1. Oshike shoka Jehova a ningila kehe gumwe gwomutse?

JEHOVA oye a hilila kehe gumwe gwomutse kuye. (Joh. 6:44) Dhiladhila muule kutya shoka osha hala okutya shike. Sho Jehova a konakona nuukeka aantu omabiliyona yomuuyuni mbuka, okwa mono kutya ngoye owu na omwenyo omwaanawa, noto vulu okukala wu mu hole. (1 Ondjal. 28:9) Jehova oku ku shi, oha kala e ku uvite ko noku ku hole. Shoka itashi hekeleke tuu!

2. Jesus okwe tu kwathele ngiini tu uve ko kutya Jehova oku hole oonzi dhe adhihe?

² Jehova oku na ko nasha nangoye noonkondo noku na ko nasha wo nooitaali ooyakweni ayehe. Jesus okwe tu kwathele tu uve ko oshinima shoka nawa, sho a yelekanitha Jehova nomusita methaneko lye. Ngele onzi yimwe yomoonzi 100 oya kana mo moonzi oonkwawo, omusita ota ka ninga po shike? Ota ka ‘thiga po ndhoka omilongo omugoyi nomugoyi, a ka konge ndjiyaka ya kana.’ Uuna e yi mono ita ka kala e yi geela, ihe ota ka kala a nyanyukwa. Oshiilongomwa oshini? Kehe onzi oya simana kuJehova. Jesus okwa ti: “Kali shi ehalo lyaHo megulu, ku kane nando okamwe kaambuka uushona.” — Mat. 18:12-14.

3. Oshike tatu ka kundathana moshitopolwa shika?

³ Odhoshili kutya inatu hala nando okukala hatu uvitha nayi ooitaali ooyakwetu. Mbela ongiini tatu vulu okuyanda oku shi ninga? Oshike tatu vulu okuninga uuna tu uvithwa nayi kugumwe? Omapulo ngoka otaga ka yamukulwa moshitopolwa shika. Ihe tango, otatu ki ilonga oshindji kombinga ‘yaambuka uushona,’ mboka ya popiwa montopolwa 18 yaMateus.

4. ‘Mbuka uushona’ oolye?

⁴ ‘Mbuka uushona’ aalongwa yaJesus yomapipi agehe. Nonando oye na oomvula dha yoolokathana, ayehe oye li ‘onga aanona,’ molwaashoka oye na ehalo lyokulongwa kuJesus. (Mat. 18:3) Nonando otashi vulika ya za momaputuko ga yoolokathana  noye na omataloko nomaukwatya ga yoolokathana, ayehe oye na eitaalo muKristus, noku ya hole noonkondo. — Mat. 18:6; Joh. 1:12.

5. Jehova oha kala u uvite ngiini uuna gumwe a pundukitha nenge u uvitha nayi gumwe gwomaalongeli ye?

⁵ Ayehe mboka ya popiwa kutya oye li ‘mbuka uushona,’ oye na ondilo momeho gaJehova. Opo wu uve ko nkene Jehova ha kala e ku uvitile, dhiladhila kunkene hatu kala tu uvitile aanona yetu. Otu ya hole noonkondo. Ohatu ya gamene, molwaashoka kaye na oonkondo, ontseyo nosho wo oondunge ngaashi aakuluntu. Odhoshili kutya katu hole okumona gumwe ta ningwa nayi, nohashi tu uvitha nayi noonkondo uuna gumwe tu uvitha nayi okanona. Sha faathana, Jehova naye okwa hala oku tu gamena. Ohu uvu nayi, nenge tu tye oha kala a geya, uuna gumwe a pundukitha nenge u uvitha nayi gumwe gwomaalongeli ye. — Jes. 63:9; Mark. 9:42.

6. Shi ikolelela kAakorinto yotango 1:26-29, aantu muuyuni oya tala ko ngiini aalongwa yaJesus?

⁶ Omomukalo gulwe guni aalongwa yaJesus ya fa aantu ‘aashona’? Mbela uuyuni owa tala ko oolye oyo ya simana? Aayamba, aanamadhina nosho wo mboka ye na oondondo dhopombanda. Mepingathano naantu mboka, aalongwa yaJesus hasho ye li ngawo. Onkene aantu oye ya tala ko inaaya simana noye li aantu ‘yopevi.’ (Lesha 1 Aakorinto 1:26-29.) Ihe Jehova hasho e ya tala ko ngawo.

7. Jehova okwa hala tu kale tu uvitile ngiini aamwatate naamwameme?

⁷ Jehova oku hole aapiya ye ayehe, kutya nduno oomboka ya kala noku mu longela ethimbo ele nenge opo ye ya mo moshili. Aamwatate naamwameme ayehe oya simana kuJehova, onkene oya pumbwa wo okukala ya simana nokutse. Otwa hala okukala tu ‘hole ooitaali ooyakwetu ayehe,’ hayamwe owala yomuyo. (1 Pet. 2:17) Otu na okukala hatu ningi ngaashi tatu vulu tu ya gamene noku ya ambidhidha. Ngele otwa mono kutya otwa geyitha nenge otu uvitha nayi gumwe, katu na okukala owala hatu shi ipwililikile nokwiipopila kutya omuntu ngoka ohu uvu unene nayi nuupu, noku na oku tu dhimina po, e ta dhimbwa shoka twe mu ningila. Omolwashike aantu yamwe tashi vulika yu uvithwe nayi kuyalwe? Omolweputuko lyawo, aamwatate naamwameme yamwe ohaya kala yu uvite kutya inaya simana ya fa yalwe. Yamwe opo ye ya mo moshili, noinayi ilonga natango nkene ye na okuungaunga nokwaagwanenena kwayalwe. Kutya nduno oshike, otu na okukala hatu ningi ngaashi tatu vulu tu katuke oonkatu, opo pokati ketu nayalwe pu kale ishewe ombili. Shimwe ishewe, omuntu ngoka hu uvithwa aluhe nayi nuupu kuyalwe okwa pumbwa okulonga nuudhiginini, opo a kale i hu uvu aluhe nayi nuupu. Shoka otashi ke mu kwathela a kale e na ombili yokomwenyo noku kale wo e na ekwatathano ewanawa nayalwe.

8. Aantu yopethimbo lyaJesus oya li ye na etaloko lini ndyoka lyi li wo lya nwetha mo aalongwa ye?

⁸ Oshike sha li shi inyengitha Jesus a popye kombinga ‘yaambuka uushona’? Aalongwa ye oya li ye mu pula, taya ti: “Omukuluntu e vule ooyakwawo mOshilongo shegulu olye?” (Mat. 18:1) Aajuda oyendji yopethimbo ndyono oya li ya simaneka oondondo noonkondo. Omulongwantu gumwe okwa ti: “Kaantu yamwe yopethimbo lyaJesus, esimano, ondondo, okwiiningila edhina, okukala wu shiwike, wu holike nowa simanekwa, oyo ya li unene iinima ya simanenena kuyo.”

9. Aalongwa yaJesus oya li ya pumbwa okuninga shike?

⁹ Jesus okwa li e shi kutya aalongwa ye oya li taya ka pumbwa okulonga nuudhiginini ye ethe po ombepo yethigathanopo ndjoka ya li mAajuda oyendji. Okwe ya lombwele a ti: “Omukuluntu gwomokati keni na ninge omuhugunini,  naangoka gwokomeho na ninge omuyakuli.” (Luk. 22:26) Ngele owa kala wi itala ko wu li “omuhugunini,” nena oto ka kala wo wa tala ko ‘yalwe ye ku vule.’ (Fil. 2:3) Okukala tu na etaloko ndyoka otaku ke tu kwathela kaatu kale aluhe hatu uvitha nayi yalwe.

10. Omayele gaPaulus geni tu na okuvulika kugo?

¹⁰ Aamwatate naamwameme ayehe oye tu vule miinima yontumba. Shoka ohashi kala oshipu oku shi mona, uuna tatu gandja eitulomo komaukwatya gawo omawanawa. Otu na okuvulika komayele ngoka omuyapostoli Paulus a li a pe Aakorinto, sho a ti: “Olye e ku ningi u vule yakweni? Oshike shono u na inoo shi pewa kuKalunga? Onkee oto vulu ngiini okwiitanga wa fa iinima ayihe inoo yi pewa omagano?” (1 Kor. 4:7) Onkee ano, katu na okukala twa hala okusimanekwa sha pitilila kuyalwe nenge tu kale twi itala ko tu ya vule. Pashiholelwa, ngele omumwatate oha gandja iipopiwa iiwanawa nenge omumwameme he shi enditha aluhe nawa mokutameka omakonakonombiimbeli naantu, olupandu oye na aluhe okukala haye lu ukitha kuJehova.

11. Jesus ote tu longo shike methaneko lye kombinga yomukwaniilwa nomupika gwe?

¹¹ Konima sho Jesus a londodha aalanduli ye kaaya pundukithe yalwe, okwa gandja ethaneko kombinga yomukwaniilwa nomupika gwe. Methaneko ndyoka, omukwaniilwa okwa dhimi po oongunga dhomupika gwe ndhoka a li itaa vulu okufuta. Lwanima, omupika ngoka okwa ka kala inaa hala okudhima po oongunga oonshona dhomupika omukwawo. Omolwoshinima shoka, omukwaniilwa okwa tulitha mondholongo omupika ngoka a li inaa hala okudhima po oongunga dhomupika omukwawo. Shoka otashi tu longo shike? Jesus okwa ti: “Tate yomegulu osho te mu ningile wo, ngele itamu dhimine po omuntu kehe nomwenyo aguhe.” — Mat. 18:21-35.

12. Ngele otwa tindi okudhimina po yalwe otashi vulu oku ya guma ngiini?

¹² Shoka omupika ngoka a ningi kasha li owala she mu etele iilanduliko iiwinayi, ihe osha li wo shu uvitha nayi aantu yalwe. Shotango, oku ungaunga nayi nomupika omukwawo, sho e mu “edhililitha mondholongo sigo ta futu oongunga dhe.” Oshitiyali, okwa yemateke aapika ooyakwawo mboka ya mono shoka a ningi. Sho ‘aapika ooyakwawo ya mono shoka sha ningwa po, oya li ya nika oluhodhi noonkondo.’ Sha faathana, shoka hatu ningi ohashi gumu wo yalwe. Oshike hashi ningwa po ngele gumwe okwe tu uvitha nayi, e tatu tindi oku mu dhimina po? Shotango, ngele otwa kala inaatu hala oku mu dhimina po ohashi mu uvitha nayi, notashi vulika nokuli tu tameke oku mu kala kokule nokukala wo ihaatu ungaunga naye pahole. Oshitiyali, yalwe megongalo itaya ka kala ye shu uvitile ombili ngele oye shi ndhindhilike kutya pokati ketu nomuntu ngoka kapu na ombili.

13. Oshike to ilongo moshimoniwa shomukokolindjila gumwe?

¹³ Okudhimina po ooitaali ooyakwetu ihaku ye etele owala uuwanawa, ihe natse wo. Shoka osha li sha ningilwa omukokolindjila gumwe tatu ithana Crystal. Okwa li u uvithwa nayi komumwameme gumwe gwomegongalo lyawo. Crystal okwa ti: “Omathimbo gamwe oohapu dhe odha li hadhi ulula ndje komutima dha fa egongamwele. Kanda li nokuli handi kala nda hala okulonga pamwe naye muukalele. Shoka osha ningitha ndje kaandi kale we ndi na ehwamo lyokuuvitha, nonda kanitha enyanyu lyandje.” Crystal okwa li u uvite e na etompelo ewanawa lyokukala a geya. Ihe ina kala a kwatela omumwameme ngoka onkone nenge a kale i iyetela ohenda. Okwi ifupipike, e ta tula miilonga omayele ngoka ga li moshitopolwa shi na oshipalanyolo “Forgive From Your Heart” (Kala ho dhimine po nomutima aguhe), shoka sha li mOshungolangelo yo 15 Kotoba 1999, e ta dhimine  po omumwameme ngoka. Crystal okwa ti: “Ngashingeyi ondi shi kutya atuheni otatu kambadhala okuzala omuntu omupe, nonokutya Jehova ohe tu dhimine po nehalo ewanawa esiku kehe. Ondi uvite nda fa nda kuthwa omutengi omudhigu komapepe, nongashingeyi onda nyanyukwa ishewe.”

14. Shi ikolelela kuMateus 18:21, 22, Omuyapostoli Petrus otashi vulika a li ha kondjo nashike, noshike to ilongo meyamukulo lyaJesus?

¹⁴ Otu shi kutya otu na okukala hatu dhimine po yalwe, oshoka okuninga ngawo oshu uka. Ihe otashi vulika tu shi mone oshidhigu oku shi ninga. Omuyapostoli Petrus otashi vulika omathimbo gamwe naye a li ha kala u uvite ngawo. (Lesha Mateus 18:21, 22.) Oshike mbela tashi vulu oku ku kwathela? Shotango, tedhatedha kunkene Jehova he ku dhimine po lwiikando. (Mat. 18:32, 33) Ina gwana okukala he tu dhimine po, ihe ohe shi ningi aluhe nehalo ewanawa. (Eps. 103:8-10) Shimwe ishewe, Jehova okwa tegelela tu kale ‘tu holathane.’ Onkee ano, okudhimina po yalwe kashi shi oshinima shoka tu na owala okuninga uuna twa hala. Otu na aluhe okukala hatu dhimine po ooitaali ooyakwetu. (1 Joh. 4:11) Oshitiyali, tedhatedha kwaashoka hashi ningwa po ngele otwa dhimine po gulwe. Otashi vulika tu kwathele omuntu ngoka e tu ninga nayi, tu kaleke egongalo lya hangana, tu kaleke po uukuume wetu naJehova nokukala ishewe tu na ombili. (2 Kor. 2:7; Kol. 3:14) Shahugunina, galikana kwaangoka e tu lombwela tu kale hatu dhimine po. Ino etha Satana a piyaganeke ombili ndjoka yi li pokati koye nooitaali ooyakweni. (Ef. 4:26, 27) Opo megongalo mu kale mu na ombili, otwa pumbwa ekwatho lyaJehova.

15. Metsokumwe nAakolossa 3:13, oshike tatu vulu okuninga ngele otu uvithwa nayi komwiitaali omukwetu?

¹⁵ Ongiini mbela ngele omwiitaali omukweni okwa ningi oshinima shontumba shoka she ku uvitha nayi? Oshike wu na okuninga po? Katuka oonkatu ngaashi tashi vulika, wu kaleke po  ombili nomuntu ngoka. Lombwela Jehova megalikano nkene wu uvite. Mu pula a yambeke omuntu ngoka e ku uvitha nayi, noku ku kwathele wu mone muye omaukwatya omawanawa ngoka Jehova e hole muye. (Luk. 6:28) Ngele ito vulu okudhimbwa shoka omuntu ngoka e ku ningila, dhiladhila kombinga yankene to vulu oku ka popya naye. Oshi li aluhe pandunge okudhiladhila kutya omuntu ngoka e ku ninga nayi ine shi ningila owina. (Mat. 5:23, 24; 1 Kor. 13:7) Ngele owa ka popya naye, kala we mu tala ko kutya oku na etompelo ewanawa kutya omolwashike e ku ihumbatela momukalo ngoka. Ongiini ngele ina hala mu pange ombili? Tsikila owala oku mu ‘idhidhimikila’ (OB-1954). Ino kala we mu sa uunye. (Lesha Aakolossa 3:13.) Shoka sha simanenena, ino kala we mu kwatela onkone, oshoka shoka otashi vulu okuteya po uukuume woye naJehova. Ino etha nando osha shi ku pundukithe. Ngele owa ningi ngawo, nena oto ku ulika kutya owu hole Jehova komeho gaayihe. — Eps. 119:165.

16. Kehe gumwe gwomutse oku na oshinakugwanithwa shashike?

¹⁶ Otwe shi tala ko shi li uuthembahenda okulongela Jehova twa hangana tu li “oshigunda shimwe” notatu wilikwa ‘komusita gumwe.’ (Joh. 10:16) Embo Organized to Do Jehovah’s Will, pepandja 165, olya ti: “Kehe gumwe gwomutse oha mono mo uuwanawa muukumwe wetu, onkene atuheni otu na oshinakugwanithwa shoku wu kaleka po.” Ano otwa pumbwa “okwiidheula okukala hatu tala ko ooitaali ooyakwetu ngaashi Jehova he ya tala ko.” Jehova okwe tu tala ko atuheni tu li ‘oonzi’ dhe dhi na ondilo. Mbela nangoye osho wa tala ko ooitaali ooyakweni ngawo? Jehova oha kala e wete nokwa pandula kehe shoka ho ningi wu ya kwathele nowu ya sile oshimpwiyu. — Mat. 10:42.

17. Otwa tokola toko okuninga shike?

¹⁷ Otu hole ooitaali ooyakwetu. Onkene otwa ‘tokola toko twaa pundukithe omwiitaali omukwetu nenge otu mu undulile muulunde.’ (Rom. 14:13) Otwa tala ko ooitaali ooyakwetu ye tu vule, notwa hala okukala hatu ya dhimine po nomutima aguhe. Inatu etha tu pundukithwe kuyalwe. Pehala lyaashono, natu kale twa tokola toko “okulalakanena aluhe mbyoka tayi tu kaleke tu na ombili nooyakwetu, naambyoka tayi tungu okukalathana kwetu.” — Rom. 14:19.