1. Ongiini tatu vulu okuholela Tate yetu omunahole, Jehova?

JEHOVA oku tu hole noonkondo. (Joh. 3:16) Otwa hala okuholela Tate yetu omunahole. Onkene ohatu kambadhala tu ulukile aantu ayehe ‘euvitopamwe, ohole yuumwayinathana nohenda,’ unene tuu mboka “tu li nayo meitaalo limwe.” (1 Pet. 3:8; Gal. 6:10) Uuna aamwatate naamwameme ya taalelwa komaupyakadhi, ohatu kala twa hala oku ya kwathela.

2. Oshike tatu ka kundathana moshitopolwa shika?

² Kehe ngoka a hala okukala omupiya gwaJehova, ota ka taalela omaupyakadhi. (Mark. 10:29, 30) Otashi vulika tu ki iyadhe momashongo ogendji, sho ehulilo lyuuyuni mbuka tali hedha popepi. Ongiini tatu vulu okukwathelathana? Natu ka taleni shoka tatu vulu okwiilonga miiholelwa yopaMbiimbeli, ngaashi shaLot, Job naNaemi. Otatu ka kundathana wo omashongo ngoka aamwatate naamwameme haya taalele kunena nankene tatu vulu oku ya kwathela ye ga idhidhimikile.

3. Ngaashi sha popiwa muPetrus omutiyali 2:7, 8, etokolo lini kaali li pandunge Lot a li a ningi, noshizemo oshini?

³ Lot okwa li a ningi etokolo kaali li pandunge, sho a hogolola oku ka kala muSodom, mokati kaantu mboka ya li ye na eihumbato ewinayi. (Lesha 2 Petrus 2:7, 8.) Oshitopolwa shoka osha li sha yambapala, ihe Lot okwe ki iyadha muupyakadhi owundji, sho a tembukile ko. (Gen. 13:8-13; 14:12) Omukulukadhi gwe otashi vulika a li a tameke okuhokwa unene oshilando shoka nenge aantu yamwe yamo, shoka she mu ningitha kaa vulike kuJehova. Okwa kanitha omwenyo gwe, sho Kalunga a lokithile omulilo  nosulufuli moshitopolwa shoka. Dhiladhila wo kombinga yoyanakadhona yaali yaLot. Oya li ya yalekwa kaalumentu yamwe mboka ya sile muSodom. Lot okwa li a kanitha egumbo lye, eliko lye, naashoka shi yemateka unene, okwa kanitha omukulukadhi gwe. (Gen. 19:12-14, 17, 26) Pethimbo lyuudhigu mboka, mbela Jehova okwa li ngaa i idhidhimikile Lot? Eeno.

4. Ongiini Jehova a li i idhidhimikile Lot? (Tala ethano lyokombanda.)

⁴ Nonando Lot okwa li a hogolola a ka kale muSodom, Jehova okwa li e mu ulukile olukeno, sho e mu tumine aayengeli ye mu hupithe pamwe nuukwanegumbo we. Nonando ongawo, pehala lyokuvulika nziya kwaashoka a lombwelwa, Lot okwa kala ta “kakadhala.” Aayengeli oye mu kwata mokwaako, e taye mu kwathele pamwe naanegumbo lye ya ze mo moshilando shoka. (Gen. 19:15, 16) Opo nduno, aayengeli oye mu lombwelwe a matukile koshitopolwa shokoondundu. Pehala lyokuvulika kuJehova, Lot okwa pula a ye kokalando kopopepi. (Gen. 19:17-20) Jehova okwe mu idhidhimikile, e te mu pitike a ye kokalando hoka. Lwanima, Lot okwa ka kala a tila okukala mo, e ta tembukile koshitopolwa shokoondundu hoka tango Jehova a li e mu lombwele a ye. (Gen. 19:30) Jehova ka li tuu a ulike eidhidhimiko! Ongiini tatu vulu oku mu holela?

5-6. Ongiini tatu vulu okutula miilonga 1 Aatessalonika 5:14, sho tatu holele Kalunga?

⁵ Ngaashi Lot, omumwatate nenge omumwameme gwontumba otashi vulika a ninge etokolo kaali li pandunge, e ti itula muupyakadhi uunene. Ngele shoka osha ningwa, otatu ki inyenga ngiini? Otashi vulika tu mu lombwele kutya ota teya shoka a kuna, shoka tashi vulika shi kale shoshili. (Gal. 6:7) Nonando ongawo, otatu vulu okuninga po sha, shoka tashi vulu oku mu kwathela. Otatu vulu okuholela omukalo moka Jehova a li a kwathele Lot. Ngiini mbela?

⁶ Jehova ka li owala a tumu aayengeli ya londodhe Lot, ihe oye mu kwathele wo a ye ondapo ehanagulo ndyoka lya li tali ka adha Sodom. Sha faathana, otashi vulika tu kale twa pumbwa okulondodha omumwatate, ngele otu wete kutya oku uka moshiponga. Ihe otashi vulika wo tu kale twa pumbwa oku mu kwathela. Nonando ota kakadhala okutula miilonga omayele gopaMbiimbeli ngoka ta pewa, otwa pumbwa oku mu idhidhimikila. Kala wa fa aayengeli yaali mboka ya li ya kwathele Lot. Otu na okukonga omikalo moka tatu vulu okukwathela omumwatate, pehala lyoku mu iteka nokukala kokule naye. (1 Joh. 3:18) Otashi vulika wo twa pumbwa oku mu kwata mokwaako pathaneko, noku mu kwathela a tule miilonga omayele ngoka a pewa. — Lesha 1 Aatessalonika 5:14.

7. Ongiini tatu vulu okuholela omukalo moka Jehova a li a tala ko Lot?

⁷ Jehova okwa li ta vulu okukala a tala kokwaagwanenena kwaLot. Ihe pehala lyaashono, okwa ka nwetha mo omuyapostoli Petrus a popye kutya Lot omulumentu omuyuuki. Inatu nyanyukwa tuu sho Jehova he tu dhimine po! (Eps. 130:3) Mbela otatu vulu okuholela omukalo moka Jehova a li a tala ko Lot? Ngele otwa kala tatu tala komaukwatya omawanawa gaamwatate naamwameme, otatu ka vula lela oku ya idhidhimikila. Kungawo, otashi ka kala oshipu kuyo okutaamba ko ekwatho ndyoka tatu ya pe.

8. Olukeno otalu ke tu inyengitha tu ninge shike?

⁸ Mepingathano naLot, Job ka li ta mono iihuna, molwaashoka a ninga omatokolo gontumba omawinayi. Nonando ongawo, okwa li i iyadha momaupyakadhi ga kwata miiti. Okwa li a kanitha iiniwe ye, ondondo ye noka li we e na uukolele. Nokuli shoka oshiwinayi noonkondo, ye nomukadhi oya silwa oyana ayehe. Job okwa li wo a lundilwa kookuume ke yatatu aaniifundja. Omolwetompelo limwe lini  ookuume ke mboka, ya li kaaye na ohenda naye? Omolwaashoka kaya li ya kambadhala ya uve ko onkalo ye. Oshizemo, oya li ya thiki pehulithodhiladhilo lya puka, e taye mu pangula nonyanya. Ongiini tatu vulu okuyanda okuninga epuko lya faathana? Natu kale tu shi kutya Jehova oye owala e shi ashihe shoka sha kwatelwa monkalo yomuntu. Pulakena neitulomo kwaashoka omuntu ngoka ta mono iihuna te ku lombwele. Ino pulakena owala kwaashoka ta popi, ihe kambadhala wo okwiitula moongaku dhe. Kungawo, opo owala to vulu oku mu ulukila uukwawo wanankali.

9. Olukeno otali ke tu kwathela kaatu ninge shike, nomolwashike?

⁹ Olukeno nenge ondjaalela otayi ke tu kwathela kaatu taandeleke oluhoko kombinga yomaupyakadhi gayalwe. Omuntu ngoka e na oluhoko, iha tungu egongalo, ihe ohe li teya po. (Omayel. 20:19; Rom. 14:19) Ke shi omunambili noha popi iinima inaayi dhiladhilwa nawa, mbyoka tayi vulu okweehameka ngoka e li nale muupyakadhi. (Omayel. 12:18; Ef. 4:31, 32) Oshi li nawa tu tale komaukwatya omawanawa gomuntu, e tatu dhiladhila nkene tatu vulu oku mu kwathela i idhidhimikile uupyakadhi mboka e na.

10. Oohapu ndhoka dhi li muJob 6:2, 3, otadhi tu longo shike?

¹⁰ Lesha Job 6:2, 3. Omathimbo gamwe, Job okwa li a popi ‘oohapu inaadhi dhiladhilwa nawa.’ Ihe konima yethimbo, okwa li a mono kutya shoka a popi osha puka. (Job 42:6) Ngaashi Job, omuntu ngoka ti idhidhimikile uupyakadhi wa kwata miiti, otashi vulika a popye iinima mbyoka konima yethimbo te ki ipa uusama. Otu na okwiinyenga ngiini? Pehala lyoku mu popila muuwinayi, natu mu yaalele. Dhimbulukwa kutya kashi shi ehalo lyaJehova, sho hatu adhika komaupyakadhi kunena. Onkee ano, oshi shi okuuviwa ko, ngele omupiya gwaJehova omudhiginini ta popi oohapu inaadhi  dhiladhilwa nawa, uuna a gwililwa po kuupyakadhi. Nokuli ngele ta popi iinima kaayi li mondjila kombinga yaJehova nenge yetu, katu na okweendelela oku mu geela nenge tu mu pangule. — Omayel. 19:11.

11. Aakuluntugongalo otaya vulu ngiini okuholela Elihu, uuna taya gandja omayele?

¹¹ Omathimbo gamwe, omuntu ngoka ti idhidhimikile uupyakadhi wa kwata miiti, okwa pumbwa wo omayele gontumba nenge epukululo. (Gal. 6:1) Ongiini aakuluntugongalo taya vulu oku mu kwathela? Oya pumbwa okuholela Elihu, ngoka a li a pulakene kuJob nohenda. (Job 33:6, 7) Elihu okwa li owala a pe Job omayele, konima sho a uvu ko nkene Job e uvite. Aakuluntugongalo mboka haya landula oshiholelwa shaElihu, otaya ka pulakena neitulomo nokukambadhala okuuva ko onkalo yomuntu. Opo nduno, uuna taye mu pe omayele, otashi vulika shi kale oshipu ya adhe omutima gwe.

12. Naemi okwa li a gumwa ngiini keso lyomusamane gwe noyanamati yaali?

¹² Naemi okwa li omukiintu omudhiginini, ngoka e hole Jehova. Ihe sho omusamane gwe noyanamati yaali ya si, okwa li a hala okulundulula edhina lye Naemi li ninge “Mara,” ndyoka tali ti “uululu.” (Rut 1:3, 5, 20, 21) Oshitenya shaNaemi, Rut, osha li sha kala pamwe naye miipyu nomiitalala. Rut ka li owala a kwathele Naemi iinima mbyoka a li a pumbwa, ihe okwa li wo e mu hekeleke. Rut okwa li wo a ulike kutya oku hole Naemi noku na ehalo lyoku mu ambidhidha, okupitila moohapu dhe oombwanawa nodhi li paushili. — Rut 1:16, 17.

13. Omolwashike mboka ya silwa ookuume kawo kopandjokana ya pumbwa ekwatho lyetu?

¹³ Uuna omumwatate nenge omumwameme gwontumba a silwa kuume ke kopandjokana, oha kala a pumbwa ekwatho lyetu. Aaihokani otaya vulu okufaathanithwa nomiti mbali dha tegama. Momukokomoko gwomimvo, omidhi dhadho ohadhi idhingile mumwe. Ngele omuti gumwe ogwa vudhwa po e ta gu si, omukwawo ohagu kala gwa gumwa noonkondo. Sha faathana, uuna gumwe a silwa kuume ke kopandjokana, otashi vulika shi gume nayi noonkondo omaiyuvo ge, uule wethimbo. Omumwameme Paula * ngoka a silwa omusamane gwe ombadhilila, okwa ti: “Onkalamwenyo yandje oya li ya lunduluka thiluthilu nonda li ndi uvite kaandi na we oonkondo. Onda kanitha kuume kandje kopothingo. Onda li handi popi naye kehe shimwe. Otwa li hatu nyanyukilwa pamwe nohatu ambidhidhathana momathimbo omadhigu. Okwa li ha pulakene ndje aluhe, uuna tandi mu lombwele omaupyakadhi gandje. Onda li ndi uvite lela nda fa inaandi ihwa po we.”

14-15. Ongiini tatu vulu okuhekeleka ngoka a silwa kuume kopandjokana?

¹⁴ Ongiini tatu vulu okuhekeleka ngoka a silwa kuume ke kopandjokana? Oshinima shotango sha simana tu na okuninga, okupopya naye, nonando otashi vulika tu kale tu uvite inaatu manguluka nenge kaatu shi kutya natu popye shike. Omumwameme Paula ngoka a popiwa metetekelo, okwa ti: “Ondi shi kutya uuna pwa holoka eso, aantu ihaya kala lela ya manguluka okupopya. Ohaya kala tayi ipula kutya otashi vulika ya popye sha, sha puka. Ihe ohashi kala oshiwinayi unene, uuna omuntu inaa tya sha.” Omuntu ngoka a silwa otashi vulika a kale inaa tegelela tu mu lombwele oohapu dhehekeleko odhindji. Paula okwa ti: “Onda li nda pandula sho ookuume kandje ya li ya hekeleke ndje taya ti: ‘Ombili kwaashoka sha holoka po.’”

¹⁵ Omumwatate William, ngoka a silwa omukadhi omimvo dha ka pita, ota ti: “Ohandi shi pandula, uuna yalwe taya lombwele ndje iinima iiwanawa mbyoka taya dhimbulukwa kombinga yomukulukadhi gwandje. Ohashi ulukile ndje kutya okwa li e holike nokwa simanekwa. Shoka oshi li ekwatho enene kungame. Oohapu dhawo  odha hekeleka ndje noonkondo, oshoka omukulukadhi gwandje onda li ndi mu hole unene, nokwa kala ekwatho enene kungame.” Omuselekadhi Bianca, okwa ti: “Ohashi hekeleke ndje, uuna yalwe taya galikana pamwe nangame nokulesha enyolo limwe nenge gaali. Ohashi kwathele ndje, uuna taye mu popi nuuna ya pulakena ndje sho tandi popi kombinga ye.”

16. (a) Ekwatho lini tu na okupa ngoka a silwa kuume ke kopandjokana? (b) Shi ikolelela kuJakob 1:27, oshinakugwanithwa shini tu na?

¹⁶ Ngaashi owala Rut a li a tokola okukala nayinamweno Naemi, otwa pumbwa okutsikila okukwathela mboka ya silwa. Paula ngoka a popiwa metetekelo, ota ti: “Konima owala sho omusamane gwandje a si, aantu oya li ye ya okukwathela ndje nokuhekeleka ndje. Mokweendela ko kwethimbo, oya kala ishewe yi ipyakidhila noonkalamwenyo dhawo. Nonando ongawo, onkalamwenyo yandje oya li ya lunduluka thiluthilu. Oshi li ekwatho enene, uuna yalwe ye shi mono mo kutya omuntu ngoka a silwa, oha kala a pumbwa okwaambidhidhwa uule woomwedhi nenge nokuli womimvo.” Odhoshili kutya aantu oya yoolokathana. Yamwe ohaya hupula nziya. Omanga yalwe, haya kala aluhe nokudhimbulukwa kehe shoka ya ninga pamwe nanakusa. Aantu ohaya nika oluhodhi momikalo dha yoolokathana. Natu dhimbulukwe kutya Jehova okwe tu pa uuthembahenda noshinakugwanithwa shokukala tu na ko nasha naamboka ya silwa ookuume kawo kopandjokana. — Lesha Jakob 1:27.

17. Omolwashike twa pumbwa okwaambidhidha mboka ya ethiwa kookuume kawo kopandjokana?

¹⁷ Aaihokani yamwe otayi idhidhimikile uuwehame  nosho wo uupyakadhi wokugwililwa po, mboka hawu etithwa kokweethiwa kookuume kopandjokana. Joyce ngoka a ethiwa komusamane gwe sho a mono po omukiintu gulwe, okwa ti: “Uuwehame mboka nda li ndi uvite sho nda hengwa, owu vulithe pwaamboka andola nda kala ndi uvite ando okwa sile. Ando okwa li a sile moshiponga nenge kuuwehame wontumba, ando ondi shi kutya haye a ninga etokolo ndyoka. Ihe pompito ndjika, oye a tokola a thige ndje po. Onda li nda sa ohoni nondi wete kaandi na we oshilonga.”

18. Oshike tatu vulu okuninga tu kwathele mboka kaaye na we ookuume kopandjokana?

¹⁸ Uuna tatu kwathele mboka kaaye na we ookuume kawo kopandjokana muunima nando uushona, kungawo otatu ya ulukile kutya otu ya hole. Oya pumbwa ookuume aawanawa, molwaashono ngashingeyi oye li oyo ayeke. (Omayel. 17:17) Ongiini to vulu oku ya ulukila kutya owu li kuume kawo? Oto vulu oku ya hiya wu lye pamwe nayo. Oto vulu wo okunyanyukilwa pamwe nayo nenge wu longe pamwe nayo momapya. Omathimbo gamwe, oto vulu oku ya ithana ye ku wayimine pelongelokalunga lyuukwanegumbo weni. Ngele owe shi ningi, oto ka nyanyudha Jehova, oshoka oku li pamwe “naamboka ya dhengwa pevi” “nomugameni gwaaselekadhi.” — Eps. 34:18; 68:5.

19. Wu na momadhiladhilo 1 Petrus 3:8, oshike wa tokola okuninga?

¹⁹ Masiku “omalwa gomuuyuni wonale otaga hulu po notaga dhimbiwa,” ngele Uukwaniilwa waKalunga owa tameke okupangela ombanda yevi. Otwa tegelela nondjuulukwe ethimbo ndyoka uuna ‘iiningwanima yonale tayi ka dhimbiwa thiluthilu.’ (Jes. 65:16, 17) Manga twe li tegelela, natu ambidhidhathane nokuulika moohapu dhetu nomiilonga yetu kutya otu hole aamwatate naamwameme ayehe. — Lesha 1 Petrus 3:8.