MOMBIIMBELI omu na oohapu ndhoka dha popiwa kaantu ‘ye tu fa.’ (Jak. 5:17) Pashiholelwa, otatu vulu okuuva ko nziya shoka Paulus a li ta ti, sho a popi oohapu ndhoka dhi li mAaroma 7:21-24, tadhi ti: “Nando ndi kale nda hala okulonga uuwanawa, uuwinayi auke he longo. . . . Ongame omuntu omukweyi!” Oohapu dhe ndhoka ohadhi tu hekeleke, uuna tatu kondjo nokwaagwanenena kwetu.

Paulus okwa holola wo natango omaiyuvo galwe. MAagalati 2:20, okwa popi uushili we kutya Jesus ‘okwa li e mu hole nokwa gandja omwenyo gwe molwe.’ Mbela natse ohatu kala tu na omaiyuvo ‘ga fa’ ge ngoka? Eeno, ihe otashi vulika haaluhe.

Uuna eiyuvo lyetu tali tu pe uusama, omolwomayono ngoka twa ninga monakuziwa, omathimbo gamwe ohashi shi ningitha oshidhigu tu itaale kutya Jehova oku tu hole nokwe tu dhimina po. Shoka ohashi tu ningitha tu kale inaatu lenga ekuliloyambo. Mbela Jesus osho a hala tu tale ko ekulilo ngawo? Ngele osho, oshike tashi vulu oku tu kwathela? Natu ka konakoneni omapulo ngoka gaali.

Eeno, Jesus okwa hala tu tale ko eyambo lye li li omagano gopaumwene. Shoka otu shi shi ngiini? Dhiladhila kehokololo ndyoka li li muLukas 23:39-43. Omulumentu gumwe ngoka a alelwa komuti gwomahepeko ontega naJesus, okwa li a zimine kutya oku na ondjo omolwuukolokoshi we womonakuziwa. Oku na okukala a li a longo omuyonena gwa kwata miiti, oshoka egeelo ndika enyanyalithi, olya li owala hali pewa aakolokoshi ye mu fa. Omulumentu nguka okwa li a lulilwa konkalo ye, nokwa ti kuJesus: “Dhimbulukwa ndje ngele wa thiki mOshilongo shoye.”

Jesus okwi inyenge ngiini? Kala ando wa fa wu mu wete ta pungulula omutse gwe e uvite uuwehame, a vule okutaalela komulumentu ngoka. Nonando okwa li e li muuwehame uunene, okwi idhidhimike, e ta shilipaleke omulumentu ngoka ta ti: “Ongame tandi ku lombwele nena tuu ndjika, oto ka kala pamwe nangame mOparadisa.” Jesus otashi vulika a li e na owala okudhimbulukitha omulumentu ngoka kutya ‘Omuna gwomuntu okwe ya . . . okugandja omwenyo gwe, a hupithe oyendji.’ (Mat. 20:28) Ihe owa ndhindhilika ngaa nkene Jesus a tsu omuthido nkene eyambo lye tali etele omuntu uuwanawa pauhandimwe? Jesus okwa popi momukalo gwombili, sho a longitha iityapeha “oto” nosho wo “nangame.” Okwa li a popi uuwanawa wopaumwene mboka eyambo lye tali ka etela omulumentu ngoka omukolokoshi, woku ka kala moparadisa kombanda yevi.

Kapu na omalimbililo kutya Jesus okwa li a hala omulumentu ngoka a taambe ko eyambo ndyoka a li pokuninga, li li omagano gopaumwene. Ngele Jesus osho a li e uvitile ngawo omukolokoshi ngoka inaa longela Kalunga, osha yela kutya osho wo e uvitile Omukriste a ninginithwa ngoka ta longele Kalunga. Oshike tashi vulu oku tu kwathela tu mone enyanyu, opo kaatu kale we tatu ipe uusama, omolwomayono ngoka twa ninga monakuziwa?

Uukalele waPaulus, owa li wa nwetha mo etaloko lye kombinga yekuliloyambo lyaJesus. Ngiini  mbela? Okwa yelitha a ti: “Ngame otandi hambelele Jesus Kristus, Omuwa gwetu, sho a pe ndje oonkondo dhokulonga oshilonga shandje. Otandi mu hambelele, sho a tala ndje kutya otandi vulu oku mu longela, e ta tula ndje miilonga ye, nando ngame onda li nale handi mu popi nayi, nde mu tidhagana nonde mu sheke.” (1 Tim. 1:12-14) Uukalele waPaulus owe mu shilipaleke kutya Jesus oku mu hole, oku na ohenda naye nokwe mu inekela. Momukalo gwa faathana, Jesus natse okwe tu inekelela oshilonga shoka. (Mat. 28:19, 20) Mbela oshinakugwanithwa shetu shokuuvitha ohashi tu kwathele tu uve ko kutya Jesus natse okwe tu sila?

Omumwatate Albert, ngoka a galukile kuJehova konima sho a li a kondwa mo megongalo uule womimvo 34 lwaampono, okwa ti: “Omayono gandje aluhe ohandi ga dhimbulukwa. Ihe uuna tandi uvitha, ohandi kala ndi uvite nda pewa oshinakugwanithwa shika kuJesus paumwene, ngaashi omuyapostoli Paulus. Shoka ohashi koleke ndje nohashi kwathele ndje ndi kale ndi na etaloko ewanawa kombinga yandje, yonkalamwenyo yandje nonakuyiwa yandje.” — Eps. 51:3.

Omumwatate Allan ngoka a li nale omulongi gwomiyonena nelongithonkondo manga ini ilonga oshili, ota ti: “Natango ohandi ipula nuuwinayi mboka nda li nda longele yalwe. Omathimbo gamwe, ohashi ningitha ndje ndi kale nda polimana. Ihe ohandi pandula Jehova, sho a pitika omulunde ngaashi ngame ndi uvithile yalwe onkundana ombwanawa. Uuna tandi tala nkene aantu tayi inyenge konkundana ombwanawa, ohashi dhimbulukitha ndje nkene Jehova omwaanawa nomunahole. Ondi uvite lela kutya ota longitha ndje ndi kwathele yalwe mboka taya kondjo nuunkundi wa fa mboka nda li ndi na.”

Iilonga yokuuvitha ohayi tu kwathele tu gandje eitulomo kokukatuka oonkatu oombwanawa notu kale nomadhiladhilo omawanawa. Ohayi tu shilipaleke wo kutya Jesus omunahenda, omunahole nokwe tu inekela.

Manga uuyuni waSatana inaawu hanagulwa po, eiyuvo lyetu otashi vulika li tsikile oku tu pa uusama, omolwomayono getu gomonakuziwa. Oshike tashi ke tu kwathela tu kondjithe eiyuvo ndyoka?

Omumwameme Jean ngoka olundji ha dhimbulukwa onkalamwenyo yopaali ndjoka a li e na pethimbo omugundjuka, ota ti: “Ondi hole sho ‘Kalunga oye omunene e vule eiyuvo lyetu.’” (1 Joh. 3:19, 20) Natse wo otatu vulu okuhekelekwa, mokukala tu shi kutya Jehova naJesus oye shi kutya otu na egamo lyokuyona, oshoka tse aalunde. Dhimbulukwa kutya ekuliloyambo inali gandjelwa aantu ya gwanenena, ihe aalunde mboka yi iyela ombedhi. — 1 Tim. 1:15.

Otwa tompwa kutya ekuliloyambo olye tu guma pauhandimwe, uuna tatu tedhatedha komukalo moka Jesus a ungaunga naantu inaaya gwanenena nuuna tatu ningi ngaashi tatu vulu, tu gwanitha po iilonga yokuuvitha mbyoka e tu pa. Ngele otwe shi ningi, ngaashi Paulus, oto ka vula okutya: Jesus ‘ngoka e hole ndje, okwa gandja omwenyo gwe molwandje.’