UULE womimvo, Aaisraeli oya kala ye na ondjigilile yokwaambidhidha pashimaliwa elongelokalunga lyashili. Ihe pethimbo lyaJesus, Aajuda oya li ye na okufuta iifendela oyindji, shoka sha li oshidhigu kuyo.

Aajuda ayehe aakuluntu oya li ye na okufuta etata lyosekeli (oshimaliwa shoshisiliveli shimwe), opo ya ambidhidhe pashimaliwa etsalihangano nolwanima otempeli. Methelemumvo lyotango, omayambidhidho ngoka oga li haga longithwa mokukaleka otempeli ndjoka ya li ya tungithwa kuHerodes monkalo ombwanawa nosho wo mokulanda omayambo ngoka ga li haga longithwa motempeli. Aajuda yamwe oya li ya pula Petrus kutya Jesus okwa tala ko ngiini okufuta oompale, na Kristus okwa li a popi kutya inashi puka oku dhi futa. Jesus okwa li nokuli a lombwele Petrus a ka tale oshimaliwa oshisiliveli, opo a fute oompale  — Mat. 17:24-27.

Pethimbo lyonale oshigwana shaKalunga osha li wo shi na okufuta oshitimulongo shiilikolomwa yomomapya gasho nenge shiiyemo yasho. (Lev. 27:30-32; Num. 18:26-28) Aawiliki yomalongelokalunga oya li haya lombwele aantu ya dhiginine okufuta oshitimulongo, nokuli nonando “ominti, odili nenge okumina.” Jesus ka li a ti kutya osha puka okufuta oshitimulongo, ihe okwa ti kutya omukalo moka aalongimpango nAafarisayi ya li haya tula miilonga ompango yi na ko nasha nokugandja oshitimulongo ogwa puka. — Mat. 23:23.

Pethimbo ndyoka Aajuda oya li wo ye na okufuta iifendela oyindji kAaroma, mboka ya li taye ya pangele. Pashiholelwa, ooyene yomapya oya li ye na okufuta iifendela yiimaliwa nenge yiilikolomwa yomomapya gawo. Otaku tengenekwa kutya oya li haya futa iifendela yoopelesenda 20 sigo 25. Omujuda kehe okwa li wo e na okufuta oompale. Aafarisayi oya li ya pula Jesus ngele oha futu ngaa oompale ndhoka. Jesus okwe shi ngongo nawa nkene tu na okutala ko okufuta iifendela, a ti: “Shono shomupangeli, shi peni omupangeli, naashoka shaKalunga, shi peni Kalunga.” — Mat. 22:15-22.

Iilandithomwa oya li wo hayi fendelelwa uuna tayi ya mo moshitopolwa nenge tayi zi mo. Iifendela mbyoka oya li hayi futithwa aantu pomatulilosikepa, poontopa, pomatsakaneno goondjila nenge piiyelo yokuya mondoolopa nenge pomatala.

Aantu mboka ya li kohi yepangelo lyOmuroma oya li haye shi mono oshidhigu noonkondo okufuta iifendela. Omunandjokonona Omuroma, Tacitus, okwa ti kutya sho omupangeli Tiberius a li ta pangele pethimbo Jesus a li kombanda yevi, “Siria naJudea, oya li ya pula ya kale haya futu iifendela iishona, oshoka iifendela oya li oyindji noonkondo.”

Iifendela oya li wo ya yi pombanda molwaashoka aantu mboka ya li hayi yi futitha oya li haya gwedha ko shawo. Epitikilo lyokufutitha aantu iifendela olya li hali tulwa mofanditha, e tali pewa ngoka te li futile iimaliwa oyindji. Mboka ya li haye li landa po oya li haya li mo nawa. Otashi vulika Sakeus naye a li gumwe gwomaantu mboka. (Luk. 19:1, 2) Oshi shi okuuviwa ko sho aantu pethimbo ndyoka ya li kaaye hole ompango ndjoka nosho wo mboka ya li haye ya futitha.