1. Oshike wi ilongo sho wa tameke okukonakona Ombiimbeli?

 MBELA oto dhimbulukwa iinima ayihe mbyoka wi ilongo sho wa tameke okukonakona Ombiimbeli? Otashi vulika wa li wa kumwa sho wa tseya kutya Kalunga oku na edhina. Otashi vulika wa li wa pepelelwa sho wa mono kutya Kalunga iha hepeke aantu momulilo gwoheli. Notashi vulika wa li wa kuminwa etegameno lyoku ka mona ishewe oonakusa nokukala pamwe nayo.

2. Kakele kokwiilonga oshili yOmbiimbeli, ehumokomeho lini wa tsikile okuninga? (Aaefeso 5:1, 2)

² Sho wa tsikile okukonakona Oohapu dhaKalunga, ohole yoye yokuhola Jehova oya koko. Oye ku inyengitha wu tule miilonga shoka wi ilonga. Owa ningi omatokolo omawanawa gi ikolelela komakotampango gOmbiimbeli. Owi ilongo okudhiladhila nokuninga shoka shi li mondjila, molwaashoka owa li wa hala okunyanyudha Kalunga. Ngaashi owala okanona haka holele omuvali gwako omunahole, owa holele Tate gwoye gwomegulu. — Lesha Aaefeso 5:1, 2.

3. Omapulo geni tatu vulu okwiipula?

³ Otashi vulika tu ipule omapulo ngaka: ‘Mbela ohole yandje yokuhola Jehova oya kola shi vulithe petameko sho opo nda ningi Omukriste? Okuza sho nda ninginithwa mbela omukalo gwandje gwokudhiladhila nogwokuninga iinima ogwa kala gwa fa gwaJehova, unene tuu mokuulukila aamwatate naamwameme ohole?’ Ngele ‘ohole yoye yokuhola Jehova yopetameko’ oya talala, ino teka omukumo. Sha faathana osha li sha ningilwa Aakriste yomethelemumvo lyotango. Jesus ka li e ya etha po noite ke tu etha po wo. (Eh. 2:4, 7) Oku shi kutya otatu vulu okwiilonga okukala tu mu hole ishewe ngaashi twa li tu mu hole sho opo twi ilongo oshili.

4. Oshike tatu ka kundathana moshitopolwa shika?

 ⁴ Oshitopolwa shika otashi ka kundathana nkene tatu vulu okukokeka ohole yetu yokuhola Jehova nosho wo yalwe. Opo nduno otatu ka kundathana omayambeko gamwe ngoka hatu mono nosho wo yalwe, uuna tatu kokeke ohole yetu.

5-6. Omashongo geni omuyapostoli Paulus a li i iyadha mugo pethimbo lyokuuvitha kwe, ihe oshike sha li she mu inyengitha a tsikile okulongela Jehova?

⁵ Omuyapostoli Paulus okwa li a nyanyukwa okulongela Jehova, ihe kasha li aluhe oshipu kuye. Olundji okwa li ha ende iinano iile, nokweenda pethimbo ndyoka, kasha li aluhe oshinima oshipu. Molweendo lwe, omathimbo gamwe okwa li ha “adhika kiiponga yomafundja noyaayugi,” omathimbo gamwe okwa li wo ha dhengwa kaatondi ye. (2 Kor. 11:23-27) Aamwahe kaya li aluhe haye mu pandula omolwiinima mbyoka e ya ningila. — 2 Kor. 10:10; Fil. 4:15.

⁶ Oshike sha li sha kwathele omuyapostoli Paulus a tsikile okulongela Jehova? Paulus okwa li a ilongo oshindji kombinga yomaukwatya gaJehova mOmanyolo nosho wo kiimoniwa ye mwene. Okwa li a tameke okukala a tompwa kutya Jehova Kalunga oku mu hole. (Rom. 8:38, 39; Ef. 2:4, 5) Nokwa tameke okukala e hole Jehova noonkondo. Paulus okwa ulike ohole yokuhola Jehova ‘mokuyakula Aakriste ooyakwawo.’ — Heb. 6:10.

7. Omomukalo gumwe guni tatu vulu okukokeka ohole yetu yokuhola Jehova?

⁷ Otatu vulu okukokeka ohole yetu yokuhola Kalunga mokukonakona nawanawa Oohapu dhe. Sho to lesha Ombiimbeli, kambadhala okutala kutya ovelise kehe otayi holola shike kombinga yaJehova. Ipula ngeyi: ‘Ehokololo ndika otali ulike ngiini kutya Jehova oku hole ndje? Omatompelo geni tali pe ndje gokukala ndi mu hole?’

8. Ongiini egalikano tali vulu oku tu kwathela tu kokeke ohole yetu yokuhola Kalunga?

⁸ Omukalo gulwe tatu vulu okukokeka ohole yetu yokuhola Jehova, omoku mu galikana esiku kehe, tatu mu lombwele nkene tu uvite lela. (Eps. 25:4, 5) Jehova naye ota ka yamukula wo omagalikano getu. (1 Joh. 3:21, 22) Omumwameme gwedhina Khanh gwomoAsia, okwa ti: “Ohole yandje yokuhola Jehova tango oya li ya kankamena kontseyo, ihe oya kolo sho nda mono nkene a yamukula omagalikano gandje. Shika osha ningitha ndje ndi kale nda hala okuninga iinima mbyoka tayi mu nyanyudha.” b

9. Timoteus okwa li a ulike ngiini kutya ota ningi ehumokomeho mokuulika ohole?

⁹ Konima yomimvo dhontumba sho a ningi Omukriste, Paulus okwa li a tsakanene nomulumentu omugundjuka gwedhina Timoteus. Timoteus okwa li e hole Jehova nosho wo aantu. Paulus okwa lombwele Aafilippi a ti: “Timoteus oye awike he mu dhiladhila ngaashi ngame noku na oshimpwiyu nane.” (Fil. 2:20) Movelise ndjika Paulus ina popya kutya Timoteus oku shi okuunganeka nawa nenge oku li omupopi gwomontaneho omwaanawa, ihe okwa li e wete kutya Timoteus oku hole lela aamwatate naamwameme. Kapu na omalimbililo kutya omagongalo ngoka ga li ga talelwa po kuTimoteus oga li ge mu tegelela nenyanyu, e ga talele po. — 1 Kor. 4:17.

10. Anna nomusamane gwe oya ulike ngiini kutya oye hole aamwatate naamwameme?

¹⁰ Natse wo ohatu kongo omikalo tu kwathele aamwatate naamwameme. (Heb. 13:16) Tala koshimoniwa shaAnna ngoka a tumbulwa moshitopolwa sha tetekele. Konima yoshikungulu oshinene, ye nomusamane gwe oya talele po  uukwanegumbo wOnzapo yimwe, noya mono kutya iipeleki yokombanda yondunda yawo oya pepwa ko koshikungulu. Oshizemo, uukwanegumbo kawa li we wu na oonguwo dha yela. Anna okwa ti: “Otwa yi noonguwo dhawo tu ke dhi yoge e tatu dhi galula twe dhi kangula notwe dhi gonya nawa.” Shoka kasha li oshidhigu kutse okuninga, ihe molwaashoka otwe shi ningi, otwa panga uukuume uuwanawa nawo sigo okunena. Anna nomusamane gwe oyi inyengithwa kohole ya kwathele aamwatate naamwameme. — 1 Joh. 3:17, 18.

11. (a) Aantu yalwe olundji ohaya kala yu uvite ngiini ngele twe yu ulukile kutya otu ya hole? (b) Shi ikolelela kOmayeletumbulo 19:17, Jehova oha inyenge ngiini uuna tatu ulike ohole?

¹¹ Uuna tatu ungaunga nohole nonombili nayalwe, olundji ohaya mono kutya otatu kambadhala okuholela Jehova. Otashi vulika ye tu pandule noonkondo omolwolukeno ndoka twe ya ulukila. Khanh ngoka a tumbulwa metetekelo ota dhimbulukwa mboka ya li ye mu kwathele. Okwa ti: “Onda pandula noonkondo aamwameme ayehe mboka ya li haya yi pamwe nangame miilonga yokuvitha. Oya li haya ile ndje pegumbo, ndi ka lye omwiha pamwe nayo nohaya shilipaleke kutya onda thika ngaa kegumbo nawa. Ngashingeyi ondi wete kutya osha li sha pula iilonga oyindji. Shoka oya li ye shi ningi omolwohole.” Odhoshili kutya haantu ayehe taye ke tu pandula omolwiinima mbyoka twe ya ningila. Khanh okwa popi shi na ko nasha naamboka ye mu kwathela a ti: “Ohandi kala nda hala oku ya futa omolwiinima mbyoka ya ningila ndje, ihe kandi shi kutya aantu mboka oya kala peni. Nonando ongawo, Jehova oku shi kutya oya kala peni note ke ya futa pehala lyandje.” Khanh oku li mondjila. Jehova oha ndhindhilike nokuli nuunima uushona mboka hatu ningile yalwe tatu inyengithwa kolukeno. Ohe shi tala ko shi li eyambo li na ongushu noli li oondjo ndhoka ta ka futila po. — Lesha Omayeletumbulo 19:17.

12. Ongiini aamwatate taya vulu okuulika ohole yawo yokuhola egongalo? (Tala wo omathano.)

 ¹² Ngele owu li omumwatate, ongiini to vulu okuulukila yalwe ohole noku ya kwathela? Omumwatate omugundjuka gwedhina Jordan okwa pulile omukuluntugongalo gumwe kutya oku na oku shi enda ngiini, opo a vule okuninga oshindji megongalo. Omukuluntugongalo okwe mu pandula omolwehumokomeho ndyoka a ninga nale, nokwe mu pe omayele gontumba ge na ko nasha nankene ta vulu okuninga oshindji megongalo. Pashiholelwa, okwa ti kutya Jordan oha thiki kuyele pOshinyanga shUukwaniilwa noha popitha yalwe, oha kutha ombinga pokugongala, oha yi aluhe miilonga yokuuvitha pamwe nongundu yawo noha kongo omikalo moka ta vulu okukwathela yalwe. Sho Jordan a tula miilonga omayele ngoka, ka li owala i ilongo uunkulungu uupe, ihe ohole ye yokuhola aamwatate naamwameme oya koko wo. Jordan okwi ilongo kutya ngele omumwatate a ningi omuyakuligongalo, iha tameke owala okukwathela yalwe, ihe pehala lyaashono oha tsikile oku ya kwathela. — 1 Tim. 3:8-10, 13.

13. Ongiini ohole ya li yi inyengitha omumwatate Christian a ninge ishewe omukuluntugongalo?

¹³ Ongiini ngele owu li nale omuyakuligongalo nenge omukuluntugongalo? Jehova oha dhimbulukwa iilonga mbyoka wa longa nale nosho wo ohole ndjoka ye ku inyengitha wu yi ninge. (1 Kor. 15:58) Oha mono wo ohole ndjoka to tsikile okuulika. Omumwatate gwedhina Christian okwa li a yemata sho a kuthwa uukuluntugongalo. Ihe nando ongawo, okwa ti: “Onda li nda tokola okuninga shoka tandi vulu okuninga, ndi longele Jehova tandi inyengithwa kohole, kutya nduno ondi li omukuluntugongalo nenge kandi shi omukuluntugongalo.” Mokweendela ko kwethimbo, okwa langekwa po ishewe e li omukuluntugongalo. Christian okwa ti: “Onda li nda tila kashona okukala ishewe omukuluntugongalo. Ihe onda tokola kutya  ngele Jehova oye a hala ndi kale ishewe omukuluntugongalo omolwohenda ye, otandi shi ningi, molwaashoka ondi mu hole nondi hole wo aamwatate naamwameme.”

14. Owi ilongo shike mwaashoka sha popiwa komumwameme gwokoGeorgia?

¹⁴ Aapiya yaJehova ohaya ulukile wo aantu ooyakwawo ohole. (Mat. 22:37-39) Pashiholelwa, omumwameme Elena gwokoGeorgia okwa ti: “Petameko, oshinima owala shono sha li sha inyengitha ndje ndi uvithe, ohole yokuhola Jehova. Ihe ohole yandje yokuhola Tate gwomegulu sho ya koko, nohole yandje yokuhola aantu oya koko wo. Onda li nda kambadhala okudhiladhila kutya omaupyakadhi geni ye na, naashoka taya ka kala ya hala okupopya kombinga yasho. Sho nda kala nokudhiladhila kombinga yawo momukalo ngoka, osha ningitha ndje ndi kale lela ndi na ehalo lyoku ya kwathela.” — Rom. 10:13-15.

15-16. Ngaashi sha ulikwa momathano ngano, omalaleko nuuyamba geni haga zi mokuulukila yalwe ohole?

¹⁵ Uuna tatu ulukile aamwatate ohole, hayo owala haya mono uuwanawa. Konima sho omukithi gwekomba gwo-COVID-19 gwa tameke, omumwatate Paolo nomukadhi, oya li ya kwathele aamwameme aakokele oyendji yi ilonge nkene ye na okuuvitha taya longitha iikwaelektronika. Omumwameme gumwe ngoka petameko sha li oshidhigu kuye okulongitha oshikwaelektronika she, hugunina osho e ke shi pondola. Okwa li a vulu oku shi longitha mokuhiya aapambele ye kEdhimbuluko. Omilongo hamano yomuyo oya li ya vulu okukala po pavidio.  Omumwameme ngoka naapambele ye ayehe oya mono mo uuwanawa moonkambadhala dhaPaolo nomukulukadhi gwe. Lwanima omumwameme okwa nyolele Paolo a ti: “Tangi sho we tu longo tse aakokele. Itandi ka dhimbwa nando nkene Jehova e tu sila oshimpwiyu nonkene wa longa nuudhiginini, opo wu tu kwathele.”

¹⁶ Iiyilongomwa ya fa mbika, oya longa Paolo oshiilongomwa sha simanenena. Oya li ye mu dhimbulukitha kutya ohole oya simana noonkondo yi vule uunongo nenge uunkulungu wetu. Okwa ti: “Onda li omutonatelishikandjo. Kunena, onde shi ndhindhilika kutya nonando otashi vulika aamwatate ya dhimbwa iipopiwa yandje, natango ohaya dhimbulukwa iinima mbyoka nde ya ningila.”

17. Ngele tatu ulukile yalwe ohole, olye ishewe ta ka mona mo uuwanawa?

¹⁷ Uuna tatu ulukile yalwe ohole, ohatu mono mo uuwanawa momikalo inaatu dhi tegelela. Jonathan ngoka ha kala moNew Zealand ote shi koleke. MOlyomakaya yimwe komatango kwa pupyala, okwa mono omukokolindjila tu uvitha oye awike mooha dhondjila. Jonathan okwa tokola a kale ha ka longa pamwe nomukokolindjila ngoka mOlyomakaya komatango. Ka li e shi kutya ota ka mona mo uuwanawa wu thike peni monkatu ndjoka a katuka. Jonathan okwa ti: “Pethimbo ndyono kanda li ndi hole iilonga yokuuvitha. Ihe sho nda pulakene komukalo moka omukokolindjila ngoka ha longo aantu, nokumona nkene he shi pondola miilonga yokuuvitha, osha pendutha mungame ohole yashili okukala ndi yi hole. Omumwatate ngoka okwa ningi wo kuume kandje kopothingo nokwa kwathele ndje ndi koke pambepo, ndi kale ndi hole iilonga yokuuvitha nondi hedhe popepi naJehova.”

18. Jehova okwa hala tu ninge shike?

¹⁸ Jehova okwa hala atuheni tu kokeke ohole yoku mu hola noyokuhola yalwe. Ngaashi twe shi ilongo, otatu vulu okukokeka ohole yetu yokuhola Jehova okupitila mokulesha Oohapu dhe nokutedhatedha kudho nosho wo mokukala hatu popi naye pandjigilile megalikano. Ohole yetu yokuhola aamwatate naamwameme otayi vulu okukola uuna tatu ya ningile iinima yi ili noyi ili. Sho ohole yetu tayi koko, otatu ka hedha popepyeelela naJehova nosho wo naamwatate naamwameme. Otatu ka nyanyukilwa wo uukuume wetu mboka sigo aluhe.