1, 2. Ombiimbeli oya hunganeka ngiini kombinga yeindjipalo lyaapiya yaJehova?

MUUYUNI awuhe omu na ehangano li na aantu ye hole Jehova noya hala oku mu longela. Aantu mboka oyo Oonzapo dhaJehova. Nonando ohaya ningi omapuko, Jehova ohe ya wilike nombepo ye ondjapuki. Natu tale omikalo dhimwe moka e ya yambeka.

² Mo 1914, aantu owala aashona ya li haya longele Jehova. Ihe Jehova okwa li a yambeke iilonga yawo yokuuvitha. Oshizemo, aantu omamiliyona oyi ilongo kombinga yoshili ndjoka yi li mOmbiimbeli, e taya ningi Oonzapo dhe. Jehova okwa popi kombinga yeindjipalo ndyoka ekumithi a ti: “Aashuushuka yomune otaa ka ninga eyuvi, naashona otaa ningi oshigwana oshinankondo. Ongame Omuwa; otandi shi ningi methimbo lyo opala.” (Jesaja 60:22) Kunena otu wete kutya ehunganeko ndyoka olya gwanithwa. Aapiya yaJehova oya ninga oshigwana oshinene. Opu na nokuli iilongo  oyindji muuyuni yi na aakalimo aashona ye vulike komwaalu gwOonzapo dhaJehova.

3. Aapiya yaJehova oyu ulike ngiini kutya oye holathane?

³ Momasiku ngaka gahugunina, Jehova okwa kwathela aantu ye ya koleke ohole yawo yokuholathana. Ombiimbeli otayi ti kutya “Kalunga oye ohole,” naantu ye ohaye mu holele. (1 Johannes 4:8) Jesus okwa li a lombwele aalanduli ye ya kale ye “holathane.” Okwa li wo e ya lombwele a ti: “Ngele omu holathane, nena aantu ayehe otaa ka dhimbulula kutya one aalongwa yandje.” (Johannes 13:34, 35) Pethimbo lyetu, aapiya yaJehova ohayu ulukilathana ohole ndjoka, nuuna iigwana tayi yi kiita. Pashiholelwa, aantu omamiliyona 55 lwaampono oya li ya dhipagelwa miita iitiyali yuuyuni. Ihe aapiya yaJehova kaya li ya dhipaga nando omuntu miita mbyoka. (Lesha Mika 4:1, 3.) Shika oshe ya kwathele ya kale ‘kaaye na ondjo yombinzi nando oyomuntu.’—Iilonga 20:26, OB-1954.

4. Omolwashike eindjipalo lyoshigwana shaJehova endhindhilikwedhi?

⁴ Omwaalu gwoshigwana shaJehova otagu indjipala, nonando oshi na omutondi omunankondo, Satana. Satana oye ‘kalunga kuuyuni mbuka.’ (2 Aakorinto 4:4) Omahangano gopapolotika ngoka ge li muuyuni mbuka nosho wo iikundaneki oyi li kohi yewiliko lye. Satana ohe yi longitha, opo a ye moshipala iilonga yokuuvitha onkundana ombwanawa. Ihe ita vulu okuya iilonga mbyoka moshipala. Oku shi shi kutya oku na ko okathimbo okafupi kowala. Onkee ano, ota tsikile nokukambadhala oku tu ethitha po okulongela Jehova.—Ehololo 12:12.

5. Omolwashike omathimbo gamwe yamwe megongalo tashi vulika ye tu uvithe nayi? (Tala kethano lyopetameko.)

⁵ Aapiya yaJehova ohayi ilongo kutya osha simanenena okukala ye hole Jehova nosho wo yalwe. Jesus okwa ti: “‘Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.’ Shika osho oshipango oshinene noshotango. Oshitiyali shi thike pusho osho shika: ‘Hola mukweni ngaashi ngoye wi ihole mwene.’” (Mateus 22:35-39) Nonando ongawo, Ombiimbeli otayi ulike kutya aantu ayehe oya valwa inaaya gwanenena, omolwuulunde waAdam. (Lesha Aaroma 5:12, 19.) Onkee ano, omathimbo gamwe yamwe megongalo otashi vulika ya popye nenge ya ninge sha shoka tashi tu uvitha nayi. Ngele shoka osha ningwa, otatu ka ninga po shike? Mbela ohole yetu yokuhola Jehova otayi ka kala ngaa ya kola? Mbela otatu ka kala ngaa aadhiginini kuye nokaapiya ye? Ombiimbeli otayi tu lombwele kombinga yaapiya yaJehova yamwe mboka ya popya nenge ya ninga iinima mbyoka ye ehameka yalwe. Natu tale shoka tatu vulu okwiilonga kwaashoka she ya ningilwa.

6. Omomukalo guni Eli a li a ndopa okupukulula oyana?

⁶ Pashiholelwa, Eli okwa li omuyambi omukuluntu gwaIsraeli, ihe oyanamati kaya li ya vulika koompango dhaJehova. Ombiimbeli oya ti: “Aana yaEli oya li aadhudhu. Inaa pupa ko komalombwelo gOmuwa.” (1 Samuel 2:12) Eli okwa li e shi shi kutya oyanamati oya li taya longo uuwinayi, ihe ine ya pukulula. Konima yethimbo, Jehova okwa geele Eli noyanamati. Ka li we  a pitika ezimo lyaEli li kale li na uuthembahenda wokukala aayambi aakuluntu. (1 Samuel 3:10-14) Ando opo wa li pethimbo lyaEli nowa li wu shi kutya okwe etha oyanamati ya longe uuwinayi, mbela ando oshe ku pundukitha? Mbela ando oshinima shoka osha nkundipaleke eitaalo lyoye muJehova e tashi ku ningitha nokuli wu ethe po oku mu longela?

7. David okwa li a yono omayono geni ga kwata miiti, na Kalunga okwa li u ungaunga naye ngiini?

⁷ David okwa li e na omaukwatya omawanawa, nomolwaashono Jehova a li e mu hole noonkondo. (1 Samuel 13:13, 14; Iilonga 13:22) Nonando ongawo, David okwa li a ningi oshinima oshiwinayi noonkondo. Sho Uria a li a ka kondja kolugodhi, David okwa yi momilalo nomukulukadhi gwaUria, Batseba, e ta ningi etegelelo. David ka li a hala aantu ya tseye shoka a ninga. Onkee ano, okwa tumu aantu ya ka tale Uria nokwa kambadhala oku mu tompa, opo a ye kegumbo. David okwa li e na einekelo kutya ngele Uria okwa yi kegumbo, ota ka lala naBatseba, opo aantu ya dhiladhile kutya Uria oye he yokanona. Ihe Uria ka li a hala okuya kegumbo. Onkee ano, David okwa ningi ondunge, opo Uria a dhipagelwe miita. David naanegumbo lye oya ka mona iihuna oyindji, omolwomayono ge ngoka ga kwata miiti. (2 Samuel 12:9-12) Nonando ongawo, Jehova okwe mu sile ohenda e te mu dhimine po. Okwa li e shi shi kutya David okwa hala okulonga shoka shi li mondjila. (1 Aakwaniilwa 9:4) Ando opo wa li pethimbo ndyoka, mbela ando owa kala wu uvitile ngiini shoka David a ninga? Mbela ando owe etha po okulongela Jehova?

8. (a) Omuyapostoli Petrus okwa li a nyengwa ngiini okutsa kumwe naashoka a popya? (b) Omolwashike Jehova a tsikile okulongitha Petrus, nonando okwa li a ninga omapuko?

 ⁸ Oshiholelwa shilwe shopaMbiimbeli oshomuyapostoli Petrus. Jesus okwa li e mu hogolola a ninge omuyapostoli. Nonando ongawo, omathimbo gamwe Petrus okwa li ha popi nenge ha ningi iinima inaayi uka. Pashiholelwa, Petrus okwa li a popi kutya nonando ayehe oya thige po Jesus, ye ite mu thigi po. (Markus 14:27-31, 50) Ihe konima sho Jesus a kwatwa po, aayapostoli ayehe oye mu thigi po, mwa kwatelwa Petrus. Iikando ayihe itatu, Petrus okwi idhimbike Jesus. (Markus 14:53, 54, 66-72) Ihe nonando ongawo, Petrus okwa li u uvitile nayi shoka a ninga. Onkee ano, Jehova okwe mu dhimine po nokwa tsikile oku mu longitha. Ando owa li omulongwa gwaJesus pethimbo ndyoka nowa tseya shoka Petrus a ninga, mbela ando owa tsikile ngaa okwiinekela Jehova?

9. Omolwashike wi inekela kutya Jehova oha longo aluhe shoka shu uka?

⁹ Iiholelwa mbika otayi tu ulukile kutya aapiya yamwe yaJehova oya li ya ningi iinima iiwinayi noya li ye ehameka yalwe noonkondo. Ngele shoka tashi ku ningilwa kunena, oto ka ninga po shike? Mbela oto ke etha po okuya kokugongala nenge nokuli wu thige po Jehova noshigwana she? Nenge oto ka mona kutya Jehova oku na ohenda notashi vulika a tegelela omuntu ngoka a yona, i iyele ombedhi? Ihe otashi vulika poompito dhimwe omuntu ngoka a yona eyono lya kwata miiti a kale kee uvitile nayi shoka a ninga. Mbela oto ka kala wi inekela kutya Jehova okwe shi tseya nota ka ninga po sha pethimbo lye lyo opala? Otashi vulika nokuli a kuthe mo omuntu ngoka megongalo ngele osha pumbiwa. Owi itaala ngaa shili kutya Jehova oha longo aluhe shoka shi li mondjila noshu uka?

10. Jesus okwe tu tulila po oshiholelwa sha dhenga mbanda shini?

¹⁰ Otatu lesha mOmbiimbeli kombinga yaamboka ya kala aadhiginini kuJehova nokoshigwana she, nonando aantu mboka ye ya kundukidha oya ninga omapuko ga kwata miiti. Jesus okwe tu tulila oshiholelwa sha dhenga mbanda. Konima sho a galikana He uusiku awuhe, opo e mu kwathele, okwa hogolola aayapostoli 12. Ihe gumwe gwomuyo, Judas Iskariot, konima yethimbo okwe mu gwaaleke. Omuyapostoli Petrus naye okwa li wo i idhimbike Jesus. (Lukas 6:12-16; 22:2-6, 31, 32) Jesus ka li a pe Jehova nenge aalongwa ye uusama, sho yamwe yomuyo ya li ye mu uvitha nayi. Pehala lyaashono, Jesus okwa kala e na ekwatathano lyopothingo naHe nokwa tsikile oku mu longela nuudhiginini. Oshizemo, Jehova okwe mu yumudha e te mu ningi Omukwaniilwa gwUukwaniilwa we megulu.—Mateus 28:7, 18-20.

11. Ombiimbeli oya hunganeka shike shi na ko nasha naapiya yaJehova pethimbo lyetu?

¹¹ Oshiholelwa shaJesus otashi tu longo tu kale aadhiginini kuJehova nokoshigwana she. Otu na omatompelo omawanawa gokuninga ngawo. Otu wete kutya Jehova ota wilike aapiya ye momasiku ngaka gokehulilo.  Ote ya kwathele yu uvithile aantu oshili muuyuni awuhe noyo owala haya longo iilonga mbyoka. Aapiya yaJehova oya hangana noya nyanyukwa shili, omolwaashihe shoka te ya longo. Jehova okwe shi popya a ti: “Otaa ka imba omahambelelo.”—Jesaja 65:14.

12. Otu na okwiinyenga ngiini uuna yalwe ya ninga omapuko?

¹² Otwa nyanyukwa shili, oshoka Jehova ohe tu wilike nohe tu kwathele tu ninge iinima oyindji iiwanawa. Mepingathano naashoka, aantu muuyuni waSatana inaya nyanyukwa nokaye na etegameno lyasha lyonakuyiwa. Onkee ano, itashi ka kala pandunge nenge pauyuuki tu thige po Jehova noshigwana she, molwaashoka owala gumwe megongalo a ninga sha sha puka nenge e shi popya. Pehala lyaashono, otu na okukala aadhiginini kuJehova e tatu landula ewiliko lye. Otu na wo okwiilonga nkene tu na okutala ko omapuko gayalwe nankene tu na okwiinyenga.

13, 14. (a) Omolwashike tu na okwiidhidhimikilathaneni? (b) Euvaneko lini tu na okukaleka momadhiladhilo?

¹³ Oshike wu na okuninga ngele omumwatate nenge omumwameme gwontumba okwa popi nenge a ningi oshinima she ku uvitha naye? Ombiimbeli otayi ti: “Ino uluma okugeya mombepo yoye, oshoka ondjahi ohayi kala meni lyegoya.” (Omuuvithi 7:9) Atuheni inatu gwanenena nohatu ningi omapuko. Onkee ano, inatu tegelela aamwatate ya popye nenge ya ninge aluhe shoka shi li mondjila. Itashi ka kala oshiwanawa tu kale hatu dhiladhila aluhe komapuko gawo. Ngele otwa ningi ngawo, otashi ke tu ningitha tu kale inaatu nyanyukwa we sho tatu longele Jehova. Shoka oshiwinayi unene osho kutya, otashi vulika eitaalo lyetu li nkundipale e tatu thigi po ehangano lyaJehova. Ngele otwa ningi ngawo, itatu ka longela we Jehova nenge tu kale tu na etegameno lyoku ka kala muuyuni uupe.

¹⁴ Oshike tashi vulu oku ku kwathela wu kale wa nyanyukwa sho to longele Jehova, uuna gumwe a ninga sha shoka she ku uvitha nayi? Kaleka aluhe momadhiladhilo euvaneko lyaJehova ndika tali ti: “Tala, otandi shiti egulu epe nevi epe. Iiningwanima yonale otayi ka dhimbiwa thiluthilu.” (Jesaja 65:17; 2 Petrus 3:13) Jehova ote ke ku pa omalaleko nuuyamba ngaka ngele owa kala omudhiginini kuye.

15. Jesus okwe tu lombwela tu ninge shike uuna gumwe a ninga epuko?

¹⁵ Katu li natango muuyuni uupe. Onkee ano, ngele otwa ningwa nayi kugumwe, otwa pumbwa okutedhatedha kwaashoka Jehova a hala tu ninge. Pashiholelwa, Jesus okwa ti: “Ngele hamu dhimine po aantu omayono gawo, nena Ho yeni yomegulu ote mu dhimine po wo omayono geni. Ihe ngele ihamu dhimine po aantu omayono gawo, nena Ho yeni yomegulu ite mu dhimine po omayono geni.” Sho Petrus a pula Jesus ngele okudhimina po omuntu “luheyali olwa gwana,” Jesus okwe mu yamukula a ti: “Otandi ku lombwele kutya haluheyali,  ndele, olwomilongo heyali luheyali.” Kungeyi, Jesus okwe tu longo kutya natu kale aluhe tu na ehalo lyokudhimina po yalwe.—Mateus 6:14, 15; 18:21, 22.

16. Josef okwe tu tulila po oshiholelwa oshiwanawa shini?

¹⁶ Oshiholelwa shaJosef otashi tu longo nkene tu na okwiinyenga uuna gumwe e tu uvitha nayi. Josef nonkelo yawo, oyo owala ya li oyanamati yaJakob naRakel. Jakob okwa li e na oyanamati yalwe omulongo, ihe okwa li e hole Josef unene, shi vulithe puyo. Shika osha ningitha aamwahe yaJosef ye mu sile efupa. Oya li nokuli ye mu tonde noonkondo, e taye mu landitha po e li omupika nokwa falwa kuEgipiti. Konima yoomvula dhontumba, omukwaniilwa gwaEgipiti okwa lenge Josef a kale omuntu omutiyali omunankondo moshilongo, oshoka okwa li e hole iilonga iiwanawa yaJosef. Konima yethimbo, aamwahe yaJosef oye ya okulanda iikulya kuEgipiti, oshoka moshilongo omwa li ondjala. Sho ya mono Josef, inaye mu dhimbulula, ihe Josef okwa li e ya dhimbulula. Nonando aamwahe yaJosef oya li ye mu ningi nayi, Josef ine ya ningila uuwinayi. Pehala lyaashono, okwa tala ngele oya lundulula ngaa shili iikala yawo. Sho a mono kutya oya lundulula, okwe ya lombwele kutya oye Josef, omumwayina gwawo. Konima okwe ke ya hekeleka ta ti: “Itamu pumbwa okutila. Otandi mu sile oshimpwiyu pamwe naana yeni.”—Genesis 50:21.

17. Oshike tu na okuninga uuna yalwe ya ninga omapuko?

¹⁷ Dhimbulukwa kutya molwaashoka kehe gumwe oha ningi omapuko, nangoye oto vulu okuuvitha yalwe nayi. Ngele owa mono kutya owu uvitha gumwe nayi, landula omayele gOmbiimbeli. Pula omuntu ngoka e ku dhimine po, e to kambadhala okupanga ombili naye. (Lesha Mateus 5:23, 24.) Ohatu kala tu uvite nawa uuna yalwe ye tu dhimina po. Onkee ano, natse otu na oku ya dhimina po wo. Aakolossa 3:13 otayi tu lombwele tayi ti: “Kwathathaneni, dhiminathanii po oondjo ethimbo kehe, uuna pe na ngoka a ningathana namukwawo. Dhiminathanii po oondjo naanaa, ngashika Omuwa e mu dhimine po.” Ngele otu hole shili aamwatate, itatu ka kala twe ya geela, omolwoshinima shoka ye tu ninga sha pita nale. (1 Aakorinto 13:5) Ngele otwa kala hatu dhimine po yalwe, Jehova ote ke tu dhimina po wo. Uuna yalwe ya ninga omapuko, otu na oku ya sila ohenda ngaashi Tate yetu, Jehova, he tu sile ohenda.—Lesha Episalomi 103:12-14.