolwokuvulika kwomuntu gumwe.” (Rom. 5:19; 1 Tim. 2:6) Niitya yimwe, aantu ayehe aalunde, nohaya si, omolwomulumentu gumwe ngoka a gwanenena, inaa vulika kuKalunga. Onkee ano osha li sha pula omulumentu gumwe omuvuliki, e tu mangulule.

4. Omolwashike Jehova inaa etha oluvalo lwaAdam, ndoka lwa vulika kuye, lu kale nomwenyo sigo aluhe?

⁴ Mbela Jesus okwa li ngaa e na okusa, opo e tu hupithe? Omolwashike Jehova inaa etha owala oluvalo lwaAdam, ndoka lwa vulika kuye, lu kale nomwenyo sigo aluhe? Kaantu inaaya gwanenena, otashi vulika tu dhiladhile kutya osha li pandunge okuninga oshinima shoka. Ihe kuJehova, kasha li oshinima shi li pauyuuki okuninga, molwaashoka osha li tashi ka kala sha fa Adam inaa ninga nando epuko ndyoka lya kwata miiti, nosho wo kutya oyana kaye shi aalunde. Ihe shoka kasha li shoshili.

5. Ongiini tatu vulu okukala nuushili kutya Jehova oha ningi aluhe shoka shi li mondjila?

⁵ Shimwe ishewe, andola Jehova ka li a gandja ekuliloyambo, e ta etha oluvalo lwaAdam inaa lu gwanenena lu kale nomwenyo sigo aluhe, kungawo Jehova okwiidhimbika omithikampango dhe dhaashoka shi li mondjila naashoka sha puka. Noshizemo, aantu otaya ka kala taya ipula kutya otashi vulika Jehova e ki idhimbike natango omithikampango dhe, noita ka ninga shoka a ti ota ka ninga monakuyiwa. Ihe katu na okukala tu na omalimbililo kombinga yaashoka. Molwaashoka Jehova okwa ninga shoka shi li pauyuuki, sho a yamba po Omwana omuholike, ota tu vulu okukala nuushili kutya ota ka ninga aluhe shoka shi li mondjila.

6. Omomukalo gumwe guni, ekuliloyambo tali holola ohole yaJehova? (1 Johannes 4:9, 10)

⁶ Nonando ekuliloyambo otali tu kwathele tu uve ko kutya Jehova omuyuuki, otali tu kwathele wo tu uve ko mpoka pu thike ohole ye. (Johannes 3:16; lesha 1 Johannes 4:9, 10.) Elongo lyekuliloyambo otali holola kutya Jehova  ina hala owala tu kale nomwenyo gwaana ehulilo, ihe okwa hala wo tu kale oshitopolwa shuukwanegumbo we. Tala kwaashika: Sho Adam a yono, ka li we oshitopolwa shuukwanegumbo waJehova ta wu mu longele. Oshizemo, atuheni otwa valwa kaatu li oshitopolwa shuukwanegumbo waKalunga. Ihe omolwekuliloyambo, Jehova oha dhimi po omayono getu, naantu ayehe mboka ye na eitaalo muye nohaya vulika kuye, ohaya ningi oshitopolwa shuukwanegumbo we. Nokuli nongashingeyi, otatu vulu okukala nekwatathano lyopothingo naJehova nosho wo noitaali ooyakwetu. Jehova oku tu hole shili. — Rom. 5:10, 11.

7. Ongiini okumona iihuna kwaJesus, ta ku tu kwathele tu uve ko kutya Jehova oku tu hole shi thike peni?

⁷ Otatu vulu okuuva ko nawa kutya Jehova oku tu hole shi thike peni, ngele otwa dhiladhila kwaashoka sha kwatelwa mo mekuliloyambo. Satana okwa ti kutya kapu na omupiya gwaKalunga ta vulu okukala omudhiginini kuye, uuna oshidhigu oku shi ninga. Opo a ulike kutya Satana omufundja, Jehova okwa li a etha Jesus a mone iihuna, manga inaa sa. (Job 2:1-5; 1 Pet. 2:21) Jehova okwa li a mono nkene Jesus ta shekwa kaapataneki yomalongelokalunga, ta dhengwa kaakwiita nokuyalelwa komuti gwomahepeko. Opo nduno Jehova okwa li a tala ko, sho Omwana omuholike ta si, eso tali uvitha omwenyo omutoye. (Mat. 27:28-31, 39) Molwaashoka Jehova oku na oonkondo, okwa li ta vulu okuya mo olunyala moshinima shoka. Pashiholelwa, sho aapataneki ya ti: “Ne [Kalunga] mu hupithe, ngele okwe mu hokwa,” Jehova okwa li ta vulu oku shi ninga. (Mat. 27:42, 43) Ihe ando Kalunga okwa yile mo olunyala, andola kaku na ekuliloyambo, nokatu na etegameno lyasha. Onkee ano Jehova okwa li a pitike Omwana, a idhidhimikile uuwehame, sigo a fudha mo omufudho gwe gwahugunina.

8. Mbela Jehova okwa li a uvu nayi, sho a mono omwana ta mono iihuna? Shi yelitha. (Tala wo ethano.)

⁸ Katu na okudhiladhila kutya molwaashoka Kalunga omunankondoawike, ke na omaiyuvo. Otwa shitwa oshifetha she, tu na omaiyuvo, onkene oshili pandunge okudhiladhila kutya naye oku na wo omaiyuvo. Ombiimbeli oya popi kutya Kalunga okwa li a ‘nika oluhodhi’ nokwa ‘geya.’ (Eps. 78:40, 41) Tala wo koshiholelwa shaAbraham naIsak. Jehova okwa li a lombwele Abraham a yambe po omwana oye awike. (Gen. 22:9-12; Heb. 11:17-19) Dhiladhila owala nkene Abraham tashi vulika a li e uvite, sho a li a ilongekidha okudhipaga po omwana. Dhiladhila nduno kuuwehame mboka Jehova naye a li e uvite, okutala sho Omwana ta hepekwa sigo omeso, kaalumentu aahenakalunga. Tala okavidio, Natu holeleni eitaalo lyawo — Abraham, Oshitopolwa 2, kepandja jw.org.

9. Oshike to vulu okwiilonga mAaroma ontopolwa 8:32, 38, 39, kombinga yohole yaJehova yoku ku hola nosho wo ooitaali ooyakwetu?

⁹ Ekuliloyambo otali tu longo kutya kapu na  ngoka e tu hole unene e vule Jehova, haakwanezimo yetu nenge kuume ketu kopothingo. (Lesha Aaroma 8:32, 38, 39.) Onkene kapu na omalimbililo kutya Jehova oku tu hole unene shi vulithe mpoka tu ihole mwene. Mbela owa hala okukala nomwenyo sigo aluhe? Jehova okwa halelela wu ka kale nomwenyo sigo aluhe. Mbela owa hala oondjo dhoye dhi dhimwe po? Jehova okwa halelela oku dhi dhima po. Shoka a tegelela kutse, okuulika olupandu omolwomagano gekuliloyambo, okukala tu na eitaalo muye nokuvulika kuye. Ekuliloyambo oli li shili omukalo moka Jehova e tu ulukila kutya oku tu hole unene. Nokuli nomuuyuni uupe, otatu ka ilonga oshindji kombinga yohole yaJehova. — Omuuv. 3:11.

SHOKA EKULILOYAMBO TALI TU LONGO KOMBINGA YAJESUS

10. (a) Omolwashike Jesus a li a gwililwa po omolweso lye? (b) Omomikalo dhini Jesus a yukipalitha edhina lyaJehova? (Tala wo oshimpungu “ Uudhiginini waJesus owa yukipalitha edhina lyaJehova.”)

¹⁰ Jesus okwa li unene e na ko nasha nokuyapulitha edhina lyaHe. (Joh. 14:31) Jesus okwa li a nika oluhodhi noonkondo, sho aantu taya dhiladhilile He muuwinayi, oshoka okwa li ta ka dhipagwa a fa omuntu ngoka inaa simaneka Kalunga. Nomolwaashono a galikana a ti: “Tate, ngele otashi vulika, oshitenga shika nashi pitilile ndje po.” (Mat. 26:39) Sho Jesus a kala omudhiginini kuJehova sigo omeso, kungawo okwa yukipalitha edhina lyaHe.

11. Jesus okwa ulike ngiini kutya okuhole aantu noonkondo? (Johannes 13:1)

¹¹ Ekuliloyambo ota li tu longo wo kutya Jesus oku na ko nasha lela naantu, unene tuu aalanduli ye. (Omayel. 8:31; lesha Johannes 13:1.) Pashiholelwa, Jesus okwa li e shi kutya iinima yimwe mbyoka e na okuninga pethimbo lyiilonga ye yokuuvitha kombanda yevi, otayi ka kala iidhigu noonkondo, unene tuu eso lye enyanyalithi. Ihe Jesus  okwa ningi iinima ayihe mbyoka iidhigu, oshoka okuhole aantu, ihe hamolwaashoka owala a pewa oshinakugwanithwa shoka kuJehova. Jesus okwa li a uvitha nomutima aguhe, a longo, nokuyakula yalwe. Nokuli nesiku a sa, okwa kutha ethimbo, opo a yoge oompadhi dhaayapostoli ye, oku ya lombwela oohapu odhindji tadhi hekeleke noku ya pa omalombwelo. (Joh. 13:12-15) Opo nduno manga e li komuti gwomahepeko, Jesus okwa longitha okathimbo okashona, a pe etegameno omukolokoshi ngoka a alelwa pamwe naye, nokulombwela gumwe, opo a sile yina oshimpwiyu. (Luk. 23:42, 43; Joh. 19:26, 27) Jesus ka li owala a ulike ohole ye yomuule okupitila meso lye, ihe okwe yi ulike wo mokukalamwenyo kwe akuhe kombanda yevi.

12. Ongiini Jesus ta tsikile nokuninga omaiyambo omolwetu?

¹² Odhoshili kutya Kristus okwa si “lumwe aluke,” ihe onkee ngaa ta tsikile nokuninga omaiyambo omolwetu. (Rom. 6:10) Ngiini mbela? Ota tsikile oku tu pa iinima oyindji iiwanawa, mbyoka ekuliloyambo lye shi ningitha tashi wapa tu yi mone. Tala kwaashoka a ipyakidhila nokuninga ngashingeyi. Ota longo e li Omukwaniilwa gwetu, Omuyambi Omunene nokuli omutse gwegongalo. (1 Kor. 15:25; Ef. 5:23; Heb. 2:17) Okwiipyakidhila niilonga yokugongela aagwayekwa nosho wo ongundu onene, oshilonga shoka tashi ka pwa omanga uudhigu uunene inaawu hula. b (Mat. 25:32; Mark. 13:27) Jesus oha shilipaleke wo kutya aapiya ye aadhiginini oya silwa oshimpwiyu nawa pambepo, momasiku ngaka ga hugunina. (Mat. 24:45) Naasho ta ka pangela uule woomvula eyuvi, ota ka tsikila oku tu ningila uuwanawa. Jehova okwa gandja shili Omwana omolwetu.

TSIKILA OKWIILONGA IINIMA IIPE

13. Ongiini okutedhatedha taku vulu oku ku kwathela, wu tsikile okwiilonga kombinga yohole ndjoka Kalunga naKristus ye tu ulukila?

¹³ Oto vulu okutsikila okwiilonga kombinga yohole ndjoka Jehova Kalunga naJesus Kristus ye tu ulukila, ngele owa tsikile nokutedhatedha kombinga yohole ndjoka. Omumvo nguka, pethimbo lyoomwedhi dhEdhimbuluko, oto vulu okulesha nuukeka limwe lyomOmavaangeli, nenge ge vulithe po. Ino kambadhala okulesha oontopolwa odhindji poshikando. Pehala lyaashono, enda kashona nokukonga omatompelo ga gwedhwa po kutya omolwashike tu na okukala tu hole Jehova nosho wo Jesus. Naashoka sha simana, kala ho lombwele yalwe kombinga yaashoka wa ilonga.

14. Metsokumwe nEpisalomi 119:97, ongiini okuninga omapekapeko taku vulu oku tu kwathela tu tsikile okwiilonga kombinga yekuliloyambo nosho wo kombinga yomalongo galwe? (Tala wo ethano.)

 ¹⁴ Ngele owa kala moshili uule womimvo odhindji, otashi vulika wu ipule ngele opu na iikundathanwa iipe mbyoka wa pumbwa okwiilonga, ngaashi uuyuuki waKalunga, ohole ye, nekuliloyambo. Uushili owo kutya inatu ngambekwa okwiilonga kombinga yiinima mbyoka nosho wo yilwe. Mbela oshike nduno to vulu okuninga? Kala ho lesha nokukonakona uuyelele uuwanawa mboka wa kankamena kOmbiimbeli, tawu adhika miileshomwa yetu. Uuna wa lesha oshinima mOmbiimbeli ihe ku shi uvite ko, ninga omapekapeko. Opo nduno momukokomoko gwesiku, tedhatedha kombinga yaashoka wa mono, naashoka tashi ku longo kombinga yaJehova, yOmwana nosho wo kombinga yohole yawo yoku ku hola. — Lesha Episalomi 119:97.

15. Omolwashike twa pumbwa okutsikila okukonga omaliko gomoMbiimbeli?

¹⁵ Ino teka omukumo ngele ino mona oshinima oshipe nenge shituntula, ethimbo kehe to lesha nenge to ningi omapekapeko. Kala wa fa omuntu ta kongo oshingoli. Olundji, omuntu ngoka ta kongo oshingoli, oha shi mu pula ethimbo olindji, nenge omasiku, manga inee shi mona. Iha si uunye, ihe oha tsikile noku shi konga, molwaashoka okatopolwa kehe koshingoli oke na ongushu kuye. Oshili yOmbiimbeli oyi na ondilo yi vule oshingoli. (Eps. 119:127; Omayel. 8:10) Onkene kala omwiidhidhimiki nokutsikila okulesha Ombiimbeli, ngaashi wa itulila po elandulathano. — Eps. 1:2.

16. Ongiini tatu vulu okuholela Jehova nosho wo Jesus?

¹⁶ Sho to konakona, konga omikalo nkene to vulu okutula miilonga shoka to ilongo. Pashiholelwa, oto vulu okuholela uuyuuki waJehova, mokuungaunga nayalwe nopwaa na okatongo. Oto vulu okuholela ohole yaJesus yokuhola He nosho wo yalwe, mokukala wu na ehalo lyokumona iihuna omolwedhina lyaJehova, nomokukwathelwa ooitaali ooyakwetu. Oto vulu wo okuholela Jesus, mokugandja uunzapo kuyalwe, opo nayo ya mone ompito yoku taamba ko omagano gaJehova ge na ondilo.

17. Oshike tatu ka kundathana moshitopolwa tashi landula?

¹⁷ Ngele otwa tsikile okwiilonga kombinga yekuliloyambo nokuulika olupandu, otatu ka kala tu hole unene Jehova nosho wo Omwana. Noshizemo, otaya ka kala wo ye tu hole unene. (Joh. 14:21; Jak. 4:8) Onkene natu longithe omasiloshimpwiyu gaJehova, tu tsikile okwiilonga kombinga yekuliloyambo. Moshitopolwa tashi landula, otatu ka kundathana omikalo dhimwe moka tatu vulu okumona mo uuwanawa mekuliloyambo, nankene tatu vulu okuulika olupandu omolwohole yaJehova.