1. Omolwashike Jehova ihee tu yelekanitha nayalwe?

JEHOVA ina hala kehe shimwe nenge aantu ayehe ya kale ya faathana. Shoka oshi iwetikile meshito lye ekumithi nosho wo maantu. Kehe omuntu okwa yooloka ko kumukwawo. Onkee ano, Jehova ihe ku yelekanitha nayalwe. Oha konakona omutima gwoye, ano uuntu woye womeni. (1 Sam. 16:7) Oku shi wo shoka to vulu okuninga, uunkundi woye neputuko lyoye, noiha kala a tegelela wu ninge shoka itoo vulu okuninga. Otwa pumbwa okukala hatu holele Jehova, mokukala hatu itala ko ngaashi e tu tala ko. Kungawo otatu ka kala tu na ‘ondjele,’ shoka tashi ke tu kwathela kaatu kale twi itala ko twa simana unene nenge kaatu na oshilonga shasha.​—Rom. 12:3.

2. Omolwashike okwiiyelekanitha nayalwe kaaku li pandunge?

² Otatu vulu okwiilonga sha kiiholelwa iiwanawa yayalwe. Pashiholelwa, otashi vulika tu shi omumwatate nenge omumwameme gwontumba ngoka ha longo nuudhiginini miilonga yokuuvitha. (Heb. 13:7) Oshiholelwa she otashi vulu oku tu kwathela tu mone mpoka tatu vulu okuhwepopala ngele tashi ya piilonga yokuuvitha. (Fil. 3:17) Ihe opu na eyooloko pokati kokuholela oshiholelwa oshiwanawa shagumwe nokwiiyelekanitha naye. Ngele otwa kala hatu iyelekanitha nayalwe, shoka otashi vulu oku tu ningitha tu kale twe ya tsila efupa, twa teka omukumo nenge shi tu ningithe tu kale twi itala ko kaatu na oshilonga. Ngaashi twi ilongo moshitopolwa sha tetekele, okukala twi itala ko tu vule yalwe megongalo otaku ka teya po wo ekwatathano lyetu naJehova. Onkee ano Jehova ote tu ladhipike ta ti: “Kehe gumwe na konakone ye mwene, iilonga ye nkene ya tya. Iilonga ye ngele iiwanawa, nena ota vulu okwiitangela shoka e shi longo, ihe ita vulu okuyelekanitha iilonga ye niilonga yamukwawo.”​—Gal. 6:4.

3. Omushike wa ninga ehumokomeho shoka she ku etela enyanyu?

³ Jehova okwa hala wu kale wa nyanyukwa sho to ningi ehumokomeho moku mu longela. Pashiholelwa, ngele wa ninginithwa oho  kala wa nyanyukwa sho wa adha elalakano ndyoka. Etokolo ndyoka ongoye mwene we li ningi, kaapu na ngoka e ku thiminika. Owa tokola okuninginithwa, omolwohole yoye yokuhola Kalunga. Dhiladhila kombinga yehumokomeho ndyoka wa ninga okuza esiku ndyoka sigo onena. Pashiholelwa, mbela ngashingeyi owu hole okulesha nokukonakona Ombiimbeli paumwene shi vulithe nale? Mbela ngashingeyi oho galikana tashi zi komutima shi vulithe nale? (Eps. 141:2) Mbela ngashingeyi owu shi nawa okutameka oonkundathana naantu nosho wo okulongitha iileshomwa nuuvidio mboka hatu longitha muukalele? Ngele owu na uukwanegumbo, mbela Jehova okwe ku kwathela wu kale omusamane, omukulukadhi nenge omuvali e li hwepo? Owa pumbwa okukala wa nyanyukwa omolwehumokomeho ndyoka wa ninga.

4. Oshike tatu ka kundathana moshitopolwa shika?

⁴ Otatu vulu okukwathela yalwe ya nyanyukilwe shoka taya ningi ya longele Jehova. Otatu vulu wo oku ya kwathela ya yande okwiiyelekanitha nayalwe. Moshitopolwa shika, otatu ka tala nkene aavali taya vulu okukwathela oyana, nkene aayihokani taya vulu okukala haya kwathelathana nosho wo nkene aakuluntugongalo nayalwe taya vulu okukwathela aamwatate naamwameme megongalo. Hugunina, otatu ka kundathana kombinga yomakotampango gOmbiimbeli ngoka taga vulu oku tu kwathela tu itulile po omalalakano ngoka tatu vulu okwaadha.

5. Shi ikolelela kAaefeso 6:4, aavali oye na okuyanda okuninga shike?

⁵ Aavali oye na okukala ya kotoka kaaya yelekanithe oyana nenge ya kale ya tegelela oyana ya ninge shoka itaaya vulu okuninga. Okuninga ngawo otaku vulu okuteya aanona omukumo. (Lesha Aaefeso 6:4.) Omumwameme gwedhina Sachiko * okwa ti: “Kosikola, aalongi yandje oya li haya kala ya tegelela ndi kale omutango mongundu yetu. Shimwe ishewe, meme okwa li ha ladhipike ndje ndi ilonge nuudhiginini mosikola, opo shi gandje uunzapo uuwanawa kaalongi yandje nosho wo kutate ngoka kee shi Onzapo. Ka li nokuli ha kala a hala ndi ninge omapuko uuna tandi nyola otutsa. Nonando opwa pita oomvula odhindji sho nda mana osikola, omathimbo gamwe ohandi kala ndu uvite kutya shoka tandi ningile Jehova inashi gwana.”

6. Oshike shoka aavali taya vulu okwiilonga mEpisalomi 131:1, 2?

⁶ Oshiilongomwa sha simanenena aavali taya vulu okwiilonga, otashi adhika mEpisalomi 131:1, 2. (Lesha.) Omukwaniilwa David okwa li  a ti kutya ini “itula mumbyoka iinene” nenge mbyoka tayi mu nyenge. Eifupipiko lye nokukala kwe e na ondjele okwe mu kwathele a ‘loteke omwenyo gwe noku gu ngungumaneke.’ Oshike shoka aavali taya vulu okwiilonga koohapu ndhoka dhaDavid? Aavali kaye na owala okukala aaifupipiki noye na ondjele mwaashoka haya ningi, ihe nomwaashoka wo haya kala ya tegelela oyana ya ninge. Aavali otaya vulu okukwathela oyana ya kale yu uvite ye na oshilonga, mokukala ye shi iinima mbyoka ye shi nawa naambyoka itaaya vulu okuninga, e taye ya kwathele yi itulile po omalalakano ngoka taya vulu okwaadha. Omumwameme gwedhina Marina okwa ti: “Meme ka li ha yelekanitha ndje naamwayina yandje nenge naanona yalwe. Okwa li a longo ndje kutya kehe gumwe oku na omagano ga yooloka ko kugayalwe nosho wo kutya kehe gumwe gwomutse oku na ondilo momeho gaJehova. Shoka osha kwathela ndje kaandi kale handi iyelekanitha nayalwe.”

7-8. Omusamane ota vulu ngiini okuulukila omukulukadhi gwe kutya okwe mu simaneka?

⁷ Omusamane Omukriste oku na okukala ha simaneke omukulukadhi gwe. (1 Pet. 3:7) Okusimaneka yalwe okwa kwatela mo oku ya pa eitulomo lyi ikalekelwa. Pashiholelwa, omusamane ohu ulike kutya okwa simaneka omukulukadhi gwe, mokuungaunga naye pahole. Iha kala a tegelela a ninge shoka itaa vulu okuninga. Shimwe ishewe, ihe mu yelekanitha naakulukadhi yalwe. Omukulukadhi otashi vulika a kale u uvite ngiini ngele omusamane gwe ohe mu yelekanitha naakulukadhi yalwe? Omusamane gwomumwameme gwedhina Rosa ngoka kee shi Onzapo, olundji ohe mu yelekanitha naakulukadhi yalwe. Oohapu dhe oombwinayi ihadhi mu teya owala omukumo, ihe ohadhi mu ningitha wo a kale u uvite kaapu na ngoka e mu hole. Ota ti: “Shoka osha ningitha ndje ndi kale aluhe nda pumbwa okushilipalekwa kutya Jehova okwa lenga ndje.” Mepingathano naashoka, omusamane Omukriste ohu ungaunga aluhe pahole nomukulukadhi gwe nohe mu simaneke. Oku shi kutya okuungaunga nomukulukadhi gwe momukalo ngoka ohaku ningitha a kale e na ekwatathano ewanawa naye nosho wo naJehova. *

⁸ Omusamane ngoka a simaneka omukulukadhi gwe ohe mu popile aluhe muuwanawa, ohe mu shilipaleke kutya oku mu hole nohe mu pandula. (Omayel. 31:28) Omusamane gwomumwameme Katerina ngoka a popiwa moshitopolwa sha tetekele osho a li a ningi ngawo, opo e mu kwathele kaa kale we u uvite kee na oshilonga. Sho Katerina a li okanona, yina okwa kala he mu yelekanitha naakadhona yepipi lye nosho wo nookuume ke. Shoka osha ningitha Katerina a kale hi iyelekanitha nayalwe, naasho nokuli a ningi Onzapo. Ihe omusamane gwe okwe mu kwathela e ethe po oku shi ninga noku kale i itala ko pandjele. Okwa ti: “Omusamane gwandje oku hole ndje, oha pandula ndje omolwiinima iiwanawa mbyoka handi ningi noha galikanene ndje. Oha dhimbulukitha ndje wo kombinga yomaukwatya omawanawa gaJehova noha kwathele ndje ndi lundulule okudhiladhila kwandje kwa puka.”

9-10. Aakuluntugongalo oya kwathele ngiini omumwameme gumwe kaa kale we hi iyelekanitha nayalwe?

⁹ Aakuluntugongalo otaya vulu ngiini okukwathela mboka ye na egamo lyokwiiyelekanitha nayalwe? Natu taleni koshimoniwa shomumwameme gwedhina Hanuni, ngoka sho a li okanona kaali ha pandulwa kaavali ye nokuyalwe. Okwa ti: “Onda li ndi na oohoni nonda li ndu uvite ndi vulike kuunona uukwetu. Onda tameke okwiiyelekanitha nayalwe okuza kuunona.” Nonando Hanuni moshili okwa adhika ninga mo oomvula odhindji, natango okwa li hi iyelekanitha nayalwe. Shoka osha li she mu ningitha a kale u uvite kee na oshilonga megongalo. Ihe ngashingeyi ota  kokola ondjila nokwa nyanyukwa. Mbela oshike she mu kwathele a lundulule okudhiladhila kwe kwa puka?

¹⁰ Hanuni okwa ti kutya okwa kwathelwa kaakuluntugongalo yomegongalo lyawo. Oye mu shilipaleke kutya oku na oshilonga megongalo, noye mu pandula omolwoshiholelwa she oshiwanawa. Okwa nyola a ti: “Aakuluntugongalo oya li ya pula ndje lwiikando ndi tse omukumo aamwameme yontumba mboka ya li ya pumbwa ekwatho. Shoka osha ningitha ndje ndi kale ndu uvite kutya ondi na oshilonga megongalo. Otandi dhimbulukwa sho aakuluntugongalo ya pandula ndje sho nda tsu omukumo aamwameme yamwe aagundjuka. Okuza mpono oya leshele ndje Aatessalonika yotango 1:2, 3. Enyolo ndyono olya li lela lya gumu ndje komutima! Aakuluntugongalo mboka oya kwathele ndje ndi mone kutya onda pumbiwa nondi na oshilonga megongalo.”

11. Ngaashi sha popiwa muJesaja 57:15, ongiini tatu vulu okukwathela mboka ye na “omitima dha nyanyagulwa”?

¹¹ Lesha Jesaja 57:15. Jehova oku na ko nasha noonkondo naamboka ye na “omitima dha nyanyagulwa.” Atuheni, kaashi shi owala aakuluntugongalo, otatu vulu okutsa omukumo aamwatate naamwameme. Omukalo gumwe moka tatu vulu oku ya tsa omukumo, omoku yu ulukila kutya otu na ko nasha lela nayo. Jehova okwa hala tu kale hatu yu ulukile kutya oku ya hole noonkondo. (Omayel. 19:17) Okukala kwetu aaifupipiki otaku vulu wo oku ya kwathela. Inatu hala okukala tu na ombepo yokwiiyulika, molwaashoka otashi vulu okuningitha yalwe ya kale ye tu tsila ondumbo. Pehala lyaashono, otwa hala okukala hatu longitha owino nenge ontseyo ndjoka tu na tu tsaathane omukumo.​—1 Pet. 4:10, 11.

12. Omolwashike aantu ya li ye hole okukala pamwe naJesus? (Tala ethano lyokombanda.)

¹² Otatu vulu okwiilonga oshindji kombinga yokuungaunga nawa nayalwe, mokutala kunkene Jesus a li hu ungaunga naalanduli ye. Jesus okwa li omuntu omunenenene ngoka a li ko. Nonando ongawo, okwa li ‘omunambili nomwiifupipiki.’ (Mat. 11:28-30) Ka li hi iyulike kutya ye omunandunge nenge kutya oku shi iinima oyindji. Uuna ta longo aantu ka li ha longitha iitya iidhigu okuuva ko nenge omathaneko ga kitakana. (Luk. 10:21) Mepingathano naakwatelikomeho yomalongelokalunga mboka ya li ye na uuntsa, Jesus okwa li aluhe ha ningitha aantu ya kale yu uvite kutya oye na ondilo momeho gaKalunga. (Joh. 6:37) Okwa li wo hu ungaunga nayo nesimaneko.

13. Olukeno nohole yaJesus oya li hayi kala yi iwetikile ngiini momukalo moka a li hu ungaunga naalongwa ye?

¹³ Olukeno nohole yaJesus oya li hayi kala yi iwetikile momukalo moka a li hu ungaunga naalongwa ye. Okwa li e shi kutya okuvula kwawo noonkalo dhawo odha yoolokathana. Onkene ayehe kaya li taya vulu okukala ye na iinakugwanithwa ya faathana nenge ya kale haya mono iizemo ya faathana sho taya uvitha. Nonando ongawo, Jesus okwa li aluhe ha pandula oonkambadhala dhaalongwa ye ayehe. Shoka oshi iwetikile meyele lyiimaliwa ndyoka a li a gandja. Meyele ndyoka, omulumentu gumwe okwa thigile aaniilonga ye iimaliwa yontumba shi ikolelela “kokuvula kwawo, NW.” Gumwe gwomaaniilonga mboka okwa li a likolitha iimaliwa mbyoka a thigilwa e vulithe mukwawo. Ihe mwene gwawo okwe ya pandula ayehe a ti: “Iyaloo, mumati ngoye omwaanawa nomwiinekelwa!”​—Mat. 25:14-23.

14. Ongiini tatu vulu okuholela omukalo moka Jesus a li hu ungaunga naantu?

¹⁴ Jesus ohu ungaunga aluhe natse pahole nonolukeno. Oku shi kutya okuvula kwetu noonkalo dhetu odha yoolokathana, nohe shi pandula uuna tatu ningi ngaashi tatu vulu. Natse otwa pumbwa okukala hatu ungaunga nayalwe ngaashi Jesus. Katu na nando okuningitha omwiitaali omukwetu a kale u uvite kee na oshilonga, molwaashoka ihaa vulu okuninga iinima mbyoka yalwe megongalo haya vulu okuninga. Pehala lyaashono, natu kale aluhe hatu kongo oompito tu ya pandule sho haya ningi ngaashi taya vulu ya longele Jehova.

15-16. Omumwameme gumwe okwa mono mo ngiini uuwanawa mokwiitulila po omalalakano ngoka ta vulu okwaadha?

¹⁵ Okwiitulila po omalalakano ohaku ningitha onkalamwenyo yetu yi kale tayi ti sha noyi kale yinyanyudha. Ihe otu na okwiitulila po omalalakano shi ikolelela kokuvula kwetu nonkalo yetu, kaapu na okwiiyelekanitha nayalwe. Okwiiyelekanitha nayalwe otaku ke tu teya owala omukumo. (Luk. 14:28) Natu ka taleni koshiholelwa shomumwameme gwedhina Midori, ngoka e li omukokolindjila.

¹⁶ Sho Midori a li okanona, he okwa li he mu lombwele kutya oku vulike kaamwayina ye nosho wo kaanona yomongundu yawo. Midori okwa ti: “Shoka osha li sha ningitha ndje ndi kale ndu uvite kaandi na oshilonga.” Ihe sho a koko ka li we i itala ko ngawo. Okwa ti: “Okulesha Ombiimbeli kehe esiku okwa kwathela ndje ndi kale ndi na ombili yokomutima nondi kale ndu uvite kutya Jehova oku hole ndje.” Shimwe ishewe, okwi itulile po omalalakano ngoka ta vulu okwaadha nokwa kala ha galikana Jehova e mu kwathele e ga adhe. Shoka oshe mu kwathele a kale a nyanyukilwa shoka ta vulu okulongela Jehova.

17. Oshike tashi vulu oku tu kwathela tu lundulule omitima dhetu nosho wo okudhiladhila kwetu, notashi ke tu etela uuwanawa wuni?

¹⁷ Ohashi pula ethimbo, opo omuntu kaa kale we i itala ko nayi. Onkene Jehova ote tu ladhipike ta ti: “Omitima dheni nomadhiladhilo geni naga shituluke lela, ga ninge omape.” (Ef. 4:23, 24) Opo tu shi ninge, otwa pumbwa okukala hatu galikana, hatu konakona Oohapu dhaKalunga nokutedhatedha. Onkee ano, kala ho ningi iinima mbyoka, e to pula Jehova e ku nkondopaleke. Ombepo ye ondjapuki otayi ke ku kwathela wu sinde egamo lyokwiiyelekanitha nayalwe. Jehova ote ke ku kwathela wo wu shi ndhindhilike mo ngele mungoye otamu iyakele ondumbo nenge  uuntsa, note ke ku kwathela wo wu katuke oonkatu nziya wu ninge omalunduluko.

18. Oohapu ndhoka dha popiwa mOndjalulo ontiyali 6:29, 30 otadhi vulu ngiini oku tu hekeleka?

¹⁸ Lesha 2 Ondjalulo 6:29, 30. Jehova oku shi shoka shi li momitima dhetu. Oku shi kutya ohatu kondjitha enwethomo lyuuyuni nosho wo okwaagwanenena kwetu. Sho Jehova ha kala e tu wete tatu kondjitha enwethomo ewinayi, ohole ye yoku tu hola ohayi kolo.

19. Oshiholelwa shini Jehova a longitha, opo e tu ulukile nkene ha kala e tu uvitile?

¹⁹ Opo e tu ulukile nkene ha kala e tu uvitile, Jehova okwa longitha oshiholelwa shohole ndjoka hayi kala pokati kokahanona nayina. (Jes. 49:15) Natu ka taleni koshiholelwa shomumwameme gwedhina Rachel. Okwa nyola a ti: “Okamwanakadhona kandje, Stephanie, oka valwa ethimbo inaali thika. Sho nde mu mono oshikando shandje shotango okwa li lela okapelema, nokwa li ta monika kee na oonkondo. Ihe aapangi oya li ya pitike ndje ndi kale handi mu ukata kehe esiku sho opo a valwa. Shoka oshe tu kwathele tu kokeke ekwatathano lyetu. Ngashingeyi oku na omimvo hamano noku na olutu olushona noonkondo ngele owe mu yelekanitha naanona yalwe yepipi lye. Nonando ongawo, ondi mu hole noonkondo, oshoka okwa kondja a mana mo a kale nomwenyo nokwe etela ndje enyanyu enene monkalamwenyo yandje.” Itashi hekeleke tuu okutseya kutya Jehova naye osho ha kala e tu uvitile ngawo uuna e tu tala sho tatu mu longele nomwenyo gwetu aguhe!

20. Wu li omulongeli gwaJehova, oshike to vulu okunyanyukilwa?

²⁰ Molwaashoka owu li omulongeli gwaJehova, okwe ku tala ko wu li oshilyo sha simana noshi na oshilonga shuukwanegumbo we womuuyuni awuhe. Jehova ine ku nanena kuye, molwaashoka andola wu vule aantu yalwe. Okwe ku nanene kuye, molwaashoka sho a konakona omutima gwoye okwa mono kutya owu li omuntu omwiifupipiki nowu na ehalo lyokulongwa kuye nokuninga omalunduluko. (Eps. 25:9) Kala wu shi kutya okwa pandula noonkondo sho ho ningi ngaashi to vulu wu mu longele. Okwiidhidhimika kwoye nosho wo uudhiginini woye kuye otawu ulike kutya owu na ‘omwenyo omwaanawa gu na evuliko.’ (Luk. 8:15) Onkee ano, tsikila okupa Jehova aluhe shoka sha dhenga mbanda. Shoka otashi ke ku kwathela wu nyanyukilwe ‘shoka to vulu oku mu longela.’