OSHITOPOLWA SHOKUKONAKONWA 3
EIMBILO 35 ‘Kaleni mu na owino yokuyoolola iinima mbyoka yi na oshilonga unene’
Ninga omatokolo ngoka taga nyanyudha Jehova
“Etilo Kalunga olyo ekota lyowino, nokutseya Omuyapuki, okwo uunongo wo wene.” — OMAYEL. 9:10.
SHOKA TATU KA ILONGA
Otatu ka tala nkene tatu vulu okulongitha ontseyo yetu, euvoko noondunge dhetu dhokuyoolola tu ninge omatokolo gopandunge.
1. Atuheni ohatu iyadha meshongo lini?
OHATU kala twa pumbwa okuninga omatokolo esiku kehe. Gamwe omapu okuninga. Ngaashi okutokola kutya oto ka lya shike poshuumbululwa nosho wo kutya oto ka lala pongapi. Ihe opu na omatokolo gamwe ngoka haga kala omadhigu lela okuninga. Gamwe otaga vulu okuguma uukolele wetu, enyanyu lyetu, aantu mboka tu hole, nenge okulongela kwetu Kalunga. Otwa hala omatokolo getu, ge tu etele uuwanawa mwa kwatelwa aantu yaandjetu. Ihe shoka sha simanenena, otwa hala okuninga omatokolo ngoka taga nyanyudha Jehova. — Rom. 12:1, 2.
2. Oonkatu dhini tadhi ke ku kwathela wu ninge omatokolo gopandunge?
2 Otashi vulika wu ninge omatokolo gopandunge ngele (1) owu na uushili moshinima, (2) ngele oto dhiladhila nkene Jehova a tala ko oshinima shoka noshi (3) owa tala nawa omahogololo ngoka wu na okuninga. Oshitopolwa shika otashi ka kundathana oonkatu ndhoka. Otashi ke tu kwathela wo tu mone nkene tatu vulu okukala noondunge dhokuyoolola. — Omayel. 2:11.
KALA WU NA UUSHILI MOSHINIMA
3. Yelitha kutya omolwashike wa pumbwa okukala wu na uushili moshinima shontumba, manga inoo ninga etokolo?
3 Okukala wu na uushili moshinima, okwo onkatu yotango yokuninga etokolo ewanawa. Omolwashike okukala wu na uushili moshinima kwa simana? Natu tye andola omuvu okwa yi a ka mone ndohotola, molwaashoka e na uuvu wontumba wa kwata miiti. Mbela ndohotola ote ke mu nyolela omiti ndhoka e na okulongitha nopwaana oku mu konakona, nenge oku mu pulapula? Hasho nando. Nangoye oto ka ninga wo omatokolo ge li nawa, ngele owa mono uushili wu na ko nasha naashoka wu na okuninga. Mbela shoka oto ke shi enda ngiini?
4. Metsokumwe nOmayeletumbulo 18:13, oto ka shilipaleka ngiini kutya owu na uushili kombinga yoshinima? (Tala wo ethano.)
4 Olundji ohatu vulu okumona uushili moshinima, mokupula omapulo. Natu tye andola owa hiywa kokatuthi kontumba. Mbela oto ka ya ko? Ngele ngoka e ku hiya ku mu shi nawa nenge omalongekidho ngoka a ninga, owa pumbwa oku mu pula omapulo ngaashi openi nuunake okatuthi taka ka ningwa? Otapu ka kala aantu ye thike peni? Olye ta ka tula po elandulathano? Oolye taya ka kala po? Omainyanyudho geni taga ka kala po? Mbela otapu ka kala iikolitha? Omayamukulo komapulo ngoka otage ke ku kwathela wu ninge etokolo lyopandunge. — Lesha Omayeletumbulo 18:13.
Konga uuyelele moshinima mokupula omapulo (Tala okatendo 4) a
5. Mbela oshike wu na okuninga konima ngele wa mono uushili moshinima?
5 Konima ngele wa mono uushili moshinima, dhiladhila nuukeka kombinga yethano lyaashihe shoka sha kwatelwa mo. Pashiholelwa, ongiini ngele owa uvu kutya otapu ka kala aantu mboka inaaya simaneka omakotampango gOmbiimbeli nosho wo kutya omalovu otaga ka nuwa oshimwenekepo? Mbela owu wete okatuthi hoka tashi vulika kaka hulile muufukedhi nenge tu tye meihumbato lya nyata? (1 Pet. 4:3) Shimwe ishewe, ongiini ngele ethimbo ndyoka okatuthi taka ka ningwa otali ke ku imba wu ye kokugongala nenge miilonga yokuuvitha? Uuna wa mono ethano lyaashihe shoka sha kwatelwa mo, otashi ke ku kwathela wu ninge etokolo ewanawa. Ihe opu na onkatu yilwe natango ndjoka wu na okukatuka. Ngashingeyi owu na ethano lyaashihe shoka sha kwatelwa mo. Ihe mbela Jehova oku uvitile ngiini okatuthi hono? — Omayel. 2:6.
KALA WU NA ETALOKO LYAJEHOVA
6. Ngaashi sha popiwa muJakob 1:5, omolwashike tu na okugalikana kuJehova e tu kwathele?
6 Pula Jehova e ku kwathele wu uve ko oshinima shoka. Jehova okwa uvaneka kutya ote ke tu pa uunongo tu yoolole ngele okuninga oshinima shontumba otashi ke mu nyanyudha. Ombiimbeli otayi ti: “oha pe ayehe nopwaa na omanyenyeto,” uunongo mboka. — Lesha Jakob 1:5.
7. Ongiini to vulu okukala wu na etaloko lya fa lyaJehova moshinima shontumba? Shi thaneka.
7 Konima ngele wa galikana kuJehova e ku pe ewiliko, gandja eitulomo kunkene ta yamukula omagalikano goye. Natu shi thaneke ngeyi: Natu tye andola owu li molweendo e to kana. Otashi vulika wu pule ekwatho kugumwe gwomoshitopolwa moka. Mbela oto ke mu thiga po manga inee ku kwathela? Hasho nando. Oto ka pulakena kwaashoka te ku lombwele. Sha faathana, konima ngele wa pula uunongo kuJehova, kambadhala okumona eyamukulo Lye mokukonga oompango dhOmbiimbeli nomakotampango ngoka taga opalele onkalo yoye. Pashiholelwa, uuna to tokola ngele oto yi kokatuthi hoka ka popiwa metetekelo, otashi vulika wa pumbwa okutala shoka Ombiimbeli tayi ti kombinga yiituthi yi na eihumbato lya nyata, yeendathano ewinayi nompumbwe yokupititha komeho Uukwaniilwa, pehala lyiinima yoye mwene. — Mat. 6:33; Rom. 13:13; 1 Kor. 15:33.
8. Oshike to vulu okuninga, ngele owa pumbwa ekwatho wu mone uuyelele mboka to kongo? (Tala wo ethano.)
8 Natango, omathimbo gamwe otashi vulika wu kale wa pumbwa ekwatho opo wu mone uuyelele mboka to kongo. Otashi vulika wu pewe omayele komumwatate nenge komumwameme a pyokoka. Ihe oto vulu wo okumona uuwanawa mokuninga omapekapeko kungoye mwene. Opu na uuyelele owundji mboka tawu vulu oku tu kwathela, tawu adhika mEmbo lyokukonga uuyelele lyOonzapo dhaJehova, nosho wo membo Omanyolo ngoka tage tu kwathele tu longele Jehova. Dhimbulukwa kutya elalakano lyoye, okuninga etokolo ndyoka tali ka nyanyudha Jehova.
Dhiladhila nkene Jehova a tala ko oshinima shoka (Tala okatendo 8) b
9. Ongiini tatu vulu okukala nuushili kutya etokolo lyetu otali ka nyanyudha Jehova? (Aaefeso 5:17)
9 Ongiini tatu vulu okukala nuushili kutya etokolo lyetu otali ka nyanyudha Jehova? Tango, otwa pumbwa oku mu tseya nawa. Ombiimbeli otayi ti: “Okutseya Omuyapuki okwo uunongo wo wene.” (Omayel. 9:10) Eeno, ontseyo yashili ohayi zi mokukala tu shi omaukwatya gaJehova, elalakano lye, shoka e hole naashoka e tonde. Ipula ngeyi, ‘Sha ikolelela kwaashoka ndi shi kombinga yaJehova, mbela etokolo ndyoka tandi ka ninga ota li ke mu nyanyudha ngaa?’ — Lesha Aaefeso 5:17.
10. Omolwashike omakotampango gOmbiimbeli ga simanenena ge vule omuthigululwakalo nenge eputuko?
10 Opo tu nyanyudhe Jehova, omathimbo gamwe otu na okuuvitha nayi mboka yopopepi natse. Pashiholelwa, aavali yamwe mboka ye na omainyengotompelo omawanawa, otashi vulika ya thiminike omwanakadhona a hokanwe komulumentu omuyamba, nenge ngoka ta vulu okuya pa iigonda oyindji lela, nonando ite shi enditha nawa pambepo. Odhoshili kutya oya hala omwanakadhona a silwe oshimpwiyu painiwe, ihe mbela olye te ke mu kwathela a kale e na ekwatathano lya kola naJehova? Mbela Jehova okwa tala ko ngiini oshinima shono? Eyamukulo otatu li adha muMateus 6:33. Movelise ndjoka, Aakriste otaya ladhipikwa ya tsikile “okupititha komeho Uukwaniilwa.” Nonando ohatu simaneke aavali yetu, naantu mboka ye li moshitopolwa shetu, shoka sha simanenena kutse okunyanyudha Jehova.
TALA NAWA OMAHOGOLOLO NGOKA WU NA OKUNINGA
11. Uukwatya wuni wa popiwa mAafilippi 1:9, 10, mboka tawu ke ku kwathela wu tale nawa omahogololo ngoka wu na okuninga?
11 Konima ngele wa mono omakotampango gOmbiimbeli ngoka ga kwatelwa mo metokolo lyoye, owa pumbwa okudhiladhila nuukeka kombinga yomahogololo goye. (Lesha Aafilippi 1:9, 10.) Oondunge dhokuyoolola otadhi ke ku kwathela wu mone iizemo yehogololo kehe tashi vulika wu ninge. Omathimbo gamwe, otashi vulika shi kale oshipu okuninga etokolo lyontumba. Ihe hamatokolo agehe haga kala omapu okuninga. Oondunge dhokuyoolola otadhi ke ku kwathela wu ninge omatokolo gopandunge nokuli nomoonkalo oondhigu.
12-13. Ongiini oondunge dhokuyoolola tadhi vulu oku ku kwathela wu ninge etokolo lyopandunge li na ko nasha niilonga yokwiikongela omboloto?
12 Tala konkalo tayi landula. Natu tye andola oto kongo iilonga wu kwathele yaandjeni. Opu na oompito mbali dhiilonga. Owa talulula ashihe shoka sha kwatelwa mo, ngaashi iilonga oyoludhi luni, elandulathano, otashi pula ethimbo li thike peni opo wu thike kiilonga nosho tuu. Oompito adhihe ndhono dhiilonga odho opalela Aakriste. Otashi vulika wu hogolole po ompito yimwe yiilonga molwaashoka owu hole oludhi lwiilonga mbyoka nondjambi oyi li nawa lela. Nonando ongawo, opu na iinima yimwe mbyoka wa pumbwa okutala kuyo manga inoo ninga etokolo.
13 Mbela iilonga ayihe mbyoka otayi kaya moshipala elandulathano lyoye lyokuya kokugongala? Mbela otayi ka mana po ethimbo ndyoka wu na okulongitha wu sile oshimpwiyu yaandjeni pamaiyuvo nosho wo pambepo? Okupula omapulo ga tya ngaaka otashi ke ku kwathela wu pitithe komeho iinima mbyoka yi na oshilonga, ano okulongela Jehova nosho wo okugwanitha po oompumbwe dhaanegumbo lyoye pehala lyokulonga oshimaliwa oshindji. Opo nduno oto vulu okuninga etokolo ndyoka Jehova ta ka yambeka.
14. Ongiini okulongitha oondunge dhokuyoolola nokuulika ohole haku tu kwathele tu yande okupundukitha yalwe?
14 Oondunge dhokuyoolola ohadhi tu kwathele wo tu dhiladhile nkene etokolo lyetu tali vulu okuguma yalwe, opo tu yande ‘okupundukitha yalwe.’ (Fil. 1:10) Shoka osha simana uuna tatu ningi omatokolo gopaumwene, ngaashi okuzala nokwiiyopaleka. Pashiholelwa, otashi vulika tu hole okuzala nokwiiyopaleka momukalo gwontumba. Ongiini ngele otashi ka pundukitha yalwe meni nokondje yegongalo? Oondunge dhokuyoolola otadhi ke tu kwathela tu simaneke omaiyuvo gawo. Ohole otayi ke tu inyengitha tu lalakanene shoka tashi “opalele mukwawo” nokukala tu na ondjele. (1 Kor. 10:23, 24, 32; 1 Tim. 2:9, 10) Opo nduno otatu ka ninga etokolo ndyoka tali ulike kutya otu hole notwa simaneka yalwe.
15. Oshike wa pumbwa okudhiladhila kombinga yasho manga inoo ninga etokolo lya simana?
15 Ngele oto ningi etokolo lya simana, dhiladhila kwaashoka sha kwatelwa mo, opo wu li tule miilonga. Jesus okwe tu longa tu ‘yalule iitungitho.’ (Luk. 14:28) Dhiladhila ethimbo ndyoka lya kwatela mo, iiniwe noonkambadhala ndhoka wa pumbwa okuninga, opo wu ninge etokolo ndyoka. Poompito dhimwe, otashi vulika wa pumbwa okupula yaandjeni wu mone kutya oshike ya pumbwa okuninga, opo ya ambidhidhe etokolo ndyoka. Omolwashike shoka sha simana? Otashi ke ku kwathela wu mone ngele owa pumbwa okuninga omalunduluko, nenge ehogololo limwe oli li hwepo. Nongele owa kwatele mo yaandjeni nokupulakena komaetopo gawo, otaya ka kala ya halelela oku ku kwathela wu ninge etokolo ndyoka tali ka pondola. — Omayel. 15:22.
NINGA ETOKOLO NDYOKA TALI KA PONDOLA
16. Oonkatu dhini tadhi ke ku kwathela wu pondole mokuninga omatokolo? (Tala wo oshimpungu, “ Nkene wu na okuninga omatokolo gopandunge.”)
16 Ngele owa landula oonkatu adhihe ndhoka dha popiwa metetekelo, otashi ulike kutya owa ilongekidha okuninga etokolo lyopandunge. Owa mona uuyelele nokukonakona omakotampango ngoka tage ku kwathele wu ninge etokolo ndyoka tali nyanyudha Jehova. Ngashingeyi oto vulu okupula Jehova e ku kwathele wu pondole mokuninga etokolo lyoye.
17. Oshinima shini shokondandalunde tashi ke ku kwathela wu ninge omatokolo omawanawa?
17 Nonando owa pondola okuninga omatokolo ogendji monakuziwa, dhimbulukwa kutya oshinima shokondandalunde shoka tashi ke ku kwathela wu ninge omatokolo omawanawa, okwiinekela muunongo mboka hawu zi kuJehova, pehala lyokwiinekela moondunge dhetu yene nenge mowino ndjoka tu na. Oye owala ta vulu oku ku pa ontseyo yashili, euvoko noondunge dhokuyoolola, iinima mbyoka yi li iitopolwa ya simanenena yuunongo. (Omayel. 2:1-5) Jehova ota vulu oku ku kwathela wu ninge omatokolo ngoka tage mu nyanyudha. — Eps. 23:2, 3
EIMBILO 28 Okukala kuume kaJehova
