Tate okwa li omukuluntu gwegongalo mongeleka yomoshitopolwa yedhina United Church of Canada, onkee oshiwike kehe okwa li ha ti natu ye kosikola yOsoondaha, nokonima otwa li hatu mu wayimine mongeleka ndjoka, po 11 gwongula. Komatango, otwa li hatu yi nameme kOshinyanga shUukwaniilwa. Otwa li hatu vulu okumona nuupu eyooloko pokati komalongelokalunga ngoka gaali.

Meme okwa li a lombwele ookuume ke aaihokani, Bob naMarion Hutcheson, shoka a li ti ilongo mOmbiimbeli noya li ya ningi Oonzapo dhaJehova. Mo 1985, omumwatate Hutcheson nomukadhi noyanamati yatatu, oya yi pamwe nangame koshigongi Divine Will International Assembly shomasiku gahetatu, moNew York City. Ngashingeyi ondi shi kutya kasha li oshipu kuyo okuya pamwe nangame, ihe oshigongi shoka osho shimwe shomiinima mbyoka ihaandi dhimbwa.

Sho nda li omugundjuka, otwa li hatu zi mofaalama, mono nda li ndi hole okusila oshimpwiyu iinamwenyo. Onda li nda dhiladhila ndi ilongele uupangi wiinamwenyo. Oshinima shono meme okwe shi lombwele omukuluntugongalo gumwe. Okwa dhimbulukitha ndje nombili kutya otu li “momasiku gahugunina” nokwa pula ndje ngele oku ka kala kouniveesiti uule womimvo ndhontumba itaku ka guma ekwatathano lyandje naJehova. (2 Tim. 3:1) Oshizemo, onda tokola kaandi ye we kouniveesiti.

 Onda li natango ndi na omaipulo kutya otandi ka ninga shike ngele nda mana osikola. Nonando onda li handi kutha ombinga miilonga yokuuvitha oshiwike kehe, kanda li handi yi nyanyukilwa, nokanda li ndi wete tandi vulu okuninga omukokolindjila. Pethimbo ndyoka, tate nomumwayina mboka kaaye shi Oonzapo oya ladhipike ndje ndi ka longe kehangano limwe lyomakwashilipaleko moToronto. Omumwayina gwatate okwa li e na mo ondondo ya simana mehangano ndyoka, onkee onda taamba ko iilonga mbyoka.

MoToronto, onda li handi longo omalutayima nokweendathana naantu mboka kaaye shi ooyitaali, shoka osha li shi imbi ndje okuya kokugongala nokuuvitha pandjigilile. Tango onda li nakuku ngoka kee shi Oonzapo, ihe sho a si, onda li nda pumbwa ehala lilwe lyokukala.

Omumwatate Hutcheson nomukadhi, mboka ya li ya faalele ndje koshigongi shoshitopolwa, mo 1958, oya li ya fa aavali yandje. Oyi ithana ndje ndi ka kale kaandjawo noya kwathele ndje ndi koleke uukuume wandje naJehova. Mo 1960 onda ninginithwa pamwe nomwanamati gwawo, John. John okwa tameke uukokolindjila nokonima yokathimbo, shoka osha tsu ndje omukumo gwokulonga ethimbo olindji miilonga yokuuvitha. Aamwatate megongalo oya ndhindhilike kutya otandi humu nawa komeho pambepo, nomokweendela ko kwethimbo onda ningwa omukwatelikomeho gwosikola yOnkalamwenyo yopaKriste niilonga yetu yokuuvitha.

Mo 1966 onda hokana Randi Berge, omukokolindjila omulaadhi ngoka a li a halelela oku ka longa hoka ku na ompumbwe onene. Omutonatelishikandjo gwetu okwa li e tu hokwa, nokwe tu ladhipike tu kwathele megongalo lyaOrillia, mOntario. Onkee, otwa pakele nokutembuka meendelelo.

Nziya sho twa thiki moOrillia, onda wayimine Randi muukokolindjila wondjigilile. Onda li nda tuntukwa ngaashi ye! Sho nda tameke okulonga nuudhiginini ndi kale omukokolindjila e li nawa, onda tameke okukala ndi na enyanyu ndyoka hali zi mokulongitha Ombiimbeli nomokumona nkene aantu ye yi uvite ko. Osha li shi nyanyudha okukwathela aaihokani yamwe ya ninge omalunduluko moonkalamwenyo dhawo noya ninge aapiya yaJehova.

Sho twa li twa ka talela po koToronto, onda li nda tsakanene naArnold MacNamara, ngoka a li gumwe gwomaamwatate mboka ya li taya kwatele komeho moBetel. Okwa li a pula ngele inatu hala okuya muukokolindjila wi ikalekelwa. Onde mu yamukula meendelelo nda ti: “Otwa hala! Ihe shampa owala kaashi shi moQuebec!” Onda li nda nwetha mo ketaloko ewinayi lyaantu yomoshitopolwa moka hamu popiwa Oshiingilisa, moKanada, ya li ye na kombinga yoshitopolwa shomoQuebec moka aantu haya popi Oshifulaanisa. Pethimbo ndyoka, aantu oya li taya ningi ekanka ye li ompinge nepangelo, noya li ya hala oshitopolwa shaQuebec shi kale shi li kusho shene.

Arnold okwa yamukula a ti: “MoQuebec omo owala oshitayimbelewa tashi tumine aakokolindjila yi ikalekelwa pethimbo ndika.” Onda zimine nziya ndi ye. Onda adhika nale ndi shi kutya Randi okwa hala oku ka longela hoka. Lwanima, onde shi mono mo kutya ndika olyo limwe lyomomatokolo ga dhenga mbanda twa ninga monkalamwenyo yetu!

Konima sho twa kala iiwike itano mootundi tatu ilongo Oshifulaanisa, tse naRandi nosho wo aaihokani yalwe otwa yi koRimouski, mpoka pu na ookilometa 540 lwaampoka, okuuka muumbangalantuzilo waMontreal. Otwa li natango tu na okwiilonga oshindji, shoka sha li hashi kala shi iwetikile lela, uuna tandi lesha omatseyitho gamwe pokugongala. Oshikando shimwe onda li nda ti, poshigongi shetu shoshitopolwa tashi landula ko otwa tegelela pu ka kale “aayenda oyendji oompo” pehala lyokutya “aayenda oyendji Aaustria.”

MoRimouski, otwa li twa wayiminwa kaamwameme aadhiginini yane inaaya hokanwa nosho wo omumwatate nomumwameme Huberdeau noyanakadhona yaali. Omumwatate nomumwameme ngoka oya li ya hiila egumbo enene, naakokolindjila ayehe mboka ya li ya kala mo, oya kwathele mokufuta ohiila. Egumbo ndyoka oya li haye li ithana egumbo etokele, molwaashoka komeho yalyo okwa li kuutokele noli na oongudhi oontokele. Konyala otwa li hatu kala mo 12 nenge 14. Tu li aakokolindjila yi ikalekelwa, ngaye naRandi otwa li hatu uvitha ongula, komatango, kongulohi notwa li twa pandula sho hapu kala aluhe pu na yamwe mboka taye tu wayimine miilonga yokuuvitha, nokuli nokoongulohi kwa talala.

Otwa kala tu na ekwatathano lyopothingo naakokolindjila mboka aadhiginini notwa kala twa fa uukwanegumbo wumwe awuke. Omathimbo gamwe otwa li hatu kuutumba pomulilo nenge twa li hatu kala tu na esiku moka tatu teleke pamwe uumboloto. Gumwe gwomaamwatate okwa li omuhikingalo, onkee mOlyomakaya koongulohi otwa li hatu kala tatu imbi tse otatu ndanisa.

Oshitopolwa shomoRimouski omwa li aantu ye hole okwiilonga Ombiimbeli! Momukokomoko gwomimvo ntano, otwa li tu na enyanyu ndyoka hali zi mokumona aakonakonimbiimbeli oyendji taya humu komeho sigo ya ninginithwa. Egongalo olya koko mokukala li na aauvithi 35 lwaampono.

MoQuebec, otwa li twa dheulwa nawanawa tu kale aauvithi yevaangeli. Otwa mona nkene Jehova a kala noku tu kwathela miilonga yokuuvitha nomoompumbwe dhetu. Shimwe ishewe, otwi ilonga okukala tu hole aapopi yOshifulaanisa, elaka lyawo neputuko lyawo, shoka she tu ningitha tu kale tu hole wo omaputuko gaantu yalwe. — 2 Kor. 6:13.

Inaashi tegelelwa, oshitayimbelewa osha li she tu pula tu tembukile kondoolopa Tracadie, kuuzilo womunkulofuta waNew Brunswick. Shika osha li eshongo, molwaashoka otwa adhika owala opo twa shaina okondalaka ye hala nonda li ndi na okondalaka yopakathimbo yokulonga aantu. Shimwe ishewe, yamwe yo maakonakonimbiimbeli yetu oya adhika owala opo ya ningi aauvithi, notwa adhika opo tu li mokati kokutunga Oshinyanga shUukwaniilwa.

 Otwa kala tatu galikana ehulilo shiwike alihe kombinga yokutembuka noku ka talela po koTracadie hoka kwa li inaaku fa koRimouski. Ihe otwa tokola kutya molwaashoka Jehova oye a hala tu ye hoka, otatu yi. Otwa makele Jehova notwa mono nkene te tu kuthile po omandangalati kehe. (Mal. 3:10) Molwaashoka Randi okwa li e na ekwatathano lya kola naJehova, ka li i ihole ye mwene nokwa li e hole iiyolitha, onkee osha li oshipu kuye noonkondo okutembuka.

Megongalo lyetu epe omwa li owala mu na omukuluntugongalo gumwe awike, Robert Ross. Okwa kala omukokolindjila moka pamwe nomukadhi, Linda, noya tokola ya kale moka konima sho ya mono okanona kawo kosheeli. Nokuli nando oya li taya putudha okanona kawo kokamati hoka opo ya mono, molwaashoka oya li ye na ombepo yokuyakula aayenda naalaadhi miilonga yokuuvitha, oye tu tsu lela omukumo tse naRandi.

Konima yokukokola ondjila moTracadie uule womimvo mbali, otwa mono ishewe ehiyo limwe lituntula, lyokuya miilonga yuutonatelishikandjo. Otwa li twa longo moshitopolwa shOshiingilisa uule womimvo heyali, konima yaashono otwa pulwa tu ye koshitopolwa shaapopi yOshifulaanisa, koQuebec. Omutonateli gwoshitopolwa moQuebec, Léonce Crépeault, okwa li ha pandula ndje ngele nda gandja iipopiwa. Ihe lwanima okwa kala aluhe ha pula ndje ta ti: “Oho she ende ngiini opo wu gandje iipopiwa iiwanawa?” a Shoka a popi osha kwathele ndje ndi kaleke omukalo gwandje gwokulonga aantu gwokondandalunde nomu pu okuuviwa ko.

Shimwe shomiinakugwanithwa nda li handi dhimbulukwa unene, ooshono nda li ndi na mo 1978 koshigongi shoshitopolwa shopaigwana, “Victorious Faith” moMontreal. Onda li handi longo moshikondo shiikulya. Otwa li twa tegelela aantu 80 000, otwa li tu na okupa aantu iikulya momukalo inaagu fa gwonale. Iinima ayihe oya li ya lunduluka: Iilongitho, omenyu nomukalo gwokulongekidha iikulya. Otwa li tu na ookila dhokutalaleka 20 lwaampono, ndhoka omathimbo gamwe kaadha li hadhi longo. Esiku lyotango manga inaatu tameka, katwa li nokuli twa vulu okuya mo mokapale tu ka tule iinima pomahala sigo omokati kuusiku, oshoka omwa li tamu dhanenwa uudhano esiku ndyoka. Otwa li tu na okukala twa tema omasiga manga eluwa inaali tenda, opo tu teleke oshuumbululwa! Otwa li twa vulwa noonkondo, notwi ilongo oshindji mokulonga nuudhiginini, mokukala twa pyokoka nokukala hatu ningi mboka hatu longo nayo omashendjo. Otu li natango okuume sigo ongashingeyi. Kasha li tuu sha simana okukala tu na oshigongi shika  shoshitopolwa moQuebec, mehala moka mwa li mu na omahepeko omanyanyalithi pokati komumvo 1940 nosho wo 1950!

Ondi ilongo oshindji kaatonateli ooyakwetu poshigongi shetu oshinene moMontreal. Omumvo gumwe, omumwatate David Splane ngoka ngashingeyi e li oshilyo shOlutuwiliki okwa li omutonateli gwoshigongi shoshitopolwa. Lwanima poshigongi shoshitopolwa sho nda pulwa ndi ungaunge noshinakugwanithwa shoka, David okwa li a kwathele ndje lela.

Mo 2011, konima sho twa kala omimvo 36 miilonga yuutonatelishikandjo, onda li nda hiwa ndi ka longe ndi li omulongi gwosikola yaakuluntugongalo. Ngame naRandi otwa li twa lala koombete 75 dha yoolokathana momukokomoko gwomimvo mbali, ihe osha li lela eiyambo li shi okupandulwa. Kehulilo lyoshiwike kehe, aakuluntugongalo oya li haya kala ya pandula noonkondo, molwaashoka yu uvite kutya Olutuwiliki otalu sile oshimpwiyu ekwatathano lyawo naJehova.

Lwanima, onda ka kala omulongi gwOsikola yAauvithi yUukwaniilwa. Aanasikola olundji oya li haya kala ya vulwa noya gwililwa po, molwaashoka oya li haya kala yi ipyakidhila noonkondo, omolwokukuutumba uule woowili heyali lwaampono mesiku, okuninga iithigilwalonga yawo uule wowili ndatu kongulohi kehe nokuungaunga niinakugwanithwa yi li ine nenge itano moshiwike. Omulongi gulwe nangaye otwe ya yelithile kutya otaya vulu owala oku shi ninga kekwatho lyaJehova. Onda li aluhe handi dhimbulukwa nkene aalongwa ya li ya nyanyukwa sho ya mono kutya kekwatho lyaJehova oya li ya vulu okugwanitha po okuninga ayihe shi vulithe pwaashoka ya li ya dhiladhila.

Molwaashoka meme okwa li e na ohokwe muyalwe, osha kwathele aakonakoni ye ya ninge ehumokomeho nosha kwathele wo tate a kale e na ohokwe moshili. Konima yomasiku gatatu sho meme a si, oshe tu kumitha sho tate e ya koshipopiwa shomontaneho kOshinyanga shUukwaniilwa, nokwa tsikile okukala he ya komakugongala uule womimvo 26 dha ka landula ko. Nonando tate ka li nando a ninginithwa, aakuluntugongalo oya li ya lombwele ndje kutya oye ha thiki po aluhe tango pokugongala moshiwike kehe.

Meme okwa li wo e li oshiholelwa sha dhenga mbanda kungaye nokaamwamemekandhona. Aamwamemekadhona ayehe yatatu naasamane yawo oya li haya longele Jehova nuudhiginini. Aamwamemekandhona yaali oya li haya longo koshitayimbelewa, gumwe okwaashono shi li mOputu, nagulwe omwaashono shi li moHaiti.

Ngashingeyi tse naRandi otu li aakokolindjila yi ikalekelwa moHamilton shaOntario. Sho twa li miilonga yuutonatelishikandjo, otwa li hatu nyanyukilwa okuya nayalwe komaishunoko gawo nokaakonakonimbiimbeli yawo. Ihe ngashingeyi otwa nyanyukwa sho tu wete aakonakonimbiimbeli yetu taya humu komeho pambepo. Sho twa panga uukuume naamwatate naamwameme megongalo lyetu epe, otwa li twa tsuwa omukumo mokumona nkene Jehova e ya ambidhidha pomathimbo omadhigu nopomathimbo omawanawa.

Okutala konakuziwa, otwa pandula lela sho yamwe ya li ye tu ulukile ohokwe. Opo ihe otwa li twa kambadhala ‘okwiipula’ nayalwe noku ya ladhipika ya longele Jehova ngaashi taya vulu. (2 Kor. 7:6, 7) Pashiholelwa, muukwanegumbo wumwe, omukulukadhi, naanona oya li miilonga yethimbo lyu udha. Onda li nda pula omusamane ngele okwa dhiladhilile ngaa nando onale okuninga omukokolindjila. Okwa ti kutya ota ambidhidha aakokolindjila yatatu. Onda ti: “Mbela oto vulu ngaa oku ya ambidhidha nawa shi vulithe puJehova?” Onde mu ladhipike a ninge omukokolindjila. Konima yoomwedhi 6 okwa ningi omukokolindjila.

Tse naRandi otatu ka tsikila ‘okulombwela epipi tali landula ko’ kombinga ‘yiilonga yaJehova iikumithi’ notu na einekelo kutya nayo otaye ke yi nyanyukilwa ngaashi owala tse. — Eps. 71:17, 18.