1, 2. Omolwashike Kalunga a li e ‘hole’ Daniel, nongiini tatu vulu okukala hatu vulika ngaashi Daniel?

SHO Aajuda ya falwa muupongekwa muBabilonia, moshilando omwa li mu udha iimenka naantu haya longele oompwidhuli. Nonando ongawo, Aajuda mboka ya li aadhiginini ngaashi Daniel nokuume ke yatatu, oya li ya tindi okunwethwa mo kaantu yomuBabilonia. (Daniel 1:6, 8, 12; 3:16-18) Daniel nookuume ke oya li ya taamba ko Jehova e li Omuhongi gwawo noya tsikile oku mu longela. Nonando Daniel okwa li a kala uule womimvo odhindji momudhingoloko gu na enwethomo ewinayi, omuyengeli gwaJehova okwa li e mu lombwele a ti: “Kalunga oku ku hole.”—Daniel 10:11, 19.

² Pethimbo lyOmbiimbeli, omuhongi gwiiyuma oha kala ta me eloya, opo a ninge po oshiyuma. Kunena aalongelikalunga yashili oye shi kutya Jehova oye Omupangeli gweshito alihe noku na uuthemba wokuzula iigwana ayihe. (Lesha Jeremia 18:6.) Jehova oku na wo uuthemba wokuzula kehe gumwe gwomutse. Ihe iha thiminike nando omuntu a ninge omalunduluko. Pehala lyaashono, okwa hala tu kale tu na ehalo lyokweetha e tu zule. Moshitopolwa shika otatu ki ilonga nkene tatu vulu okukala twa fa eloya  ndyoka Jehova ta vulu okuma nuupu. Otatu ka kundathana omapulo ngaka gatatu: (1) Ongiini tatu vulu okuyanda okuulika iikala mbyoka tashi vulika yi tu ningithe tu kale inaatu hala okutaamba ko omayele gaJehova notu kale twa fa eloya ndyoka itaa vulu okuma? (2) Ongiini tatu vulu okukokeka omaukwatya ngoka tage tu kwathele tu kale hatu vulika notu kale twa fa eloya ndyoka hali mewa nuupu? (3) Ongiini aavali Aakriste taya vulu okulonga pamwe naJehova uuna taya zula oyana?

3. Iikala yini tayi vulu oku tu ningitha tu kolondeke omitima dhetu? Gandja oshiholelwa.

³ Omayeletumbulo 4:23 otayi ti: “Tonatela omutima gwoye shi vule ayihe mbyoka yi na okutonatelwa, oshoka omo mu na ekota lyomwenyo.” Otu na okuyanda iikala iiwinayi ngaashi uuntsa, okukala hatu yonene owina nokwaaneitaalo, opo kaatu kolondeke omitima dhetu. Ngele inatu kotoka, iikala mbyoka otayi vulu oku tu ningitha tu kale ihaatu vulika notu tse ondumbo naJehova. (Daniel 5:1, 20; Aahebeli 3:13, 18, 19) Oshinima shoka osho sha ningilwa omukwaniilwa gwaJuda, Ussia. (Lesha 2 Ondjalulo 26:3-5, 16-21.) Petameko Ussia okwa li ha vulika kuJehova nokwa li e na ekwatathano ewanawa naye. Onkee ano, Jehova okwe mu nkondopaleke. Ombiimbeli otayi ti kutya konima yethimbo, “sho a ningi omunankondo, okwa tumbu pombanda” momutima gwe. Okwa ningi omunuutsa e ta yi motempeli nokwa kambadhala okufika iitsinino ketsininoyambelo, nonando aayambi oyo owala ya li ya pitikwa ye shi ninge. Sho aayambi ye mu lombwele kutya oshinima shoka ta ningi osha puka, Ussia okwa geye noonkondo. Jehova okwa fupipike omukwaniilwa ngoka omunuutsa nokwa kwatwa koshilundu sigo a si.—Omayeletumbulo 16:18.

4, 5. Oshike tashi vulu okuningwa po ngele otwa kala inaatu kotokela uuntsa? Gandja oshiholelwa.

⁴ Ngele itatu yanda uuntsa, otatu vulu okutameka okudhiladhila kutya otu li nawa tu vule yalwe, notashi vulika tu tameke okutinda omayele ngoka tatu pewa okuza mOmbiimbeli. (Omayeletumbulo 29:1; Aaroma 12:3) Shoka osho sha li sha ningilwa omukuluntugongalo gwedhina Jim. Jim okwa li itaa tsu kumwe naakuluntugongalo ooyakwawo megongalo moshinima shontumba. Ota ti: “Onda li nda lombwele aamwatate kutya kaye shi aanahole, e tandi piti mo mokugongala kwaakuluntugongalo.” Konima yoomwedhi hamano lwaampono, okwa tembukile kegongalo lilwe, ihe ka li a langekwa po e li omukuluntugongalo. Jim okwa li e shi yematela noonkondo. Okwa li e na uushili kutya shoka a popi kombinga yaakuluntugongalo ooyakwawo oshi li mondjila, nokwe etha po okulongela Jehova e ta kala ini ipyakidhila we uule womimvo omulongo. Jim ota ti kutya okwa li a kwatwa kuuntsa e ta tameke okupa Jehova uusama omolwiinima ayihe mbyoka a ningilwa. Uule womimvo odhindji, aamwatate oya kala haye mu talele po noya li ya kambadhala oku mu kwathela, ihe Jim okwa tindi ekwatho lyawo.

⁵ Jim ota ti: “Kanda li tandi vulu okweetha po okukala tandi dhiladhila kutya yalwe oyo ya puka.” Oshiholelwa she otashi tu ulukile kutya uuntsa otawu vulu oku tu ningitha tu kale tatu popile eihumbato lyetu nonando ewinayi. Uuna shika tashi ningwa, ihatu kala we twa fa eloya ndyoka hali vulu okumewa nuupu. (Jeremia 17:9) Mbela owu uvithwa nale nayi komumwatate nenge komumwameme gwontumba? Mbela owa li wa yemata molwaashoka wa kuthwa oshinakugwanithwa shontumba? Owa li wi inyenge ngiini? Owa li wa kwatwa kuuntsa, nenge owa li wa mono kutya okupanga nombili nomumwaho nosho wo okukala omudhiginini kuJehova  oko oshinima sha simana noonkondo?—Lesha Episalomi 119:165; Aakolossa 3:13.

6. Oshike tashi vulu okuningwa po ngele otwa kala hatu yonene owina?

⁶ Ngele omuntu okwa tsikile okuyonena owina nokuholeka nokuli omayono ge, otashi vulika shi kale oshidhigu kuye okutaamba ko omayele gopaMbiimbeli. Otashi vulu nokuli okukala oshipu kuye okutsikila okuyona. Omumwatate gumwe okwa ti kutya konima yethimbo eihumbato lye ewinayi kalya li we hali mu piyaganeke nandonando. (Omuuvithi 8:11) Omumwatate gulwe ngoka a li a kala uule wokathimbo e na ondjigilile yokutala omathano giipala, konima yethimbo okwa ti: “Onde ki iyadha nda kokeka iikala yokupa aakuluntugongalo uusama.” Ondjigilile ye yokutala omathano giipala oya yono po ekwatathano lye naJehova. Sho yalwe ya mono shoka a kala ha ningi, okwa ka konga ekwatho kaakuluntugongalo. Oshoshili kutya atuheni inatu gwanenena. Ihe ngele otwa kala tu na iikala yokugandja uusama kwaamboka haye tu pe omayele nenge yokukonga omaipopilo uuna twa ninga sha sha puka, pehala lyokupula Kalunga e tu dhimine po noku tu kwathele, omitima dhetu otadhi kolonda.

7, 8. (a) Aaisraeli yonale oya li yu ulike ngiini kutya kaye na eitaalo muJehova? (b) Oshike tatu ilongo kuyo?

⁷ Sho Jehova a mangulula Aaisraeli muupika waEgipiti, oya mono nkene ta longo iikumithalonga oyindji. Nonando ongawo, sho ye li popepi nokuthika mEvi lyEuvaneko, omitima dhawo odha kolonda. Omolwashike mbela? Kaya li ye na eitaalo muJehova. Pehala lyokwiinekela muJehova, oya tila e taya tameke okutamaneka Moses. Oya li ya hala nokuli okushuna kuEgipiti, hoka ya li aapika. Jehova okwa li e yu uvitile unene nayi e ta ti: “Sigo uunake aantu mbaka taa kala nokudhina ndje?” (Numeri 14:1-4, 11; Episalomi 78:40, 41) Aaisraeli mboka oya li ya sile mombuga, molwaashoka ya li ya kukutika omitima dhawo nomolwaashono ya li kaaye na eitaalo.

⁸ Kunena, otu li popepi nokuya muuyuni uupe, neitaalo lyetu otali makelwa. Onkee ano, otwa pumbwa okutala kutya eitaalo lyetu olya kola shi thike peni. Ongiini tatu vulu okushilipaleka kutya olya kola? Otatu vulu okukonakona oohapu dhaJesus ndhoka tadhi adhika muMateus 6:33. Otatu vulu wo okwiipula ngeyi: ‘Mbela omalalakano gandje nomatokolo gandje otagu ulike ngaa shili kutya ondi itaala oohapu dhaJesus? Mbela otandi ka faula okugongala nenge iilonga yomomapya molwaashoka nda hala okwiikongela iimaliwa oyindji? Oshike tandi ka ninga po ngele iilonga yandje otayi pula ndje ndi longe olutayima? Mbela otandi ke etha uuyuni mbuka wu nwethe ndje mo nenge nokuli wu ethithe ndje po okulongela Jehova?’

9. Omolwashike tu na ‘okukonakona’ ngele otu na eitaalo, nongiini tatu vulu oku shi ninga?

⁹ Ngele ihatu landula shoka Ombiimbeli tayi ti kombinga yeendathano ewinayi, yokukondwa, nenge yomainyanyudho omawinayi, omitima dhetu otadhi vulu okukolonda. Oshike mbela wu na okuninga ngele shoka osha tameke oku ku ningilwa? Owa pumbwa okukonakona eitaalo lyoye meendelelo. Ombiimbeli otayi ti: “Ikonakoneni, ne mu iyeleke, opo mu tale, ngele omu li  tuu meitaalo.” (2 Aakorinto 13:5) Ikonakona mwene, e to longitha aluhe Oohapu dhaKalunga, opo dhi zule omadhiladhilo goye.

10. Oshike tashi vulu oku tu kwathela tu kale twa fa eloya ndyoka tali vulu okumewa nuupu kuJehova?

¹⁰ Kalunga okwe tu pa Oohapu dhe, egongalo nosho wo uukalele yi tu kwathele tu kale twa fa eloya ndyoka hali vulu okumewa nuupu. Uuna tatu lesha Ombiimbeli notatu tedhatedha kuyo esiku kehe, otashi tu kwathele tu kale hatu vulu okumewa nuupu kuJehova nokweetha e tu zule. Jehova okwa lombwelele aakwaniilwa yaIsraeli ya nyolithe oohapu dhomembo lyOmpango yaKalunga noku dhi lesha esiku kehe. (Deuteronomium 17:18, 19) Aayapostoli oya li ye shi shi kutya okulesha Omanyolo nokutedhatedha kugo osha simanenena omolwuukalele wawo. Oya li haya longitha olundji iitopolwa yOmanyolo gOshihebeli momanyolo ngoka ya nyola. Uuna tayu uvithile aantu, oya li haye ya ladhipike ya konakone wo Omanyolo. (Iilonga 17:11) Komukalo gwa faathana, natse otu wete kutya osha simana okulesha Oohapu dhaKalunga esiku kehe nokutedhatedha kudho. (1 Timoteus 4:15) Shika otashi tu kwathele tu kale aaifupipiki, na Jehova ota ka vula oku tu zula.

11, 12. Shi ikolelela koompumbwe dhetu, Jehova oha longitha ngiini egongalo lyopaKriste li tu zule? Gandja oshiholelwa.

¹¹ Jehova oku shi oompumbwe dhetu noha longitha egongalo lyopaKriste li tu zule. Jim ngoka a popiwa metetekelo okwa tameke okulundulula iikala ye sho omukuluntugongalo gumwe e mu ulukile kutya oku na ko nasha naye. Jim okwa popi kombinga  yomukuluntugongalo ngoka a ti: “Kapwa li nando esiku a pele ndje uusama nenge a pangule ndje omolwomukalo moka nda li ndi ihumbata nale. Pehala lyaashono, okwa kala a tala ndje ko momukalo omuwanawa nokwa li u ulike kutya okwa hala okukwathela ndje.” Konima yoomwedhi ndatu lwaampono, omukuluntugongalo ngoka okwa hiya Jim kokugongala. Jim ota ti kutya aantu megongalo oye mu taamba ko nombili, nohole yawo oye mu kwathele a lundulule omukalo moka a li ha dhiladhila. Okwa mono kutya shoka a li u uvite hasho shi na oshilonga. Aakuluntugongalo megongalo lyawo nosho wo omukulukadhi gwe oye mu ladhipike, nokonima okwa tameke kashona nakashona okulongela Jehova ishewe. Jim natango okwa kwathelwa wo kokulesha iitopolwa ngaashi “Jehova ke na ondjo” nosho wo “Longela Jehova nOudiinini,” tayi adhika mOshungonangelo ye 1 Novomba 1992.

¹² Konima yethimbo Jim okwa ningi ishewe omukuluntugongalo. Okuza mpoka, okwa kala ha kwathele aamwahe ya kandule po omaupyakadhi ga fa ngoka a li e na nokukoleka eitaalo lyawo. Okwa ti kutya okwa li e shi oku na ekwatathano lyopothingo naJehova, ihe nani hasho. Ohi ipe ombedhi sho e etha uuntsa wu mu ningithe a kale ta gandja eitulomo unene komapuko gayalwe pehala lyoku li gandja kiinima mbyoka ya simana.—1 Aakorinto 10:12.

13. Uukalele otawu vulu oku tu kwathela tu kokeke omaukwatya geni, notatu ka mona mo uuwanawa wuni?

¹³ Uukalele nawo otawu vulu oku tu zula noku tu kwathela tu kale aantu aawanawa. Ngiini mbela? Uuna tatu uvitha onkundana ombwanawa, otwa pumbwa okuulika omaukwatya ngaashi, eifupipiko nosho wo iiyimati yi ili noyi ili yombepo yaKalunga. (Aagalati 5:22, 23) Dhiladhila komaukwatya omawanawa ngoka uukalele we ku kwathela wu kokeke. Uuna tatu holele Jesus, aantu otaya ka kala ya hokwa etumwalaka lyetu, notashi vulika ya lundulule omukalo moka hayu ungaunga natse. Pashiholelwa, Oonzapo dhimwe muAustralia odha li tadhi kambadhala okuuvithila omukulukadhi gumwe pegumbo lye, ihe okwa geye noonkondo e te dhi yamukula nayi. Nonando ongawo, Oonzapo odhe mu pulakene owala nesimaneko. Konima yethimbo omukulukadhi ngoka okwa ka kala ti ipe ombedhi omolwomukalo moka i ihumbata, e ta nyolele koshitayimbelewa. Okwa gandja ombili omolweihumbato lye. Okwa nyola a ti: “Ngaye egoya, molwaashoka onda li ndi ihumbata nayi komeho gaantu taya popi kombinga yOohapu dhaKalunga nonda kambadhala oku ya tidhila kokule.” Moshiholelwa shika otatu ilongo mo kutya osha simana okukala twi ifupipika nuuna tatu uvitha. Iilonga yokuuvitha ohayi kwathele yalwe shili, ihe ohayi tu kwathele wo tu hwepopaleke omaukwatya getu.

14. Aavali oye na okuninga shike ngele oya hala okuzula oyana nomupondo?

¹⁴ Aanona oyendji aashona oyi ifupipika noye na ehalo lyokwiilonga iinima. (Mateus 18:1-4) Onkee ano, oshi li pandunge aavali ya kwathele oyana manga aashona natango yi ilonge oshili noya kale ye yi hole. (2 Timoteus  3:14, 15) Opo aavali ya pondole, oye na okukala yo yene ye hole oshili nokutula miilonga shoka Ombiimbeli tayi ti. Ngele oye shi ningi, otashi ka kala oshipu koyana ya kale ye hole oshili. Oyana otaye ku uva ko wo kutya uuna aavali yawo taye ya pukulula, otashu ulike kutya oye ya hole noye holike kuJehova.

15, 16. Ongiini aavali ye na okuulika kutya oyi inekela Jehova uuna omwana a kondwa?

¹⁵ Nonando aavali oya longe oyana oshili, yamwe ohaye ke etha po okulongela Jehova nenge ya kondwe. Ngele shoka sha ningwa, aanegumbo ohaya kala ya yemata noonkondo. Omumwameme gumwe gwomoSouth Africa okwa ti: “Sho omumwamememati a kondwa, kungaye osha li owala a fa a sa. Osha li she ehameka ndje noonkondo.” Ihe mbela omumwameme ngoka naavali ye oya ningi po shike? Oya landula omalombwelo ngoka ge li mOmbiimbeli. (Lesha 1 Aakorinto 5:11, 13.) Aavali yawo oya li ye shi kutya ngele oya vulika komayele gaJehova, otashi ke etela kehe gumwe megumbo uuwanawa. Oya li wo ye shi shi kutya okukondwa oku li egeelo lyopahole lya za kuJehova. Onkee ano, oya kala owala haya popi nomwanamati uuna sha pumbiwa.

¹⁶ Mbela omwanamati okwa li u uvite ngiini? Konima sho a galuka, okwa ti: “Onda li ndi shi shi kutya yaandjetu kaya li ye tonde ndje, ihe oya li owala taya vulika kuJehova nokehangano lye.” Okwa ti wo: “Uuna to thiminikwa wu indile Jehova e ku kwathele ye e ku dhimine po, ohashi ku kwathele wu mone kutya nani owe mu pumbwa lela.” Dhiladhila owala kenyanyu ndyoka yaandjawo ya li yu uvite sho a galukile kuJehova. Osha yela kutya, otatu ka kala twa nyanyukwa notatu ka pondola, ngele otwa kala aluhe hatu vulika kuJehova.—Omayeletumbulo 3:5, 6; 28:26.

17. Omolwashike tu na okukala aluhe hatu vulika kuJehova, naashoka otashi ke tu etela uuwanawa wuni?

¹⁷ Omuhunganeki Jesaja okwa li a hunganeka kutya Aajuda mboka ye li muBabilonia otaye ki iyela ombedhi notaya ka lombwela Jehova taya ti: “Omuwa, ongoye tate. Tse eloya, ngoye omuhongi gwiiyuma. Owe tu shiti.” Otaye ki indila wo Jehova taya ti: “Ino tu geela nenge u dhimbulukwe omayono getu sigo aluhe. Otse aantu yoye; tu sila ohenda.” (Jesaja 64:8, 9) Ngele otwa kala aaifupipiki nokukala aluhe hatu vulika kuJehova, Jehova ota ka kala e tu hole, ngaashi a li e hole Daniel. Jehova ota ka tsikila noku tu zula ta longitha Oohapu dhe, ombepo ondjapuki nehangano, opo tu ka kale ‘aana yaKalunga’ monakuyiwa.—Aaroma 8:21.