1. Uushili wuni tu na, nomolwashike?

 MBELA ohashi kala oshidhigu kungoye okwiitaala kutya iinima onayi ka hwepopale ngaa, uuna wa tala koonkalo moka uuyuni wu li kunena? Pashiholelwa, aakwanezimo kaye holathane we lela ngaashi nale. Aantu oye hole uuhwapindi nelongithonkondo shi vulithe nale, noyi ihole yoyene. Oyendji ohaye shi mono oshidhigu okwiinekela mboka ye na oonkondopangelo. Nonando ongawo, oonkalo ndhika tu li mudho otadhi tu ulukile kutya iinima otayi ka hwepopala. Omolwashike tatu tile ngawo? Oshoka aantu kunena ohaya ihumbata ngaashi naanaa Ombiimbeli ya hunganeka kutya osho otaya ka kala ngaaka “momasiku ga hugunina.” (2 Tim. 3:1-5, NW) Kapu na omuntu omunashili ta vulu okuludhika kutya ehunganeko ndyoka otali gwanithwa kunena. Shoka otashi koleke wo kutya Kristus Jesus okwa tameka okupangela e li Omukwaniilwa gwUukwaniilwa waKalunga. Ihe ndyoka limwe owala lyomomahunganeko ogendji ngoka taga popi kombinga yUukwaniilwa. Ngele otwa konakona kombinga yomahunganeko galwe ngoka ga gwanithwa omimvo opo dha zi ko, otashi ka koleka eitaalo lyetu.

2. Otatu ka kundathana shike moshitopolwa shika, nomolwashike? (Gandja etyokosha kethano lyokombanda.)

² Moshitopolwa shika, otatu ka kundathana (1) ehunganeko ndyoka tali tu kwathele tu uve ko kutya Uukwaniilwa owa dhikwa po uunake, (2) omahunganeko ngoka tage tu kwathele tu uve ko nawa okukala po kwaJesus kaaku wetike nomeho gokomutse e li Omukwaniilwa gwUukwaniilwa waKalunga nosho wo (3) omahunganeko ngoka taga popi nkene aatondi yUukwaniilwa waKalunga taya ka hanagulwa po. Otatu ka mona kutya omahunganeko agehe otaga tsu kumwe ngaashi uupambu wethano mboka hawu tulwa kumwe wu ete po ethano lya yela. Otage tu kwathele tu mone kutya ehulilo otali ya masiku ngaashi naanaa Jehova a uvaneka.

3. Ehunganeko ndyoka li li muDaniel 7:13, 14 otali tu shilipaleke shike kombinga yOmukwaniilwa gwUukwaniilwa waKalunga?

³ Ehunganeko ndyoka tali adhika muDaniel 7:13, 14 otali tu shilipaleke kutya Kristus Jesus oye a gwana shili okukala Omupangeli gwUukwaniilwa waKalunga. Aantu yomiigwana ayihe otaye ke “mu longela” nehalo ewanawa, nokapu na ngoka te ke mu pingena po e li Omupangeli. Ehunganeko lilwe lyomembo lyaDaniel olya hunganeka kutya Jesus ota ka tameka okupangela mUukwaniilwa mboka pehulilo lyethimbo ndyoka lya popiwa kutya omimvo heyali nenge tu tye omathimbo gaheyali. Mbela otatu vulu ngaa okutseya kutya Jesus okwa langekwa po e li Omukwaniilwa uunake?

4. Yelitha nkene Daniel 4:10-17 te tu kwathele tu mone kutya Kristus okwa langekwa po momumvo guni e li Omukwaniilwa. (Tala wo enyolo lyopevi.)

⁴ Lesha Daniel 4:10-17. “Omimvo heyali [nenge tu tye omathimbo gaheyali]” otaga thaneke omimvo 2 520. Ethimbo ndyoka olya tameke mo 607 K.E.N., sho Aababilonia ya kutha ko omukwaniilwa gwahugunina koshipangelapundi shaJehova muJerusalem. Olya hulu mo 1914 E.N., sho Jehova a langeke po Jesus ‘ngoka a hogolola’ a ninge Omukwaniilwa gwUukwaniilwa We. * — Hes. 21:25-27.

5. Omukalo gumwe guni tatu vulu okumona mo uuwanawa mehunganeko kombinga ‘yomimvo heyali’?

⁵ Ehunganeko ndika otali vulu ngiini oku tu etela uuwanawa? Ngele otu uvite ko ehunganeko ndyoka tali popi kombinga ‘yomimvo heyali,’ otatu kala tu na omukumo kutya Jehova oha gwanitha po aluhe omauvaneko ge pethimbo. Ngaashi owala a li a tula po ethimbo lyokondandalunde lyokudhika po Uukwaniilwa we, ota ka shilipaleka wo kutya omahunganeko galwe agehe ote ke ga gwanithwa po pethimbo ndyoka a tula po. Eeno, esiku lyaJehova “itali kala ko.” — Hab. 2:3, NW.

6. (a) Oshike tu wete kunena shoka tashi koleke kutya Jesus okwa tameka okupangela megulu? (b) Uumbangi mboka owa kolekwa ngiini kehunganeko ndyoka li li mEhololo 6:2-8?

⁶ Lwopehulilo lyuukalele we kombanda yevi, Jesus okwa li a hunganeke kombinga yiiningwanima yontumba mbyoka tayi kwathele aalanduli ye ya tseye kutya okwa tameka okupangela megulu. Yimwe yomiinima mbyoka a li a hunganeke ongaashi iita, oondjala, nomakakamo gevi. Okwa hunganeke wo kutya ota ku kala omalega nenge omikithi “koombinga noombinga,” shoka shi iwetikile ngele otwa tala komukithi gwekomba gwo-COVID-19 ngoka gwi ihanena muuyuni. Iiningwanima ayihe mbyoka oyi li ‘endhindhiliko tali holola’ okukala po kwaKristus. (Mat. 24:3, 7; Luk. 21:7, 10, 11) Konima yomimvo dha konda po 60, sho Jesus a si e ta shuna megulu, okwa li a shilipaleke omuyapostoli Johannes kutya iiningwanima mbyoka otayi ka ningwa shili. (Lesha Ehololo 6:2-8.) Iiningwanima ayihe mbyoka oya kala tayi holoka muuyuni konima sho Jesus a langekwa po e li Omukwaniilwa mo 1914.

7. Omolwashike oonkalo kombanda yevi dha nayipala konima sho Jesus a tameke okupangela?

⁷ Omolwashike oonkalo kombanda yevi dha nayipala konima sho Jesus a langekwa po e li Omukwaniilwa? Ehololo 6:2 oli na uuyelele wa simana kutya oshinima shotango shoka Jesus a ningi sho a langekwa po e li Omukwaniilwa, okwa yi molugodhi. Okwa kondjo nalye? OnOndiyapoli noompwidhuli dhayo. Shi ikolelela kEhololo ontopolwa 12, Satana noompwidhuli dhe oya sindika, e taya umbilwa kombanda yevi. Shoka osha ningitha Satana a kale a udha ondjahi, nokwa kala ta monitha aantu “iihuna” kombanda yevi. — Eh. 12:7-12.

8. Sho tu wete omahunganeko kombinga yUukwaniilwa taga gwanithwa, otashi vulu ngiini oku tu etela uuwanawa?

⁸ Omahunganeko ngaka otaga vulu ngiini oku tu etela uuwanawa? Iiningwanima muuyuni nosho  wo eihumbato lyaantu ndyoka lya lunduluka li iwetikile apuhe, otayi tu kwathele tu mone kutya Jesus okwa tameka okupangela. Onkee ano, pehala lyokukala twa geya uuna tu wete aantu ye na iikala yokwiihola mwene nuutondwe, natu dhimbulukwe kutya okukala kwawo ye na iikala mbyoka oku li egwanitho lyaashoka Ombiimbeli ya hunganeka. Uukwaniilwa owa dhikwa po! (Eps. 37:1) Otwa tegelela okumona oonkalo muuyuni dhi ende tadhi nayipala sho Armageddon ta hedha popepi. (Mark. 13:8; 2 Tim. 3:13) Otwa pandula noonkondo Tate yetu gwomegulu sho he tu kwathele tu uve ko kutya omolwashike muuyuni mu udha omaupyakadhi ogendji.

9. Ehunganeko ndyoka li li muDaniel 2:28, 31-35 otali popi shike kombinga yepangelo enankondo lyuuyuni lyahugunina, nolya holoka uunake?

⁹ Lesha Daniel 2:28, 31-35. Otu wete ehunganeko ndika nkene tali gwanithwa po kunena. Ondjodhi yaNebukadnezzar otayi ulike kiinima mbyoka ya li tayi ka ningwa ‘monakuyiwa [nenge tu tye pehulilo lyomasiku ga hugunina],’ konima sho Kristus a tameke okupangela. Aatondi yaJesus oya kwatela mo epangelo lyahugunina enankondo lyuuyuni ndyoka lya hunganekwa mOmbiimbeli, tali thanekwa ‘koompadhi dhoshiyela sha kwatakanithwa mumwe neloya.’ Epangelo ndyoka enankondo otali pangele nale. Olya holoka pIita yoTango yUuyuni sho Britania naAmerika ya tameke okulongela kumwe, e taya ningi Anglo-Amerika. Oshiyelekela shomondjodhi yaNebukadnezzar osha hunganeka wo iinima iyali kombinga yepangelo ndyoka enankondo, mbyoka tayi ke li ningitha li kale lya yooloka ko komapangelo galwe ngoka ga li ko.

10. (a) Oshike tu wete mepangelo enankondo lyaAnglo-Amerika kunena, shoka sha hunganekwa kuDaniel? (b) Oshiponga shini tu na okuyanda? (Tala oshimpungu “ Kala wa kotokela eloya!”)

¹⁰ Shotango, mepingathano nomapangelo omanankondo guuyuni ngoka taga thanekwa koshiyelekela  shomondjodhi yaNebukadnezzar, epangelo lyaAnglo-Amerika inali thanekwa koshiyela ngaashi oshingoli nenge oshisiliveli, ihe olya thanekwa li li oshiyela sha kwatakanithwa mumwe neloya. Eloya otali thaneke “aantu,” nenge tu tye aakwashigwana. (Dan. 2:43, NW) Ngaashi hatu shi mono kunena, enwethomo lyaantu momahogololo, momakanka omanene nomomahangano ngoka ge lile po uuthemba waaniilonga, ohali shi ningitha oshidhigu kaaleli yepangelo ndyoka enankondo lyuuyuni ya gwanithe po omalalakano gawo.

11. Epangelo enankondo lyuuyuni lyaAnglo-Amerika otali koleke ngiini einekelo lyetu kutya otu li pethimbo lyehulilo?

¹¹ Oshitiyali, ngaashi sha ulikwa koompadhi dhoshiyelekela oshinene, Anglo-Amerika olyo epangelo lyahugunina enankondo lyuuyuni lya hunganekwa mOmbiimbeli. Itali ka pingenwa po kepangelo lilwe lyopapolotika. Pehala lyaashono, otali ka hulithwa po puArmagedon sho Uukwaniilwa waKalunga tawu ke li hanagula po mwa kwatelwa wo omapangelo galwe gopantu. * — Eh. 16:13, 14, 16; 19:19, 20.

12. Ehunganeko lyaDaniel oli na uumbangi wulwe wuni tawu tu hekeleke notawu tu pe etegameno?

¹² Ehunganeko ndika otali vulu ngiini oku tu etela uuwanawa? Ehunganeko lyaDaniel otali tu pe uumbangi wa gwedhwa po kutya otu li pethimbo lyehulilo. Omimvo 2 500 dha ka pita, Daniel okwa li a hunganeke kutya konima yepangelo lyaBabilonia, omapangelo galwe omanankondo guuyuni otaga ka hepeka oshigwana shaKalunga. Shimwe ishewe, Daniel okwa holola kutya Anglo-Amerika olyo lya li tali kala epangelo enankondo lyahugunina lyomomapangelo ngoka. Shono otashi tu hekeleke notashi tu pe etegameno kutya masiku Uukwaniilwa waKalunga otawu ka hanagula po omapangelo agehe gopantu notawu ka pangela kombanda yevi alihe. — Dan. 2:44.

13. “Omukwaniilwa omutihetatu” nosho wo “aakwaniilwa omulongo” mboka ya popiwa mEhololo 17:9-12 otaya thaneke shike, nehunganeko ndyoka olya gwanithwa ngiini?

¹³ Lesha Ehololo 17:9-12. * Ehanagulo ndyoka lya etithwa kIita yoTango yUuyuni olya gwanitha po ehunganeko lilwe kombinga yomasiku ga hugunina. Pethimbo ndyoka, aaleli yiigwana oya li ya hala okweeta ombili muuyuni awuhe. Onkee ano, muJanuali mo 1920 oya toto po Oshipandi shIigwana, shoka sha ka pingenwa po kIigwana ya Hangana muKotoba 1945. Iigwana ya Hangana oya popiwa mOmbiimbeli kutya oyo “omukwaniilwa omutihetatu.” Ihe kali shi epangelo enankondo lyuuyuni. Oli na owala oonkondo omolwomapangelo gopapolotika ngoka hage li yambidhidha. Omapangelo ngoka oga popiwa mOmbiimbeli pathaneko kutya ogo “aakwaniilwa omulongo.”

14-15. (a) Ehololo 17:3-5 olya popi shike kombinga ‘yaBabilon Oshinene’? (b) Aayambidhidhi yomalongelokalunga giifundja otaya ende taya ningi shike kunena?

¹⁴ Lesha Ehololo 17:3-5. Kalunga okwa li a hololele omuyapostoli Johannes emoniko moka a mono ohonda, ano “Babilon oshinene,” shoka tashi thaneke uukwaniilwa womalongelokalunga giifundja. Emoniko ndyoka olya gwanithwa po ngiini? Uule womimvo, omahangano gomalongelokalunga giifundja oga kala haga longele kumwe nomapangelo gopapolotika noku ga yambidhidha. Nonando ongawo, masiku Jehova ote ki inyengitha omapangelo gopapolotika ngoka ga gwanithe po “ehalo lye.” Shoka otashi ka eta oshizemo shini? Omapangelo ngoka, ano “aakwaniilwa omulongo,” otaya ka pilukila po omalongelokalunga giifundja e taye ga hanagula po. — Eh. 17:1, 2, 16, 17.

¹⁵ Otu shi shi ngiini kutya ehanagulo lyaBabilon Oshinene oli li popepi? Opo tu yamukule epulo ndyoka, osha simana tu dhimbulukwe kutya  oshilando shaBabilonia shonale osha li sha gamenwa komeya gomulonga omunene gwaEufrat. Embo lyEhololo olya faathanitha aantu omamiliyona mboka haya yambidhidha Babilon Oshinene ‘nomeya’ ngoka ge li egameno. (Eh. 17:15) Ihe olya popya wo kutya omeya ngoka otaga ka ‘pwina,’ shoka tashi thaneke kutya omalongelokalunga giifundja otaga ka kanitha aantu oyendji mboka haye ga yambidhidha. (Eh. 16:12) Kunena, ehunganeko ndyoka otali gwanithwa, molwaashoka aantu oyendji noonkondo oya thiga po omalongelokalunga giifundja nohaya ka konga ekwatho palwe ya mone nkene taya vulu okukandula po omaupyakadhi gawo.

16. Uuwanawa wuni tatu mono, ngele otu uvite ko ehunganeko lyokutotwa po kwIigwana ya Hangana nosho wo lyehanagulo lyaBabilon Oshinene?

¹⁶ Omahunganeko ngaka otaga vulu ngiini oku tu etela uuwanawa? Sho Iigwana ya Hangana ya totwa po naasho aantu oyendji ihaaya yambidhidha we omalongelokalunga giifundja, otashi koleke kutya otu li momasiku ga hugunina. Nonando omeya gegameno gopathaneko gaBabilon otaga ende taga pwine, omalongelokalunga giifundja otaga ka hanagulwa po momukalo gulwe. Ngaashi sha popiwa metetekelo, Jehova ote ki inyengitha “aakwaniilwa omulongo,” ano omapangelo gopapolotika ngoka haga yambidhidha Iigwana ya Hangana  ga gwanithe po “ehalo lye.” Omapangelo ngoka otaga ka hanagula po omalongelokalunga giifundja ombaadhilila, shoka tashi ka kumitha oyendji. * (Eh. 18:8-10) Ehanagulo lyaBabilon Oshinene otali ka guma uuyuni awuhe, ihe oshigwana shaKalunga otashi ka kala sha nyanyukwa omolwomatompelo gaali. Lyotango, Babilon Oshinene ngoka a kala omutondi gwaJehova uule wethimbo ita ka kala po we, netiyali, ehupitho lyetu otali ka kala lela li li popepi! — Luk. 21:28.

17-18. (a) Ongiini tatu vulu okutsikila okukoleka eitaalo lyetu? (b) Oshike tatu ka kundathana moshitopolwa tashi landula ko?

¹⁷ Daniel okwa hunganeka kutya ‘ontseyo yashilli otayi ka indjipala.’ Naashoka osha ningwa shili! Ngashingeyi otu uvite ko omahunganeko kombinga yethimbo lyetu. (Dan. 12:4, 9, 10) Omahunganeko ngoka otaga gwanithwa naanaa ngaashi ga hunganekwa nohashi tu ningitha tu kale twa kuminwa Jehova nosho wo Oohapu dhe dha nwethwa mo. (Jes. 46:10; 55:11) Onkee ano, tsikila okukoleka eitaalo lyoye mokukala ho konakona Ombiimbeli nuukeka nokukwathela yalwe ya kokeke ekwatathano ewanawa naJehova. Ota ka gamena nokuwilika ayehe mboka yi inekela muye thiluthilu, note ke ya pa ‘ombili tayi kalelele.’ — Jes. 26:3.

¹⁸ Moshitopolwa tashi landula, otatu ka kundathana omahunganeko kombinga yegongalo lyopaKriste pethimbo lyehulilo lyuuyuni. Ngaashi tatu ke shi ilonga, omahunganeko ngoka nago otaga ulike kutya otu li momasiku ga hugunina. Otatu ka tala wo kuumbangi wulwe mboka tawu ulike kutya Jesus, Omukwaniilwa gwetu ngoka ta pangele, ota wilike aalanduli ye aadhiginini.