Ombiimbeli otayi ti: “Iilya oyi li po oyindji, ihe aalongi oyo aashona. Galikaneni ano [Mwene] gwiilya, a tume aalongi keteyo lye.” (Luk. 10:2) Oohapu ndhika dha li dha popiwa kuJesus omimvo 2 000 nasha dha ka pita, otadhi hokolola onkalo ndjoka yi li moMyanmar kunena. Omolwashike tatu tile ngawo? MoMyanmar, omu na aantu omamiliyona 55, ihe omu na owala aauvithi yonkundana ombwanawa ye li 4 200 lwaampono.

“Mwene gwiilya,” Jehova, okwi inyengitha omitima dhaamwatate naamwameme oyendji miilando yi ili noyi ili, opo ya ye koshilongo shoka shi li mUumbugantuzilo waAsia, ya kwathele meteyo lyopambepo. Oshike she ya inyengitha ya thige po iilongo yawo? Oya kwathelwa ngiini ya tembukile hoka? Omayambeko geni taya nyanyukilwa? Natu ke shi taleni.

Omimvo dhontumba dha ka pita, omumwatate Kazuhiro, omukokolindjila moJapani, okwa li a kwatwa koshintona, nomadhiladhilo ge oga zi pehala e ta falwa koshipangelo. Ndohotola okwe mu lombwele kaa hinge uule womimvo mbali. Shoka osha kumitha Kazuhiro. Okwi ipula ta ti: ‘Ongiini tandi vulu okutsikila okukokola ondjila, oshinima shoka ndi hole?’ Okwa galikana i itula mo, ta indile Jehova e mu pe ompito a tsikile okukokola ondjila.

Omumwatate Kazuhiro ota ti: “Konima yomwedhi, kuume kandje ngoka a li ta uvithile moMyanmar, oku uvu kombinga yuupyakadhi wandje. Okwa dhengele ndje e ta ti: ‘MoMyanmar oshiyenditho shoka hashi longithwa unene, ombesa. Ngele owe ya huka, oto vulu okutsikila okuuvitha, ino pumbwa ohauto.’ Onda pula ndohotola ngele onkalo yandje otayi pitike ndje ndi ye koMyanmar. Ohaluka, ndohotola okwa ti: ‘Ndohotola guuluyi gwokoMyanmar ngashingeyi ota talele po moJapani. Otandi mu lombwele kombinga yoye. Ngele omukithi ogwe ku adha ishewe, ota vulu oku ku kwathela.’ Onkee ano, onda taamba ko shoka nda lombwelwa kundohotola shi li eyamukulo lya za kuJehova.”

Omumwatate Kazuhiro okwa tumine nziya o-e-mail koshitayimbelewa shaMyanmar. Okwe ya lombwele kutya ye nomukadhi oya halelela oku ka kokola ondjila hoka. Konima yomasiku gatano, oshitayimbelewa oshe tu yamukula, sha ti: “Ileni, otwa pumbwa aakokolindjila oyendji!” Omumwatate Kazuhiro nomukadhi, Mari, oya landitha po oohauto dhawo, oya mono oovisa e taya londo ondhila. Ngashingeyi, otaya longo nongundu yelaka lyokuudhika moMandalay ya nyanyukwa. Omumwatate Kazuhiro ota ti: “Okupitila moshimoniwa shika, otu uvite eitaalo lyetu meuvaneko ndyoka li li mEpisalomi 37:5, tali  ti: ‘Igandja kOmuwa; mu inekela, oye te ku kwatha,’ lya kolekwa.”

Mo 2014, moMyanmar omwa ningwa oshigongi shoshitopolwa shi ikalekelwa shOonzapo dhaJehova. Aamwatate naamwameme ya za kiilongo yilwe, oya li ya yi koshigongi shoka. Gumwe gwomuyo, omumwameme Monique, gwomimvo 30 nasha gwokoAmerika. Ota ti: “Sho nda galuka koshigongi, onda galikana kuJehova kombinga yonkatu ndjoka nda li ndi na okukatuka monkalamwenyo yandje. Onda popi wo naavali yandje kombinga yomalalakano gandje gopambepo. Atuhe otwa li tu uvite kutya onda pumbwa okushuna koMyanmar, ihe osha kutha ethimbo kashona nokugalikana olundji, manga inaandi ninga etokolo lyahugunina.” Monique okwa yelitha kutya omolwashike.

“Jesus okwa li a ladhipike aalanduli ye ya ‘yalule kutya oshungo otayi pula shi thike peni.’ Onkee ano, ondi ipula nda ti: ‘Mbela otandi vulu ngaa okutembuka? Mbela otandi ka vula ngaa okwiikwathela moshilongo shoka nopwaa na okulongitha ethimbo olindji miilonga yokwiikongela omboloto?’” Monique ota ti: “Onde shi dhimbulula mo nziya kutya kandi na iimaliwa ya gwana, ndi tembukile koshilongo shilwe.” Mbela okwe shi ende ngiini a vule okutembuka? — Luk. 14:28.

Omumwameme Monique, ota ti: “Esiku limwe omuhona gwandje okwa pula ndje ndi ye kuye. Onda li nda tila, nonda dhiladhila kutya otandi tidhwa mo miilonga. Ihe nani, okwa li owala ta pandula ndje, omolwiilonga yandje iiwanawa. Okwa lombwele ndje nokuli kutya okwa ninga elongekidho, opo ndi mone oshimaliwa sha gwedhwa po, shoka naanaa nda li nda pumbwa ndi fute oongunga dhandje.”

Monique okwa kala ta uvitha moMyanmar okuza muDesemba 2014. Oku uvite ngiini sho a ka uvitha hoka ku na ompumbwe? Ota ti: “Onda nyanyukilwa okukala muka. Ondi na aakonakonimbiimbeli yatatu. Gumwe gwomuyo oku na omimvo 67. Oha popitha ndje aluhe ti imemeha nokupapatela ndje. Sho i ilongo kutya edhina lyaKalunga oJehova, oshe mu inyengitha, e ta tameke okulila. Okwa ti: ‘Shika oshikando shandje shotango tandi uvu kutya edhina lyaKalunga oJehova. Ngoye omushona kungame, ihe owa longa ndje oshinima sha simanenena shoka kaanda li ndi shi.’ Onda tameke wo okulila. Oshimoniwa shika osha tsu ndje omukumo ndi longe mpoka pu na ompumbwe, oshinima shoka oshiwanawa lela.” Monique okwa mono wo uuthembahenda wokuya kOsikola yaauvithi yUukwaniilwa.

Shimwe ishewe shi inyengitha yamwe ye ye koMyanmar, oshimoniwa membo 2013 Yearbook of Jehovah’s Witnesses kombinga yoshilongo shika. Omumwameme Li, gwomimvo 30 nasha, nale okwa li ha zi mUumbugantuzilo waAsia. Okwa li ha longo esiku kehe iilonga yokwiikongela omboloto, ihe oshimoniwa shoka shi li membo ndyoka, oshe mu inyengitha a ka uvithile koMyanmar. Okwa ti: “Mo 2014, sho nda yi koshigongi shi ikalekelwa moYangon, onda tsakanene ko naaihokani mboka ya li haya uvithile koshitopolwa shAachiina moMyanmar hoka kwa li ku na ompumbwe onene. Molwaashoka ohandi popi Oshichiina, onda tokola ndi tembukile koMyanmar, opo ndi ka ambidhidhe ongundu yOshichiina. Otwe shi kundathana naMonique e tatu tembukile koMandalay. Jehova okwe tu yambeke moku tu kwathela tu mone iilonga yokulonga kosikola yimwe atuhe. Ohatu longo owala omalupita notwa mono nokuli ehala lyokukala li li popepi. Nonando moshitopolwa omwa pupyala nomu na omashongo gamwe, ondi hole okuuvithila mo. Aantu moMyanmar oye na onkalamwenyo inaayi kitakana, oye hole aantu noye na ehalo lyokupulakena konkundana ombwanawa. Ohashi nyanyudha okumona nkene Jehova ta endelelitha iilonga ye. Ondi itaala lela kutya oshi li ehalo lyaJehova, sho ndi li ngashingeyi moMandalay.”

Aantu mboka ya ka uvitha hoka ku na ompumbwe onene, oya mona nkene egalikano li na oonkondo. Natu tale koshiholelwa shomumwatate Jumpei nomukadhi Nao,  mboka ye na omimvo 30 nasha. Oya li nale megongalo lyelaka lyokuudhika moJapani. Omolwashike ya tembukile koMyanmar? Omumwatate Jumpei, ota ti: “Ngame nomukulukadhi gwandje, otwa kala twa hala oku ka uvithila koshilongo hoka ku na ompumbwe onene. Omumwatate ngoka a li megongalo lyetu lyelaka lyokuudhika moJapani, okwa tembukile koMyanmar. Nonando otwa li owala twa pungula po okamaliwa okashona, muMei 2010 natse otwa tembuka. Aamwatate naamwameme moMyanmar oye tu taamba ko nohole.” Oku uvite ngiini sho ta uvitha moshitopolwa shelaka lyokuudhika moMyanmar? Ota ti: “Aantu oyendji oye na ohokwe. Uuna tatu ulukile oombolo uuvidio welaka lyokuudhika, ohadhi kala dha nyanyukwa. Otwa nyanyukwa sho twa ningi etokolo lyokuya huka tu longele Jehova!”

Mbela Jumpei naNao oya li ya adha peni oshimaliwa? Jumpei okwa ti: “Konima yomimvo ndatu, otwa longitha oshimaliwa shetu oshindji shoka twa li twa pungula, nokatwa li we tu na sha gwana okufuta ehala lyetu omumvo gwa ka landula ko. Ngame nomukulukadhi gwandje, otwa kala tatu galikana olundji twa mana mo. Ombadhilila, otwa mono ontumwafo ya za koshitayimbelewa, tatu pulwa tu kale aakokolindjila yi ikalekelwa yopakathimbo. Otwa li twi inekela muJehova notwa mono kutya ine tu ekelahi. Okwa kala aluhe noku tu sila oshimpwiyu.” Omathimbo opo ga zi ko, Jumpei naNao oya li ya yi kOsikola yaauvithi yUukwaniilwa.

Omumwatate Simone gwomimvo 40 nasha, gwokoItalia, nomukadhi Anna, gwomimvo 30 nasha, gwokoNew Zealand, oya tembukila koMyanmar. Oshike she ya inyengitha ya tembukile hoka? Anna okwa ti: “Oshimoniwa shoka shi li membo 2013 Yearbook kombinga yaMyanmar, osho she tu inyengitha!” Simone ota ti: “Oshi li uuthembahenda uunene okukala moMyanmar. Onkalamwenyo huka inayi kitakana nohandi longitha ethimbo olindji mokulongela Jehova. Oshinyanyudha okumona nkene Jehova te tu sile oshimpwiyu, sho tatu uvithile moshitopolwa muka mu na ompumbwe onene.” (Eps. 121:5) Anna ota ti: “Onda nyanyukwa lela shi vulithe nale. Onkalamwenyo yetu inayi kitakana. Ohandi kala ethimbo olindji nomusamane gwandje, noshe tu kwathela lela tu kale ookuume kopothingo. Otwa mona wo ookuume aape aawanawa. Aantu kaye na uupyakadhi nOonzapo dhaJehova nohaya ulike lela ohokwe.” Omomikalo dhini mbela?

Omumwameme Anna ota ti: “Esiku limwe, onda uvithile omulongwa gumwe gwokouniveesiti pomatala nonda ningi elongekidho ndi shune kuye. Sho nda shuna ko, okwa li po nakuume ke. Oshikando sha ka landula ko, okwa li po nookuume ye yontumba. Oshikando sha ka landula ko ishewe, okwa li po nookuume ye ye vulithe pwaamboka. Ngashingeyi ohandi konakona nayatano yomuyo.” Simone ota ti: “Aantu muukalele aanambili noya hala okutseya oshindji. Oyendji oye na ohokwe. Nonando ongawo, katu ethimbo lya gwana lyokukonakona nayo ayehe.”

Oonkatu dhini dha kwatelwa mokuninga etokolo lyokuya koMyanmar? Omumwameme Mizuho gwokoJapani, ota ti: “Ngame nomusamane gwandje, Sachio, otwa kala aluhe twa hala oku ka uvithila koshilongo hoka ku na ompumbwe onene, ihe katwa li tu shi mpoka tu na  okuya. Konima sho twa lesha oshimoniwa kombinga yaMyanmar membo 2013 Yearbook, oshe tu inyengitha tu dhiladhile ngele otatu vulu oku ka uvithila ko.” Sachio okwa gwedha ko ta ti: “Otwa tokola tu ye koYangon, oshilandopangelo shaMyanmar, uule woshiwike shimwe tu ka tale nkene ku li. Sho twa yi ko, otwa mono kutya otwa pumbwa okutembukila ko.”

Omumwatate Rodney nomukadhi Jane, yokoAustralia, ye na omimvo 50 nasha, omwanamati Jordan nosho wo omwanakadhona Danica, oya kala taya uvithile koMyanmar hoka ku na ompumbwe onene, okuza mo 2010. Rodney ota ti: “Osha li she tu inyengitha lela okumona aantu ya sa ondjala yopambepo. Otandi ladhipike lela omaukwanegumbo ga kambadhale oku ka uvithila komahala ngaashi Myanmar.” Omolwashike mbela? Ota ti: “Oshinima shika oshe tu kwathela tu li uukwanegumbo tu hedhe popepi lela naJehova. Aagundjuka oyendji ohaya kala unene tayi ipula niinima ngaashi oongodhi, oohauto, iilonga nosho tuu. Ihe aanona yetu, oyi ipyakidhila okwiilonga iitya mbyoka taya vulu okulongitha muukalele. Ohaya kambadhala okwiilonga nkene ye na okutompathana naamboka kaaye shi Ombiimbeli, nkene taya vulu okugandja omatyokosha pokugongala nohaya kutha wo ombinga miinima yilwe oyindji yinyanyudha yopambepo.”

Omumwatate Oliver, gwomimvo 30 nasha gwokoAmerika, okwa yelitha kutya omolwashike ta popile iilonga mbika. Ota ti: “Okulongela Jehova kehala ndyoka inaandi igilila, okwe etela ndje uuwanawa owundji. Okutembukila kehala lilwe, okwa kwathela ndje ndi kale ndi na omukumo nondi kale ndi inekela muJehova kutya nduno ondi iyadhe monkalo ya tya ngiini. Okulonga pamwe naamboka kaanda li ndi shi nale notu li meitaalo limwe, okwa kwathela ndje lela ndi mone kutya kapu na shoka sha simana muuyuni tashi vulu okuyelekwa nUukwaniilwa waKalunga.” Ngashingeyi, omumwatate Oliver nomukadhi Anna, otaya tsikile okuuvitha nuulaadhi moshitopolwa shaapopi yelaka lyOshichiina.

Omumwameme Trazel, gwomimvo 50 nasha, gwokoAustralia, okwa kala ta uvithile moMyanmar okuza mo 2004. Ota ti: “Mboka oonkalo dhawo tadhi ya pitike, otandi ya ladhipike ya ka uvithile hoka ku na ompumbwe onene. Onde shi mona kutya ngele owu na ehalo lyoku ka longa hoka ku na ompumbwe onene, Jehova ote ke ku yambeka. Kanda li ndi shi ngele onandi ka kale nonkalamwenyo ya tya ngeyi. Ndjika onkalamwenyo ombwanawa kaaku na we.”

Oohapu dhaamboka ya ka uvitha hoka ku na ompumbwe, nadhi ku inyengithe wu ka kwathele aanamitima omiwanawa kiitopolwa mbyoka ihaayi uvithilwa. Mboka ya ka uvithila hoka ku na ompumbwe onene, otaya ti: “Alikana ileni koMyanmar mu tu kwathele!”