1, 2. Omuyapostoli Paulus okwa li u ulike ngiini kutya okwa pandula noonkondo esilohenda lyaKalunga?

OMUYAPOSTOLI Paulus okwa li a vulu okupopya e na uushili ta ti: ‘Esilohenda lyaKalunga inali kala lyaa na oshilonga kungame.’ (Lesha 1 Aakorinto 15:9, 10.) Paulus okwa li e shi nawa kutya ohenda yaKakunga onene, ine yi longela sha, oshoka okwa li ha hepeke Aakriste.

² Pehulilo lyonkalamwenyo ye, Paulus okwa nyolele omulongi pamwe naye Timoteus a ti: “Ngame otandi hambelele Jesus Kristus, Omuwa gwetu, sho a pe ndje oonkondo dhokulonga oshilonga shandje. Otandi mu hambelele, sho a tala ndje kutya otandi vulu oku mu longela, e ta tula ndje miilonga ye.” (1 Timoteus 1:12-14) Iilonga mbyoka oya li yashike? Paulus okwa lombwele aakuluntugongalo yomuEfeso kutya iilonga oya kwatela mo shike, sho a ti: “Ngame mokugwanitha eithano lyandje kandi na nando uutende nomwenyo gwandje. Onda hala ashike okutsakanitha  oshilonga shoka nde shi pewa kOmuwa Jesus shokuuvitha elaka etoye tali hokolola esilohenda lyaKalunga.”—Iilonga 20:24.

3. Paulus okwa li a pewa oshinakugwanithwa shi ikalekelwa shini muukalele? (Tala kethano lyopetameko.)

³ Paulus okwa li u uvitha “elaka etoye” lini ndyono lya tsu omuthindo esilohenda lyaKalunga? Okwa lombwele Aakriste yomuEfeso a ti: “Omu uva kutya Kalunga okwa pe ndje molwesilohenda lye oshilonga shika shelelo lyegumbo lye, ndi shi longe omoluuwanawa weni.” (Aaefeso 3:1, 2) Paulus okwa li a pewa oshinakugwanithwa shokutaandelitha elaka etoye kwaamboka kaaye shi Aajuda, opo nayo ya kwatelwe mwaamboka taya ka kala pamwe naKristus mepangelo lyUukwaniilwa wopaMesiasa. (Lesha Aaefeso 3:5-8.) Molwaashoka Paulus okwa li hu uvitha nuulaadhi muukalele, okwa tulile po Aakriste yokunena oshiholelwa oshiwanawa noku ulike kutya esilohenda lyaKalunga “inali kala lyaa na oshilonga” kuye.

4, 5. Omolwashike tatu vulu okutya ‘elaka etoye lyOshilongo’ olya faathana ‘nelaka etoye tali hokolola esilohenda lyaKalunga’?

⁴ Pethimbo ndika lyehulilo, aapiya yaJehova oya pewa oshinakugwanithwa shokuuvitha ‘elaka etoye lyOshilongo ndyoka tali uvithilwa aantu ayehe, li ningile iigwana ayihe onzapo.’ (Mateus 24:14) Etumwalaka ndyoka natse hatu uvitha olyo “elaka etoye tali hokolola esilohenda lyaKalunga,” oshoka omayambeko agehe ngoka tatu ka mona kohi yepangelo lyUukwaniilwa otatu ga mono omolwesilohenda lyaJehova okupitila muKristus. (Aaefeso 1:3) Mbela ohatu holele ngaa Paulus mokuulika kutya otwa pandula esilohenda lyaJehova mokuuvitha nuulaadhi muukalele?—Lesha Aaroma 1:14-16.

⁵ Moshitopolwa sha zi ko, otwi ilongo nkene tse tu li aalunde twa mona uuwanawa mesilohenda lyaJehova momikalo odhindji. Onkee ano, otu na oshinakugwanithwa shokuninga ngaashi tatu vulu tu longe yalwe kombinga yankene Jehova u ulike ohole ye nankene taya vulu okumona mo uuwanawa. Iinima yimwe yini ya kwatelwa mesilohenda lyaKalunga tu na okukwathela yalwe ya kale ye yi pandula?

6, 7. Sho tatu yelithile aantu kombinga yekulilo, otatu taandelitha ngiini elaka etoye ndyoka tali hokolola esilohenda lyaKalunga?

⁶ Aantu oyendji kunena ihaya kala yu uvite kutya yo aalunde, nomolwaashono kaaye wete ngele oya pumbwa ekulilo. Nonando ongawo, aantu oyendji oye shi dhimbulula mo kutya okukala owala taya ningi shoka ya hala monkalamwenyo ihashi ye etele enyanyu lyashili. Manga inaayu uvithilwa kOonzapo dhaJehova, ihaya kala ye shi kutya uulunde oshike, ohawu tu gumu ngiini noshike twa pumbwa okuninga, opo tu mangululwe mo muupika wuulunde. Aanamitima omiwanawa oya pepelelwa sho yi ilongo kutya Jehova okwa tumu Omwana kombanda yevi, opo e tu mangulule mo muulunde nomeso. Okwe shi ningi oshoka oku tu hole noonkondo nomolwesilohenda lye.—1 Johannes 4:9, 10.

⁷ Paulus okwa popi kombinga yOmwana gwaJehova omuholike a ti: “Oshoka tse otwa mangululwa notwa dhiminwa po oondjo dhetu omolweso lyaKristus. Esilohenda lyaKalunga ekumithi ngiini!” (Aaefeso 1:7) Ekuliloyambo lyaJesus oli li euliko enene lyohole yaJehova yoku tu hola notali ulike ongushu yesilohenda Lye. Inatu pepelelwa tuu sho twi ilongo kutya ngele otwa kala tu na eitaalo mekuliloyambo lyaJesus, oondjo dhetu otadhi ka dhimwa po neiyuvo  lyetu otali ka kala lya yela! (Aahebeli 9:14) Ndjika kayi shi tuu onkundana ombwanawa ndjoka tu na okulombwela yalwe!

8. Omolwashike aantu aalunde ya pumbwa okuhanganithwa naKalunga?

⁸ Otu na oshinakugwanithwa shokutseyithila yalwe kutya otaya vulu okukala ye na ekwatathano ewanawa nOmushiti. Ngele aantu itayu ulike eitaalo mekuliloyambo lyaJesus, Kalunga ohe ya tala ko ye li aatondi ye. Omuyapostoli Johannes okwa nyola a ti: “Oongoka i itaala Omwana, oku na omwenyo gwaaluhe, ihe ngoka itaa vulika kOmwana, ita ka mona omwenyo, ihe ondjahi otayi kala kombanda ye.” (Johannes 3:36) Lago enene, ekuliloyambo lyaKristus olye tu hanganitha naKalunga. Paulus okwe shi yelitha a ti: “One omwa kala nale kokule naKalunga nomwi iningi aatondi ye miilonga nomomadhiladhilo geni omawinayi. Ihe ngashingeyi Kalunga okwe mu hanganitha naye mwene molweso lyOmwana.”—Aakolossa 1:21, 22.

9, 10. (a) Kristus okwa gandja oshinakugwanithwa shashike kaamwahe aagwayekwa? (b) ‘Oonzi dhilwe’ ohadhi kwathele ngiini aamwahe aagwayekwa?

⁹ Kristus okwa pe aamwahe aagwayekwa kombanda yevi “oshilonga shokuhanganitha aantu yalwe naye.” Paulus okwa lombwele Aakriste aagwayekwa yomethelemumvo lyotango a ti: “Ayihe mbika oya ningwa kuKalunga, ngoka e tu hanganitha naye mwene molwaKristus nokwe tu pe oshilonga shokuhanganitha aantu yalwe naye. Tse otatu uvitha kutya Kalunga okwa li muKristus nokwa hanganitha aantu ayehe naye, ye ina yalulila aantu oondjo dhawo. Kalunga okwe tu pe elaka tali popi, nkene ta hanganitha aantu naye mwene. Ano tse aatumwa yaKristus. Kalunga oye mwene te tu longitha oku mu kumagidha, onkee peha lyaKristus otatu mu indile, mu hanganithwe naKalunga.’”—2 Aakorinto 5:18-20.

¹⁰ ‘Oonzi dhilwe’ odhi na uuthembahenda wokukwathela aamwahe aagwayekwa miilonga mbika yokuuvitha. (Johannes 10:16) Ye li aakalelipo yaKristus oye na oshinakugwanithwa sha simana shokulonga aantu oshili noku ya kwathela ya kokeke ekwatathano ewanawa naJehova. Shika oshi li oshilonga sha simana shokuuvitha elaka etoye tali hokolola esilohenda lyaKalunga.

11, 12. Omolwashike shi li onkundana ombwanawa kaantu sho tayi ilongo kutya otaya vulu okugalikana Jehova?

¹¹ Aantu oyendji ohaya galikana, oshoka ohashi yu uvitha nawa, ihe inayi itaala lela kutya Kalunga ohu uvu omagalikano gawo. Oya pumbwa okutseya kutya Jehova ohu “uvu omagalikano.” Omupisalomi David okwa nyola a ti: “Eeno, ongoye nguka ho uvu omagalikano. Aantu ayehe otaye ya kungoye omolwoondjo dhawo. Omayono getu oge tu tono, ihe owe ga dhimi po.” —Episalomi 65:2, 3.

¹² Jesus okwa lombwele aalongwa ye a ti: “Ngele otamu indile ndje sha medhina lyandje, otandi shi ningi.” (Johannes 14:14) Osha yela kutya “sha” otashi ti kehe shimwe tatu pula metsokumwe nehalo lyaJehova. Johannes okwe tu shilipaleke a ti: “Osho ngeyi otatu vulu okuhedha kuKalunga tu na omukumo, oshoka ngele tatu mu indile shaa shoka she mu opalela, oye ote tu uvu ethimbo kehe ndyoka tatu mu indile.” (1 Johannes 5:14) Kashi shi tuu oshiwanawa okulonga aantu kutya egalikano olyo omukalo moka hatu vulu okuhedha “koshipangelapundi shesilohenda” lyaJehova, ihe kali shi owala oshinima shoku tu uvitha nawa! (Aahebeli 4:16) Uuna tatu ya longo ya galikane  momukalo omwaanawa kOmuntu ngoka e li mondjila noyi indile iinima mbyoka yi li mondjila, nena otatu ya kwathele ya hedhe popepi naJehova noya mone ehekeleko pethimbo lyuudhigu.—Episalomi 4:1; 145:18.

13, 14. (a) Aagwayekwa otaya ka kala ye na uuthembahenda uukumithi wuni monakuyiwa? (b) Aagwayekwa otaya ka longela aantu iilonga yini iiwanawa?

¹³ Jehova ote ku ulika esilohenda lye shi vulithe nale momasiku gahugunina. Jehova ota ka pa aantu 144 000 uuthembahenda uukumithi woku ka pangela pamwe naKristus mUukwaniilwa we womegulu. Paulus okwa nyola a ti: “Ihe Kalunga, nguka u udha esilohenda omolwohole ye onene, sho e tu hole, okwe tu tula omwenyo pamwe naKristus. Okwe shi tu ningile, manga twa li twa sa pambepo omolwokwaavulika kwetu kuye. Ne omwa hupithwa kesilohenda lyaKalunga. Muukumwe wetu naKristus Jesus, Kalunga okwe tu yumudha kuusi pamwe naKristus, opo tu wape okupangela pamwe naye megulu. Oye okwe shi ningi, opo a holole sigo okomathimbo ngoka tage ke ya uuwindji wesilohenda lye nowohole ye ndjoka e yi tu hololele muJesus Kristus.”—Aaefeso 2:4-7.

¹⁴ Oshidhigu okudhiladhila kutya iinima iikumithi mbyoka Jehova a longekidhila Aakriste aagwayekwa sho taya ka pangela pamwe naKristus megulu oyini. (Lukas 22:28-30; Aafilippi 3:20, 21; 1 Johannes 3:2) Shi na ko nasha nayo Jehova okwe ya hololele “uuwindji wesilohenda lye.” Otaya ka ninga “Jerusalem oshipe,” omufuko gwaKristus. (Ehololo 3:12; 17:14; 21:2, 9, 10) Otaya ka longa pamwe naJesus ya ka ‘aludhe aantu,’ ya ka kwathele aantu aavuliki ya manguluke mo mondjoko yuulunde neso noye ke ya kwathele ya kale ya gwanenena.—Lesha Ehololo 22:1, 2, 17.

15, 16. Jehova ote ku ulukila ngiini ‘oonzi dhilwe’ esilohenda lye monakuyiwa?

¹⁵ MAaefeso 2:7, otamu popiwa kutya Kalunga ote ku ulika esilohenda lye “komathimbo ngoka tage ke ya.” Pethimbo ndyoka kehe gumwe kombanda yevi ota ka mona lela “uuwindji wesilohenda lye.” (Lukas 18:29, 30) Omukalo gumwe gwa dhenga mbanda moka Jehova te ku ulika esilohenda lye ekumithi kombanda yevi, oosho ta ka yumudha ‘aasi.’ (Job 14:13-15; Johannes 5:28, 29) Aalumentu naakiintu aadhiginini mboka ya sa nale manga ekuliloyambo lyaKristus inaali ningwa nosho wo ‘oonzi dhilwe,’ ano aantu mboka taya si ye li aadhiginini pomasiku gahugunina, otaya ka yumudhwa, opo ya tsikile okulongela Jehova.

¹⁶ Aantu omamiliyona mboka ya sa inaaya tseya Kalunga, nayo otaya ka yumudhwa. Otaya ka pewa ompito ya vulike kuunamapangelo waJehova. Johannes okwa nyola a ti: “Onda mono oonakusa, aanenentu naadhinwa ya thikama komeho goshipangelapundi. Omambo oga li ga pandjwa, nembo ekwawo, embo lyaanamwenyo, olya pandjwa. Oonakusa oya pangulwa noya tokolelwa shaa ngoka ngaashi e shi ilongela, ngashika sha nyolwa membo. Nena efuta olya gandja aasi mboka ya sile mulyo. Eso noshaasi oya gandja wo aasi mboka ya li mo, naayehe oya pangulwa noya tokolelwa, ngaashi ye shi ilongela.” (Ehololo 20:12, 13) Osha yela kutya mboka taya ka yumudhwa otaya ka pumbwa okwiilonga nkene ye na okutula miilonga omakotampango gaKalunga ngoka ge li mOmbiimbeli. Oshikwawo, otaya ka landula omalombwelo omape ngoka taga ka adhika ‘momambo’ ngoka taga popi iitegelelwa yaJehova yi na ko nasha nokukala muuyuni uupe. Shoka tashi ka kala sha nyolwa momambo ngoka nasho otashi ku ulika wo esilohenda lyaJehova.

17. Oshike tu na okukaleka momadhiladhilo sho tatu uvitha?

¹⁷ Otu na okuuvitha onkundana ombwanawa yUukwaniilwa shi vulithe nale unene tuu sho ehulilo tali hedha popepi. (Markus 13:10) Osha yela kutya onkundana ombwanawa otayi tsu omuthindo esilohenda lyaJehova. Otwa pumbwa oku shi dhimbulukwa uuna tatu uvitha. Elalakano lyetu lyokuuvitha olyo okusimanekitha Jehova. Mbela otu na oku shi ninga ngiini? Otu na okulombwela aantu kutya omauvaneko agehe kombinga yomayambeko ngoka tatu ka nyanyukilwa muuyuni uupe otaga gwanithwa po owala omolwesilohenda lyaJehova.

18, 19. Ongiini tatu vulu okusimanekitha esilohenda lyaJehova?

¹⁸ Sho tatu uvithile yalwe, otatu vulu oku ya yelithila kutya kohi yepangelo lyUukwaniilwa waKristus, aantu otaya ka mona uuwanawa owundji okupitila mekuliloyambo notaye ke enda kashona nakashona yu uka megwaneneno. Ombiimbeli otayi ti: ‘Eshito alihe otali ka manguluka muupika weyonuuko, li ye memanguluko nomeadhimo lyaana yaKalunga.’ (Aaroma 8:21) Shino otashi ka ningwa owala okupitila mesilohenda enene lyaJehova.

¹⁹ Otu na uuthembahenda wokulonga ayehe mboka taya pulakene kombinga yeuvaneko ewanawa ndyoka tali adhika mEhololo 21:4 tali ti: “Oye ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.” Nena ngoka a kuutumba koshipangelapundi, okwa popi a ti: ‘Tala, ngashingeyi iinima ayihe otandi yi ningi iipe!’ Okwa lombwele ndje wo a ti: “Nyola oohapu ndhika, oshoka odhoshili nodhi shi okwiinekelwa.” Uuna tatu uvithile yalwe nuulaadhi onkundana ndjika ombwanawa, otatu simanekitha shili esilohenda lyaJehova.