1. Kunena aantu oyendji, ohaya gandja eitulomo kushike?

 MBELA owe shi ndhindhilika ngaa kutya aantu oyendji kunena ohaya kala owala taya lalakanene uuwanawa wawo yene? Pashiholelwa, oyendji ohaya ningi ngaashi taya vulu ya longithe omapandja gomakwatathano gopaintaneta, ya itumbaleke noya ulike shoka ya pondola. Nonando ongawo, aashona owala haya gandja esimano kuJehova Kalunga. Moshitopolwa shika, otatu ka kundathana kutya otashi ti shike okusimaneka Jehova nosho wo kutya oshike shi na oku tu inyengitha tu shi ninge. Otatu ka ilonga wo nkene tatu vulu okupa Kalunga esimano ndyoka a ilongela nosho wo nkene ta ka tumbalekitha edhina lye monakuyiwa yi li popepi.

OKUSIMANEKA JEHOVA OTASHI TI SHIKE?

2. Jehova okwa li a holola ngiini esimano lye pondundu Sinai? (Tala wo ethano.)

² Oshitya esimano otashi ti ngiini? PaMbiimbeli, oshitya shono otashi vulu okuukithwa koshinima kehe shoka tashi kumitha omuntu. Jehova okwa li a ulike esimano lye momukalo gwa dhenga mbanda, konima owala sho a hupitha oshigwana shaIsraeli muupika waEgipiti. Kala andola wa fa wu wete Aaisraeli omamiliyona, ya gongala popepi nondundu yaSinai ya pulakene shoka Kalunga te ya lombwele. Opo ye li po, oshikogo oshiluudhe osha siikile ondundu. Ohaluka, opwa holoka ekakamo lyevi enene, ndyoka lya endele pamwe nomulilo tagu ndwafuka mondundu, nolya kakamitha evi mpoka ya thikama, omanga omindundumo, oombadhi nosho wo ewi lyenkuma tali kugagana, oya uvika mombepo. (Eks. 19:16-18; 24:17; Eps. 68:8) Dhiladhila owala kutya Aaisraeli mbono oya li ya kumwa shi thike peni, sho Jehova a holola oonkondo dhe ndhoka tadhi ulike eadhimo lye.

3. Okupa Jehova esimano osha hala okutya shike?

 ³ Ongiini kombinga yetu? Mbela natse otatu vulu ngaa okusimanekitha Jehova? Eeno, otatu vulu. Omukalo gumwe moka tatu vulu oku mu simanekitha, omokulombwela yalwe kombinga yoonkondo dhe oonkumithi nosho wo yomaukwatya ge omawanawa. Ohatu simanekitha wo Jehova, uuna tatu mu pe olupandu omolwiinima mbyoka twa tompola kekwatho lye. (Jes. 26:12) Omukwaniilwa David okwa tula po oshiholelwa sha dhenga mbanda sha gumwe ngoka a gandja esimano kuJehova. Megalikano ndyono David a li a galikana komeho yoshigwana shaIsraeli, okwa lombwele Kalunga a ti: “Uunene owoye noonkondo odhoye, eadhimo nesimano nuuyelele owoye, oshoka iinima ayihe oyoye megulu nokombanda yevi.” Konima sho David a mana okugalikana, “oshigongi ashihe osha hambelele Omuwa.” — 1 Ondjal. 29:11, 20.

4. Mbela Jesus okwa li a simanekitha Jehova ngiini?

⁴ Sho Jesus a li kombanda yevi, okwa simanekitha He, mokulombwela aantu kutya oye he mu pe oonkondo sho ta longo iikumithalonga. (Mark. 5:18-20) Jesus okwa li wo a simanekitha He, Jehova, momukalo moka a li a popi kombinga ye nosho wo nkene a li a ungaunga nayalwe. Pompito yimwe, Jesus okwa li ta longo aantu mosinagoga. Mokati kaapulakeni ye omwa li omukiintu gumwe, ngoka a kala ta hepekwa kondemoni uule womimvo 18. Ondemoni oye mu ningitha a kale ta ende a andalala noonkondo, noka li nando ha vulu okuukilila. Omukiintu ngoka okwa li ta mono iihuna lela. Jesus okwa li e mu kenukile, e te mu lombwele newi lyohenda ta ti: “Owa aludhwa kuuvu woye.” Opo ihe Jesus okwe mu tenteke iikaha ye e ta ukilile nziya, nokwa “tameke okutanga Kalunga.” Omukiintu okwa li a pandula Jehova sho e mu aludha nosho wo sho e mu pe oonkondo. (Luk. 13:10-13) Omukiintu ngoka okwa li e na etompelo ewanawa lyokusimanekitha Jehova, natse wo otatu vulu okuninga sha faathana.

OSHIKE HASHI TU INYENGITHA TU SIMANEKITHE JEHOVA?

5. Otu na omatompelo geni gokusimanekitha Jehova?

⁵ Ohatu simanekitha Jehova, molwaashoka otwe mu lenga noonkondo. Otu na omatompelo ogendji goku mu simaneka. Jehova oku na oonkondo dha shiga ko, oshoka ye Omunankondoawike. (Eps. 96:4-7) Uunongo we kaawu shi okuyelekwa nasha, owi iwetikile miinima mbyoka a shita. Oye onzo yomwenyo, noye he tu pe kehe shimwe shoka twa pumbwa, tu kale tu na omwenyo. (Eh. 4:11) Jehova omuyapuki, nenge tu tye omudhiginini kutse. (Eh. 15:4) Kehe shimwe ha ningi, ohashi tompola noha gwanitha po aluhe omauvaneko ge. (Jos. 23:14) Itashi kumitha sho omuhunganeki Jeremia a popi kombinga yaJehova a ti: “Kaku na ngoka e ku fa mokati kaanandunge ayehe yomiigwana nenge mokati kaakwaniilwa yayo.” (Jer. 10:6, 7) Osha yela kutya otu na omatompelo omawanawa gokusimanekitha Tate yetu gwomegulu. Kakele owala kokusimaneka Jehova, otu mu hole wo.

6. Omolwashike tu hole Jehova?

⁶ Ohatu simanekitha Jehova, molwaashoka otu mu hole noonkondo. Natu ka taleni komaukwatya gaJehova gontumba, ngoka hage tu ningitha tu kale tu mu hole. Ye omunahenda nomunahole. (Eps. 103:13; Jes. 49:15) Oha kala e tu uvitile uukwawo wanankali, nuuna tu uvite nayi, naye oha kala e uvite nayi. Okwe shi ningitha oshipu kutse tu hedhe popepi naye, e li Kuume ketu. (Eps. 25:14; Iil. 17:27) Shimwe ishewe, Jehova omwiifupipiki, oshoka “oha nyongama, a tale egulu nokombanda yevi. Ota kutha mo ohepele montsi yevi.” (Eps. 113:6, 7) Omolwomatompelo agehe ngono, otatu vulu okuhokolola, nenge tu tye okusimanekitha Kalunga ketu omunene. — Eps. 86:12.

7. Otu na ompito yini ya ikalekelwa?

⁷ Ohatu simanekitha Jehova, molwaashoka otwa hala yalwe ye mu tseye. Aantu oyendji kaye shi oshili kombinga yaJehova. Omolwashike  mbela? Oshoka omadhiladhilo gawo oga pukithwa kuSatana, mokutaandelitha iifundja iitokele kombinga yaJehova. (2 Kor. 4:4) Satana okwa ningitha aantu ya itaale kutya Jehova oku na onyanya, noye ha etitha okumona iihuna akuhe muuyuni. Ihe tse otu shi oshili kombinga yaKalunga ketu. Otu na ompito yokwaaneka pomutenya iifundja yaSatana, shono tashi ka simanekitha Kalunga. (Jes. 43:10) Episalomi 96 otali popi kombinga yokupa Jehova esimano. Sho tatu kundathana oohapu dhimwe dha kankamena kEpisalomi 96, dhiladhila kombinga yomikalo nkene to vulu okupa Jehova esimano ndyoka a ilongela.

ONGIINI TATU VULU OKUPA JEHOVA ESIMANO NDYOKA A ILONGELA?

8. Omomukalo gumwe guni tatu vulu okusimanekitha Jehova? (Episalomi 96:1-3)

⁸ Lesha Episalomi 96:1-3. Otatu vulu okusimanekitha Jehova, mwaashoka hatu popi kombinga ye. Oshigwana shaJehova otashi lombwelwa moovelise ndhono kutya “imbileni Omuwa” ne mú “mu simaneke,” “hokololeni esiku kehe elaka etoye kutya okwe tu hupitha” nosho wo kutya “uvithileni iigwana esimano lye.” Omikalo adhihe ndhoka otatu vulu oku dhi longitha tu simaneke Tate yetu gwomegulu. Aajuda aadhiginini nAakriste yomethelemumvo lyotango, kaya li ya kakadhala okulombwela yalwe kombinga yiinima iiwanawa mbyoka Jehova e ya ningila nosho wo okupopila edhina lye. (Dan. 3:16-18; Iil. 4:29) Ongiini natse tatu vulu okuninga oshinima sha faathana?

9-10. Oshike to ilongo moshimoniwa shaAngelena? (Tala wo ethano.)

⁹ Natu ka taleni koshimoniwa shomumwameme Angelena, a ngoka ha kala moAmerika. Okwa li a popile nuulaadhi edhina lyaJehova kiilonga. Sho Angelena opo a kutwa miilonga, okwa li a pulwa a hokolole paufupi kombinga yondjokonona ye, opamwe naaniilonga yalwe aape ooyakwawo mboka, opo ya kutwa mehangano lyawo. Angelena okwa longitha omathano paufupi a ulike enyanyu ndyoka a mona mokulongela Jehova. Omanga Angelena ina tameka okupopya, omumati gumwe, omuniilonga pamwe naye okwa ti kutya naye okwa putudhwa e li Onzapo yaJehova. Okwa tameke okupopila muuwinayi Oonzapo dhaJehova nosho wo shoka dha itaala. Angelena okwa ti: “Omutima gwandje ogwa li tagu tuna kuumbanda. Ihe ondi ipopile nda ti: ‘Mbela otandi ka etha gumwe a popye iifundja kombinga yaJehova? Nenge otandi ka popila edhina lyaJehova?’”

¹⁰ Konima sho omuniilonga pamwe naye a  mana okupopya, Angelena okwa galikana paufupi momwenyo. Okwa li a popi nomuniilonga ngoka a ngungumana a ti: “Eputuko lyoye nolyandje olya faathana. Nangaye okuza kuunona wandje onda putudhwa ndi li Onzapo yaJehova, nondi li natango melongelokalunga ndyoka sigo okunena.” Nonando oompata odha li dha kwata miiti, Angelena okwa popi a ngungumana, ta ulike omathano ge nookuume ke, ya nyanyukwa sho taya longele Jehova. Konima yaashono, okwa yelithile aaniilonga pamwe naye eitaalo lye nesimaneko. (1 Pet. 3:15) Mbela shono osha eta iizemo yini? Sho Angelena a mana okupopya, omumati ngono gomuniilonga pamwe naye okwa li a ngungumana. Omumati ngoka okwa li nokuli a dhimbulukwa iimoniwa iiwanawa yontumba mbyoka a tyapula pethimbo sho ta koko e li Onzapo yaJehova. Angelena okwa ti: “Katu na okweetha edhina lyaJehova tali popilwa muuwinayi. Oshi li uuthembahenda okupopila edhina lye.” Natse wo otu na uuthembahenda wokutanga nokusimanekitha Jehova, uuna yalwe taye mu sheke.

11. Mondjokonona ayihe,A aalongelikalunga yashili oya kala ngiini taya landula ekotampango ndyoka tali adhika mEpisalomi 96:8?

¹¹ Lesha Episalomi 96:8: Otatu vulu okusimanekitha Jehova, mokulongitha iiniwe yetu. Aalongelikalunga yashili oya kala nokusimaneka Jehova momukalo gwa tya ngaaka. (Omayel. 3:9) Pashiholelwa, Aaisraeli oya li ya longitha iiniwe yawo, ya ambidhidhe iilonga yokutunga otempeli noku yi kaleka monkalo ombwanawa. (2 Aak. 12:4, 5; 1 Ondjal. 29:3-9) Aalongwa yaKristus yamwe, oya li ye mu yakula pamwe naayapostoli ye taya “longitha iiniwe yawo.” (Luk. 8:1-3) Aakriste yomethelemumvo lyotango oya li wo ya ambidhidha aamwahe yopambepo, moku ya pa iikwatha. (Iil. 11:27-29) Kunena, otatu vulu wo okusimanekitha Jehova, mokugandja omayambidhidho nehalo ewanawa.

12. Omayambidhidho getu otaga vulu ngiini okusimanekitha Jehova? (Tala wo ethano.)

¹² Natu ka taleni koshimoniwa shimwe shoka tashi ulike nkene omayambidhidho getu haga simanekitha Jehova. Momumvo 2020, otaku hokololwa kutya moZimbabwe omwa kala mu na oshikukuta uule wethimbo ele. Omolwoshikukuta shono, aantu ye vulithe pomiliyona yimwe oya li taya vulu okusa kondjala, mwa kwatelwa omumwameme Prisca. Nonando onkalo oya li itaayi nuwa omeya, omumwameme Prisca okwa tsikile nokuuvitha Etitatu nEtitano kehe ngaashi shito, nokuli nopethimbo lyoondima. Aashiinda oya li ye mu sheke sho hayi miilonga yokuuvitha, pehala lyokulonga mepya, taya ti: “Oto ka sa kondjala.” Prisca okwa li he ya yamukula  nomukumo ta ti: “Jehova ke na esiku a ethe aapiya ye.” Inapu pita ethimbo ele okuza sho shoka sha ningwa, okwa li a pewa iikwatha okuza kehangano lyOonzapo dhaJehova. Omolwomayambidhidho ngoka hatu gandja, Prisca okwa li a vulu okupewa iikulya niipumbiwa yilwe. Aashiinda she oya li ya kumwa, noye mu lombwele ya ti: “Kalunga ine ku etha nando, onkee natse otwa hala okwiilonga oshindji kombinga ye.” Aashiinda ye yaheyali oya tameke okukala haya gongala.

13. Eihumbato lyetu otali vulu ngiini okusimanekitha Jehova? (Episalomi 96:9)

¹³ Lesha Episalomi 96:9. Eihumbato lyetu otali vulu okusimanekitha Jehova. Aapristeli mboka ya li haya longo motempeli yaJehova, oya li ye na okukala ya yela palutu. (Eks. 40:30-32) Kakele owala kuuyogoki wopalutu, osha simana okukala tu na eihumbato lya yogoka. (Eps. 24:3, 4; 1 Pet. 1:15, 16) Otwa pumbwa okulonga nuudhiginini tu ‘ihule omuntu omukulu,’ ano iikala ya nyata neihumbato ewinayi, e tatu “zala omuntu omupe,” shono sha hala okutya, okudhiladhila nokukatuka momukalo ngoka tagu ulike kutya otatu holele eadhimo lyaJehova nosho wo omaukwatya ge omawanawa. (Kol. 3:9, 10) Kekwatho lye, nokuli noohandimwe mboka onkalamwenyo yawo inaayi yogoka noye hole elongithonkondo otaya vulu okulundulula nokuzala omuntu omupe.

14. Oshike to ilongo moshimoniwa shaJack? (Tala wo ethano.)

¹⁴ Natu ka taleni koshimoniwa shaJack, omulumentu ngoka a li e hole elongithonkondo nokwa nika oshiponga. Okwa li a tseyika nawa noshilukadhina Ondemoni. Omolwomiyonena ndhoka a longa, Jack okwa li a tokolelwa eso. Ihe manga a tegelela oku ka dhipagwa, Jack okwa tameke okukonakona Ombiimbeli nomumwatate ngoka a li e ya okutalela po ondholongo moka a li. Nonando onkalamwenyo ye oya li ombwiinayi, Jack okwa ihula omuntu omuntu omukulu nolwanima okwa kala a gwana okuninginithwa. Jack okwa li a lundulula iikala ye noonkondo, naasho esiku e na okudhipagwa lya thiki, aapolisi yamwe oya li taya lili, sho taye mu laleke a ka dhipagwe. Shisande gwopolisi ngoka ha longo naanandholongo okwa ti: “Sho Jack e ya mondholongo, oye a li a nika oshiponga e vulithe aanandholongo ayehe. Ihe ngashingeyi ito mu pewa komuntu, oye e vule aanandholongo ayehe mokulonga uuwanawa.” Konima owala yoshiwike shimwe sho Jack a dhipagwa, aamwatate mboka ya li ye ya okuninga okugongala oshiwike sha landula ko mondholongo, oya li ya tsakanene po nomunandholongo  gumwe ngoka, opo te ya kokugongala oshikando shotango. Oshike she mu inyengitha e ye kokugongala? Okwa li a kumwa komalunduluko ngoka Jack a ninga, naashono oshe mu ningitha a kale a hala okutseya shoka a pumbwa okuninga, a longele Jehova. Osha yela kutya eihumbato lyetu otali vulu okusimanekitha tate yetu gwomegulu. — 1 Pet. 2:12.

MASIKU JEHOVA OTA KA SIMANEKITHA NGIINI EDHINA LYE?

15. Masiku Jehova ota ka simanekitha ngiini thiluthilu edhina lye? (Episalomi 96:10-13)

¹⁵ Lesha Episalomi 96:10-13. Oovelise dha hugunina dhEpisalomi 96, otadhi popi Jehova e li Omupanguli omuuyuuki nOmukwaniilwa. Masiku Jehova ota ka simanekitha ngiini edhina lye? Okupitila mokupangula kwe. Masiku ota ka hanagula po Babiloni Oshinene, sho sha kala nokunyateka edhina lye eyapuki. (Eh. 17:5, 16; 19:1, 2) Yamwe mboka taya ka mona ehanagulo lyaBabiloni Oshinene, otashi vulika ye ku tu wayimine melongelokalunga lyashili. Hugunina, piita yaArmagedon, Jehova ota ka hanagula po onkalelo ayihe yiinima yaSatana, nokuhulitha po mboka ye li ompinge naye nohaya sheke edhina lye, ihe ota ka hupitha ayehe mboka ye mu hole, haya vulika kuye noye uvite etumba sho taya simanekitha edhina lye. (Mark. 8:38; 2 Tes. 1:6-10) Konima yaashoka tashi ka landula Elelo lyaKristus lyOmimvo Eyuvi, Jehova ota ka kala a yapulitha thiluthilu edhina lye. (Eh. 20:7-10) Pethimbo ndyono, “evi otali ku udha okutseya esimano lyOmuwa, ngaashi omafuta gu udha omeya.” — Hab. 2:14.

16. Owa tokola toko okuninga shike? (Tala wo ethano.)

¹⁶ Otashi ka kala shi nyanyudha sho kehe gumwe ngoka e na omwenyo ta ka gandja esimano kuJehova ngaashi e shi ilongela! Ihe manga esiku ndyono inaali thika, otatu vulu okulongitha ompito kehe tu simanekithe Kalunga ketu. Opo Olutuwiliki lu tse omuthindo oshinima shino sha simana, olwa hogolola Episalomi 96:8 li kale Enyolo lyomumvo 2025, ndyoka tali ti: ‘Peni edhina lyaJehova esimano ngaashi e shi ilongela.’