1. Omolwashike twa pumbwa okupulakena kelondodho lyaJesus?

MEHUNGANEKO lye li na ko nasha nomasiku gahugunina, Jesus okwa ti: ‘Ikotokeleni ne yene! Inamu etha omadhiladhilo geni ga luudhikwe kiimpwiyu yopauyuni.’ (Luk. 21:34) Otwa pumbwa okupulakena kelondodho ndyoka. Omolwashike? Omolwaashoka nokunena ohatu iyadha momaupyakadhi ogendji ga faathana naangoka haga adha kehe gumwe.

2. Aamwatate naamwameme ohaya kala ya gwililwa po komaupyakadhi geni?

² Omathimbo gamwe, ohatu iyadha momaupyakadhi ogendji pethimbo limwe. Natu taleni kiiholelwa tayi landula. Omumwatate gwedhina John, * ngoka e na uuvu wopamadhiladhilo hawu ithanwa multiple sclerosis, okwa li a uvu nayi sho omukadhi e mu thigi po, konima yomimvo 19 ndhoka ya kala mondjokana. Opo nduno, oyanakadhona yaali oye etha po okulongela Jehova. Aaihokani yamwe, Bob naLinda, oya li yi iyadha momashongo ogendji ga yooloka ko. Ayehe oya li ya kanitha iilonga, e taya tembuka mo megumbo lyawo. Shimwe ishewe, Linda okwa kwatwa kuuvu womutima wa kwata miiti, mboka wa yonagula aakwiita ye yolutu.

3. Shi ikolelela kAafilippi 4:6, 7, uushili wuni tatu vulu okukala tu na?

³ Otatu vulu okukala tu na uushili kutya Jehova, ngoka e li Omushiti gwetu naTate omunahole, oha kala e uvite ko okugwililwa po kwetu komaupyakadhi. Okwa hala oku tu kwathela mokuungaunga nomashongo ngoka hatu kala twa taalela. (Lesha Aafilippi 4:6, 7.) MOohapu dhaKalunga omu na iiholelwa oyindji mbyoka tayi popi kombinga yomaupyakadhi ngoka aapiya  yaKalunga ya li yi idhidhimikile. Omu na wo iiholelwa yankene Jehova a li e ya kwathele ya ungaunge noonkalo ndhoka oondhigu. Natu ka taleni kiiholelwa yimwepo.

4. Elia okwa li a taalele omashongo geni, nokwa li e uvitile ngiini Jehova?

⁴ Elia okwa li a longele Jehova momathimbo omadhigu nokwa li a taalelwa komashongo ga kwata miiti. Omukwaniilwa Ahab gumwe gwomaakwaniilwa mboka ya li kaaye shi aadhiginini mondjokonona yaIsraeli, okwa hokana Isebel, ngoka a li ha longele Baal. Ayehe yaali oya li ya humitha komeho okulongela oshikalunga Baal noya li ya dhipagitha aahunganeki oyendji yaJehova. Elia okwa li a vulu oku ya ya ontuku. Okwa li wo a hupu mondjala onene yekomba, sho a kala i inekela muJehova. (1 Aak. 17:2-4, 14-16) Shimwe ishewe, Elia okwa li i inekela Jehova, sho a li a popi sha ukilila naahunganeki nonaalongelikalunga yaBaal. Okwa li a ladhipike Aaisraeli ya longele Jehova. (1 Aak. 18:21-24, 36-38) Elia okwa li e na uumbangi owundji tawu mu shilipaleke kutya Jehova okwa li te mu ambidhidha pethimbo lyuudhigu mboka.

5-6. Shi ikolelela kAakwaniilwa yotango 19:1-4, Elia okwa li e uvite ngiini, na Jehova okwa li e mu ulukile ngiini kutya oku mu hole?

⁵ Lesha 1 Aakwaniilwa 19:1-4. Elia okwa li a kwatwa kuumbanda, sho omunyekadhi Isebel a li a hala oku mu dhipaga. Onkee ano, okwe mu yi ondapo, e ta yi kuBeersheba. Okwa li a teka lela omukumo, shoka she mu ningitha a kale “a hala a se.” Oshike she mu ningitha a kale e uvite ngawo? Elia okwa li omuntu inaa gwanenena “e tu fa.” (Jak. 5:17) Otashi vulika a li e uvite a gwililwa po kuupyakadhi nokwa vulwa  noonkondo. Otashi vulika Elia a li ta dhiladhila kutya oonkambadhala dhe dhokuhumitha komeho elongelokalunga lyashili osima yowala, onkalo muIsraeli inayi hwepopala nonokutya oye owala a li ta longele Jehova. (1 Aak. 18:3, 4, 13; 19:10, 14) Otashi vulika tu kale twa kumwa komukalo moka omuhunganeki ngoka omudhiginini a li i inyenge. Ihe Jehova okwa li e uvite ko nkene e uvite.

⁶ Jehova ka li a nyenyetele Elia sho a holola omaiyuvo ge. Pehala lyaashono, okwe mu tsu omukumo. (1 Aak. 19:5-7) Lwanima, Jehova okwa li a kwathele Elia nombili a lundulule okudhiladhila kwe moku mu ulukila kutya Ye oku na oonkondo oonene. Jehova okwa li e mu ulukile kutya opwa li pu na natango aantu 7 000 muIsraeli, mboka ya tindi okulongela Baal. (1 Aak. 19:11-18) Momikalo adhihe ndhoka, Jehova okwa li a ulukile Elia kutya oku mu hole.

7. Momukalo moka Jehova a li a kwathele Elia, otagu tu shilipaleke shike?

⁷ Mbela oto kondjo nonkalo ondhigu? Itashi tu hekeleke tuu okutseya kutya Jehova okwa li e uvite ko omaiyuvo gaElia! Shoka otashi tu shilipaleke kutya Jehova oha kala wo e uvite ko omaiyuvo getu. Oku shi shoka tatu vulu okuninga naashoka itaatu vulu okuninga nosho wo shoka tatu dhiladhila nankene tu uvite. (Eps. 103:14; 139:3, 4) Ngele otwa kala twi inekela Jehova ngaashi Elia, Jehova ote ke tu kwathela tu ungaunga nomaupyakadhi ngoka ge tu gwilila po. — Eps. 55:22.

8. Jehova ote ke ku kwathela ngiini wu ungaunge nomaupyakadhi goye?

⁸ Okukala twa gwililwa po kuupyakadhi, otaku vulu oku tu dhiladhilitha iinima iiwinayi noku tu teya omukumo. Ngele shoka osha ningwa, dhimbulukwa kutya Jehova ote ke ku kwathela wu ungaunge nawo. Ote ke shi ninga ngiini? Ote ku hiya wu mu lombwele omaupyakadhi goye. Ngele owe shi ningi, ota ka yamukula omagalikano goye. (Eps. 5:3; 1 Pet. 5:7) Onkee ano, kala ho tseyithile aluhe Jehova omaupyakadhi goye. Ita ka popya nangoye sha ukilila ngaashi e shi ninga naElia, ihe ote ke shi ninga okupitila mOohapu dhe, Ombiimbeli, nomehangano lye. Omahokololo ngoka to lesha mOmbiimbeli otaga vulu oku ku hekeleka noku ku pa etegameno. Shimwe ishewe, aamwatate naamwameme otaya vulu oku ku tsa omukumo. — Rom. 15:4; Heb. 10:24, 25.

9. Kuume ngoka twi inekela, ota vulu ngiini oku tu kwathela?

⁹ Jehova okwa li a lombwele Elia a gandje po iinakugwanithwa yimwe kuElisa. Kungawo, okwa li a pe Elia kuume e li nawa, ngoka a li ta vulu oku mu kwathela, sho a teka omukumo. Sha faathana, uuna twa lombwele kuume ketu ngoka twi inekela omaupyakadhi getu, ota vulu oku tu kwathela tu ungaunge nago. (2 Aak. 2:2; Omayel. 17:17) Ngele owu uvite kutya kapu na ngoka to vulu okulombwela uupyakadhi woye, galikana Jehova e ku kwathele wu mone Omukriste a pyokoka, ngoka ta vulu oku ku kwathela.

10. Oshimoniwa shaElia otashi tu tsu ngiini omukumo, nongiini euvaneko ndyoka li li muJesaja 40:28, 29 tali vulu oku tu kwathela?

¹⁰ Jehova okwa li a kwathele Elia a ungaunge nomaupyakadhi ngoka ge mu gwilila po, noku mu longele nuudhiginini uule womimvo. Oshimoniwa shaElia otashi tu tsu omukumo. Otashi vulika tu pite momaupyakadhi ngoka taga vulu oku tu gwilila po pamaiyuvo nopalutu. Ihe ngele otwa kala twi inekela muJehova, ote ke tu pa oonkondo ndhoka twa pumbwa, tu tsikile oku mu longela. — Lesha Jesaja 40:28, 29.

11-13. Aapiya yaKalunga yatatu yonale, oya li ya gwililwa po ngiini komaupyakadhi?

¹¹ MOmbiimbeli omwa popiwa aantu yalwe  mboka ya li wo ya gwililwa po komaupyakadhi. Pashiholelwa, Hanna okwa li i idhidhimikile onkalo yokwaaha mona aanona noyokushekwa nayi kunyamunkwawo. (1 Sam. 1:2, 6) Molwaashoka Hanna okwa li a gwililwa po noonkondo, okwa lili nokwa tindi okulya. — 1 Sam. 1:7, 10.

¹² Omukwaniilwa David naye omathimbo gamwe okwa li a gwililwa po. Dhiladhila owala komaupyakadhi ngoka ga li ge mu taalela. Okwa li e uvitile nayi noonkondo omapuko ogendji ngoka a ninga. (Eps. 40:12) Omwanamati Absalom okwa li e mu tukululile oshipotha, shoka sha li sha fala Absalom meso. (2 Sam. 15:13, 14; 18:33) David okwa li wo a kotokelwa kugumwe gwomookuume ke kopothingo. (2 Sam. 16:23–17:2; Eps. 55:12-14) Omapisalomi ogendji ngoka ga nyolwa kuDavid, otaga popi nkene a li a teka omukumo nosho wo einekelo lye lya kola muJehova. — Eps. 38:5-10; 94:17-19.

¹³ Konima yethimbo, omupisalomi gumwe okwa li a tameke okukala a sila efupa aakaanakalunga, omolwuulinawa wawo. Otashi vulika a li gwomezimo lyomuLevi, Asaf, nokwa li ha longo “mongulu yaKalunga.” Omupisalomi nguka okwa li a gwililwa po pamaiyuvo, shoka she mu ningitha a kale inaa nyanyukwa noina gwanenwa. Okwa li a tameke okukala inaa gwanenwa komayambeko ngoka haga zi mokulongela Kalunga. — Eps. 73:2-5, 7, 12-14, 16, 17, 21.

14-15. Oshike tatu ilongo kiiholelwa yopaMbiimbeli itatu kombinga yokukonga ekwatho kuJehova?

¹⁴ Aalongelikalunga yashili yatatu mboka ya popiwa metetekelo, ayehe oya li yi inekela muJehova oye e ya kwathele. Oya li haya mbumbulile Jehova iimpwiyu yawo okupitila megalikano. Oya li wo haye mu lombwele ya manguluka kombinga yaashoka she ya gwilila po. Oya li ya tsikile okuya kotempeli yaJehova. — 1 Sam. 1:9, 10; Eps. 55:22; 73:17; 122:1.

 ¹⁵ Jehova okwa yamukula omagalikano gawo, molwaashoka okwa li e ya uvitile olukeno. Shoka osha li sha kwathele Hanna a kale e na ombili yopamadhiladhilo. (1 Sam. 1:18) David okwa nyola a ti: “Omuyuuki ota tsakanekwa kuudhigu owindji, ihe Omuwa ote mu hupitha muwo.” (Eps. 34:19) Lwanima, omupisalomi okwa li e uvite kutya Jehova okwe mu ‘kwata koshikaha shokolulyo, te mu wilike moku mu pa omayele gopahole.’ Okwa imbi ta ti: “Ngame, osho opalela ndje okukala popepi naKalunga. Omuwa Omupangeliawike onde mu ningi egameno lyandje.” (Eps. 73:23, 24, 28) Oshike tatu ilongo kiiholelwa mbyoka? Odhoshili kutya omathimbo gamwe, otatu ki iyadha twa gwililwa po komaupyakadhi. Ihe otatu vulu oku ga idhidhimikila, ngele otwa kala hatu galikana kuJehova, hatu vulika kwaashoka te tu pula nokutedhatedha kunkene a li a kwathele yalwe monakuziwa. — Eps. 143:1, 4-8.

16-17. (a) Omolwashike kaatu na okwiitopola ko kuJehova nokoshigwana she? (b) Ongiini tatu vulu ishewe okukala tu na omukumo?

¹⁶ Iiholelwa mbyoka itatu otayi tu longo oshinima shilwe sha simana. Oshike shono? Katu na okwiitopola ko kuJehova nokoshigwana she. (Omayel. 18:1) Omumwameme Nancy, ngoka a li a gwililwa po sho omusamane gwe e mu thigi po, okwa ti: “Uule womasiku, kanda li nda hala  okumona nenge okupopya nomuntu. Ihe sho nda kala ethimbo ele ndi ikalela, osha etele ndje unene eyeme.” Onkalo oya ka lunduluka, sho Nancy a tameke okukonga oompito a kwathele yalwe mboka nayo ya li ye na omaupyakadhi. Ota ti: “Onda li handi kala nda pulakena nawa, sho yalwe taya lombwele ndje omaupyakadhi gawo. Onda li nde shi mono mo kutya uuna tandi ya kenukile, ohashi kwathele ndje kaandi gandje unene eitulomo kungame mwene nokomaupyakadhi gandje.”

¹⁷ Otatu vulu okukala tu na omukumo ishewe, mokukala aluhe pokugongala. Uuna tu li pokugongala, kungawo otatu pe Jehova ompito e tu ‘kwathe noku tu tse omukumo.’ (Eps. 86:17) Pokugongala, ohe tu nkondopaleke okupitila mombepo ye ondjapuki, mOohapu dhe nomaapiya ye. Pokugongala opo hatu mono ompito tu vule “okutsaathana omukumo.” (Rom. 1:11, 12) Omumwameme Sophia, okwa ti: “Jehova nosho wo aamwatate naamwameme, oya kwathela ndje ndi pule komeho. Omakugongala ogo ga kala ga simanenena kungame. Onda li nde shi mono mo kutya okukala tandi longo nuudhiginini miilonga yokuuvitha nomegongalo, osha kwathela ndje ndi vule okuungaunga nomaupyakadhi gandje.”

18. Ngele otwa teka omukumo, Jehova ota vulu oku tu pa shike?

¹⁸ Uuna twa teka omukumo, natu dhimbulukwe kutya Jehova ina uvaneka owala kutya ote ke tu pa epepelelo monakuyiwa ndyoka tali kalelele, ihe okwa uvaneka wo e tu kwathe moonkalo oondhigu ngashingeyi. Ohe tu pe “ehalo noonkondo” tu vule okusinda etekomukumo nokwaanetegameno. — Fil. 2:13.

19. Eshilipaleko lini twa pewa mAaroma 8:37-39?

¹⁹ Lesha Aaroma 8:37-39. Omuyapostoli Paulus okwe tu shilipaleka kutya kapu na shoka tashi vulu oku tu topola ko kohole yaKalunga. Ongiini tatu vulu okukwathela aamwatate naamwameme mboka ya gwililwa po komaupyakadhi? Oshitopolwa tashi landula, otashi ke tu kwathela nkene tatu vulu okuholela Jehova mokuulukila aamwatate naamwameme olukeno nomoku ya kwathela, uuna ya gwililwa po.