1. Oshike tu na okuninga opo tu nyanyudhe Jehova?

 NATU tye andola owa pe gumwe ngoka wu hole omagano ga ikalekelwa omawanawalela nota vulu oku ga longitha. Oto ka kala wu uvite nayi ngele omuntu ngoka okwa pungula omagano ngoka. Ihe, oto ka kala wa nyanyukwa ngele omuntu ngoka okwe ga longitha nawa nokuulika kutya okwa pandula sho we ge mu pe. Oshitsa oshini? Jehova okwa gandja Omwana gwe e tu sile omolwetu. Jehova ota ka kala a nyanyukwa, ngele otu ulike olupandu omolwomagano ngoka ge na ondilo nosho wo ohole ye ndjoka ye mu inyengitha e tu pe ekuliloyambo. — Joh. 3:16; Rom. 5:7, 8.

2. Oshike tatu ka kundathana moshitopolwa shika?

² Mokweendela ko kwethimbo, otashi vulika kaatu kale we twa lenga omagano gekuliloyambo. Otatu ka kala twa fa twa pungula omagano gaKalunga. Otwa nyanyukwa okukala tu ga na, ihe ngele otwe ga pungula itatu ka dhiladhila kombinga yago. Opo kaatu ethe shoka shi tu ningilwe, otwa pumbwa okuulika olupandu pandjigilile kwaashihe shoka Kalunga naKristus ye tu ningila. Oshitopolwa shika otashi ke tu kwathela tu ninge ngaaka. Otatu ka kundathana nkene tatu vulu okumona mo uuwanawa mekuliloyambo ngashingeyi nosho wo nkene tatu vulu oku ka mona mo uuwanawa monakuyiwa. Otatu ka kundathana wo nkene tatu vulu okuulika olupandu omolwohole yaJehova, unene tuu pethimbo ndika lyoomwedhi dhEdhimbuluko.

NKENE HATU MONO MO UUWANAWA NGASHINGEYI

3. Omomukalo gumwe guni hatu mono mo uuwanawa ngashingeyi mekuliloyambo?

³ Otatu mono mo nale uuwanawa mekuliloyambo lyaKristus. Pashiholelwa, omolwekuliloyambo Jehova oha dhimi po oondjo dhetu. Ihe shi ningi molwaashoka a pumbwa oku tu dhimina po,  ihe ohe shi ningi molwaashoka a hala oku shi ninga. Omupisalomi okwa li a holola olupandu lwe, sho a imbi a ti: “Omuwa, ongoye omunalukeno noho tu dhimine po.” — Eps. 86:5; 103:3, 10-13.

4. Jehova okwa gandja ekuliloyambo omolwoolye? (Lukas 5:32; 1 Timoteus 1:15)

⁴ Yamwe otashi vulika ya kale ye uvite kaaye na oshilonga noye uvite inaaya gwana okudhiminwa po kuJehova. Odhoshili kutya atuheni inatu gwana okudhiminwa po. Omuyapostoli Paulus okwa li e uvite kutya “ina gwana okwiithanwa omuyapostoli.” Natango okwa li ishewe a gwedha ko a ti: “Omolwesilohenda lyaKalunga ngame ondi li ngaashi ndi li.” (1 Kor. 15:9, 10) Uuna twa iyele ombedhi omolwomayono getu, Jehova ohe tu dhimine po. Omolwashike mbela? Hamolwaashoka twa gwana oku shi pewa, ihe omolwashoka e tu hole. Ngele oto kondjo nomaiyuvo gokukala wu uvite waa na oshilonga, dhimbulukwa kutya Jehova ina gandja ekuliloyambo kaayuuki, ihe okaayoni mboka ya itedhulula. — Lesha Lukas 5:32; 1 Timoteus 1:15.

5. Mbela Jehova okwa pumbwa okuulikila kehe gumwe gwomutse ohenda ye? Shi yelitha.

⁵ Kapu na gumwe gwomutse e na okukala e uvite kutya Jehova ote ke tu dhimina po, molwaashoka otwe mu longela omimvo odhindji. Odhoshili kutya Jehova ohe tu pandula omoluudhiginini wetu. (Heb. 6:10) Okwa gandja ekuliloyambo oshali, ihe hamolwoku tu futa sho tatu mu longele. Andola otwa li tatu dhiladhila kutya otwa silwa ohenda nenge tatu ungaungiwa natse momukalo gwa ikalekelwa, kungawo otwa fa tatu ti Kristus ka li e na okusa omolwetu. — Yelekanitha Aagalati 2:21.

6. Omolwashike Paulus a li a longo nuudhiginini miilonga yaJehova?

⁶ Paulus okwa li e shi kutya Jehova ina gwana oku mu dhimina po. Mbela omolwashike nduno a li a longo nuudhiginini miilonga yaJehova? Ine shi ninga andola a ulike kutya okwa gwana oku shi pewa, ihe okuulike olupandu omolwesilohenda lyaJehova. (Ef. 3:7) Ngaashi Paulus, ohatu tsikile okulongela Jehova nuulaadhi, hamolwaasho twa hala okumona esilohenda lye, ihe otu ulike olupandu omolwalyo.

7. Omomukalo gumwe guni ishewe hatu mono mo uuwanawa mekuliloyambo ngashingeyi? (Aaroma 5:1; Jakob 2:23)

⁷ Omukalo gumwe ishewe tatu vulu okumona mo uuwanawa mekuliloyambo ngashingeyi ogwo, otatu vulu okukala tu na ekwatathano lyopothingo naJehova. a Ngaashi sha popiwa moshitopolwa sha zi ko, sho twa valwa katwa li tu na ekwatathano naKalunga. Ihe omolwekuliloyambo, otatu vulu okukala tu na “ombili naKalunga” notatu vulu okuhedha popepi naye. — Lesha Aaroma 5:1; Jakob 2:23.

8. Omolwashike twa pumbwa okupandula Jehova omolwuuthembahenda wegalikano?

⁸ Ohatu ulike kutya otu na ekwatathano lya kola naJehova okupitila megalikano. Jehova iha uvu owala omagalikano gomontaneho gaantu ye mboka ya gongala pamwe, ihe oha uvu wo omagalikano ga kehe gumwe pauhandimwe. Uuna tatu galikana, ihatu kala we tu uvite tu na iimpwiyu. Ihe shoka hasho owala uuwanawa wegalikano. Otali vulu okukoleka ekwatathano lyetu naKalunga. (Eps. 65:2; Jak. 4:8; 1 Joh. 5:14) Sho Jesus a li kombanda yevi, okwa li ha galikana lwiikando molwaashoka okwa li e shi kutya Jehova ota pulakene kuye, nosho wo kutya egalikano otali ka koleka ekwatathano lye naHe. (Luk. 5:16) Inatu pandula tuu sho ekuliloyambo lyaJesus lye shi ningitha tashi wapa, tu kale ookuume kaJehova nokupopya Naye megalikano!

 NKENE TATU KA MONA MO UUWANAWA MONAKUYIWA

9. Uuwanawa wuni ekuliloyambo ta li ka etela aalongeli yaKalunga aadhiginini monakuyiwa?

⁹ Uuwanawa wuni ekuliloyambo ta li ka etela aalongeli yaKalunga aadhiginini monakuyiwa? Otaya ka mona omwenyo gwaaluhe. Aantu oyendji ohaya dhiladhila kutya shoka itashi wapa, molwaashoka oyendji oya kala nokusa omimvo omayovi. Ihe elalakano lyaJehova lyopetameko olya li aantu ya kale nomwenyo sigo aluhe. Andola Adam ka yonene, ando kapu na omuntu ha dhiladhila kutya okukala nomwenyo sigo aluhe oshinima itaashi vulika. Nonando pethimbo lyetu okukala nomwenyo sigo aluhe oshinima sha fa itaashi vulika, otu na okwiitala kutya otashi ka ningwa shili, molwaashoka otu shi kutya Jehova okwa futa ofuto ya shiga ko, sho a gandja omwenyo gOmwana omuholike. — Rom. 8:32.

10. Etegameno lini aagwayekwa noonzi dhilwe ye na?

¹⁰ Nonando omwenyo gwaaluhe uuwanawa mboka tatu ka mona monakuyiwa, Jehova okwa hala tu kale hatu dhiladhila kugo ngashingeyi. Aagwayekwa oya tegelela oku ka kala nonkalamwenyo tayi ti sha megulu, sho taya ka pangela kombanda yevi pamwe naKristus. (Eh. 20:6) Oonzi dhilwe odha tegelela oku ka kala nomwenyo meviparadisa, moka itaamu ka kala we uuwehame noluhodhi. (Eh. 21:3, 4) Mbela owu li gumwe gwomoonzi dhilwe ndhoka dhi na etegameno lyoku ka kala nomwenyo gwaana ehulilo kombanda yevi? Ondjambi ndjono oyi na ongushu lela! Kalunga okwa li a shita aantu ya kale nomwenyo sigo aluhe kombanda yevi. Onkee okukala nomwenyo sigo aluhe, otashi ke tu etela enyanyu lyaa shi okuyelekwa nasha.

11-12. Omalaleko nuuyamba geni twa tegelela mOparadisa? (Tala wo omathano.)

¹¹ Dhiladhila owala kunkene onkalamwenyo tayi ka kala ya tya mOparadisa kombanda yevi. Ito ka ipula we kombinga yuuwehame, nenge yeso. (Jes. 25:8; 33:24) Jehova ote ke ku pa iinima ayihe iiwanawa mbyoka wa hala. Mbela oshike unene wa hala oku ka ilonga mOparadisa? Mbela okombinga yiinamwenyo? Okwiilonga okudhana oshihikomwa shontumba? Nenge okwiilonga okuthaneka? Kapu na omalimbililo  kutya otapu ka kala pu na ompumbwe yaathaneki, aatungi naanamapya. Odhoshili kutya otapu ka kala wo pu na ompumbwe yokwaambidhidha nokukaleka iinima monkalo ombwanawa, ngaashi okulongekidha iikulya, okunduluka po iilongitho nokusila oshimpwiyu omutungilo gwevi omwaanawa. (Jes. 35:1; 65:21) Sho to ka kala nomwenyo sigo aluhe, oto ka kala wu na ethimbo lyokuninga iinima ayihe mbyoka.

¹² Itashi ka kala tuu enyanyu enene oku ka hambelela mboka ta ya ka yumuka! (Iil. 24:15) Dhiladhila owala nkene to ka nyanyukilwa okwiilonga kombinga yaJehova, mokukonakona iinima oyindji mbyoka a shita. (Eps. 104:24; Jes. 11:9) Shoka sha dhengambanda, otashi ka kala oshiwanawa okulongela Jehova nopwaahe na okukala tu uvite tu na ondjo yasha. Mbela “uutoye wuulunde wokathimbo kowala,” oto ke wu pitika wu ku ningithe wu hunuthe omalaleko nuuyamba gomonakuyiwa? (Heb. 11:25) Hasho nando! Kapu na nando eiyambo kehe tatu ningi ngashingeyi, tali vulu okuyelekanithwa nomalaleko nuuyamba ngoka. Dhimbulukwa kutya itatu ka kala twa tegamena Oparadisa kombanda yevi sigo aluhe, oshoka etegameno ndyoka otali ka gwanithwa sikulimwe lyomomasiku. Omalaleko nuuyamba agehe ngoka, oga ningwa molwaashoka Jehova oku tu hole, sho e tu pe ekuliloyambo lyOmwana gwe.

ULIKA KUTYA OWA PANDULA OHOLE YAJEHOVA

13. Ongiini tatu vulu okuulika kutya otwa pandula ohole yaJehova? (2 Aakorinto 6:1)

¹³ Ongiini tatu vulu okuulika kutya otwa pandula Jehova sho e tu pe ekuliloyambo? Omo ku pititha komeho iilonga ye monkalamwenyo yetu. (Mat. 6:33) Komeho gaayihe, Jesus okwa si, “opo mboka ye na omwenyo yaa ikalele we yo yene, ihe ya kalele nguka a si molwawo nokwa yumudhwa molwawo.” (2 Kor. 5:15) Odhoshili kutya inatu hala nando oku hepitha esilohenda lyaJehova. — Lesha 2 Aakorinto 6:1.

14. Ongiini tatu vulu okukala tu na eitaalo momalombwelo gaJehova?

¹⁴ Otatu vulu wo okuulika kutya otwa pandula ohole yaJehova mokuvulika komalombwelo ge. Ngiini mbela? Uuna tashi ya pokuninga omatokolo, ngaashi kutya otwa pumbwa elongo li thike peni nenge iilonga yini tatu vulu okulonga, otwa pumbwa okutala kwaashoka Jehova a hala tu ninge. (1 Kor. 10:31; 2 Kor. 5:7) Uuna twa tula miilonga shoka twa itaala, eitaalo lyetu nuukuume wetu naJehova ohawu kolo. Onkee etegameno lyetu lyoku ka kala nomwenyo sigo aluhe, oha li kala lyolela kutse. — Rom. 5:3-5; Jak. 2:21, 22.

15. Ongiini tatu vulu okuulika olupandu pethimbo lyoomwedhi dhEdhimbuluko?

¹⁵ Natango opu na ishewe omukalo gumwe moka tatu vulu okuulika kutya otwa pandula ohole yaJehova. Omokuninga ngaashi tatu vulu pethimbo lyoomwedhi dhEdhimbuluko, tu ulike kutya otwa pandula Jehova shi thike peni, omolwekuliloyambo. Shimwe ishewe, kakele owala koku ka kala po, otatu vulu okuhiya yalwe kEdhimbuluko. (1 Tim. 2:4) Yelithila mboka to  hiya kutya oshike tashi ka ningwa po pEdhimbuluko. Oto vulu wo oku ya ulukila uuvidio: Jesus okwa sile shike? nosho wo Edhimbuluko lyeso lyaJesus, mboka wu li kepandja lyetu, jw.org. Aakuluntugongalo otaya vulu okuhiya mboka inaaya ipyakidhila we. Dhiladhila owala kenyanyu ndyoka tali ka kala megulu nosho wo kombanda yevi, ngele dhimwe dhomoonzi dhaJehova ndhoka dha li dha kana, odha galukile moshigunda she! (Luk. 15:4-7) Natu shi ninge elalakano tu popithe aantu ayehe pEdhimbuluko, unene tuu mboka aape, nenge mboka ya ninga ethimbo inaaya gongala. Otwa hala ya kale ye uvite ya taambiwa ko. — Rom. 12:13.

16. Omolwashike tu na okutamununa mo uukalele wetu, pethimbo lyoomwedhi dhEdhimbuluko?

¹⁶ Mbela oto vulu okulonga oshindji miilonga yaJehova pethimbo lyoomwedhi dhEdhimbuluko? Okuninga ngawo, otatu ka ulika kutya otwa pandula shoka Kalunga naKristus ye tu ningila. Ngele otwa kala hatu yi miilonga yokuuvitha olundji, otatu ka mona nkene Jehova te tu kwathele, neinekelo lyetu muye otali ka kala lya kola. (1 Kor. 3:9) Shimwe ishewe, endela pamwe nElesho lyOmbiimbeli li na ko nasha nEdhimbuluko, ndyoka tali adhika mokambo Konakona Omanyolo esiku kehe, nenge mokafo hoka haka longithwa pokugongala kwomokati koshiwike. Oto vulu wo okulongitha oovelise ndhoka pekonakono lyoye lyopaumwene.

17. Oshike hashi nyanyudha Jehova? (Tala oshimpungu “ Omikalo moka tatu vulu okuulika kutya otwa pandula ohole yaJehova.”)

¹⁷ Odhoshili kutya onkalo yoye otashi vulika kaayi ku pitike wu ninge ashihe shoka sha popiwa moshitopolwa shika. Dhimbulukwa kutya Jehova iha yelekanitha shoka ho gandja naashoka yalwe haya gandja, oku wete shoka shi li momutima gwoye. Oha kala a nyanyukwa, uuna e wete sho wu na olupandu omolwomagano ge, ge na ondilo, ekuliloyambo. — 1 Sam. 16:7; Mark. 12:41-44.

18. Omolwashike twa pandula Jehova nosho wo Jesus Kristus?

¹⁸ Ekuliloyambo olye shi ningitha tashi wapa, opo tu dhiminwe po omayono getu, okukala ookuume naJehova nosho wo oku ka kala nomwenyo sigo aluhe. Natu kale aluhe hatu ulike olupandu omolwohole yaJehova, ndjoka ye mu inyengitha e tu pe omalalekonuuyamba ngaka. (1 Joh. 4:19) Natu kale wo hatu ulike kutya otwa pandula Jesus, ngoka e tu hole noonkondo nokwa gandja omwenyo gwe omolwetu. — Joh. 15:13.