1. Omolwashike aapiya yaJehova omathimbo gamwe tashi vulika ya kale yu uvite ye li oyo ayeke?

OYENDJI yomutse omathimbo gamwe ohatu kala tu uvite tu li otse atuke. Kuyamwe, omaiyuvo ngoka ohage ende taga kana po. Yamwe ohaya tsikile okukala yu uvite ngawo ethimbo ele. Otashi vulika wo tu kale tu uvite tu li otse atuke nuuna tu li naantu oyendji. Yamwe ohaye shi mono oshidhigu okupanga uukuume nayalwe megongalo epe. Yo yamwe mboka yi igilila okuninga iinima oyindji pamwe noyaandjawo ohaya kala yu uvite ye li oyo ayeke ngele oya tembukile kokule nayo. Yamwe oya yuulukwa noonkondo aaholike yawo mboka ya sa. Yo Aakriste yamwe, unene tuu mboka opo yi ilongo oshili, ohaya kala yu uvite ye li oyo ayeke uuna taya patanekwa kaakwanezimo yawo mboka kaaye shi ooitaali nenge kookuume kawo aakulu.

2. Omapulo geni tatu ka yamukula moshitopolwa shika?

² Jehova oha kala e shi kehe shimwe kombinga yetu noku shi uvite ko. Uuna tu uvite tu li otse atuke, oha kala e shi wete, nokwa hala oku tu kwathela kaatu kale tu uvite ngawo. Mbela Jehova ohe tu kwathele ngiini? Oshike tatu vulu okuninga tu ikwathele tse yene? Shimwe ishewe, ongiini tatu vulu okukwathela yalwe megongalo mboka haya kala yu uvite ye li oyo ayeke? Natu ka yamukuleni omapulo ngoka.

3. Jehova okwa li u ulike ngiini kutya oku na ko nasha naElia?

³ Jehova oku na ko nasha lela nonkalonawa yaalongeli ye ayehe. Oku li popepi nakehe gumwe gwomutse, noha kala e tu wete uuna twa gwililwa po nenge twa teka omukumo. (Eps. 145:18, 19) Dhiladhila kunkene Jehova a li e na ko nasha nankene omuhunganeki Elia a li u uvite, nankene e mu kwathele. Omulumentu ngoka omudhiginini okwa li ko pethimbo edhigu mondjokonona  yaIsraeli. Pethimbo ndyoka aalongeli yaJehova oya li taya hepekwa noonkondo, naatondi yoshigwana shaJehova oya li unene ya hala okudhipaga Elia. (1 Aak. 19:1, 2) Shimwe ishewe, Elia okwa li ta dhiladhila kutya oye awike omuhunganeki a hupa ko ta longele Jehova. (1 Aak. 19:10) Jehova Kalunga okwa li a ningi po sha nziya e mu kwathele. Jehova okwa tumu omuyengeli e mu shilipaleke kutya ke li oye awike, noku mu lombwele wo kutya opu na natango Aaisraeli oyendji haya tila Kalunga. — 1 Aak. 19:5, 18.

4. Markus 10:29, 30 otu ulike ngiini kutya Jehova oku na ko nasha naapiya ye mboka tashi vulika ya kale kaaye na ngoka te ya kwathele?

⁴ Jehova oku uvite ko kutya sho twa hogolola oku mu longela, yamwe yomutse otwa li tu na okuthiga po oshindji. Otashi vulika aapambele yetu nookuume ketu aakulu ya tameke okukala inaaya hala we oku tu kwathela. Omuyapostoli Petrus oshikando shimwe okwa pulile Jesus, tashi vulika molwaashoka a li a limbililwa, a ti: “Otse twa thigi ko iinima ayihe e tatu ku landula. Otatu ka pewa shike?” (Mat. 19:27) Jesus okwa li a shilipaleke aalongwa ye kutya otaya ka mona aamwayina oyendji, mboka taya ka kala onga aapambele yawo. (Lesha Markus 10:29, 30.) Jehova, Tate yetu gwomegulu, oku uvaneka kutya ota ka ambidhidha mboka ya hala oku mu longela. (Eps. 9:10) Natu taleni kiinima yimwe mbyoka to vulu okuninga, opo Jehova e ku kwathele uuna to kondjo nokukala wu uvite uuwike.

5. Uuwanawa wuni to ka mona ngele owa kala ho gandja eitulomo kunkene Jehova te ku kwathele?

⁵Gandja eitulomo kunkene Jehova te ku kwathele. (Eps. 55:22) Shoka otashi ke ku kwathela wu kale wu na etaloko li li pandjele kombinga yonkalo yoye. Omumwameme inaa hokanwa gwedhina Carol, * ngoka kee na aapambele moshili, okwa ti: “Okudhiladhila kombinga yankene Jehova a kala nokwaambidhidha ndje ndi idhidhimikile oonkalo oondhigu okwa kwathele ndje ndi kale ndu uvite kaandi li ongame awike. Ohashi shilipaleke ndje wo kutya Jehova ota ka ambidhidha ndje nomonakuyiwa.”

6. Petrus gwotango 5:9, 10 ota vulu ngiini okuladhipika mboka haya kondjo nokukala yu uvite uuwike?

⁶Dhiladhila kunkene Jehova ta kwathele ooitaali ooyakweni mboka yu uvite uuwike. (Lesha  1 Petrus 5:9, 10.) Omumwatate Hiroshi, ngoka a li oye awike Onzapo maandjawo, okwa ti: “Oshipu okumona kutya megongalo kamu na ngoka kee na omaupyakadhi. Okutseya kutya atuheni otatu ningi ngaashi tatu vulu tu longele Jehova, otaku vulu oku tu ladhipika tse mboka kaatu na aakwanezimo ye li moshili.”

7. Egalikano ohali ku kwathele ngiini?

⁷Kala aluhe ho galikana, ho lesha Ombiimbeli noho kala pokugongala. Shoka osha kwatela mo okukala ho lombwele Jehova nkene wu uvite. (1 Pet. 5:7) Omumwameme omugundjuka gwedhina Massiel, okwa ti: “Oshinima shimwe sha simana shoka sha kwathela ndje ndi idhidhimikile okukala ndu uvite uuwike, okugalikana aluhe kuJehova.” Massiel okwa li u uvite kee niwe ko nasha naye kuyaandjawo sho a tameke okulongela Jehova. Ota ti: “Jehova okwa li onga Tate kungame nonda li nda mu galikana esiku kehe lwiikando, tandi mu lombwele nkene ndu uvite.”

8. Okulesha Oohapu dhaKalunga nokutedhatedha kudho ohaku ku kwathele ngiini?

⁸ Kala aluhe ho lesha Oohapu dhaKalunga, nokutedhatedha komahokololo gokondandalunde ngoka tagu ulike kutya Jehova oku ku hole. Omumwameme Bianca, ngoka hi idhidhimikile okuulwa nayi kaakwanezimo ye omolweitaalo lye, okwa ti: “Okulesha nokutedhatedha kombinga yomahokololo gOmbiimbeli gaapiya yaJehova mboka ya li ya taalele onkalo ya fa yandje ohaku kwathele ndje noonkondo.” Aakriste yamwe ohayi ilongo momutse omanyolo ngoka taga vulu oku ya hekeleka, ngaashi Episalomi 27:10 nosho wo Jesaja 41:10. Yamwe oya mona kutya okupulakena kOmbiimbeli nenge kiitopolwa yokukonakonwa mbyoka ya kwatwa ohaku ya kwathele kaaya kale yu uvite unene uuwike uuna tayi ilongekidhile okugongala nenge taya lesha Ombiimbeli.

9. Okukala pokugongala ohaku ku kwathele ngiini?

⁹ Kala ho ningi ngaashi to vulu wu kale aluhe ho kala pokugongala. Shoka hashi kundathanwa pokugongala ohashi tu tsu omukumo, nokukala puko ohaku tu kwathele wo tu tseye ooitaali ooyakwetu nawa. (Heb. 10:24, 25) Massiel, ngoka a popiwa metetekelo, okwa ti: “Nonando onda li ndi na oohoni noonkondo, onda tokola okukala handi kala pokugongala kehe nokukutha ombinga muko. Shoka osha kwathele ndje ndi kale ndu uvite ndi li oshilyo shegongalo.”

10. Omolwashike sha simana okupanga uukuume nAakriste mboka aadhiginini?

¹⁰Panga uukuume nAakriste mboka aadhiginini. Panga ookuume megongalo naamboka ye li oshiholelwa oshiwanawa, mwa kwatelwa wo mboka kaaye shi yepipi lyoye nenge ye na eputuko lya yooloka ko kulyoye. Ombiimbeli otayi tu dhimbulukitha kutya oondunge “otadhi monika mokati kaakokele.” (Job 12:12) Aakokele nayo otaya vulu wo okwiilonga oshindji kaagundjuka  mboka aadhiginini. David okwa li omushona lela kuJonatan, ihe shoka inashi ya imba ya pange uukuume wopothingo. (1 Sam. 18:1) David naJonatan oya li ya kwathelathana, opo ya longele Jehova, nonando opwa li omashongo ga kwata miiti. (1 Sam. 23:16-18) Omumwameme Irina, ngoka oye awike Onzapo maandjawo, okwa ti: “Aamwatate naamwameme otaya vulu lela okukala onga aavali yetu nenge aamwayina yetu. Jehova ota vulu oku ya longitha e tu kwathele.”

11. Oshike wu na okuninga, opo wu pange uukuume wopothingo nayalwe?

¹¹ Okumona ookuume aape otaku vulu okukala okudhigu, unene tuu ngele owu na oohoni. Ratna, omumwameme e na oohoni ngoka i ilongo oshili nonando okwa li ta patanekwa, okwa ti: “Pethimbo tandi ilongo oshili, onda li nda mono kutya onda pumbwa ekwatho lyaamwatate naamwameme.” Ohashi vulu okukala eshongo okulombwela gumwe nkene wu uvite, ihe ngele owe shi ningi, omuntu ngoka oha vulu okuninga kuume koye kopothingo. Ookuume koye ohaya kala ya hala oku ku tsa omukumo noku ku kwathela, ihe owu na oku ya lombwela nkene taya vulu oku shi ninga.

12. Uukalele otawu vulu ngiini oku ku kwathela wu pange uukuume wa kola nayalwe?

¹² Omukalo gumwe omwaanawa to vulu okupanga uukuume nooitaali ooyakweni, omokukala ho kutha ombinga muukalele pamwe nayo. Carol, ngoka a popiwa metetekelo, okwa ti: “Onda mono ookuume aawanawa oyendji sho nda kala handi longo pamwe naamwameme muukalele nosho wo mokulongela Jehova momikalo dhilwe. Momukokomoko gwomimvo, Jehova okwa kala ta ambidhidha ndje okupitila mookuume mboka.” Okupanga uukuume nAakriste mboka aadhiginini oku na lela uuwanawa. Jehova oha longitha ookuume mboka e tu kwathele tu ungaunge nomaupyakadhi getu, ngaashi uuna tu uvite uuwike. — Omayel. 17:17.

13. Atuheni otu na oshinakugwanithwa shashike megongalo?

¹³ Atuheni otu na oshinakugwanithwa shokuhumitha komeho ombili nohole megongalo, opo kaapu kale nando ogumwe u uvite uuwike. (Joh. 13:35) Shoka hatu popi nohatu ningi otashi vulu lela okutsa yalwe omukumo! Omumwameme gumwe okwa ti: “Sho ndi ilongo oshili, mboka yomegongalo lyetu oya kala onga aakwanezimo yandje. Onda vulu okuninga Onzapo yaJehova, kekwatho lyaamwatate naamwameme mboka.” Oshike to vulu okuninga wu kwathele mboka ye li oyo ayeke moshili, ya kale yu uvite kutya oye li oshitopolwa shegongalo?

14. Oshike to vulu okuninga wu pange uukuume naamboka aape?

¹⁴Kambadhala okupanga uukuume naamboka aape megongalo. Otatu vulu okukala hatu ya taamba ko nomaako agehe uuna ye ya kokugongala. (Rom. 15:7) Ihe otwa pumbwa okukala hatu ningi oshindji, kaashi shi owala oku ya popitha nombili. Otwa hala okupanga uukuume wopothingo nayo mokweendela ko kwethimbo. Onkee ano, kala ho ungaunga nombili naamboka aape, nokuulika kutya owu na ko nasha lela nayo. Kambadhala okuuva ko onkalo yawo, nopwaa na okwiidhopa miinima yawo yopaumwene. Yamwe yomuyo otashi vulika shi kale oshidhigu okupopya nkene yu uvite, onkee ino ya thininika ya popye. Pehala lyaashono, ya pula omapulo ngoka tagu ulike kutya owu na ko nasha lela nayo, e to ya pulakene neitulomo sho taya popi. Pashiholelwa, oto vulu oku ya pula kutya oshili oye yi mono ngiini.

15. Aakriste mboka ye na eitaalo lya kola otaya vulu ngiini okukwathela yalwe megongalo?

¹⁵ Ayehe megongalo otaya ka kala ye na eitaalo lya kola, uuna mboka ye na eitaalo lya kola, unene tuu aakuluntugongalo, hayu ulike ohokwe muyalwe. Omumwameme Melissa, ngoka  a putudhilwa moshili kuyina, okwa ti: “Onda pandula noonkondo aamwatate mboka ya kala onga ootate kungame momukokomoko gwomimvo. Uuna nda hala okupopya nkene ndu uvite, ohandi kala aluhe ndi na ngoka tandi vulu okupopya naye.” Omumwatate omugundjuka gwedhina Mauricio, ngoka a li u uvite e ekelwahi sho omumwatate ngoka a li ha konakona naye Ombiimbeli a thigi po oshili, okwa ti: “Aakuluntugongalo oya li yu ulike kutya oye na ko nasha nangame, naashoka osha kwathela ndje lela. Oya kala aluhe haya popi nangame. Oya kala wo haya longo pamwe nangame muukalele, haya kundathana nangame kombinga yomaliko gopambepo ngoka ya mona pekonakonombiimbeli lyawo lyopaumwene, notwa li wo hatu dhana omaudhano pamwe.” Melissa naMauricio ngashingeyi oye li miilonga yethimbo lyu udha.

16-17. Omomikalo dhini tadhi longo tatu vulu okukwathela yalwe kaaya kale yu uvite uuwike?

¹⁶Kwathela yalwe momikalo tadhi longo. (Gal. 6:10) Omumwatate Leo, ngoka e li omutumwa moshilongo shi li kokule noyaandjawo, okwa ti: “Olundji omuntu oho kala wa pumbwa okuulukilwa olukeno pethimbo ndyoka we li pumbwa. Otandi dhimbulukwa esiku limwe sho nda li moshiponga shohauto. Sho nda thiki kegumbo, onda li nda polimana noonkondo. Ihe aaihokani yamwe oya hiya ndje ndi ka lye pamwe nayo. Itandi dhimbulukwa shoka twa lya, ihe otandi dhimbulukwa kutya oya li lela ya pulakene kungame nolukeno. Konima yaashono onda kala ndu uvite hwepo.”

¹⁷ Atuheni ohatu nyanyukilwa okukala nooitaali ooyakwetu piigongi iishona niinene, unene tuu okupopya nayo kombinga yiipopiwa mbyoka twa pulakena. Nonando ongawo, Carol, ngoka a popiwa metetekelo, okwa ti: “Uuna ndi li piigongi iishona nenge iinene, ohandi kala ndu uvite uuwike.” Mbela omolwashike ha kala u uvite ngawo? Okwa ti: “Nonando piigongi ohapu kala aamwatate naamwameme oyendjiyendji, olundji ohaya kala ye li naantu yaandjawo. Shoka ohashi ningitha ndje ndi kale ndu uvite uuwike.” Yamwe ohaya mono oshidhigu okukala piigongi oshikando shawo shotango okuza sho ya silwa ookuume kawo kopandjokana. Mbela owu shi gumwe ngoka tu ungaunga nonkalo ya fa ndjoka? Oto vulu oku mu hiya a kuutumbe pamwe nane poshigongi tashi landula.

18. Ongiini tatu vulu okutula miilonga Aakorinto aatiyali 6:11-13, uuna tatu hiya yalwe komagumbo getu nenge twa hala oku za po nayo?

 ¹⁸Kala ho endathana nooitaali ooyakweni. Kambadhala okukala ho endathana naamwatate naamwameme ya yoolokathana, mwa kwatelwa wo mboka tashi vulika haya kala yu uvite uuwike. Otwa hala ‘okweegululila omitima dhetu’ aantu ayehe, unene tuu mboka haya kala yu uvite uuwike. (Lesha 2 Aakorinto 6:11-13.) Melissa, ngoka a popiwa metetekelo, okwa ti: “Otwa li hatu kala aluhe twa nyanyukwa noonkondo, uuna aamwatate naamwameme ye tu hiya komagumbo gawo nenge ye tu pula tu ze po nayo.” Mbela megongalo lyeni omu na gumwe ngoka to vulu okuhiya?

19. Uunake okukala pamwe nAakriste ooyakwetu taku vulu okukala ekwatho enene kuyo?

¹⁹ Omathimbo gamwe otashi vulika Aakriste ooyakwetu ye shi pandule ngele otwe ya hiya komagumbo getu. Yamwe otashi vulika ya mone oshidhigu okukala naapambele mboka kaaye shi ooitaali pethimbo lyomatango omanene. Yalwe otashi vulika haya kala ya yemata noonkondo momasiku gontumba, ngaashi esiku moka kuume kawo kopandjokana a sa. Ngele ohatu iyamba tu kale pamwe naamwatate naamwameme mboka ye li moonkalo dha fa ndhoka, kungawo otatu ulike kutya ‘otu na oshimpwiyu nayo.’ — Fil. 2:20.

20. Oohapu dhaJesus ndhoka tadhi adhika muMateus 12:48-50, otadhi vulu oku tu kwathela ngiini uuna tu uvite uuwike?

²⁰ Opu na omatompelo ogendji ngoka haga ningitha omuntu a kale u uvite uuwike. Nonando ongawo, inatu dhimbwa nando kutya Jehova oha kala e wete nkene tu uvite. Olundji oha longitha Aakriste ooyakwetu, e tu pe shoka twa pumbwa. (Lesha Mateus 12:48-50.) Onkee ano, ohatu ulukile Jehova kutya otwa pandula sho e tu pa pahole egongalo lyopaKriste, mokuninga ngaashi tatu vulu tu ambidhidhe ooitaali ooyakwetu. Kutya nduno otwi iyadhe tu uvite ngiini, katu na okudhimbwa nando kutya Jehova oku li aluhe pamwe natse.