1. Etilokalunga oshike, nomolwashike mboka ye hole Jehova ye na okukala ye li na?

AAKRISTE oye hole Kalunga, nohaye mu tila wo. Aantu yamwe otashi vulika ya kale ye wete itaashi vulika. Ihe etilo ndyoka tali popiwa, kali shi ndyoka hali etwa kuumbanda. Otatu ka kundathana kombinga yetilo ndyoka ewanawa. Aantu mboka ye na etilo ndyoka, ohaya kala ya simaneka noonkondo Kalunga. Inaya hala okuyemateka Tate gwawo gwomegulu, molwaashoka inaya hala okuyona po uukuume wawo naye. — Eps. 111:10; Omayel. 8:13.

2. Shi ikolelela koohapu dhomukwaniilwa David ndhoka dha nyolwa mEpisalomi 86:11, iinima iyali yini tatu ka kundathana?

² Lesha Episalomi 86:11. Uuna tatu dhiladhila koohapu ndhoka, oshi iwetikile kutya omukwaniilwa omudhiginini, David, okwa li e wete kutya osha simana okutila Kalunga. Natu ka taleni nkene tatu vulu okutula miilonga oohapu dhaDavid dha nwethwa mo. Tango otatu ka kundathana omatompelo gamwe kutya omolwashike twa pumbwa okukala twa simaneka noonkondo edhina lyaKalunga. Opo nduno, otatu ka kundathana nkene tatu vulu okuulika kutya otwa simaneka noonkondo edhina lyaKalunga monkalamwenyo yetu yakehe esiku.

3. Oshiningwanima shini tashi vulika sha li sha kwathele Moses, a kale a simaneka noonkondo edhina lyaKalunga?

³ Dhiladhila kunkene Moses a li e uvite, sho a li mekololo li li memanya, e ta mono eadhimo lyaJehova tali piti po. Embo Insight on the Scriptures otali ti kutya “oshiningwanima shoka otashi vulika sha li oshikumithi noonkondo, molwaashoka manga Jesus Kristus inee ya kombanda yevi, kapwa li omuntu a mona oshinima sha tya ngawo.” Moses okwa li u uvu oohapu tadhi landula, ndhoka dha popiwa komuyengeli, tadhi ti: “Ongame [Jehova, NW], ongame  Kalunga omunamutimahenda, omunalukeno nomutalanteni, ihandi geye mbala nondu udha esilohenda nuudhiginini. Ohandi dhiginine ohole yandje koluvalo lwomayuvi note dhimi po uukolokoshi, omayono noondjo.” (Eks. 33:17-23; 34:5-7) Otashi vulika Moses a li ha dhimbulukwa oshiningwanima shoka, uuna ta tumbula edhina Jehova. Itashi kumitha sho Moses lwanima a ka lombwela oshigwana shaKalunga, Israeli, shi ‘simaneke edhina lyOmuwa Kalunga kasho ekumithi netilithi.’ — Deut. 28:58.

4. Oshike tashi vulu oku tu kwathela tu kale twa simaneka Jehova shi vulithe nale?

⁴ Uuna tatu dhiladhila kombinga yedhina Jehova, otwa pumbwa wo okutedhatedha kombinga yuukwatya we. Omaukwatya ge ongaashi, oonkondo, uunongo, uuyuuki nosho wo ohole. Okuninga ngawo, otaku vulu oku tu inyengitha tu mu simaneke shi vulithe nale. — Eps. 77:11-15.

5-6. (a) Edhina lyaKalunga otali ti shike? (b) Shi ikolelela kuEksodus 3:13, 14 nosho wo Jesaja 64:8, omomikalo dhini Jehova ha vulu okuningitha iinima yi gwanithwe po?

⁵ Oshike tu shi kombinga yeityo lyedhina lyaKalunga? Aalongwantu oyendji oya thika pehulithodhiladhilo kutya edhina Jehova, otashi vulika tali ti kutya “Oha ningitha.” Eityo ndyono otali tu dhimbulukitha kutya kaku na shoka tashi vulu okwiimba Jehova a ninge shoka a hala okuninga. Ngiini mbela?

⁶ Jehova oha vulu okuningitha kehe shimwe, shi ninge shoka a hala, opo a gwanithe po ehalo lye. (Lesha Eksodus 3:13, 14.) Miileshomwa yetu, olundji ohatu ladhipikwa tu tedhatedhe kombinga yoshinima shono, ngele tashi ya puukwatya waJehova. Jehova oha vulu wo okulongitha aapiya ye inaaya gwanenena ya ninge shoka a hala, opo ya vule oku mu longela nokugwanitha po ehalo lye. (Lesha Jesaja 64:8.) Jehova oha longitha omikalo ndhoka, opo a gwanithe po ehalo lye. Kapu na shoka tashi vulu oku mu imba a vule okugwanitha po ehalo lye. — Jes. 46:10, 11.

7. Ongiini tatu vulu okukokeka olupandu okupandula Tate yetu gwomegulu?

⁷ Otatu vulu okukokeka olupandu lwetu okupandula Tate yetu gwomegulu, mokutedhatedha kombinga yaashoka a ninga naasho he tu kwathele tu vule okugwanitha po ehalo lye. Pashiholelwa, ohashi tu kumitha noonkondo, uuna  tatu dhiladhila kiinima iikumithi mbyoka Jehova a shita. (Eps. 8:3, 4) Shimwe ishewe, uuna tatu tedhatedha kunkene Jehova e tu kwathela tu gwanithe po ehalo lye, ohatu mu simaneke noonkondo shi vulithe nale. Edhina Jehova ekumithi lela! Olya kwatela mo ashihe shoka tashi popi kombinga yaTate yetu, ashihe shoka a ninga nale naashihe shoka ta ka ninga. — Eps. 89:7, 8.

8. Deuteronomium 32:2, 3, ota yelitha ngiini etaloko lyaJehova kombinga yedhina lye?

⁸ Manga Aaisraeli inaaya ya mEvi lyEuvaneko, Jehova okwa longo Moses eimbilo. (Deut. 31:19) Moses eimbilo ndyoka okwe li longo wo Aaisraeli. (Lesha Deuteronomium 32:2, 3.) Ngele tatu tedhatedha kovelise onti-2 nonti-3, oshi iwetikile kutya Jehova ina hala edhina lye li kale kaali shiwike, lya fa ando eyapuki unene okutumbulwa. Okwa hala edhina lye li tseyike kiishitwa ye ayihe iinandunge. Kasha li tuu uuthembahenda uunene kaantu okuuva Moses te ya longo kombinga yaJehova nedhina lye eyapuki! Shoka Moses e ya longo, osha koleke eitaalo lyawo noshe ya ladhipike, ngaashi naanaa omvula ombwanawa hayi kwathele iimeno yi koke. Ongiini tatu vulu okushilipaleka kutya natse aantu osho hatu ya longo ngawo?

9. Ongiini tatu vulu okukwathela mokuyapulitha edhina lyaJehova?

⁹ Uuna tatu longo egumbo negumbo, nenge tatu uvitha montaneho, otatu vulu okulongitha Ombiimbeli tu ulukile aantu edhina lyaKalunga, Jehova. Otatu vulu oku ya pa iileshomwa, oku yu ulukila uuvidio wetu wa dhenga mbanda noku ya ulukila epandja lyetu lyokointaneta hoka ku na uuyelele owundji tawu simanekitha Jehova. Uuna tu li kiilonga, kosikola, nenge molweendo, otatu vulu okukonga oompito dhokupopya naantu kombinga yaKalunga ketu omunahole noyuukwatya we. Uuna tatu lombwele mboka hatu tsakaneke kombinga yelalakano lyaJehova lyopahole li na ko nasha naantu nosho wo nevi, kungawo otatu ya kwathele ya tale ko Jehova momukalo moka tashi vulika kaaya li ye mu tala ko. Uuna tatu lombwele yalwe oshili kombinga yaTate yetu omunahole, otatu kwathele mokuyapulitha edhina lyaKalunga. Otatu aneke wo pomutenya iifundja mbyoka yalwe tashi vulika ya longwa, kombinga yaKalunga. Shoka hatu longo aantu okuza mOmbiimbeli, ohashi koleke eitaalo lyawo, ohashi ya talaleke noitashi vulu okuyelekwa nasha. — Jes. 65:13, 14.

10. Uuna tatu ningi omakonakonombiimbeli, omolwashike tu na okuninga oshindji, kaashi shi owala oku ya longa kombinga yiitegelelwa yaKalunga nomithikampango dhe?

¹⁰ Uuna tatu ningi omakonakonombiimbeli, otwa hala okukwathela aakonakoni yetu ya tseye edhina lyaJehova noye li longithe. Shimwe ishewe, otwa hala oku ya kwathela ya tseye oshili kombinga yaJehova. Mbela otatu ke shi pondola ngaa, ngele otwa kala owala hatu ya lombwele omalongo gaJehova, omithikampango dhe nosho wo oompango dhankene ye na okwiihumbata? Omukonakoni omwaanawa ota vulu okwiilonga kombinga yoompango dhaKalunga nokukala nokuli e dhi lenga. Ihe mbela omukonakoni ngoka ota ka vulika ngaa kuJehova, molwaashoka e Mu hole? Dhimbulukwa kutya Adam naEva oya li ye shi ompango yaKalunga, ihe kaya li ye hole shili Omugandji gwayo. (Gen. 3:1-6) Onkee ano, otu na okuninga oshindji, kaashi shi owala okulonga yalwe kombinga yiitegelelwa yaKalunga nomithikampango dhe dhi li pauyuuki.

11. Uuna tatu longo aakonakoni yetu kombinga yoompango dhaKalunga nomithikampango dhe, ongiini tatu vulu oku ya kwathela ya kale ye hole ngoka e dhi tula po?

¹¹ Iitegelelwa yaKalunga nomithikampango dhe ohadhi tu etele aluhe uuwanawa. (Eps. 119:97, 111, 112) Ihe aakonakoni yetu otashi vulika kaaye dhi tale ko momukalo ngoka, ngele kaye wete kutya Jehova okwe dhi tula po, molwaashoka e tu hole. Onkee ano, otatu vulu oku ya pula ngeyi: “Mbela omolwashike Kalunga a tegelela aapiya ye ya ninge oshinima shino, nenge yi ikaleke kokule  nasho? Shoka otashi tu longo shike kombinga ye?” Ngele otwa kwathele aakonakoni yetu ya dhiladhile kombinga yaJehova noya kokeke ohole yashili yokuhola edhina lye ekumithi, kungawo otashi ka kala oshipu okwaadha omitima dhawo. Aakonakoni yetu itaya ka kala ye hole owala Kalunga, ihe noompango dhe wo. (Eps. 119:68) Eitaalo lyawo otali ka kala lya kola notali ke ya kwathela yi idhidhimikile omamakelo omadhigu ngoka tage ke ya adha. — 1 Kor. 3:12-15.

12. Ongiini pompito yimwe omutima gwaDavid gwa li gwa topoka, niilanduliko oya li yini?

¹² MEpisalomi 86:11 otamu adhika uutumbulilo wa simanenena, tawu ti: “Hanganitha omutima gwandje” (NW). Omukwaniilwa David okwa li a nwethwa mo a nyole oohapu ndhoka. Monkalamwenyo ye, okwa li a mono nkene oshipu okweetha omutima gwe gwu kale gwa topoka. Oshikando shimwe, manga a li kontala yongulu ye, okwa mono omukulukadhi gwomusamane gulwe ti iyogo. Mbela pompito mpono omutima gwaDavid ogwa li gwa hangana nenge ogwa li gwa topoka? David okwa li e shi omuthikampango gwaJehova ngoka tagu ti: “Ino haluka omukiintu gwamukweni.” (Eks. 20:17) Ihe nando ongawo, okwa tsikile owala oku mu tala. Omutima gwaDavid ogwa li gwa topoka, nokwe etha okahalu hoka a li e nine Batseba ke mu pangele, pehala lyokuvulika kuJehova. Nonando David okwa kala ethimbo ele e hole Jehova nohe mu tila, okwi igandja kokahalu. Pompito ndjoka, okwa ningi iinima iiwinayi noonkondo, e ta nyatekitha edhina lyaJehova. Okwe etele wo aantu kaaye na ondjo oshiponga, nokwa etele yaandjawo uudhigu uunene. — 2 Sam. 11:1-5, 14-17; 12:7-12.

13. Otu shi shi ngiini kutya omutima gwaDavid ogwa ka kala ishewe gwa hangana?

¹³ David okwa li a geelwa kuJehova, nokwa ka kala ishewe e na ekwatathano ewanawa naye. (2 Sam. 12:13; Eps. 51:2-4, 17) David okwa li a dhimbulukwa uupyakadhi nosho wo eyeme ndyoka e etitha, sho e etha a kale e na omitima mbali. Oohapu dhe ndhoka dhi li mEpisalomi 86:11, otadhi vulu wo okutolokwa ngeyi: “Kwathela ndje ndaa kale nomitima mbali.” Mbela Jehova okwa li ngaa a kwathele David kaa kale we nomitima mbali? Eeno, molwaashoka lwanima Ombiimbeli oya ka popya kutya David omulumentu ngoka e hole Jehova Kalunga ‘nomutima gwe aguhe.’ — 1 Aak. 11:4; 15:3, yelekanitha NW.

14. Oshike tu na okwiipula, nomolwashike?

¹⁴ Oshiholelwa shaDavid oshi li elondodho, notatu vulu okwiilonga ko oshindji. Eyono lye lya kwata miiti, oli li elondodho kaapiya yaKalunga kunena. Kutya nduno moshili otwa ninga mo omimvo ngapi, atuheni otu na okwiipula epulo ndika tali ti: ‘Mbela ohandi kondjitha ngaa oonkambadhala dhaSatana dhokuningitha ndje ndi kale ndi na omitima mbali?’

15. Etilokalunga otali vulu ngiini oku tu gamena komathano ngoka haga pendutha omahalo ga puka?

 ¹⁵ Oho kala wu uvite ngiini ngele owa mono ethano kotiivii nenge kointaneta tali vulu okupendutha omahalo ga puka? Otashi vulika shi kale oshipu tu ipopile kutya shoka twa tala kashi shi lelalela omathano giipala. Ihe mbela oshinima shoka Satana ita vulu oku shi longitha e tu ningithe tu kale tu na omitima mbali? (2 Kor. 2:11) Omathano ngoka tashi vulika wa mono kotiivii nenge kointaneta, otaga vulu okufaathanithwa noshiyela shoka omuntu ha longitha a tandule endangalati. Tango omuntu oha dhengele oshiyela mendangalati, opo nduno sho oshiyela tashi ende tashi ningine mo, endangalati ohali tanduka pokati. Omathano ngono haga kala kotiivii nenge kointaneta otaga vulu okufaathanithwa nondungu ya honga yoshiyela shoka. Oshinima shoka hashi kala sha fa okanima okashona petameko, notashi monika sha fa itaashi eta uupyakadhi, mokweendela ko kwethimbo, otashi vulu okuningitha omuntu a yone kuJehova. Onkee ano, kala kokule nakehe shoka tashi vulu okupendutha omahalo ga puka momutima gwoye. Kaleka omutima gwoye gwa hangana nohagu tila Jehova.

16. Uuna tatu makelwa tu ninge sha sha puka, omapulo geni tu na okwiipula?

¹⁶ Kakele komathano ngoka haga pendutha omahalo ga puka, Satana oha longitha iinima oyindji e tu makele. Otatu ki inyenga ngiini? Oshipu okudhiladhila kutya iinima mbika inayi puka naanaa muyo yene. Pashiholelwa, otashi vulika tu dhiladhile tatu ti: ‘Oshinima shino itashi vulu okukonditha ndje, onkee osha yela kutya inashi kwata miiti.’ Okudhiladhila kwa tya ngawo okwa puka lela. Otashi ka kala pandunge tu kale hatu ipula omapulo ngaashi: ‘Mbela Satana ota longitha oshinima shika a ningithe ndje ndi kale ndi na omitima mbali? Ngele ondi iyethele momahalo ga puka, mbela shoka itashi ka nyatekitha edhina lyaJehova? Mbela ngele oshinima shino onde shi ningi, otashi ka hedhitha ndje ngaa popepi naKalunga, nenge otashi ka kaleka ndje owala  kokule naye?’ Otwa pumbwa lela okukala hatu tedhatedha kombinga yomapulo ngoka. Galikana wu pewe uunongo, wu vule okuyamukula omapulo ngoka paushili nopwaa na okwiifundjaleka. (Jak. 1:5) Ngele osho twa kala hatu ningi, nena otatu ki igamena. Otashi ke ku kwathela wo kuu iyethele momamakelo ngaashi Jesus sho a ti: “Za po, Satana.” — Mat. 4:10.

17. Omolwashike kaatu na okukala nomitima mbali? Shi thaneka.

¹⁷ Kashi shi oshiwanawa nando okukala tu na omitima mbali. Dhiladhila ando kosipana yuudhano, ndjoka yi na aantu ihaaya longele kumwe. Yamwe oyi ihalela owala esimano, yamwe inaya hala okudhana shi ikolelela koompango dhuudhano, noyendji oya dhina omudheuli gwawo. Osipana ya tya ngawo, kayi na esiku yi ka sindane. Mepingathano naashono, ohashi kala oshipu kosipana ndjoka ya hangana, yi sindane. Omutima gwoye otagu vulu okukala gwa fa osipana ndjoka hayi pondola, ngele omadhiladhilo goye, omahalo goye nomaiyuvo goye ohaga kala metsokumwe nehalo lyaJehova. Dhimbulukwa kutya Satana ota ka kala a nyanyukwa ngele otu na omitima mbali. Okwa hala omadhiladhilo goye, omahalo goye nomaiyuvo goye ga kale ge li ompinge nomithikampango dhaJehova. Ihe opo wu longele Jehova, tango omutima gwoye ogwu na okukala gwa hangana. (Mat. 22:36-38) Ino etha nando Satana e ku ningithe wu kale wu na omitima mbali.

18. Shi ikolelela kuMika 4:5, owa tokola toko okuninga shike?

¹⁸ Galikana kuJehova ngaashi David, ‘a hanganithe omutima gwoye nowu tile edhina lye.’ Shi ninga elalakano kehe esiku wu kale metsokumwe negalikano ndyoka. Shi ulika kehe esiku, okupitila momatokolo goye omanene nomashona, kutya owa simaneka noonkondo Jehova. Ngele osho wa ningi, wu li Onzapo yaJehova, nena oto ka kaleka po edhina ewanawa lyaJehova. (Omayel. 27:11) Kungawo, atuheni, ngaashi omuhunganeki Mika, otatu ka vula okutya: “Otatu ka enda medhina lyaJehova Kalunga ketu, aluhe sigo aluhe.” — Mika 4:5, NW.