1. Shi ikolelela kAakolossa 2:4, 8, Satana oha kambadhala ngiini a nwethe mo omadhiladhilo getu?

SATANA okwa hala tu pilamene Jehova. Opo a pondole, oha kambadhala okunwetha mo omadhiladhilo getu, moku ga kwata ko noku tu ningitha tu dhiladhile ngaashi a hala. Oha kambadhala wo oku tu pukitha tu mu landule, moku tu hekaheka nuuhalu uuwinayi. — Lesha Aakolossa 2:4, 8.

2-3. (a) Omolwashike tu na okugandja eitulomo kelondodho ndyoka li li mAakolossa 2:8? (b) Oshike tatu ka kundathana moshitopolwa shika?

² Mbela otu li ngaa lela moshiponga sha kwata miiti shokupukithwa kuSatana? Eeno! Dhimbulukwa kutya elondodho ndyono li li mAakolossa 2:8, omuyapostoli Paulus ine li nyolela mboka kaaye shi ooitaali. Okwa li e li nyolele Aakriste mboka ya gwayekwa nombepo ondjapuki. (Kol. 1:2, 5) Aakriste mboka oya li moshiponga, ihe tse kunena otu li nokuli moshiponga oshinenenene. (1 Kor. 10:12) Omolwashike mbela? Satana oku umbilwa kombanda yevi nota kambadhala a mana mo a pukithe aapiya yaKalunga aadhiginini. (Eh. 12:9, 12, 17) Oshikwawo, otu li momasiku ngoka aakolokoshi naafudhime taya “tsikile . . . yu uka muuwinayi.” — 2 Tim. 3:1, 13.

³ Moshitopolwa shika, otatu ka kundathana nkene Satana ha kambadhala okunwetha mo okudhiladhila kwetu “nomafundjaleko gaa fele.” Otatu ka tala “omakotokelo omawinayi” gatatu ngoka ha longitha. (Ef. 6:11) Opo ihe moshitopolwa tashi landula, otatu ka kundathana nkene tatu vulu okuvudha mo uuwinayi kehe, mboka tashi vulika wa nwetha mo okudhiladhila kwetu.  Ihe tango natu ka kundathaneni shoka tatu vulu okwiilonga komukalo ngoka Satana a li a longitha a pukithe Aaisraeli, konima sho ya yi mEvi lyEuvaneko.

4-6. Shi ikolelela kuDeuteronomium 11:10-15, omalunduluko geni ge na ko nasha nuunamapya Aaisraeli ya li ye na okuninga, sho ye li mEvi lyEuvaneko?

⁴ Satana okwa li a makele Aaisraeli ya longele iikalunga. Okwa li e shi ningi ngiini? Okwa li e shi kutya Aaisraeli otaya ka pumbwa iikulya, onkene okwa longitha ompumbwe ndjono, opo e ya nwethe mo ya longe shoka a hala. Sho Aaisraeli ya yi mEvi lyEuvaneko, oya li ye na okulongitha omikalo omipe dhokulonga omapya, opo ya mone iikulya. Sho ya li muEgipiti, oya li haya longitha omeya gomomulonga gwaNiili, opo ya tekele omapya gawo. Nonando ongawo, mEvi lyEuvaneko, omapya kaga li haga tekelwa nomeya gomomulonga, ihe okomvula nosho wo komume. (Lesha Deuteronomium 11:10-15; Jes. 18:4, 5) Onkee ano, Aaisraeli oya li ye na okwiilonga omikalo omipe dhokulonga omapya. Shoka kasha li tashi ka kala oshipu, molwaashoka oyendji mboka ya li ye na ontseyo yokulonga omapya, oya sile mombuga.

⁵ Jehova okwa li a yelithile oshigwana she kutya onkalo yasho oya lunduluka. Opo ihe okwa gwedha ko elondodho ndyoka petameko lya li lya fa kaali na ko nasha nuunamapya, a ti: “Inamu etha mu kuthwe po pOmuwa, ne mu ka longele ookalunga yalwe.” (Deut. 11:16, 17) Omolwashike Jehova a li a londodha oshigwana she kombinga yokulongela iikalunga, omanga a li ta popi omikalo omipe dhuunamapya?

⁶ Jehova okwa li e shi kutya Aaisraeli otaya ka makelwa yi ilonge omikalo dhimwe dhuunamapya, kaapagani mboka ya li ye ya dhingilila. Odhoshili kutya aapagani mboka oya li ye na owino ye vule Aaisraeli; noshigwana  shaKalunga osha li tashi vulu okwiilonga kuyo omikalo dhimwe omiwanawa ndhono tashi vulu okulongitha, ihe osha li wo shi na okukala sha kotoka. Aakaanana oya li haya longele Baal, noya li ya nwethwa mo nayi keitaalo ndyoka. Oya li ya tala ko oshikalunga shoka kutya osho mwene gwewangandjo nonokutya osho hashi lokitha omvula. Jehova ka li a hala oshigwana she shi nwethwe mo keitaalo ndyoka lya puka. Nonando ongawo, omathimbo gamwe Aaisraeli oya li ya longele Baal. (Num. 25:3, 5; Aatok. 2:13; 1 Aak. 18:18) Ngashingeyi tala nkene Satana a li a kwata ko Aaisraeli.

7. Eitaalo lyAaisraeli olya li lya makelwa ngiini, sho ya yi mEvi lyEuvaneko?

⁷ Omukalo gwotango ngoka Satana a longitha, okwa li a ningitha Aaisraeli ya kale ya hala okumona evi lya lokwa. Omumvo kehe, okuza pehulilo lyaApilili sigo omuSeptemba, mEvi lyEuvaneko kamwa li hamu lokwa naanaa. Uuhupilo wAaisraeli owa li wi ikolelela komvula ndjono ya li hayi tameke muKotoba lwaampo. Satana okwa li a kotokele Aaisraeli moku ya itaalitha kutya otaya vulu okuyambapala, ngele oya landula omikalo dhaapagani mboka ya li ye ya kundukidha. Aapagani mboka oya li yi itaala kutya omikalondjigilile dha tya ngawo odha pumbiwa, opo iikalunga yawo yi vule okulokitha omvula ndjoka ya li ya pumbiwa. Mboka ya li kaaye na eitaalo lya kola muJehova, oya li ye wete kutya nguka ogwo owala omukalo tagu vulu okukeelela oshikukuta. Onkee ano, oya longitha omikalondjigilile dhaapagani mokusimaneka oshikalunga Baal.

8. Omukalo omutiyali guni Satana a li a longitha a kwate ko Aaisraeli? Shi yelitha.

⁸ Omukalo omutiyali Satana a li a longitha a kwate ko Aaisraeli, oku ya ningitha ya gandje eitulomo komahalo ga puka gopamilalo. Iigwana yaapagani oya li hayi longele iikalunga yawo mokulonga iilonga iinyanyalithi. Okulongela iikalunga okwa li kwa kwatela mo uuholume waakiintu naalumentu motempeli. Aapagani kaya li owala ya pitika uushenge nomikalo dhilwe dholuhondelo, ihe oya li wo ye wete iinima mbyoka ya taambiwa ko. (Deut. 23:17, 18; 1 Aak. 14:24) Aapagani oya li yi itaala kutya omikalondjigilile ndhoka ohadhi ningitha iikalunga yawo yi ningithe evi li gandje iikulya ya gwana. Shoka osha li sha nwetha mo Aaisraeli oyendji noshe ya ningitha ya longele iikalunga yaapagani mboka. Paulelalela, Aaisraeli oya li ya kwatwa ko kuSatana.

9. Metsokumwe naHosea 2:16, 17, Satana okwa li a ningitha ngiini Aaisraeli ya dhimbwe etaloko lyaJehova?

⁹ Omukalo omutitatu Satana a li a longitha, okuningitha Aaisraeli ya dhimbwe etaloko lyaJehova. Pethimbo lyomuhunganeki Jeremia, Jehova okwa li a popi kutya aahunganeki aafundja oya ningitha aapiya ye ya dhimbwe edhina Lye, “e taa gama kuBaal.” (Jer. 23:27) Aapiya yaKalunga otashi vulika ya li ya etha okulongitha edhina lyaJehova noku li pingena po nedhina Baal, ndyoka tali ti “Mwene” nenge “Omuwa.” Shika osha li she shi ningitha oshidhigu kAaisraeli ya mone eyooloko pokati kaJehova naBaal. Osha li wo she shi ningitha oshipu kuyo ya vundakanithe okulongela kwawo Jehova nomikalondjigilile dhokulongela Baal. — Lesha Hosea 2:16, 17.

10. Oomwigo dhini Satana ha longitha kunena?

¹⁰ Satana oha longitha oomwigo dha faathana nokunena. Oha kwata ko aantu moku ya ningitha ya gandje eitulomo kwaashoka ya hala, mokuhumitha komeho oluhondelo nomokuningitha aantu ya dhimbwe etaloko lyaJehova. Natu ka kundathaneni nkene Satana ha ningitha aantu ya dhimbwe etaloko lyaJehova.

11. Ongiini Satana ha ningitha aantu ya dhimbwe etaloko lyaJehova?

 ¹¹ Satana oha ningitha aantu ya dhimbwe etaloko lyaJehova. Konima yeso lyaayapostoli yaJesus, aantu yamwe mboka ya li tayi iti Aakriste, oya tameke okutaandelitha omalongo giifundja. (Iil. 20:29, 30; 2 Tes. 2:3) Aashunimonima mboka, oya li ya tameke okuningitha aantu ya dhimbwe Kalunga kashili. Pashiholelwa, oye etha okulongitha edhina lyaKalunga mOombiimbeli dhawo noku li pingena po nedhinasimaneko “Omuwa.” Sho ya kutha mo edhina lyaKalunga noku li pingena po nuutumbulilo “Omuwa,” shoka oshe shi ningitha oshidhigu kaaleshi yOmbiimbeli ya mone nkene Jehova a yooloka ko kuyalwe mboka ya popiwa mOmanyolo ye li “omuwa.” (1 Kor. 8:5) Oya longitha wo uutumbulilo “Omuwa,” ya ukitha kuJehova nokuJesus, shoka she shi ningitha oshidhigu kaantu ya uve ko kutya Jehova nOmwana aantu ya yooloka nokaye na ondondo yi thike pamwe. (Joh. 17:3) Engwangwano ndika otali ambidhidha elongo lyUukwatatu, ndyoka kaali li pamanyolo. Shoka osha ningitha aantu oyendji ya tale ko Kalunga e li omuntu gwomeholamo nokwiitaala kutya itaya vulu oku mu tseya. Iifundja oyi thike peni! — Iil. 17:27.

12. Omalongelokalunga giifundja ohaga humitha komeho shike, niilanduliko oyini, ngaashi ya popiwa mAaroma 1:28-31?

¹² Satana oha ningitha aantu ya gandje eitulomo komahalo ga puka gopamilalo. Pethimbo lyAaisraeli, Satana okwa li a longitha elongelokalunga lyiifundja li humithe komeho oluhondelo. Nokunena osho ha ningi. Omalongelokalunga giifundja oga taamba ko nohaga humitha komeho eihumbato ewinayi. Onkee ano, oyendji mboka ya li haya longele Kalunga oya etha po okuvulika komithikampango dhopamikalo. Omuyapostoli Paulus okwa yelitha montumwafo ye ndjoka a li a nyolele Aaroma, iilanduliko yaashoka. (Lesha Aaroma 1:28-31.) Iinima mbyoka yi li ‘iihuna,’ ayihe oyi li oludhi lwoluhondelo, mwa kwatelwa uushenge. (Rom. 1:24-27, 32; Eh. 2:20) Osha simanenena okukala tatu vulika kwaashoka Ombiimbeli tayi ti.

13. Omwigo gulwe guni Satana ha longitha?

¹³ Satana oha ningitha aantu ya gandje eitulomo kwaashoka ya hala. Oshi li paunshitwe atuhe okukala twa hala okwiilonga okuninga iinima yontumba, opo tu ikwathele nosho wo yaandjetu. (1 Tim. 5:8) Olundji, iinima mbyoka ohatu yi ilongo kosikola nohatu yi ilongo twa mana mo. Ihe otu na okukala  twa kotoka. Miilongo oyindji, aanasikola ihaya longwa owala uunkulungu wokuninga sha, ihe nuunongo wo wopantu. Aanasikola ohaya ladhipikwa wo ya kale ya limbililwa ngele Kalunga oko ngaa e li shili nokukala inaaya simaneka Ombiimbeli. Ohaya longwa kutya elongo lyoevolusi olyo owala lya yelitha nawa kutya omwenyo ogwa za peni. (Rom. 1:21-23) Elongo ndyoka itali tsu kumwe ‘nuunongo waKalunga.’ — 1 Kor. 1:19-21; 3:18-20.

14. Elongo lyopantu ohali humitha komeho shike?

¹⁴ Elongo lyopantu itali tsu kumwe nomithikampango dhaKalunga dhopauyuuki. Ihali kwathele aantu ya imike iiyimati yombepo yaKalunga, ihe “iilonga yuuhalu wopantu.” (Gal. 5:19-23) Ohali ladhipike aantu ya kale ye na uuntsa noyi inenepeke, shoka hashi ya ningitha ya kale yi ‘ihole.’ (2 Tim. 3:2-4) Omaukwatya ngoka itaga tsu kumwe neifupipiko, ano ombepo yeishonopeko ndjoka Kalunga a hala aapiya ye ya kale ye na. (2 Sam. 22:28) Aakriste yamwe mboka ya lalakanene elongo lyopombanda, oya li ya tameke okudhiladhila pauyuni, ihe hangaashi Kalunga. Natu taleni oshiholelwa shimwe shaashoka tashi vulu okuholoka po.

15-16. Oshike to ilongo moshimoniwa shomumwameme ngoka a li a lalakanene elongo lyopombanda?

¹⁵ Omumwameme gumwe ngoka a kala miilonga yethimbo lyu udha uule womimvo dhi vulithe po 15, okwa ti: “Ndi li Onzapo ya ninginithwa, onda li nda lesha nonda uva kutya osha nika oshiponga okulalakanena elongo lyopombanda, ihe nonando ongawo, inandi pupa ko. Omayele ngoka onda li ndi wete itaaga longo kungame.” Omashongo geni a li a taalele? Okwa ti: “Okwiilonga kwandje okwa li kwa kutha ethimbo ele lela noonkambadhala  odhindji, e tandi kala kaandi na ethimbo lyokugalikana kuJehova ngaashi shito; onda li wo handi kala nda vulwa noonkondo e tandi kala ihaandi ilongekidhile we nawa okugongala nokunyanyukilwa okukundathana nayalwe Ombiimbeli. Elago enene, onde shi dhimbulula kutya elongo lyopombanda, olya li tali yono po ekwatathano lyandje naJehova, nonda li ndi shi kutya ondi na oku li etha po. Shoka osho nda ningi.”

¹⁶ Elongo lyopombanda olya li lya gumu ngiini okudhiladhila kwe? Okwa ti: “Onda sa ohoni okuzimina kutya elongo ndyoka nda li nda lalakanena, olya li lya longa ndje ndi gandje eitulomo komapuko gayalwe, unene tuu gaamwatate naamwameme, okukala nda tegelela ya ninge oshindji nokukala ndi iyoolola ko kuyo. Osha pula ndje ethimbo okweetha po okudhiladhila kwa tya ngawo. Oshimoniwa shika osha ulukila ndje nkene sha nika oshiponga okwiipwililikila omalondodho ngoka tatu pewa kuTate yetu gwomegulu, okupitila mehangano lye. Jehova oku shi ndje nawa e vule ndje. Ando onda pulakenene kuye!”

17. (a) Otu na okukala twa tokola toko okuninga shike? (b) Oshike tatu ka kundathana moshitopolwa tashi landula?

¹⁷ Kala wa tokola toko waa yulwe nando ‘okomalongo guunongo wopantu nomafundjaleko gaa fele’ gomuuyuni waSatana. Tsikila okukala wa kotokela oomwigo dhaSatana. (1 Kor. 3:18; 2 Kor. 2:11) Ino etha nando Satana e ku dhimbithe etaloko lyaJehova. Kala metsokumwe nomithikampango dhaJehova dhopamikalo dha dhenga mbanda. Ino etha nando Satana e ku ende mevi, wu kale kuu na ko nasha nomayele gaJehova. Oshike wu na okuninga, ngele owu wete wa nwethwa mo nale komadhiladhilo guuyuni? Oshitopolwa tashi landula, otashi ka ulika nkene Oohapu dhaKalunga tadhi vulu oku tu kwathela tu vule okulundulula “omadhiladhilo agehe gomaifundjaleko” nosho wo eihumbato ewinayi. — 2 Kor. 10:4, 5.