Oovelise ndhoka otadhi popi omaukwatya omugoyi ngoka Omukriste a pumbwa okukala e na. Otadhi ti: “Iiyimati yOmbepo oyo mbika: ohole, enyanyu, ombili, eidhidhimiko, uukuume, uuwanawa, [eitaalo, engungumano neipangelo, NW].” Ihe ngaka hago owala omaukwatya omawanawa ngoka ombepo yaKalunga tayi vulu oku tu kwathela tu kokeke.

Ndhindhilika shoka omuyapostoli Paulus a popi moovelise dha tetekele. Okwa ti: “Iilonga yuuhalu wopantu oyi igalala. Aantu oye hole uuholume, iipala nuukeeneidhiliko, otaa simaneke iimenka notaa longo muumpulile. Oyo otaa tondathana, otaa tamanana, otaa silathana efupa, otaa geelathana notaa kotokelathana. Oyo otaa topoka moongundu nomiimpaga. Oye na uukodhi, uunkolwi nuufukedhi niinima iikwawo ya fa mbika.” (Gal. 5:19-21) Osha yela kutya mAakolossa 3:5, Paulus ina tumbula iinima ayihe mbyoka yi li “iilonga yuuhalu wopantu”. Sha faathana, konima yokupopya omaukwatya omugoyi ngoka omawanawa, okwa ti: “Kaku na nando ompango ya tsa ondumbo niinima mbika.” Ano Paulus ka li ta kambadhala okupopya omaukwatya agehe omawanawa ngoka tatu vulu okukokeka kekwatho lyombepo ondjapuki.

Shoka otatu shi uvu ko owala ngele otwa yelekanitha iiyimati yombepo noshiyimati shuuyelele shoka Paulus a li a popi kombinga yasho, sho a nyolele egongalo lyokuEfeso, a ti: “Uuyelele owo otau eta eteyo olindji ngashika uuwanawa, uuyuuki noshili.” (Ef. 5:8, 9) Eeno, “uuwanawa” pamwe nuuyuuki noshili, owu li oshitopolwa ‘shoshiyimati shuuyelele,’ ihe owu li wo oshitopolwa ‘shiiyimati yombepo.’

Paulus okwa li wo a ladhipike Timoteus a ‘lalakanene uuyuuki, esimanekokalunga, eitaalo, ohole, eidhidhimiko nombili,’ ngoka ge li omaukwatya gahamano omawanawa. (1 Tim. 6:11) Gatatu owala gomugo, (eitaalo, ohole nombili) ge li momusholondondo gwiiyimati yombepo. Timoteus okwa li wo a hala ombepo ondjapuki yi mu kwathele a kokeke omaukwatya galwe ngoka ga popiwa, ngaashi uuyuuki, esimanekokalunga neidhidhimiko. — Yelekanitha Aakolossa 3:12; 2 Petrus 1:5-7.

Onkee ano, Aagalati 5:22, 23, itaya popi omaukwatya agehe ngoka Aakriste ye na okukokeka. Ombepo yaKalunga otayi vulu oku tu kwathela tu kokeke omaukwatya omugoyi ngoka ge li “iiyimati yOmbepo.” Ihe opu na omaukwatya ogendji ngoka twa pumbwa okukokeka, opo tu kale tu na ekwatathano ewanawa naJehova notu ‘zale omuntu omupe ngoka a shitwa a fa Kalunga nohi iholola ye mwene mokukalamwenyo ku uka nokwa yapuka.’ — Ef. 4:24.