OSHITOPOLWA SHOKUKONAKONWA 25
“Ongame mwene tandi ka konga oonzi dhandje”
“Ongame mwene tandi ka konga oonzi dhandje noku dhi sila oshimpwiyu.” — HES. 34:11.
EIMBILO 105 “Kalunga oye ohole”
ELALAKANO LYOSHITOPOLWA *
1. Omolwashike Jehova ti iyelekanitha nomuvalakadhi?
“OPE na tuu omwali ta dhimbwa okahanona ke?” Epulo ndyoka olya pulilwe kuJehova pethimbo lyomuhunganeki Jesaja. Kalunga okwa li a lombwele oshigwana she, a ti: “Nonando nee yina a dhimbwe omwana, ngame itandi ku dhimbwa.” (Jes. 49:15) Haaluhe Jehova hi iyelekanitha nomuvalakadhi. Nonando ongawo, pompito ndjoka okwa li e shi ningi. Jehova okwa li a longitha ekwatathano ndyoka hali kala pokati komuvalakadhi nomwana, u ulike nkene e hole aapiya ye noonkondo. Aavalakadhi oyendji otashi vulika ya kale yu uvite ngaashi omumwameme gwedhina, Jasmin, ngoka a ti: “Uuna to lele okamwoye, ohamu kokeke ekwatathano lyopothingo ndyoka hali kala po onkalamwenyo yeni ayihe.”
2. Jehova oha kala u uvite ngiini, uuna gumwe gwomaapiya ye ini ipyakidhila we?
2 Jehova oha kala e shi wete, uuna gumwe gwomaapiya ye e etha po okweendathana negongalo nosho wo okuya muukalele. Ohashi mu uvitha lela nayi, uuna e wete aapiya ye oyendji omumvo kehe, inaayi ipyakidhila we. *
3. Jehova okwa hala mboka inaayi ipyakidhila we ya ninge shike?
3 Oyendji yomaamwatate naamwameme mboka ya li inaayi ipyakidhila we, ohaya galukile kegongalo nohatu ya taamba ko nenyanyu. Jehova okwa hala ya galuke, natse osho twa hala. (1 Pet. 2:25) Ongiini tatu vulu oku ya kwathela? Manga inaatu yamukula epulo ndyoka, oshi li nawa tu tseye kutya omolwashike yamwe yomuyo ye etha po okuya kokugongala nokuya muukalele.
OMOLWASHIKE AAUVITHI YAMWE HAYE ETHA PO OKULONGELA JEHOVA?
4. Oshike hashi ningilwa yamwe mboka ya tala ko iilonga yawo yokwiikongela ombolo oyo ya simanenena?
4 Yamwe oye etha iilonga yawo yokwiikongela omboloto, oyo yi kale ya simanenena monkalamwenyo yawo. Omumwatate Hung, * ngoka ha zi kUumbangalantuzilo waAsia, okwe shi zimine, a ti: “Onda li handi longitha ethimbo olindji noonkondo dhandje odhindji kiilonga. Ondi ipopile tandi ti kutya ngele onda kala ndi na iimaliwa oyindji, otashi ka kala oshipu kungame ndi longele Jehova. Onkee ano, onda kala handi longo oowili odhindji lela kiilonga. Onda tameke okufaula okugongala, nokonima yethimbo onde etha po thiluthilu okweendathana negongalo. Satana oha longitha uuyuni wu piyaganeke aantu, opo mokweendela ko kwethimbo ye ethe po okulongela Jehova.”
5. Omumwameme gumwe okwi inyenge ngiini, sho a li a taalelwa komaupyakadhi?
5 Aamwatate naamwameme yamwe oya gwililwa po komaupyakadhi. Omumwameme Anne, ngoka a za koBritania, e na aanona yatano, okwa ti: “Gumwe gwomaamwandje okwa valwa oshilema. Mokweendela ko kwethimbo, gumwe gwomaamwandjekadhona okwa kondwa, nomumwandjemati gumwe okwa kwatwa komukithi gwopamadhiladhilo. Onda kwatwa kepolimano, nonde etha po okuya kokugongala nomuukalele. Lwanima, onda kala inaandi ipyakidhila we.” Otu uvitile olukeno omumwameme Anne noyaandjawo nosho wo yamwe mboka ya taalelwa komaupyakadhi ga fa mpoka.
6. Ongiini okwaatula miilonga Aakolossa 3:13, taku vulu okuningitha gumwe e ethe po okulongela Jehova?
6 Lesha Aakolossa 3:13. Yamwe yomaapiya yaJehova otashi vulika yu uvithwa nayi kooitaali ooyakwawo. Omuyapostoli Paulus okwe shi zimine kutya omathimbo gamwe, otashi vulika tu ‘ningathane’ nomumwatate nenge nomumwameme. Otashi vulika nokuli tu ungaungiwe natse kaashi li pauyuki. Ngele inatu kotoka, otashi vulika tu mu kwatele onkone. Ngele omuntu oku uvithwa nayi, lwanima otashi vulika e ethe po okulongela Jehova. Natu taleni koshimoniwa shomumwatate Pablo, gwokuAmerika lyokUumbugantu. Okwa li a lundilwa kutya okwa yona, shoka she mu kanithitha uuthembahenda wontumba megongalo. Okwa li i inyenge ngiini? Okwa ti: “Onda geye, nomokweendela ko kwethimbo, onde etha po okulongela Jehova.”
7. Oshike tashi vulu okuningilwa omuntu ngoka e na eiyuvo tali mu nyenyetele?
7 Omuntu ngoka a yona ompango yaKalunga monakuziwa, otashi vulika eiyuvo lye li kale tali mu nyenyetele, e ta kala u uvite inaa gwana we okukala e holike kuKalunga. Nonando okwi iyela ombedhi, natango otashi vulika a kale e wete inaa gwana we okukala gumwe gwomaapiya yaKalunga. Omumwatate gwedhina Franscisco, osho a li e uvite ngawo. Okwa ti: “Onda li nda geelwa, omolwoluhondelo. Nonando petameko onda tsikile nokuya kokugongala, onda kwatwa kepolimano nonda kala ndu uvite inaandi gwana we okukala gumwe gwomaapiya yaJehova. Eiyuvo lyandje olya kala tali nyenyetele ndje, nonda li nda tompwa kutya Jehova ina dhimina ndje po. Lwanima, onde etha po okuuvitha nokuya kokugongala.” Owu uvitile ngiini aamwatate naamwameme mboka haya taalelwa koonkalo dha fa ndhoka twa zi nokukundathana? Mbela oho kala wu ya uvitile uukwawo wanankali? Shoka sha simanenena, mbela Jehova oha kala e ya uvitile ngiini?
JEHOVA OKU HOLE OONZI DHE
Omusita Omuisraeli okwa li e na ko nasha noonkondo nonzi ndjoka ya kana (Tala okatendo 8-9) *
8. Mbela Jehova oha dhimbwa mboka ye mu longela? Shi yelitha.
8 Jehova iha dhimbwa mboka ya li haye mu longele nale, e taye etha po pakathimbo oku shi ninga noiha dhimbwa wo iilonga mbyoka ye mu longela. (Heb. 6:10) Omuhunganeki Jesaja okwa nyola kombinga yeyele ewanawa, ndyoka tali ulike nkene Jehova ha sile oshimpwiyu aapiya yaye. Okwa ti: “Ongomusita ta litha oshigunda she; oonzigona ote dhi gongele pamwe noku dhi humbata momaako ge.” (Jes. 40:11) Omusita Omunene, Jehova, oha kala u uvite ngiini ngele yimwe yomoonzi dhe ya kana mo moonkwawo? Jesus okwa holola nkene Jehova ha kala u uvite, sho a pula aalongwa ye, a ti: “Otamu ti ngiini? Ngele omuntu e na oonzi ethele limwe, ihe yimwe yomudho tayi kana, ita thigi po ando ndhoka omilongo omugoyi nomugoyi koondundu, a ka konge ndjiyaka ya kana? Ihe ngele e yi mono, otandi mu lombwele, oye te yi nyanyukilwa noonkondo shi vule ndhoka omilongo omugoyi nomugoyi dha li inaadhi kana.” — Mat. 18:12, 13.
9. Aasita aawanawa yopethimbo lyonale oya li haya ungaunga ngiini noonzi dhawo? (Tala ethano lyokombanda.)
9 Omolwashike tatu vulu okuyelekanitha Jehova nomusita? Omolwaashoka pethimbo lyonale, omusita omwaanawa okwa li ha kala e na ko nasha lela noonzi dhe. Pashiholelwa, David okwa li a kondjo nonkoshi nosho wo nemwanka, a gamene oonzi dhe. (1 Sam. 17:34, 35) Omusita omwaanawa ohe shi mono mo nziya uuna onzi yimwe ya kana. (Joh. 10:3, 14) Omusita ngoka ohe edhilile oonzi ndhoka 99 moshigunda nenge e dhi thigile aasita ooyakwawo, e ta ka konga ndjoka ya kana. Jesus okwa longitha eyele ndjoka e tu longe oshili ya simana, a ti: “Kali shi ehalo lyaHo megulu, ku kane nando okamwe kaambuka uushona.” — Mat. 18:14.
Omusita muIsraeli shonale ta sile oshimpwiyu onzi ndjoka ya li ya kana (Tala okatendo 9)
JEHOVA OHA KONGO OONZI DHE
10. Shi ikolelela kuHesekiel 34:11-16, Jehova oku uvaneka a ningile shike oonzi dhe ndhoka dha kana?
10 Jehova oku hole kehe gumwe gwomutse, mwa kwatelwa naamboka ‘aashona’ ya li ya kana mo moshigunda she. Kalunga okwa li u uvaneka okupitila momuhunganeki Hesekiel kutya ota ka konga oonzi dhe ndhoka dha kana noku dhi kwathela dhi kale ishewe dhi na ekwatathano ewanawa naye. Okwa popya shoka ta ka ninga e dhi galulile kuye, ngaashi owala omusita Omuisraeli a li ha ningi, uuna onzi ye yimwe ya kana. (Lesha Hesekiel 34:11-16.) Tango, omusita oha kongo onzi ndjoka ya kana, shoka tashi vulika shi pule ethimbo noonkambadhala odhindji. Opo nduno ngele e yi mono, ohe yi eta koonkwawo. Shimwe ishewe, ngele oye ehamekwa nenge ya sa ondjala, ohe yi kwathele pahole mokumanga iilalo yayo, moku yi humbata po noku yi pa iikulya. ‘Aasita yoshigunda shaKalunga’ oya pumbwa okuninga sha faathana, ya kwathele kehe gumwe ngoka ini ipyakidhila we. (1 Pet. 5:2, 3) Aakuluntugongalo ohaye ya kongo, ohaye ya kwathele ya galukile kegongalo noku yu ulukila ohole, moku ya kwathela ya kale ishewe ye na ekwatathano ewanawa naJehova. *
11. Omusita omwaanawa oha kala e shi shike?
11 Omusita omwaanawa oha kala e shi kutya oonzi ohadhi vulu okukana. Ngele onzi oya kana mo moonkwawo, omusita ka li he yi geele. Natu taleni koshiholelwa shoka Kalunga a tula po, sho a li ta kwathele yamwe yomaapiya ye, mboka ya li ye etha po oku mu longela uule wokathimbo.
12. Jehova okwa li a ungaunga ngiini naJona?
12 Omuhunganeki Jona okwa li a fadhuka po oshinakugwanithwa she. Nonando ongawo, Jehova ka li e mu si uunye. Ngaashi omusita omwaanawa, Jehova okwe mu hupitha nokwe mu kwathele a kale ishewe e na oonkondo dhokugwanitha po oshinakugwanithwa she. (Jona 2:7; 3:1, 2) Lwanima, Kalunga okwa longitha oshiholelwa sholumono a kwathele Jona a uve ko kutya omwenyo gwomuntu ogu na ongushu. (Jona 4:10, 11) Oshiilongomwa oshini? Aakuluntugongalo kaye na okusa uunye mboka inaayi ipyakidhila we. Pehala lyaashono, oye na okukambadhala yu uve ko shoka she ya ningitha ya kale inaayi ipyakidhila we. Uuna onzi ya galukila kuJehova, aakuluntugongalo oye na okutsikila oku yi ulukila ohole nosho wo kutya oye na ko nasha nayo.
13. Oshike tatu vulu okwiilonga kunkene Jehova i inyenge, sho a li tu ungaunga nomunyoli gwEpisalomi 73?
13 Omunyoli gwEpisalomi 73, okwa li a teka omukumo, sho e wete aakolokoshi ya fa taye shi enditha nawa. Okwa li ti ipula ngele okulonga ehalo lyaKalunga oku na ngaa uuwanawa washa. (Eps. 73:12, 13, 16) Jehova okwa li i inyenge ngiini? Ka li e mu pangula. Ihe oohapu dhomupisalomi ngoka okwe dhi nyolitha mOmbiimbeli. Lwanima, omupisalomi okwa ka mona kutya ekwatathano ewanawa naJehova olya simanenena, li vule kehe shimwe. (Eps. 73:23, 24, 26, 28) Oshiilongomwa oshini? Aakuluntugongalo kaye na okupangula meendelelo mboka haya tameke okukala ye na omaipulo, ngele okulongela Jehova oku na ngaa uuwanawa washa. Pehala lyoku ya pangula, aakuluntugongalo oye na okuuva ko kutya omolwashike hayi ipula ngawo nohaya ningi iinima momukalo ngoka. Kungawo opo owala taya vulu okulongitha Ombiimbeli ye ya ladhipike.
14. Omolwashike Elia a li a pumbwa ekwatho, nongiini Jehova e mu kwathele?
14 Omuhunganeki Elia okwa li a yi omukwaniilwakiintu, Isabel, ontuku. (1 Aak. 19:1-3) Okwa li ta dhiladhila kutya kapu na we gumwe ta longele Jehova e li omuhunganeki, nokwa li e wete kutya iilonga ye osima yowala. Elia okwa kwatwa kepolimano, e ta kala a hala a se. (1 Aak. 19:4, 10) Pehala lyoku mu pangula, Jehova okwe mu shilipaleke kutya ke li oye awike, ota vulu okwiinekela moonkondo Dhe, nonokutya oku na iilonga oyindji mbyoka e na natango okulonga. Jehova okwa pulakene neitulomo kwaashoka Elia a li ti ipula nasho nokwe mu pe iinakugwanithwa iipe. (1 Aak. 19:11-16, 18) Oshike tatu ilongo mo? Atuheni, unene tuu aakuluntugongalo, otu na okuungaunga noonzi dhaJehova nolukeno. Kutya nduno omuntu okwa geya, nenge oku uvite kutya Jehova ite ke mu dhimina po, aakuluntugongalo otaya ka pulakena kuye neitulomo, sho te ya mbumbulile omutima gwe. Opo nduno otaye ke mu shilipaleka kutya Jehova oku mu hole.
OTU NA OKUKALA TU UVITILE NGIINI OONZI DHAKALUNGA NDHOKA DHA KANA?
15. Shi ikolelela kuJohannes 6:39, Jesus okwa li a tala ko ngiini oonzi dhaHe?
15 Jehova okwa hala tu kale tu uvitile ngiini oonzi dhe ndhoka dha kana? Jesus okwe tu tulila po oshiholelwa. Okwa li e shi kutya oonzi adhihe dhaJehova, odhi na ongushu momeho gaKalunga. Onkene, okwa ningi ashihe shoka ta vulu a kwathele ‘oonzi ndhoka dha kana dhomuIsraeli,’ dhi galukile kuJehova. (Mat. 15:24; Luk. 19: 9, 10) E li omusita omwaanawa, okwa longo nuudhiginini, opo kaa kanithe nando onzi yimwe yaJehova. — Lesha Johannes 6:39.
16-17. Aakuluntugongalo oye na okukala yu uvite ngiini kombinga yokukwathela mboka inaayi ipyakidhila we? (Tala oshimpungu “ Nkene onzi ndjoka ya kana tashi vulika yi kale yu uvite.”)
16 Omuyapostoli Paulus okwa li a ladhipike aakuluntugongalo yomuEfeso, ya holele oshiholelwa shaJesus. Okwe ya lombwele a ti: ‘Omu na okukwathela, aankundi. Dhimbulukweni oohapu ndhoka Omuwa Jesus mwene e dhi popi, sho a ti: “Okugandja oku na elago ku vule okutaamba.”’ (Iil. 20:17, 35) Osha yela kutya aakuluntugongalo kunena oye na oshinakugwanithwa shi ikalekelwa shokusila oshimpwiyu oshigwana shaKalunga. Omukuluntugongalo gwedhina Salvador, ngoka a za koSpania, okwa ti: “Uuna tandi dhiladhila kombinga yankene Jehova e na ko nasha noonzi dhe ndhoka dha kana, ohashi inyengitha ndje ndi ninge ngaashi tandi vulu ndi dhi kwathele. Ondi shi kutya Jehova okwa hala ndi dhi kwathele.”
17 Ayehe mboka ya popiwa moshitopolwa shika ya li inaayi ipyakidhila we, oya li ya kwathelwa ya galukile kuJehova. Ngashingeyi oyendji mboka ya li inaayi ipyakidhila we, oya hala okuninga sha faathana. Oshitopolwa tashi landula otashi ka kundathana uuyelele owundji kombinga yaashoka tatu vulu okuninga tu ya kwathele ya galukile kuJehova.
EIMBILO 139 Kala wa fa wu iwete wu li muuyuni uupe
^ okat. 5 Omolwashike yamwe mboka ya longela Jehova nuudhiginini uule womimvo, haya thigi po egongalo? Kalunga oha kala e yu uvitile ngiini? Oshitopolwa shika otashi ka yamukula omapulo ngoka. Otashi ka kundathana wo shoka tatu vulu okwiilonga kunkene Jehova a li a kwathele yamwe yomaapiya ye yonale, mboka ya li ye etha po oku mu longela uule wokathimbo.
^ okat. 2 OMAUTUMBULILO GA YELITHWA: Omuuvithi ngoka ini ipyakidhila we, oye omuntu ngoka inaa gandja olaporta ye yiilonga yokuuvitha noyokuninga aantu aalongwa, muule woomwedhi hamano nenge dhi vulithe po. Nonando ongawo, mboka inaayi ipyakidhila we, natango oye li aamwatate naamwameme notu ya hole.
^ okat. 4 Omadhina gamwe oga lundululwa.
^ okat. 10 Oshitopolwa tashi landula otashi ka kundathana nkene aakuluntugongalo taya vulu okuninga iinima mbyoka itatu.
^ okat. 60 OMATHANO: Omusita Omuisraeli ngoka e na ko nasha nonzi ndjoka ya kana, okwa li he ke yi konga, e te yi kwathele yi galukile koonkwawo. Kunena aakuluntugongalo nayo osho haya ningi.
^ okat. 64 OMATHANO: Sho omumwameme ngoka ini ipyakidhila we a tegelela ombesa yi ye, okwa mono oonzapo mbali ndhoka tadhi kutha ombinga miilonga yokuuvitha montaneho, dha nyanyukwa.
