Omuuvithi inaa ninginithwa, gwedhina Haykanush gwokoArmenia, okwa li a toola opasporta popepi negumbo lye. Mopasporta moka omwa li uukalata wombaanga niimaliwa oyindji. Okwa lombwele omusamane gwe ngoka naye a li omuuvithi inaa ninginithwa kombinga yaashoka a toola.

Aaihokani mboka oya li ye na ompumbwe onene yoshimaliwa noya li ye na oongunga. Ihe nonando ongawo, oya tokola ya fale opasporta ndjoka kumwene. Omulumentu ngoka a li e yi kanitha nosho wo yaandjawo, oya li ya kumwa. Haykanush nomusamane gwe oye mu lombwele kutya yo aanashili, molwaashoka ohaya konakona Ombiimbeli. Oya li ya longitha ompito ndjoka, opo ya popye kombinga yOonzapo dhaJehova, noya li ya pe aanegumbo mboka iileshomwa.

Aanegumbo mboka oya li ya hala okupa Haykanush iimaliwa, opo yu ulike olupandu, ihe ine yi taamba. Esiku lya landula, omukulukadhi gwomusamane ngoka a toolithwa ko, okwa ka talela po Haykanush nomusamane gwe kegumbo lyawo. Okwa li a thiminike Haykanush a taambe okalinga kondiamande, oshoka okwa li a hala okuulika olupandu lwe.

Ngaashi aanegumbo mboka, aantu oyendji ohaya kala ya kuminwa uukwatya mboka wu ulikwa kuHaykanush nomusamane gwe. Ihe mbela Jehova okwa li e shi kuminwa? Mbela okwa li a tala ko ngiini uukwatya wawo wokukala aanashili? Mbela okukala kwawo aanashili okwe ya etela ngaa uuwanawa washa?

Omayamukulo komapulo ngoka kage shi omadhigu. Omolwashike tatu tile ngawo? Omolwaashoka aapiya yaJehova oye shi shi kutya okuholela omaukwatya gaJehova oko ku na ondilo kuye ku vule okawe, oshingoli nenge iinima yilwe yopamaliko. Shoka Jehova a tala ko shi na ondilo osha yooloka ko kwaasho ka aantu ya tala ko kutya osho shi na ondilo. (Jesaja 55:8, 9) Aapiya yaJehova oyu uvite kutya oonkambadhala dhawo dhokuholela omaukwatya gaJehova, odha simanenena.

Shoka otatu vulu oku shi mona mwaashoka Ombiimbeli tayi ti kombinga yoondunge nowino. Omayeletumbulo 3:13-15 otaga ti: “Omunelago omuntu ngoka a likola owino, nomuntu ngoka a pewa oondunge. Oshoka oku dhi likola okuwanawa ku vule oshisiliveli, notadhi etitha ontanitho yi vule ndjoka yoshingoli. Odhi na ondilolela dhi vule uuwe, nomaliko goye agehe guuyamba itaga yelekwa nadho.” Osha yela kutya Jehova okwa tala ko omaukwatya ngoka ge na ondilo ge vule iinima ayihe yopamaliko.

Mbela ongiini kombinga yokukala omunashili?

Jehova omunashili noiha “fundju.” (Titus 1:2) Okwa nwetha mo omuyapostoli Paulus a nyolele Aakriste Aahebeli mboka ya li ko omimvo 2 000 dha ka pita ta ti: “Dhiginineni oku tu galikanena. Tse otu na eiyuvo lya yela, oshoka otwa hala aluhe okulonga shoka shi li mondjila.”—Aahebeli 13:18.

Jesus Kristus okwe tu tulila po oshiholelwa oshiwanawa shokukala aanashili. Pashiholelwa, omuyambi omukuluntu Kajafas okwa li a lombwele Jesus a ti: “Otandi ku ganitha kuKalunga omunamwenyo, tu lombwela, ngele ongoye Kristus, Omuna gwaKalunga.” Jesus okwa li a popi oshili nokwe mu yamukula kutya oye Mesiasa. Okwa li e mu lombwele oshili, nonando okwa li e shi shi kutya oshigongi ashihe shaatokoli otashi ke mu lundila kutya okwa tuka Kalunga notashi ke mu dhipagitha.—Mateus 26:63-67.

Ongiini kombinga yetu? Mbela otatu ka kala ngaa aanashili, ngele otwi iyadha monkalo moka tashi vulika tu mone mo uuwanawa wopamaliko ngele otwa kala inaatu popya oshili nenge ngele otwa lundulula uuyelele wontumba?

Oshi li oshidhigu okukala omunashili momasiku ngaka gahugunina sho aantu oyendji ‘yi ihole noye hole eliko.’ (2 Timoteus 3:2) Uuna uuhupilo tawu nyangwanyangwa nenge iilonga itaayi monika nuupu, aantu oyendji ihaya kala ye wete sha puka okuyaka, okukengelela aantu nokuninga iinima mbyoka kaayi li pauyuuki. Aantu oyendji oyu uvite kutya opo ya mone uuwanawa wopamaliko, kaye na okukala aanashili. Aakriste yamwe oya ninga nokuli omatokolo omawinayi, noya kanitha edhina lyawo ewanawa megongalo sho ya ‘kongo eliko nomakoto.’—1 Timoteus 3:8; Titus 1:7.

Aakriste oyendji ohaya holele Jesus. Oyu uvite kutya okukala nomaukwatya ga fa ga Kalunga osha simanenena shi vule eliko kehe nenge omauwanawa galwe. Nomolwaashono aagundjuka Aakriste ihaaya yaka ekonakono, opo ya mone iizemo iiwanawa kosikola. (Omayeletumbulo 20:23) Okukala omunashili haaluhe tashi ti kutya oto ka pewa sha ngaashi Haykanush. Ihe nonando ongawo, Kalunga ota ti kutya okukala omunashili osho shi li mondjila notashi tu kwathele tu kale  neiyuvo lya yela, shoka shi li oshinima shi na ondilo.

Oshiholelwa shomumwatate Gagik otashi shi ulike. Okwa ti: “Manga inaandi ninga Omukriste, onda li handi longele ehangano enene ndyoka mwene gwalyo a li ha gandja omwaalu omushona gwiiyemo yongeshefa ye, opo kaa fute iihohela ya ya pombanda. Ndi li omuwiliki gwehangano, onda li nda tegelelwa ndi ninge euvathano naangoka hatu futu kuye iihohela moku mu pa ombumbo, opo kaa lopote ehangano lyetu sho ihaali futu iihohela yi igwana po. Kungawo, onda kala nda talika ko kaandi shi omunashili. Sho nda tseya oshili, onde etha po iilonga mbyoka, nonando onda li he futwa nawa. Onda toto po ongeshefa yandje. Esiku ya patuluka, onde ke yi nyolitha nonda kala handi futu iifendela.”—2 Aakorinto 8:21.

Gagik ota ti: “Iiyemo yandje oya li iishona, onkene kasha li oshipu okusila oshimpwiyu aanegumbo yandje. Ihe ngashingeyi onda nyanyukwa shi vulithe nale. Ondi na eiyuvo lya yela koshipala shaJehova. Onda tulila po aamwandjemati yaali oshiholelwa oshiwanawa nondi na iinakugwanithwa megongalo. Aayaluli yiihohela nosho wo mboka handi longo nayo oya tala ndje ko ndi li omunashili.”

Jehova oku hole mboka haye mu simanekitha sho haya holele omaukwatya ge omawanawa ngoka ga kwatela mo okukala omunashili. (Titus 2:10) Uuna tatu holele omaukwatya ge, okwe tu uvanekela kutya ote ke tu kwathela. Okwa nwetha mo omukwaniilwa David a nyole ta ti: “Ngame ngashingeyi onda kulupa, onda kala muuyuni ethimbo ele, ihe inandi mona nando olumwe omuyuuki e ethiwa kOmuwa, nenge oyana taa hehela iikulya.”—Episalomi 37:25.

Oshiholelwa shaRut ngoka a li omudhiginini oshe shi ulika. Okwa kala omudhiginini sho a kala nayinamweno Naemi, pehala lyoku mu thiga po molwaashoka a kulupa. Rut okwa yi kuIsraeli, hoka a ka longela Kalunga kashili. (Rut 1:16, 17) Okwa li omunashili nokwa li ha longo nuudhiginini sho ta pupula, a landula elongekidho lyOmpango ndyoka lya li lya tulilwa po oohepele. Ngaashi David a li e shi mono, Jehova ina thiga po nando Rut naNaemi. (Rut 2:2-18) Okwa li a ningi oshindji shi vulithe owala okusila Rut oshimpwiyu palutu. Okwe mu hogolola a ninge oshilyo shezimo moka mwa ka za omukwaniilwa David nosho wo nokuli Mesiasa omuuvanekwa.—Rut 4:13-17; Mateus 1:5, 16.

Otashi vulika shi kale oshidhigu kaapiya yaJehova yamwe, okumona oshimaliwa sha gwana oompumbwe dhawo dhakehe esiku. Ihe pehala lyokukambadhala okukandula po oompumbwe dhawo momikalo dhaa li pauyuuki, ohaya longo nuudhiginini ye dhi kandule po. Ngele taye shi ningi, nena otayu ulike kutya omaukwatya gaKalunga omawanawa, mwa kwatelwa okukala omunashili, oge na ondilo onene kuyo ge vulithe iinima yopamaliko.—Omayeletumbulo 12:24; Aaefeso 4:28.

Ngaashi Rut, Aakriste muuyuni awuhe oyi itaala kutya oonkondo dhaJehova otadhi vulu oku ya kwathela. Oyi inekela lelalela muJehova ngoka u uvaneka a ti: “Itandi ku etha nando; itandi ku thigi po.” (Aahebeli 13:5) Jehova okwa kala nokuulika lwiikando niikando kutya ota vulu nota ka kwathela mboka haya kala aanashili ethimbo kehe. Okwa kala aluhe ha gwanitha po euvaneko lye kutya ota ka pa aapiya ye shoka ya pumbwa.—Mateus 6:33.

Aantu otaya vulu okukala ya lenga okawe nosho wo iinima yilwe yopamaliko. Ihe otatu vulu okukala nuushili kutya Tate yetu gwomegulu okwa lenga uukwatya wetu wokukala aanashili nosho wo omaukwatya galwe omawanawa shi vulithe eliko kehe.