1-2. Omomukalo guni Omukriste tashi vulika a kale a fa? (1 Aakorinto 15:58)

 MOMUMVO 1978, moTokyo, moJapani, omwa li mwa tungwa etungo eleeleka. Aantu oya li tayi ipula ngele otali ka hupa ngaa, molwaashoka moshilando moka ohamu ningwa omakakamo gevi ogendji. Ooindjiniya odha li dha ningi po shike shoka sha kwathele etungo ndyoka li hupe kekakamo lyevi moshilando shoka? Odha li dha nduluka po etungo ndyoka lya kola lela noiha li vulu wo okukakamithwa komakuthikuthi gekakamo lyevi. Aakriste oya fa etungo ndyoka. Ngiini mbela?

² Omukriste oku na okukala e na ondjele ngele tashi ya pokukala a kolelela noiha tengauka. Oku na okukala a kola noiha tengauka, uuna tashi ya poku vulika koompango nokomithikampango dhaJehova. (Lesha 1 Aakorinto 15:58.) Oha “vulika nehalo ewanawa” noiha iyethele mokuyona. Shimwe ishewe, oku na okukala e na “ondjele” nenge ha tifuka, uuna tashi wapa nenge sha pumbiwa. (Jak. 3:17, NW) Omukriste ngoka a ilonga okukala e na etaloko ndika li li pandjele, iha thininikile yalwe shoka a hala shi ningwe. Moshitopolwa shika, otatu ka kundathana nkene tatu vulu okukala ihaatu tengauka. Otatu ka tala wo nkene tatu vulu okuyanda omikalo ntano ndhoka Satana ha longitha, opo a nkundipaleke etokolotoko lyetu notatu kiilonga wo nkene tatu vulu okuyanda oonkambadhala dhe.

3. Oompango dhini dhOmugandjimpango gwetu Omunene tadhi adhika mIilonga 15:28, 29?

³ Jehova e li Omugandjimpango gwetu Omunene, oha gandja aluhe oompango dha yela koshigwana she. (Jes. 33:22) Pashiholelwa,  olutuwiliki lwomethelemumvo lyotango olwa li lwa mono po omikalo ndatu moka Aakriste ye na okukala ya kola: (1) mokutinda okulongela iikalunga e taya longele owala Jehova, (2) mokuvulika kompango yaJehova ndjoka tayi ti kutya ombinzi ondjapuki (3) nomokuvulika komithikampango dha dhenga mbanda dhOmbiimbeli. (Lesha Iilonga 15:28, 29.) Ongiini Aakriste yokunena taya vulu okukala haya vulika kuJehova momikalo ndhika ndatu?

4. Ongiini tatu vulu okulongela Jehova oye awike? (Ehololo 4:11)

⁴ Ohatu tindi okulongela iikalunga e tatu longele owala Jehova. Jehova okwa li a lombwele Aaisraeli ye mu longele oye awike. (Deut. 5:6-10) Sho Jesus a li ta makelwa kuSatana okwe shi popi sha yela kutya otu na owala okulongela Jehova oye awike. (Mat. 4:8-10) Onkee ano, ihatu longele iikalunga. Ihatu galikana aantu. Pashiholelwa, ihatu ungaunga naawiliki yomalongelokalunga, yopapolotika, aakwanepangelo nenge omanyakwa momaudhano nomomainyanyudho ngaashi ookalunga. Ohatu longele owala Jehova ngoka a “shiti iinima ayihe.” — Lesha Ehololo 4:11.

5. Omolwashike hatu vulika koshipango shaJehova shi na ko nasha nomwenyo nosho wo nombinzi?

⁵ Ohatu vulika kompango yaJehova yi na ko nasha nuuyapuki womwenyo nombinzi. Omolwashike? Omolwaashoka Jehova okwa ti kutya ombinzi oyi lile po omwenyo, ngoka gu li omagano ge na ondilo ga za kuye. (Lev. 17:14) Sho petameko Jehova a li a pitika aantu ya lye onyama yiinamwenyo, okwa li e ya lombwele kaaya lye ombinzi. (Gen. 9:4) Oshipango shoka okwa li e shi endulula sho a gandja Ompango yaMoses kAaisraeli. (Lev. 17:10) Okwa li wo a lombwele olutuwiliki lwomethelemumvo lyotango lu lombwele Aakriste ayehe yi ‘idhilike ombinzi.’ (Iil. 15:28, 29) Ohatu vulika koshipango shoka, uuna tatu ningi omatokolo ge na ko nasha nepango. b

6. Ohatu ningi shike, opo tu vulike komithikampango dhaJehova dhopamikalo dha dhenga mbanda?

⁶ Ohatu vulika komithikampango dhaJehova dhopamikalo dha dhenga mbanda. (Heb. 13:4) Omuyapostoli Paulus okwa longitha elaka lyopatheneko e tu pe omayele tu ‘dhipage’ iilyo yetu yopanyama, sha hala okutya tu ethe po thiluthilu uuhalu kehe wa puka wopanyama. Ohatu yanda okutala nenge okuninga iinima ya puka, mbyoka tayi tu ningitha tu ye momilalo dha nyata. (Kol. 3:5; Job 31:1) Uuna twa taalela omamakelo, ohatu yanda mbala omadhiladhilo nenge oonkatu ndhoka tadhi vulu okuyona po ekwatathano lyetu naJehova.

7. Otu na okukala twa tokola okuninga shike, nomolwashike?

⁷ Jehova okwa te geelela tu kale hatu “vulika nomwenyo aguhe.” (Rom. 6:17) Shoka he tu lombwele oshiwanawa aluhe kutse, na itatu vulu okulundulula oompango dhe. (Jes. 48:17, 18; 1 Kor. 6:9, 10) Ohatu ningi ngaashi tatu vulu tu nyanyudhe Jehova notu kale tu na eihumbato lya fa lyomupisalomi ngoka a ti: “Onda hala okuvulika kiipango yoye sigo aluhe.” (Eps. 119:112) Nonando ongawo, Satana ota ka kambadhala okunkundipaleka etokolotoko lyetu. Oha longitha omikalo dhini?

8. Satana oha longitha ngiini omahepeko, opo a nkundipaleke etokolo toko lyetu?

⁸ Omahepeko. Ondiyapoli ohayi longitha omaponokelo gopanyama nogopamadhiladhilo, opo yi nkundipaleke etokolotoko lyetu. Elalakano lye oku tu “ninagula po,” a yone po ekwatathano lyetu naJehova. (1 Pet. 5:8) Aakriste yomethelemumvo lyotango oya li ya  tilithwa, ya dhengwa noya dhipagwa, molwaashoka oya li ya tokola toko okukala aadhiginini. (Iil. 5:27, 28, 40; 7:54-60) Nokunena Satana ota tsikile okulongitha omahepeko. Shika otu shi iwetele mokuungaungiwa nonyanya kwaamwatate naamwameme moRusia nomiilonga yilwe nosho wo nkene aapataneki haya hepeke aamwatate naamwameme momikalo dhi ili nodhi ili.

9. Gandja oshiholelwa shi na ko nasha nokukala twa kotokela omathininiko gomonanguwi.

⁹ Omathiminiko gomonanguwi. Kakele komahepeko, Satana oha longitha “omakotokelo omawinayi.”(Ef. 6:11) Dhiladhila kwaashoka sha li sha ningilwa omumwatate Bob, ngoka a li moshipangelo omolwetando enene. Okwa li a lombwele oondohotola kutya ita ka taamba nando ombinzi sho ta tandwa. Omutandi okwa tsu kumwe naye a simaneke etokolo lye. Ihe nando ongawo, uusiku manga Bob inaa tandwa omukotheki okwe ya kuye konima sho yaandjawo ya shuna kegumbo. Okwa lombwele Bob kutya ombinzi otashi vulika kaayi ka pumbiwe, ihe otayi ka kala ngaa popepi, oshoka pamwe otayi ka kala ya pumbiwa. Otashi vulika ndohotola a li ta dhiladhila kutya Bob ota ka lundulula omadhiladhilo ge sho yaandjawo kaaye po. Ihe Bob okwa kala a dhiginina etokolo lye, kutya ye ke na okutulwa ombinzi, kutya nduno oshike shi ningwe po.

10. Omolwashike okudhiladhila kwopantu kwa nika oshiponga? (1 Aakorinto 3:19, 20)

¹⁰ Okudhiladhila kwopantu. Ngele otwa kala hatu tala ko iinima pataloko lyopantu, otashi vulika tu ethe po Jehova nomithikampango dhe. (Lesha 1 Aakorinto 3:19, 20.) “Shoka sha talwa kuuyuni mbuka kutya osho oondunge,” olundji ohashi nwetha mo aantu kaaya vulike kuKalunga. Aakriste yamwe moPergamo nosho wo muTiatira oya li ya nwethwa mo kaantu yomomudhingoloko mboka ya li ye na eihumbato lya nyata nohaya longele iikalunga. Jesus okwa li a gandja omayele ga kwata miiti komagongalo ngoka, molwaashoka oga li gi ipwililikila oluhondelo. (Eh. 2:14, 20) Kunena aantu momudhingoloko otaya vulu oku tu nwetha mo tu taambe ko omadhiladhilo ga puka. Yaandjetu naatseyikile otaya vulu oku tu itaalitha kutya otwa kakatela unene koompango dhomOmbiimbeli. Pashiholelwa otashi vulika ya tye kutya inashi simana okukala twa yogoka pamikalo nosho wo kutya omithikampango dhOmbiimbeli odhonkuluyonale.

11. Sho tatu tsikile okuvulika kuJehova, oshike otu na okuyanda?

¹¹ Omathimbo gamwe otashi vulika tu tye Jehova ihe tu pe omalombwelo ga yela nawa. Otashi vulika nokuli tu makelwe tu ‘konde shoka shu uthwa.’ (1 Kor. 4:6) Sho Jesus a li kombanda yevi, aawiliki yomalongelokalunga oya li ye na ondjo moshinima shoka. Oya li ya gwedha mo oompango dhawo yene mOmpango Jehova noya li ye shi ningitha oshidhigu kaantu ya vulike kuyo. (Mat. 23:4) Jehova ohe tu pe omalombwelo ga yela okupitila mOohapu dhe nomehangano lye. Katu nando etompelo lyokugwedha mo sha momalombwelo ngoka. (Omayel. 3:5-7) Onkee ihatu kondo shoka sha nyolwa mOmbiimbeli nenge tu tulile po aamwatate naamwameme oompango dhi na ko nasha niinima yopaumwene.

12. Satana oha longitha ngiini ‘omafundjaleko gaa fele’?

¹² Omafundjaleko. Satana oha longitha ‘omafundjaleko gaa fele’ nosho wo ‘omadhiladhilo ngoka taga dhana onkandangala muuyuni’ a pukithe noku topole aantu. (Kol. 2:8, NW) Methelemumvo lyotango, iinima mbyoka oya li ya kwatela mo omalongo gopaufilosofi ga kankamena komadhiladhilo gopantu nosho wo omalongo gAajuda ngoka kaaga li metsokumwe nomanyolo nelongo kutya Aakriste oye na okuvulika kOmpango yaMoses. Omalongo ngoka oga li omafundjaleko gowala, molwaashoka oga ningitha aantu kaaya gandje eitulomo  kOnzo yuunongo washili, Jehova. Kunena Satana oha longitha iikundaneki nomakwatathano gopaintaneta a taandelithe omitotolombo nosho wo oonkundana dhiifundja ndhoka hadhi humithwa komeho kaawiliki yopapolotika. Opwa li omahokololo ogendji ga fa ngoka pethimbo lyomukithi gwekomba gwo-COVID-19. c Oonzapo dhaJehova ndhoka dha landula ewiliko ndyoka lya gandjwa kehangano lyetu, odha li dha yanda iimpwiyu mbyoka ya adha mboka ya pulakene kuuyelele wa puka. — Mat. 24:45.

13. Omolwashike tu na okukala twa kotoka kaatu piyaganekwe?

¹³ Omapiyaganeko. Otu na okukala tatu gandja eitulomo ‘kiinima mbyoka yi na oshilonga’ unene. (Fil. 1:9, 10) Omapiyaganeko ohaga vulu okukutha po ethimbo lyetu olindji neitulomo kiinima mbyoka yi na oshilonga unene. Iinima mbyoka hatu ningi ngaashi okulya, okunwa, omainyanyudho nosho wo iilonga yokwiikongela omboloto, otayi vulu oku tu piyaganeka ngele otwe yi ningi oyo ya simanenena monkalamwenyo yetu. (Luk. 21:34, 35) Shimwe ishewe, esiku kehe ohatu uvu nohatu lesha kombinga yomakanka nosho wo yomaludhikathano gopapolotika. Otu na okushilipaleka kutya ihatu piyaganekwa komaludhikathano ngoka. Ngele hasho, otashi vulika tu tameke okukutha ombinga pamadhiladhilo nopamutima. Satana oha longitha omikalo adhihe ndhoka nelalakano lyokunkundipaleka etokolotoko lyetu lyokuninga shoka shi li mondjila. Natu ka taleni nkene tatu vulu okukondjitha oonkambadhala dhe nokukala aadhiginini.

14. Oshinima shimwe shini tashi vulu oku tu kwathela tu kale aadhiginini kuJehova?

¹⁴ Dhiladhila kutya omolwashike wu na okwiiyapulila Jehova nokuninginithwa. Owa katuka oonkatu ndhoka, molwaashoka owa hala okugama kombinga yaJehova. Dhiladhila kwaashoka sha li she ku kwathele wu kale wa tompwa kutya owa mona oshili. Owa tseya Jehova nowa tameke oku mu simaneka nokukala wu mu hole e li Tate gwoye gwomegulu. Owa kokeke eitaalo e tali ku inyengitha wu iyele ombedhi. Omutima gwoye ogwe ku inyengitha wu ethe po  iilonga ya puka e to kala metsokumwe nomithikampango dhaKalunga. Owa li wu uvite wa pepelelwa sho wa mono kutya Kalunga okwe ku dhimina po. (Eps. 32:1, 2) Owa kala ho kala pomakugongala nowa tameke okulombwela yalwe iinima iiwanawa mbyoka wi ilonga. Wu li Omukriste i iyapulila Jehova ngashingeyi oto ende mondjila ndjoka tayi fala komwenyo nowa tokola toko kuu ze mo mondjila ndjoka. — Mat. 7:13, 14.

15. Omolwashike okukonakona nokutedhatedha haku tu etele uuwanawa?

¹⁵ Konakona Oohapu dhaKalunga nokutedhatedha kudho. Ngaashi owala omuti tagu vulu okukala gwa kola ngele ogwa mena gwa ya muule, natse otatu ka vula okukala aadhiginini ngele otu na eitaalo lya kola. Ngele ohatu konakona nohatu tedhatedha, eitaalo lyetu otali kolo notatu kala twa tompwa lela kutya omithikampango dhaKalunga odha dhenga mbanda. (Kol. 2:6, 7) Dhimbulukwa kunkene omalombwelo gaJehova, omayele ge negameno lye, ya li ya kwathele aapiya ye methimbo lyonale. Pashiholelwa, Hesekiel okwa li a gandja eitulomo komuyengeli sho ta mete otempeli ndjoka a li a mono memoniko. Emoniko ndyoka olya li lya nkondopaleke Hesekiel, notali tu longo sha kombinga yankene tatu vulu okukala aadhiginini komithikampango dhelongelokalunga lya yogoka. d (Hes. 40:1-4; 43:10-12) Natse ohatu mono uuwanawa, uuna twa kongo ethimbo tu konakone Oohapu dhaKalunga nokutedhatedha kudho.

16. Ongiini omutima hagu vulika gwa li gwa gamene Bob? (Episalomi 112:7)

¹⁶ Koleka omutima gwoye. Omukwaniilwa David okwa li a popi kutya ke na esiku a ethe po ohole ye yokuhola Jehova sho a imbi a ti: “Kalunga, ngame ondi na einekelo lya kola.” (Eps. 57:7) Natse otatu vulu okukala nomutima hagu vulika mokukala twi inekela thiluthilu muJehova. (Lesha Episalomi 112:7.) Tala nkene shoka sha li sha kwathele Bob, ngoka a tumbulwa metetekelo. Sho a li a tseyithilwa kutya otapu ka kala pwa pumbiwa ombinzi, okwa yamukula nziya kutya ngele oya ka kala ya pumbiwa, moshipangelo ota zi mo nzinziya. Lwanima, Bob okwa ti: “Ka nda li ndi na omalimbililo kutya nandi ninge shike.”

17. Oshike tatu vulu okwiilonga koshimoniwa shaBob? (Tala wo ethano.)

 ¹⁷ Bob okwa li omudhiginini, molwaashoka okwa li a adhika nale a ninga etokolo manga inaa ya moshipangelo. Shotango, okwa li a hala okunyanyudha Jehova. Oshitiyali, okwa konakona nuukeka shoka Oohapu dhaKalunga nosho wo iileshomwa yetu ya kankamena kOmbiimbeli tayi ti kombinga yuuyapuki womwenyo nombinzi. Oshititatu, okwa li a tompwa kutya ngele okwa landula ewiliko lyaJehova ota ka mona uuwanawa tawu kalele. Natse otatu vulu okukala aadhiginini kutya nduno otwi iyadha momashongo ga tya ngiini.

18. Oshiholelwa shaBarak ohashi tu longo ngiini okwiinekela muJehova? (Tala ethano lyokombanda.)

¹⁸ Inekela muJehova. Tala nkene Barak a li a pondola, molwaashoka a li a inekela mewiliko lyaJehova. Pethimbo ndyoka Aaisraeli kaya li nokuli ye na iilwitho. Ihe Jehova okwa li a lombwele Barak a ka kondjithe elenga lyAakaanana, Sisera netangakwiita lye, ndyoka lya li na iilwitho oyindji. (Aatok. 5:8) Omuhunganeki omukiintu Debora okwa li a lombwele Barak a kuluke kondundu, e ta yi molusilu a ka kondjithe Sisera nomatembakwiita ge 900. Molusilu osha li tashi ka kala oshidhigu noonkondo kAaisraeli ya kondjithe omatembakwiita ngoka taga matuka, ihe nonando Barak okwa li e shi shi, okwa vulika. Sho aakwiita Aaisraeli ya kuluka kondundu Tabor, Jehova okwa lokitha omvula onene. Omatembakwiita gaSisera oga yi momunoko, na Jehova okwa pe Barak esindano. (Aatok. 4:1-7, 10, 13-16) Sha faathana, Jehova ote ke tu pa esindano ngele otwa kala twe mu inekela nosho wo omalombwelo ge ngoka ha gandja okupitila maakalelipo ye. — Deut. 31:6.

19. Omolwashike wa hala okukala wa kolelela?

¹⁹ Otatu tsikile okukondja tu kale twa ikolelela sho tu li monkalelo ndjika yiinima. (1 Tim. 6:11, 12; 2 Pet. 3:17) Natu kale twa tokola toko kaatu tilithwe komahepeko, komathiminiko gomonanguwi, kokudhiladhila kwopantu, komafundjaleko nosho wo komapiyageneko. (Ef. 4:14) Pehala lyaashono, natu kale aluhe aadhiginini, twa kolelela mokulongela Jehova nohatu vulika kiipango ye. Nopethimbo tuu mpoka otwa pumbwa okukala tu na ondjele. Moshitopolwa tashi landula otatu ka kundathana kombinga yankene Jehova naJesus ye li iiholelwa ya dhenga mbanda yokukala nondjele.