1. Ehalo lyaJehova olini kunena?

 KUNENA Kalunga okwa hala onkundana ombwanawa yUukwaniilwa yi uvithilwe aantu ayehe kombanda yevi. (Mark. 13:10; 1 Tim. 2:3, 4) Iilonga mbika oyaJehova nosha simana lela sho a tula po Omwana omuholike oye e yi tonatele. Onkee otatu vulu okukala nuushili kutya Jesus ngoka oye Omuwiliki ta opalele, iilonga mbika yokuuvitha oyi na okupwa ngaashi Jehova a hala, manga ehulilo inaa li ya. — Mat. 24:14.

2. Oshike tatu ka kundathana moshitopolwa shika?

² Moshitopolwa shika, otatu ka tala kunkene Jesus ta longitha ‘[“omupiya” NW] gwe omudhiginini nomunandunge’ a gandje omalombwelo okuza mOmbiimbeli, nokuunganeka aalanduli ye ya kuthe ombinga moshikonga oshinene shokuuvitha shoka inaashi ningwa nando onale mondjokonona. (Mat. 24:45) Otatu ka tala wo kwaashoka kehe gumwe gwomutse ta vulu okuninga a yambidhidhe Jesus nomupiya omudhiginini.

3. Jesus okwa pewa uuthemba wuni?

³ Jesus oye ta wilike iilonga yokuuvitha. Otu shi shi ngiini? Nziya manga inaaya megulu, okwa li a tsakanene naalongwa ye yamwe aadhiginini kondundu Galilea. Okwe ya lombwele a ti: “Ongame nda pewa epangelo alihe megulu nokombanda yevi.” Okwa gwedha ko ishewe a ti: “Indeni ano, ka ningeni aantu [“yomiigwana ayihe,” NW] aalongwa yandje.” (Mat. 28:18, 19) Onkee, shimwe shomiinima mbyoka Jesus a pewa, uuthemba wokuwilika iilonga yokuuvitha.

4. Omolwashike tatu vulu okukala nuushili kutya Jesus oye natango ta wilike iilonga yokuuvitha?

⁴ Jesus okwa li a popi kutya opwa li tapu ka longwa iilonga yokuuvitha nokuninga aantu “yomiigwana ayihe” aalongwa nosho  wo kutya okwa li ta ka kala naalanduli ye “omasiku agehe sigo ehulilo lyuuyuni.” (Mat. 28:20) Oohapu ndhoka otadhi shi ulike sha yela kutya iilonga yokuuvitha oya li tayi ka tsikila okuwilikwa kuJesus sigo opethimbo lyetu.

5. Ohatu kwathele ngiini mokugwanitha po ehunganeko ndyoka li li mEpisalomi 110:3?

⁵ Jesus ka li a limbililwa ngele otapu ka kala pu na ompumbwe yaalongi pethimbo lyehulilo lyuuyuni. Okwa li e shi kutya oohapu dhehunganeko dhomupisalomi gumwe ndhoka tadhi ti: “Mesiku to homona aatondi yoye, aalelwa yoye otaye ku kwatha molugodhi” otadhi ka gwanithwa. (Eps. 110:3) Ngele oho kutha ombinga miilonga yokuuvitha onkundana ombwanawa, oto yambidhidha Jesus nosho wo omupiya omudhiginini nomunandunge noto kwathele mokugwanitha po ehunganeko ndyoka. Ihe nonando iilonga yokuuvitha otayi pula komeho, opu na omashongo.

6. Eshongo limwe lini aauvithi yUukwaniilwa hayi iyadha mulyo kunena?

⁶ Eshongo limwe aauvithi yuukwaniilwa hayi iyadha mulyo, okupatanekwa. Aashunimonima, aawiliki yomalongelokalunga nosho wo aanapolotika ohaya popi iifundja kombinga yiilonga yetu. Ngele aakwanezimo yetu, aashiwikile nosho wo aalongi pamwe natse oya pukithwa kiifundja mbyoka, ohashi vulika ye tu thiminike tu ethe po okulongela Jehova nosho wo okuuvitha. Miilongo yimwe, aamwatate naamwameme ohaya patanekwa mokuningilwa omatilitho, okukwatwa po, nokuli nokutulwa mondholongo. Katu na okukala twa kumwa ngele aantu ohaya ungaunga natse momukalo gwa tya ngaaka. Jesus okwa li a hunganeke a ti: “One tamu ka tondwa kaantu ayehe omolwandje.” (Mat. 24:9) Sho tu tondike kaantu, oshi li euliko kutya ohatu landula oshiholelwa shaJesus nosho wo kutya Jehova okwe tu hokwa. (Mat. 5:11, 12) Ondiyapoli oyo hayi hwahwameke aantu mboka ye tu pataneke. Ihe Jesus oku na oonkondo e vule Ondiyapoli! Kekwatho lyaJesus, onkundana ombwanawa otayi uvithilwa aantu yomiigwana ayihe. Natu ka taleni kuumbangi wumwe.

7. Uumbangi wuni wu wete tawu ulike kutya Ehololo 14:6, 7 otali gwanithwa kunena?

⁷ Tu li aauvithi yUukwaniilwa, eshongo limwe ndyoka tu na olyo kutya aantu ohaya popi omalaka ogendji ga yoolokathana. Jesus okwa li a hunganeke kutya pethimbo lyetu onkundana ombwanawa otayi ka uvithwa nonando opu na eshongo ndyoka, memoniko ndyoka a li a hololele omuyapostoli Johannes. (Lesha Ehololo 14:6, 7.) Ngiini mbela? Ohatu pe aantu oyendji ompito ngaashi tashi vulika ya pulakene ketumwalaka lyUukwaniilwa. Kunena, aantu muuyuni ohaya vulu okulesha uuyelele wa kankamena kOmbiimbeli kepandja lyetu lyokointaneta, jw.org, molwaashoka owu li ko momalaka ge vulithe 1 000! Olutuwiliki olwa li wo lwa gandja epitikilo ku tolokwe embo Kala nonkalamwenyo ombwanawa sigo aluhe momalaka ge vulithe 700, ndyoka olyo unene li li oshilongitho shoka hatu longitha tu ninge aantu aalongwa. Oombolo nadho odha longekidhilwa wo iileshomwa yi li molupe lwuuvidio, naaposi oya longekidhilwa iileshomwa yoshiposi. Onkee otu wete nkene omahunganeko gOmbiimbeli taga gwanithwa. Aantu “yomalaka agehe” gomiigwana otaya ilongo okupopya “elaka lya yogoka,” ano oshili yOmbiimbeli. (Sak. 8:23, OB-1954; Sef. 3:9, NW) Ashihe shoka otashi gwanithwa po owala molwaashoka ngoka ta wilike iilonga mbyoka oJesus Kristus, ngoka e li Omuwiliki ta opalele.

8. Iilonga yetu yokuuvitha oya eta iizemo yini?

⁸ Kunena, aantu ye vulithe po 8 000 000 ye li miilongo 240 oye li oshitopolwa shehangano lyaJehova, nomumvo kehe aantu ye vulithe po 100 000 ohaya ninginithwa! Ihe shimwe sha simana unene shi vule omiyalu, uukwatya wopaKriste, ano “omuntu omupe” ngoka aalongwa mboka aape ngashingeyi ya zala. (Kol. 3:8-10) Oyendji oye etha po eihumbato lya nyata,  okulongitha oonkondo, okatongo nosho wo ombepo yuukwashigwana. Ehunganeko ndyoka li li muJesaja 2:4 nalyo otali gwanithwa. Aalongwa mboka “itayi ilongekidhile we olugodhi.” Molwaashoka ohatu longo nuudhiginini tu zale omuntu omupe, ohatu kwathele aantu ye ye mehangano lyaKalunga. Ohatu ulike wo kutya ohatu landula Omuwiliki gwetu Kristus Jesus. (Joh. 13:35; 1 Pet. 2:12) Iinima ayihe mbyoka ihaya po owala ngeyaka, ihe oshi li euliko kutya Jesus oye te tu pe ekwatho ndyoka twa pumbwa.

9. Shi ikolelela kuMateus 24:45-47, Jesus okwa li a popi shike shoka tashi ningwa pethimbo ndika lyehulilo?

⁹ Lesha Mateus 24:45-47. Jesus okwa li a hunganeke kutya pethimbo lyehulilo ota ka langeka po ‘omupiya omudhiginini nomunandunge’ a gandje omalombwelo taga zi moohapu dhaKalunga. Onkee otu na okukala twa tegelela omupiya ngoka a kale ha longo nuudhiginini pethimbo lyetu. Naashoka osho a kala ha ningi shili. Jesus okwa kala ta longitha okangundu okashona kaagwayekwa ya pe oshigwana shaKalunga nosho wo aantu mboka ye na ohokwe “iikulya pethimbo lyo opala.” Aalumentu mbaka inayi itala ko kutya oye na okuthiminikila aantu yalwe eitaalo. (2 Kor. 1:24) Pehala lyaashono, oye shi tala ko kutya Jesus Kristus oye “omuwiliki nondjayi” yoshigwana she. — Jes. 55:4.

10. Oshini shomiileshomwa mbika ya ulikwa methano she ku tompo wu tameke okulongela Jehova?

¹⁰ Okuza mo 1919 omupiya omudhiginini okwa longekidha iileshomwa yi ili noyi ili mbyoka ya kwathela aantu yi ilonge oshili mOohapu dhaKalunga. Mo 1921 omupiya ngoka okwa longekidha embo The Harp of God li kwathele aantu mboka ye na ohokwe yi ilonge oshili yOmbiimbeli yopetameko. Sho omathimbo ga ende taga lunduluka, okwa longekidha wo iileshomwa yilwe. Oshileshomwa shini she ku kwathela wu tseye nowu kale wu hole Tate yetu gwomegulu? Mbela embo “Let God Be True,” Oshili  ndjoka tayi fala kOmwenyo Gwaaluhe, Ngoye Oto Vulu Okukala nOmwenyo Sigo Aluhe mOparadisa kombanda yEvi, Ontseyo ndjoka tayi fala komwenyo gwaaluhe, Omalongo gashili gOmbiimbeli ogeni naanaa?, Ombiimbeli otayi tu longo shike?, nenge embo lyetu Kala nonkalamwenyo ombwanawa sigo aluhe ndyoka epeepeka? Iileshomwa ayihe mbika oya longekidhwa yi tu kwathele tu ninge aantu aalongwa, yo oyo naanaa twa li twa pumbwa sho ya nyanyangidhwa.

11. Omolwashike sha simana atuheni twi ilonge kombinga yaJehova nOmbiimbeli?

¹¹ Aantu mboka opo tayi ilongo oshili hayo owala ya pumbwa ontseyo yomuule kombinga yaJehova nOmbiimbeli. Atuheni otwe yi pumbwa. Omuyapostoli Paulus okwa nyola a ti: “Iikulya ya kola oyaakuluntu.” Okwa gwedha ko a ti kutya ngele otwa tula miilonga shoka tatu ilongo mOmbiimbeli, otashi ke tu kwathela tu kale tu shi “okuyoolola shoka shu uka nenge sha puka.” (Heb. 5:14) Ohashi vulu okukala oshidhigu okuvulika komithikampango dhaJehova ngashingeyi, molwaashoka aantu oyendji oye na eihumbato lya nyata. Ihe Jesus oha shilipaleke kutya otwa mona uuyelele mboka twa pumbwa tawu tu kwathele tu kale tu na eitaalo lya kola. Ohatu mono uuyelele mboka mOohapu dhaKalunga dha nwethwa mo, Ombiimbeli. Omupiya omudhiginini oha longekidha iikulya mbyoka nohe yi tu topolele ta wilikwa kuJesus.

12. Ngaashi Jesus otwe shi ulika ngiini kutya otwa simaneka edhina lyaKalunga?

¹² Ngaashi Jesus, ohatu simaneke edhina lyaKalunga ngaashi shi na okukala. (Joh. 17:6, 26) Pashiholelwa, mo 1931 otwa tameke okukala hatu ithanwa edhina li li mOmbiimbeli, Oonzapo dhaJehova, kungawo otu ulike nkene edhina lyaKalunga lya simana kutse nosho wo kutya otwa li twa hala tu kale tu shiwikile nedhina lyaTate yetu gwomegulu. (Jes. 43:10-12) Shimwe ishewe, okuza muKotoba gwomumvo ngoka, edhina lyaKalunga olya kala hali holoka kombanda yoshifo shika. Oshikwawo, Ombiimbeli yo-New World Translation of the Holy Scriptures sho  ya tolokwa, edhina lyaKalunga olya tulwa mo mpoka li na okukala. Shoka inashi yooloka ko tuu koongeleka dhUukwakriste ndhoka dha kutha mo edhina lyaJehova mOombiimbeli dhawo odhindji!

13. Oshike she ku tompa kutya Jesus ota longitha ‘omupiya omudhiginini nomunandunge’ kunena? (Johannes 6:68)

¹³ Jesus oha wilike ehangano lya dhenga mbanda kombanda yevi ta longitha ‘omupiya omudhiginini nomunandunge,’ a humithe komeho elongelokalunga lya yogoka. Ehangano ndika owu li uvitile ngiini? Otashi vulika wu uvite ngaashi Petrus ngoka a li a yamukula Jesus a ti: “Otatu yi kulye? Ngoye ou na oohapu ndhoka tadhi gandja omwenyo gwaaluhe.” (Joh. 6:68) Andola otwa li inaatu ya mehangano lyaJehova, ando ngashingeyi otu li peni? Okupitila mehangano ndika, Kristus oha shilipaleke kutya otu na kehe shimwe shoka twa pumbwa, opo tu kale aadhiginini kuKalunga. Ohe tu dheula wo tu kale hatu pondola miilonga yokuuvitha. Shimwe ishewe, ohe tu kwathele tu zale “omuntu omupe” opo tu nyanyudhe Jehova. — Ef. 4:24.

14. Wu li oshitopolwa shehangano lyaJehova, uuwanawa wuni wa mona pethimbo lyomukithi gwekomba gwo-COVID-19?

¹⁴ Jesus ohe tu pe omayele omawanawa uuna tu li muudhigu. Pashiholelwa, otwa li twa mono uuwanawa momalombwelo ngoka twa li twa pewa sho omukithi gwekomba gwo-COVID-19 gwa tameke. Nonando aantu oyendji muuyuni oya li kaaye shi kutya naya ninge shike, Jesus okwa li a shilipaleke kutya otwa mona omalombwelo ga yela kombinga yankene tu na okukala twa gamenwa. Otwa li twa ladhipikwa tu zale uumaska uuna tu li momahala gaayehe nokwiikala kokule. Aakuluntugongalo oya li ya dhimbulukithwa ya kale haya tala aluhe aakwanegongalo ayehe kutya oye li ngiini palutu nosho  wo kutya ekwatathano lyawo naJehova oli li ngiini. (Jes. 32:1, 2) Olutuwiliki olwa li wo lwe tu pe omalombwelo ga gwedhwa po netsomukumo okupitila muuvidio womatseyitho.

15. Omalombwelo geni twa li twa pewa ge na ko nasha nokugongala nosho wo kombinga yokuuvitha pethimbo lyomukithi gwekomba, niizemo yini twa mona?

¹⁵ Pethimbo lyomukithi gwekomba, otwa li wo twa pewa omalombwelo ga yela kombinga yankene tu na okuninga okugongala nokukutha ombinga miilonga yokuuvitha. Nziya otwa li twa tameke okugongala kwegongalo, iigongi yoshikandjo noyoshitopolwa tatu longitha omakwatathano gopaintaneta. Otwa li wo twa tameke okugandja uunzapo tatu nyola oontumwafo nokudhenga oongodhi. Jehova okwa yambeke oonkambadhala dhetu. Miitayimbelewa oyindji omwa lopotwa omwaalu gwa indjipala lela gwaauvithi. Nokuli aamwatate naamwameme oyendji oya mona iimoniwa tayi tsu omukumo pethimbo ndika. — Tala oshimpungu “ Jehova oha yambeke iilonga yetu yokuuvitha.”

16. Otatu vulu okukala tu na uushili wuni?

¹⁶ Aantu yamwe otashi vulika ya li ye uvite kutya ehangano lyaJehova olya li lya tula po oompango dha pitilila unene dhi na ko nasha nomukithi gwekomba. Ihe ethimbo nethimbo, osha li shi iwetikile kutya omalombwelo ngoka twa li twa pewa oga li lela pandunge. (Mat. 11:19) Sho tatu tedhatedha komukalo gwopahole moka Jesus ta wilike oshigwana she, ohashi tu shilipaleke kutya nonando monakuyiwa otu ki iyadhe monkalo ya tya ngiini, Jehova nOmwana omuholike otaya ka kala aluhe pamwe natse. — Lesha Aahebeli 13:5, 6.

17. Owu uvite ngiini sho hatu wilikwa kuJesus?

¹⁷ Otwa nyanyukwa noonkondo sho tu na Jesus oye Omuwiliki gwetu! Otu li mehangano ndyoka inaali topolwa komithigululwakalo, kuukwashigwana nokomalaka. Ohatu mono uuyelele owundji okuza moohapu dhaKalunga nohatu pewa edheulo ndyoka twa pumbwa, opo tu gwanithe po iilonga yetu yokuuvitha. Kehe gumwe gwomutse oha longwa nkene e na okuzala omuntu omupe nohatu ilongo tu kale tu holathane. Onkee otu na lela omatompelo omawanawa gokwiitadha sho tu na Jesus oye e li Omuwiliki gwetu!