▪ Jehova okwa hala shili aantu yaali mboka ya hokanathana ya kale ya nyanyukwa noya kale nekwatathano lyopothingo tali kalelele. (Mat. 19:4-6) Ngele owa hala okuya mondjokana, ongiini to vulu okwiikongela kuume kopandjokana to opalele? Jehova, ngoka e li Omushiti gwetu, oku shi shoka twa pumbwa okuninga, opo tu kale tu na ondjokana ombwanawa notayi kalelele. Onkee ano, ngele owa tula miilonga omakotampango ngoka e tu pa, oto ka kala wa nyanyukwa lela. Natu ka tale kugamwe gomugo.

Shotango, otu na oku shi uva ko kutya “omwenyo ogwo omunamakoto kombanda yiinima ayihe, nokagu shi kwaaludhwa.” (Jer. 17:9) Uuna aantu yaali mboka ya hala okuya mondjokana ya tameke okweendelathana, ohaya tameke okukala ye na omahalo gontumba, nohashi kala oshidhigu kuyo okuninga omatokolo ge li pandunge. Ngele aantu oya tokola okuya mondjokana shi ikolelela owala kunkene yu uvite momitima dhawo, mokweendela ko kwethimbo otashi vulike ye ki ipe uusama. (Omayel. 28:26) Nomolwaashono kaashi li pandunge kaantu mboka taye endelathana yi ihololele omaiyuvo sho opo owala ya tameke okweendelathana nenge yi iningile omauvaneko omanga kaaye shaathane natango nawa.

Omayeletumbulo 22:3 oga ti: “Omuntu onkotoki ota tala oshiponga e ta ka holama, ihe mboka yanathangwa omo taa yi e taa yemata.” Mbela oshiponga shini tashi vulu okuza mokukonga kuume kopandjokana okupitila kointaneta? Shiyemateka, yamwe mboka ya longitha omukalo ngoka oye ki iyadha tayi ipe uusama sho ye ke shi ndhindhilika mo kutya mboka taye endelathana nayo oye ya kotokela. Shimwe ishewe, aantu mboka hayi iningitha ya fa ye li nawa ohaya gandja omauyelele kombinga yawo kaage li mondjila, opo ya vule okuyaka po iimaliwa yaamboka taye endelathana nayo. Omathimbo gamwe ohayi iti nokuli kutya yo Oonzapo.

Natu taleni ishewe ketompelo limwe kutya omolwashike okukonga kuume kopandjokana okupitila kointaneta kwa nika oshiponga. Omapandja gamwe gokointaneta ngoka ohaga longitha ookompiuta odho dhi hogololele aantu mboka taye ya opalele. Nonando ongawo, kapu na uushili kutya omikalo ndhoka ohadhi longo shili. Itashi ka kala pandunge okwiinekela opolohalama yokompiuta oyo yi ku hogololele ngoka wu na okweendelathana naye, ngoka tashi vulika nokuli wu kaye naye mondjokana. Omakotampango gOmbiimbeli ogo owala taga vulu oku tu pa omayele ge shi okwiinekelwa ge na ko nasha nokukonga kuume kopandjokana to opalele.​—Omayel. 1:7; 3:5-7.

 Ekotampango ndyoka tali adhika mOmayeletumbulo 14:15, otali ti: “Omuntu gwanathangwa oti itaale shaa ohapu, ihe onkotoki ota ndhindhilike oonkatu dhe.” Manga inoo tokola kutya omuntu gwontumba ota vulu okukala kuume koye kopandjokana, owa pumbwa oku mu tseya nawa tango. Ihe ngele omu shaathane owala okupitila kointaneta, otashi ka kala oshidhigu wu mu tseye kutya okuli omuntu a tya ngiini shili. Ngele omwa kala hamu tuminathana omatumwalaka pandjigilile nowu shi uuyelele owundji kombinga yomuntu ngoka, mbela shoka osha hala lela okutya owu mu shi thiluthilu? Yamwe mboka ya li taya dhiladhila kutya oya mona kuume kopandjokana e li nawa, mokweendela ko kwethimbo sho ya tsakanene naye oye ke shi mona mo kutya omuntu ngoka ke li ngaashi ya li taya dhiladhila.

Omupisalomi okwa ti: “Kandi na uukuume naantu yaa fele; kandi na ko nasha naayiningithi.” (Eps. 26:4) Aantu oyendji mboka haya longitha omapandja gokukonga mboka ya hala okweendelathana nayo inaya tala ko okupopya iifundja kwa puka, onkene ohaya gandja uuyelele kaawu li paushili kombinga yawo, opo ya monike ya fa aantu ye li nawa. Osha simana okwiipula kombinga yomapulo taga landula: Nonando aantu yamwe ohayi iti kutya yo Oonzapo dhaJehova, mbela oye li ngaa Aakriste ya ninginithwa shili? Oye na ngaa uupambepo uuwanawa? Oye na ngaa ekwatathano ewanawa naJehova? Oye na ngaa eihumbato ewanawa megongalo? Nenge ohayi ihumbata momukalo omwiinayi noye li nokuli “eendathano ewinayi”? (1 Kor. 15:33, NW; 2 Tim. 2:20, 21) Mbela pamithikampango dhOmbiimbeli oya manguluka ngaa okuya mondjokana? Osha simana wu tseye omayamukulo gomapulo ngono. Onkene otashi ka kala pandunge wu pule gumwe gwomOonzapo ngoka e shi omuntu ngoka nawa, opo e ku lombwele oshindji kombinga ye. (Omayel. 15:22) Odhoshili kutya omupiya gwaJehova omudhiginini ita ka kala a hala “okulongela kumwe” nomuntu ngoka kee shi omwiitaali.​—2 Kor. 6:14; 1 Kor. 7:39.

Molwaashoka osha nika oshiponga okukonga kuume kopandjokana okupitila komapandja gokointaneta, opu na omikalo dhilwe omiwanawa dhokukonga kuume kopandjokana nokutseyathana nawa naye, shoka tashi ke mu kwathela mu ka kale nondjokana yi li nawa. Mbela openi to vulu okwaadha omuntu ngoka to opalele okuya naye mondjokana? Uuna okugongala kwaantu oyendji inaaku indikwa, Oonzapo dhaJehova ohadhi tseyathana nawa nooitaali ooyakwawo pokugongala, piigongi iishona niinene nosho wo puututhi.

Uuna okugongala pamwe mIinyanga yetu inaaku pitikwa, ngaashi pethimbo ndino lyoshivu sho-COVID-19, ohatu gongala okupitila momakwatathano gopaintaneta, mpoka tatu vulu okutseyathana nOonzapo ndhoka inaadhi ya natango mondjokana. Pokugongala oto vulu okumona sho omuntu ta gandja iipopiwa ye nokumona nkene ta hempulula eitaalo lye. (1 Tim. 6:11, 12) Otashi vulika wo mu popye po mu li one amuke mo-Zoom konima yokugongala. Uuna mwa gongala okupitila momakwatathano gopaintaneta mu li ongundu, oto vulu okumona nkene omuntu ngoka wu na ohokwe muye hi ihumbatele yalwe, shoka tashi ku ulika uukwatya we washili. (1 Pet. 3:4) Mokweendela ko kwethimbo, sho to ende to mu tseya, oto vulu okutokola ngele omalalakano geni oga faathana nongele otamu ka vula ngaa okulongela kumwe mu li aaihokani.

Uuna omuntu ta kongo ngoka ta vulu okuya naye mondjokana momikalo ndhoka tadhi tsu kumwe nomakotampango gOmbiimbeli, ota ka mona uushili weyeletumbulo ndyoka tali ti: “Nakumona omukulukadhi [nenge omusamane] e li nawa oku na elago, a likola ohokwe yOmuwa.”​—Omayel. 18:22.