Paulus okwa li a nyola, a ti: “Mokupopya ompango ngame onda sa, nda dhipagwa kompango, opo ndi kalele Kalunga ndi na omwenyo.” — Gal. 2:19.

Shoka Paulus a nyola oshi li metsokumwe naashoka a li a lombwele omagongalo gomoshitopolwa shaGalatia muRoma. Aakriste yamwe yaahoka oya li taya nwethwa mo kaalongi aafundja. Aantu mboka oya li haya longo aantu kutya, opo omuntu wu hupithwe, owu na okukala ho vulika kOmpango yaMoses, unene tuu ndjoka yi na ko nasha nepitotanda. Ihe Paulus okwa li e shi kutya Kalunga ka li a tegelela we aantu ya kale haya piti etanda. Okwa li a tompathana nayo nomupondo, noku ulike kutya omalongo ngoka ogiifundja, shoka she ya kwathele ya kale ye na eitaalo mekuliloyambo lyaJesus Kristus. — Gal. 2:4; 5:2.

Ombiimbeli oye shi popya sha yela kutya ngele omuntu okwa si, iha kala e shi sha nenge a ningilwe uuwanawa nenge uuwinayi washa. (Omuuv. 9:5) Sho Paulus a ti: “Mokupopya ompango ngame onda sa, nda dhipagwa kompango,” okwa li a hala okutya ka li we ta pangelwa kOmpango yaMoses. Ano Paulus okwa li e na uushili kutya molwaashoka okwa li e na eitaalo mekuliloyambo, ota vulu ‘okukalela Kalunga e na omwenyo.’

‘Ompango’ ndjoka oyo ya ningitha Paulus a lundulule etaloko lye. Ngiini mbela? Okwa adhika e shi yelitha kutya “omuntu ota ningi omuyuuki koshipala shaKalunga keitaalo okwiitaala muJesus Kristus, hamolwokugwanitha shoka tashi pulwa kompango.” (Gal. 2:16) Odhoshili kutya Ompango oya li yi na oshilonga sha simanenena. Paulus okwa li a yelithile Aagalati, a ti: “[Ompango] oya gwedhwa po, opo yi ulukile aantu kutya uulunde oshike.” (Gal. 3:19) Eeno, Ompango oya li ye shi ulike sha yela kutya aantu inaaya gwanenena itaya vulu okuvulika kOmpango thiluthilu nosho wo kutya aantu otaya ka pumbwa ishewe okukulilwa komuntu a gwanenena. Onkee ano, Ompango oya li ya kwathele aantu ya mone kutya Jesus Kristus oye “oluvalo.” Omuntu ota vulu okukala omuyuuki koshipala shaKalunga, ngele okwa kala e na eitaalo tali longo muJesus Kristus. (Gal. 3:24) Paulus okwa li a thiki pehulithodhiladhilo ndyoka, molwaashoka okwa taamba ko nokwiitaala Jesus okupitila mOmpango. Kungawo Paulus okwa “dhipagwa kompango” nokwa ‘kalele Kalunga e na omwenyo.’ Ano ka li we ta pangelwa kOmpango, ihe okuKalunga.

Paulus okwa popi wo oshinima sha faathana montumwafo ye ndjoka a nyolele Aaroma, sho a ti: “Nane wo aamwameme, omwa kwatunuka mo mompango, oshoka one iilyo yolutu lwaKristus . . . Otwa manguluka mompango notwa kwatunuka mo mushoka sha li she tu ninga oonkwatwa.” (Rom. 7:4, 6) Enyolo ndyoka nosho wo Aagalati 2:19, otaga ulike kutya Paulus ka li ta popi kombinga yokusa kwe e li omulunde kohi yOmpango. Pehala lyaashono, okwa li ta popi kombinga yokukala a manguluka ko kOmpango. Ye nosho wo yalwe mboka ya li ye na eitaalo muKristus, kaya li we taya pangelwa kuyo. Eitaalo lyawo mekuliloyambo lyaKristus olye ya mangulula ko kOmpango ndjoka.