ATUHENI otwi itaala kutya Jehova ota wilike nokupalutha oshigwana she pambepo “momasiku gahugunina.” (2 Tim. 3:1, NW) Kapu na omalimbililo kutya okuvulika kuJehova okwi ikolelela komuntu mwene. Otatu vulu okuyelekanitha onkalo yetu noyAaisraeli, sho ya li mombuga. Oya li ye na okuvulika komahiko gomankuma.

Jehova okwa li a lombwele Moses a hambulithe omankuma gaali goshisiliveli ‘gokwiithana egongalo li gongale nosho wo li tembuke mo montanda.’ (Num. 10:2) Aayambi oya li ye na okuhika omankuma momikalo dha yoolokathana, opo aantu ya tseye shoka ye na okuninga. (Num. 10:3-8) Kunena oshigwana shaKalunga ohashi mono omalombwelo momikalo dhi ili nodhi ili. Natu ka taleni komikalo ndatu ndhoka tadhi tu dhimbulukitha okuhikwa kwomankuma pethimbo lyonale. Omikalo ndhoka ndatu ongaashi, okuhiwa kwetu kiigongi iinene, okudheulwa kwaakuluntugongalo nosho wo omalunduluko ngoka haga ningwa mehangano.

Uuna Jehova a li a hala “egongalo alihe” li gongale posheelo shokuuzilo shetsalihangano, aayambi oya li haya hiki omankuma. (Num. 10:3) Omazimo agehe gomoongundu ne, ngoka ga li gu unga ontanda momudhingoloko gwetsalihangano oga li hage ga uvu. Mboka ya li yu unga oontanda popepi nosheelo shetsalihangano otashi vulika ya li haya thiki po nziya. Yamwe mboka ye li kokule otashi vulika sha li hashi ya pula ethimbo noonkambadhala dha gwedhwa po, opo ya thike po. Kutya nduno oya li haya zi kokule nenge popepi, Jehova okwa li a hala ayehe ya gongale noyu uve omalombwelo ge.

Kunena ihatu gongala petsalihangano, ihe ohatu hiywa kiigongi yoshigwana shaKalunga. Iigongi mbika oya kwatela mo iigongi yoshitopolwa nayilwe yi ikalekelwa, mpoka hatu pewa uuyelele nomalombwelo ga simanenena. Muuyuni awuhe, oshigwana shaKalunga ohashi nyanyukilwa iigongi mbyoka. Onkee ano, ayehe mboka haya taamba ko ehiyo ya kale piigongi mbyoka, ohaya kala ya nyanyukwa. Yamwe ohaye ende iinano iile ye vule ooyakwawo. Nonando ongawo, mboka haye ya ko ohaye shi zimine kutya ohashi ya etele uuwanawa owundji.

Ongiini kombinga yaamboka haya zi komahala gokokule? Iikwaelektronika yoshinanena, oye shi ningitha tashi wapa, opo oyendji yomaamwatate naamwameme mboka nayo ya vule okumona mo uuwanawa nokukala nokuli yu uvite ya gongala pamwe nooitaali ooyakwawo piigongi mbyoka. Pashiholelwa, oshikando shimwe sho omumwatate gumwe a za koombelewa dhetu oonene, a li ta talele po oshitayimbelewa shaBenin, aamwatate oya li ya ningi omalongekidho, opo aamwatate naamwameme mboka haya zi moArlit, okandoolopa moka mu na oomina ke li moNiger mombuga  yaSahara, ya vule okutala opolohalama ndjoka. Aamwatate naamwameme 21 nosho wo mboka ye na ohokwe, oya li ya gongala. Nonando oya li koshitopolwa shokokule, oya li yu uvite ya gongala pamwe nooitaali ooyakwawo, 44 131. Omumwatate gumwe okwa nyola a ti: “Tangi unene sho mwe shi ningi tashi wapa, opo tu vule okutala opolohalama ndjika. Oye tu ulukila nkene mu na ko nasha natse shili.”

Uuna aayambi Aaisraeli ya hiki enkuma limwe alike, “aawiliki yomazimo” oya li ye na okugongala petsalihangano. (Num. 10:4) Mpoka opo Moses a li he ya pe uuyelele nedheulo. Shoka osha li tashi ke ya kwathela ya gwanithe po iinakugwanithwa yawo momazimo gawo. Ando ngoye owa li gumwe gwomaawiliki mboka, mbela ando ino ninga kehe shoka to vulu okuninga, opo wu kale po nowu mone mo uuwanawa?

Kunena aakuluntugongalo kaye shi “aawiliki” noihaya pangele oshigunda shoka ya pewa kuKalunga. (1 Pet. 5:1-3) Ihe ohaya ningi ngaashi taya vulu ye shi tonatele. Onkee ano, ohaya taamba ko nenyanyu ehiyo lyoku ka pewa edheulo lya gwedhwa po, ngaashi uuna ya hiywa kOsikola yUukalele wUukwaniilwa. Kosikola hoka ohaya longwa nkene ye na okuungaunga nawa niinima yegongalo. Omolwedheulo ndyoka, aakuluntugongalo naamboka haya tonatele megongalo, ohaya vulu okuhedha popepi naJehova. Nokuli nando ino hita yimwe yomoosikola ndhoka, otashi vulika ho mono uuwanawa okupitila mwaamboka ya li ko.

Omathimbo gamwe aayambi Aaisraeli oya li haya hiki omankuma momadhengo omafupi. Shoka osha li hashi ulike kutya Jehova okwa hala ontanda ayihe yi tembuke. (Num. 10:5,6) Uuna ontanda ayihe tayi tembuka, osha li hashi ningwa momukalo gu unganekwa, ihe osha li shi na iilonga oyindji. Yamwe omathimbo gamwe otashi vulika ya li haya kala ye shi limbililwa. Omolwashike mbela?

Otashi vulika yamwe ya li ye uvite kutya okutembuka okwa ninga okundji unene nohaku ningwa ombadhilila. “Momasiku gamwe oshikogo osha kala owala okuza ongulohi sigo ongula.” Omathimbo gamwe, osha li hashi kala ‘omasiku gaali, omwedhi nenge ethimbo ele,’ inaashi yeluka. (Num. 9:21, 22) Mbela ontanda oya li ya tembuka iikando ingapi? Numeri ontopolwa 33, oya popya omahala 40 lwaampono moka Aaisraeli ya li yu ungu oontanda.

Omathimbo gamwe, otashi vulika Aaisraeli yamwe ya li haya ungu ontanda mpoka pu na omuzile. Shoka oshi shi okuuviwa ko, molwaashoka oya li ‘mombuga onene nontilithi.’ (Deut. 1:19) Onkee shoka otashi vulika sha li hashi ya ningitha ya dhiladhile kutya itashi ka kala pandunge ngele oya tembuka ishewe.

Uuna ya tameke okutembuka, otashi vulika sha li hashi kala oshidhigu kuyamwe okutegelela olufo lwawo lwokutembuka lu thike. Ayehe oya li hayu uvu omankuma taga dhengwa momadhengo omafupi, ihe ayehe kaya li taya vulu okutembuka oshita. Uuna omankuma taga hikwa momadhengo omafupi, osha li hashi kala endhindhiliko kutya ezimo lyaJuda, Issaskar nolyaSebulon, ngoka ge li kuuzilo, naga tembuke. (Num. 2:3-7; 10:5, 6) Ngele ga tembuka, aayambi oya li haya hiki omankuma taga hikwa momadhengo omafupi oshikando oshitiyali, shoka sha li hashi ulike kutya ezimo etitatu lyokuumbugantu oli na okutembuka. Aayambi oya li haya tsikile okuninga ngawo sigo ontanda ayihe ya tembuka.

Otashi vulika ho mono oshidhigu okutaamba ko omalunduluko gamwe gehangano. Otashi vulika wo ho kala wu uvite kutya omalunduluko ogendji unene. Nenge tashi vulika iinima yimwe ihoo kala wa hala yi lunduluke nowa hala yi kale ngaashi ya kala. Kutya nduno etompelo lyoye olini, otashi vulika shi kale oshidhigu oku ga igilila. Ihe ngele otwa kala hatu vulika, otatu ka mona kutya elunduluko ndyoka oli lile po uuwanawa wetu nonokutya Kalunga okwe tu hokwa.

Pethimbo lyaMoses, Jehova okwa li a wilike aalumentu, aakiintu nosho wo aanona mombuga. Ando okwa li inee ya tonatela noku ya wilika, ando inaya hupa. Kunena Jehova ohe tu wilike tu idhidhimikile omasiku ngaka omadhigu. Ohe tu kwathele tu hedhe popepi naye notu kale neitaalo lya kola. Onkee ano, atuheni natu kale twa tokola toko tu vulike kehiko lyomankuma gi ili nogi ili, ngaashi Aaisraeli aadhiginini ya li ya ningi.