1. Shi ikolelela kuPetrus gwotango 5:2, uuthembahenda wuni aakuluntugongalo ye na?

 AAKULUNTUGONGALO oye na okutonatela oonzi dhaJehova dhi na ondilo ndhoka ya inekelelwa. Aalumentu mboka aadhiginini, oya pandula sho Jehova e yi inekelela oshilonga shoka, nohaya longo nuudhiginini, opo ya kale ‘aasita mboka taya sile oshimpwiyu’ oonzi dhe. (Jer. 23:4; lesha 1 Petrus 5:2.) Inatu pandula tuu sho tu na aalumentu ya tya ngawo momagongalo getu!

2. Omamakelo geni tashi vulika aakuluntugongalo yamwe ya taalela?

² Aakuntugongalo ohaya kala ya taalela omaupyakadhi ogendji sho taya longo iilonga yawo. Pashiholelwa, aakuluntugongalo oya pumbwa okulonga nuudhiginini ya sile oshimpwiyu egongalo. Omukuluntugongalo gwedhina Tony, gwokoAmerika, okwiilonga okukala omwiifupipiki uuna tashi ya pokutala kutya iinakugwanithwa yi thike peni e na okutaamba ko. Okwa ti: “Petameko lyo-COVID-19, onda li nda kambadhala okulonga iilonga oyindji yokuunganeka okugongala kwetu akuhe nosho wo iilonga yokuuvitha. Ihe kutya nduno onda ninga shi thike peni, opwa li aluhe iilonga oyindji okulonga. Lwanima, onda kala ihaandi mono we ethimbo lya gwana lyokulesha Ombiimbeli, lyokukonakona paumwene nolyokugalikana.” Omukuluntugongalo gwedhina Ilir, gwomoKosovo, okwa li a taalele omashongo ga yoolokathana. Sho a li moshitopolwa moka mu na iita, osha li oshidhigu kuye okuvulika komalombwelo gehangano. Okwa ti: “Uulaadhi wandje owa li wa makelwa sho oshitayimbelewa sha pula ndje ndi kale handi kwathele aamwatate naamwameme yomoshitopolwa shoka sha nika oshiponga. Onda li nda tila, nelombwelo olya li tali monika lya fa itaali longo.” Tim, omutumwa moAsia, okwa li ha mono oshidhigu okuninga iinima ayihe mbyoka e na okuninga esiku esiku. Okwa ti: “Omathimbo gamwe onda li handi kala ndu uvite nda vulwa noonkondo pamadhiladhilo nopamaiyuvo okusila oshimpwiyu aamwatate naamwameme.” Oshike mbela tashi vulu okukwathela aakuluntugongalo mboka ya taalela omashongo ga fa ngoka?

3. Ongiini atuheni tatu vulu okumona uuwanawa mokukonakona oshiholelwa shOmupanguli Gideon?

 ³ Aakuluntugongalo otaya vulu okwiilonga sha koshiholelwa shOmupanguli Gideon. (Heb. 6:12; 11:32) Okwa li omugameni nosho wo omusita gwoshigwana shaKalunga. (Aatok. 2:16; 1 Ondjal. 17:6) Ngaashi Gideon, aakuluntugongalo oya langekwa po ya sile oshimpwiyu oshigwana shaKalunga, momathimbo omadhigu. (Iil. 20:28; 2 Tim. 3:1) Gideon okwe tu tulila po oshiholelwa oshiwanawa shokukala tu shi omangambeko getu, sheifupipiko noshokuvulika. Okwiidhidhimika kwe, okwa li kwa makelwa sho a li ta gwanitha po iinakugwanithwa ye. Kutya nduno otu li aakuluntugongalo nenge hasho, otatu vulu okwiilonga okukala hatu pandula lela aakuluntugongalo yetu. Otatu vulu okwaambidhidha aalumentu mboka haya longo nuudhiginini. — Heb. 13:17.

4. Gideon okwa li u ulike ngiini kutya omwiifupipiki noku shi omangambeko ge?

⁴ Gideon okwa li omulumentu omwiifupipiki noku shi omangambeko ge. b Sho omuyengeli gwaJehova a lombwele Gideon kutya okwa hogololwa a hupithe oshigwana shaIsraeli miikaha yetangakwiita lyAamidiana enankondo, omulumentu ngoka omwiifupipiki okwe mu yamukula a ti: “Oludhi lwetu kalu na edhina mezimo lyaManasse, nangame mwene omunima gwowala mezimo lyandje.” (Aatok. 6:15.) Okwa li e uvite inaa gwana okupewa oshinakugwanithwa shoka, ihe Jehova oku shi kutya okwa gwana. Kekwatho lyaJehova, Gideon okwe shi pondola mokugwanitha po oshinakugwanithwa she.

5. Uunake tashi vulu okukala oshidhigu komukuluntugongalo u ulike eifupipiko nosho wo omangambeko ge?

⁵ Aakuluntugongalo ohaya ningi ngaashi taya vulu, opo ya kale ye shi omangambeko gawo naaifupipiki miinima ayihe. (Mika 6:8; Iil. 20:18, 19) Ihayi itadhele okupondola nenge okuvula kwawo. Ihaya dhiladhila kutya kaye na oshilonga, molwomapuko ngoka ya ninga. Ihe omathimbo gamwe ohashi kala oshidhigu komukuluntugongalo a kale i ifupipika. Pashiholelwa, otashi vulika a taambe ko iinakugwanithwa oyindji, nopo nduno ta ka mona oshidhigu oku yi gwanitha po. Nenge tashi vulika a pewe uusama, omolwomukalo moka a ungaungile noshinakugwanithwa shontumba nenge a simanekwe, omolwomukalo moka a ungaunga noshinakugwanithwa shilwe. Aakuluntugongalo otaya vulu okwiilonga shike kuGideon shoka tashi ya kwathele moonkalo dha fa ndhoka?

6. Ngele tashi ya pokukala ye shi omangameko gawo, aakuluntugongalo otaya vulu okwiilonga shike kuGideon? (Tala wo ethano.)

 ⁶ Pula ekwatho. Omuntu ngoka e shi omangambeko ge oku shi kutya opu na iinima yimwe mbyoka itaa vulu okuninga. Gideon okwa li e shi omangambeko ge, molwaashoka okwa li ha pula yalwe ekwatho. (Aatok. 6:27, 35; 7:24) Aakuluntugongalo aanandunge ohaya ningi sha faathana. Tony, ngoka a tumbulwa metetekelo, okwa ti: “Omolwomukalo moka nda putudhwa sho nda li okanona, onda li handi taamba ko iilonga oyindji naambyoka itaandi vulu okulonga. Onkee ano, onda tokola mElongelokalunga lyUukwanegumbo ndi kwatele mo oonkundathana kombinga yokukala tu shi omangambeko getu, nonda pula omukulukadhi gwandje kutya ota ti ngiini kwaashoka. Onda talulula wo okavidio ko jw.org, Dheula, inekela nokukoleka yalwe ngaashi Jesus a li ha ningi.” Tony okwa li a tameke okupula yalwe ye mu kwathele ngele e na iilonga oyindji. Oshizemo? Tony okwa ti: “Iilonga yomegongalo oya li ya tameke okukala tayi longwa, nonda li ndi na ethimbo lyokwiipalutha pambepo.”

7. Ongiini aakuluntugongalo taya vulu okuholela Gideon uuna gumwe te ya pe uusama? (Jakob 3:13)

⁷ Ino geya ngele gumwe te ku pe uusama. Oshi li wo eshongo uuna gulwe ta pe aakuluntugongalo uusama. Natango oshiholelwa shaGideon otashi vulu oku ya kwathela. Kapu na omalimbililo kutya okwa li e shi kutya ina gwanenena, sho Aaefraim ya li taye mu pe uusama, okwa kala a ngungumana. (Aatok. 8:1-3) Gideon ine ya yamukula a geya. Okwi ifupipike mokupulakena komanyenyeto gawo nokupopya nayo nohenda. Aakuluntugongalo aanandunge ohaya holele Gideon mokupulakena neitulomo nokuyamukula nombili uuna taya pewa uusama kuyalwe. (Lesha Jakob 3:13.) Kungawo ohaya kwatele po ombili megongalo.

8. Aakuluntugongalo oye na okwiinyenga ngiini ngele gumwe te ya pandula? Gandja oshiholelwa.

⁸ Esimano alihe nali ukithwe kuJehova. Sho yalwe ya li ya pe Gideon esimano, Gideon okwa ti Jehova oye na pewe esimano. (Aatok. 8:22, 23) Ongiini aakuluntugongalo taya vulu okuholela Gideon? Ngele oya pondola sha, esimano otaya vulu oku li pa Jehova. (1 Kor. 4:6, 7) Pashiholelwa, ngele omukuluntugongalo oha pandulwa molwuunkulungu we wokulonga aantu, ota vulu okutya okwa kwathelwa kOohapu dhaKalunga nenge okutya atuheni ohatu longwa owala kehangano lyaJehova. Aakuluntugongalo otaya vulu okudhiladhila ngele ohaya longo ngaa aantu momukalo ngoka tagu simanekitha Jehova nenge ohaye shi ningi owala, opo ya pandike kaantu. Natu ka taleni koshiholelwa shomukuluntugongalo gwedhina Timothy. Sho opo a langekwa po okwa li e hole okugandja iipopiwa yomontaneho. Okwa ti: “Okwa li handi gandja iipopiwa yi na efalomo eleeleka nomaudhi omadhigu. Mupya omunene, aantu oya li haya gandja eitulomo alihe kungame. Omolwoshinima shoka, aapulakeni oya li ya gandja eitulomo kungaye, ihe hakOmbiimbeli nenge kuJehova.” Mokweendelako kwethimbo, Timothy okwa li a mono kutya okwa pumbwa okulundulula omukalo gwe gwokugandja iipopiwa, opo yalwe kaaya gandje we eitulomo kuye. (Omayel. 27:21) Mbela onetompelo lini? Okwa ti: “Aantu oyendji ohaya lombwele ndje nkene iipopiwa yandje ye ya kwathela yi idhidhimikile omaupyakadhi, omashongo noku ya hedhitha popepi naJehova. Ohashi etele ndje enyanyu olindji uuna ndu uvu omatyokosha ngoka, shi vulithe penyanyu ndyoka nda li nda mono sho ya li ya pandula ndje omimvo dha ka pita.”

9. Evuliko nuulaadhi waGideon owa li wa makelwa ngiini? (Tala ethano lyokombanda.)

⁹ Konima sho Gideon a langekwa po e li omupanguli, okuvulika kwe nuulaadhi we owa li wa makelwa. Okwa li a pewa oshinakugwanithwa sha nika oshiponga shokuhanagula po oshiyambelo shahe, shoshikalunga Baal. (Aatok. 6:25, 26) Lwanima, Jehova okwa li a lombwele Gideon iikando iyali kutya na shunithe pevi omwaalu gwetangakwiita lye. (Aatok. 7:2-7) Hugunina, okwa li a lombwelwa  a ponokele ontanda yaatondi ye, mokati kuusiku. — Aatok. 7:9-11.

10. Ongiini evuliko lyomukuluntugongalo tashi vulika li makelwe?

¹⁰ Aakuluntugongalo oye na okukala ‘ye na ehalo lyokuvulika.’ (Jak. 3:17) Omukuluntugongalo ngoka i ifupipika oha kala e na ehalo okuvulika kwaashoka Ombiimbeli tayi popi nokomalombwelo ga za kehangano lyaKalunga. Kungawo ota tulile po yalwe oshiholelwa oshiwanawa. Ihe otashi vulika shi kale oshidhigu kuye okuvulika. Pashiholelwa, otashi vulika a mone oshidhigu okutula miilonga omalombwelo ngono a pewa. Poompito dhimwe otashi vulika a kale ta pula ngele elombwelo lyontumba oli li ngaa pandunge. Nenge tashi vulika a pewe oshinakugwanithwa shoka tashi vulu oku mu mangitha po. Aakuluntugongalo otaya vulu ngiini okuholela evuliko lyaGideon moonkalo dha fa ndhoka?

11. Oshike tashi vulu okukwathela aakuluntugongalo ya kale haya vulika?

¹¹ Pulakena neitulomo komalombwelo noku ga tula miilonga. Kalunga okwa li a lombwele Gideon nkene e na okuhanagula po oshiyambelo shahe naampoka pwa li tapu ka tungwa oshiyambelo shaJehova oshipe, nonokutya oshinamwenyo shini tashi ka yambwa. Gideon ka li e na omaipulo shi na ko nasha nomalombwelo ngoka a pewa, pehala lyaashono okwe ga tula miilonga. Kunena Aakuluntugongalo ohaya pewa omalombwelo okuza kehangano lyaJehova okupitila moontumwafo, momatseyitho nosho omalombwelo ngoka hage tu kwathele tu tsikile okukala megameno nokuhedha popepi naJehova. Otu hole aakuluntugongalo sho haya landula ewiliko ndyoka haya pewa kuJehova. Omolwoshinima shono, egongalo alihe ohali mono mo uuwanawa. — Eps. 119:112.

12. Ongiini aakuluntugongalo taya vulu okutula miilonga Aahebeli 13:17, ngele ehangano lyaJehova olye ya lombwele ya lundulule omukalo moka haya ningi iinima?

¹² Kala wu na ehalo okuninga omalunduluko. Dhimbulukwa kutya Jehova okwa li a lombwele Gideon a shunithe aakwiita ye yamwe komagumbo, e tapu kala owala yomwaalu omushona. (Aatok. 7:8) Gideon otashi vulika a li ti ipula ta ti: ‘Elunduluko ndino mbela olya pumbiwa ngaa? Mbela otashi longo ngaa?’ Ihe nando ongawo, Gideon okwa vulika. Aakuluntugongalo kunena ohaya holele Gideon mokuvulika uuna ehangano lye ya lombwele ya ninge sha momukalo gwi ili. (Lesha Aahebeli 13:17.) Pashiholelwa, mo 2014 Olutuwiliki olwa li lwa lundulula omukalo moka Iinyanga yUukwaniilwa noyIigongi yi na okufutwa. (2 Kor. 8:12-14) Omagongalo kage na we okushunitha iimaliwa mbyoka ga hehela. Ihe ngashingeyi ehangano ohali longitha omayambidhidho ngoka ga gandjwa komagongalo muuyuni awuhe gokutungitha Iinyanga yUukwaniilwa noyIigongi mpoka ya pumbiwa, nokuli nando egongalo olya yambidhidha owala kashona. Sho José u uvu elunduluko ndyoka, okwa li a limbililwa ngele otashi ka longa ngaa, ta dhiladhila kutya: ‘Nokuli nOshinyanga shUukwaniilwa shimwe ashike osho ngaa itaashi ka vula okutungwa. Iinima hasho hayi longo ngawo muuyuni mbuka.’ Oshike sha li sha kwathele José a yambidhidhe edhiladhilo lyehangano? Okwa ti: “Oohapu dhomOmayeletumbulo 3:5, 6 odha dhimbulukitha ndje ndi kale ndi inekela  Jehova. Oshizemo osha li oshiwanawa lela. Katwa li twa tungu owala Iinyanga yUukwaniilwa oyindji, ihe otwi ilongo wo okuyambidhidha momikalo dha yoolokathana, opo ayehe ya ningilwe shi thike pamwe.”

13. (a) Oshike sha li sha tompa Gideon? (b) Ongiini aakuluntugongalo taya vulu okuholela Gideon? (Tala wo ethano.)

¹³ Kala wu na uulaadhi wokulonga ehalo lyaJehova. Gideon okwa li a vulika kuJehova, nonando okwa li a tila oshinakugwanithwa she shoka sha li tashi vulu oku mu etela oshiponga. (Aatok. 9:17) Konima sho Gideon a shilipalekwa kuJehova, okwa li a tompwa thiluthilu kutya Kalunga ote ke mu ambidhidha sho ta gamene oshigwana she. Aakuluntugongalo mboka ye li miitopolwa moka iilonga yetu yi indikwa ohaya holele Gideon. Ohaya kwatele komeho nuulaadhi omakugongala nosho wo iilonga yokuuvitha, nonando oya tilithwe kutya otaya ka kwatwa po, okupulapulwa, okukanitha iilonga nenge okulongelwa omiyonena. c Pethimbo lyuudhigu uunene, aakuluntugongalo otaya ka pumbwa uulaadhi wokuvulika komalombwelo ngoka taya ka pewa, kutya nduno oga nika oshiponga shi thike peni. Omalombwelo otashi vulika ge na ko nasha nokuuvitha etumwalaka edhigu lyepangulo nosho wo kutya otu na okuninga shike, opo tu hupe meponokelo lyaGog yaMagog. — Hes. 38:18; Eh. 16:21.

14. Eidhidhimiko lyaGideon olya li lya makelwa ngiini?

¹⁴ Gideon okwa li e na okulonga nuudhiginini, opo a vule okulonga e li omupanguli. Sho Aamidiana ya li taya fadhuka po pethimbo lyolugodhi ndoka lwa li talu kondjwa uusiku, Gideon okwe ya tidha okuza molusilu lwaJesreel sigo okomulonga gwaJordan, ngoka tashi vulika gwa li gwa kundukidhwa kiihwa oyindji nenge komiti odhindji. (Aatok. 7:22) Mbela Gideon okwa li a fudha po puJordan? Aawe! Nonando okwa li a vulwa, ye naalumentu ye 300, oye gu taaguluka, e taya tsikile oku ya tidha. Lwahugunina, oye ya adha e taye ya sindi. — Aatok. 8:4-12.

15. Uunake tashi vulika eidhidhimiko lyomukuluntugongalo li makelwe?

¹⁵ Omukuluntugongalo omathimbo gamwe otashi vulika a kale a vulwa palutu, pamadhiladhilo nenge pamaiyuvo okusila oshimpwiyu egongalo  nosho wo yaandjawo. Moonkalo dha tya ngawo, ongiini aakuluntugongalo taya vulu okuholela Gideon?

16-17. Oshike sha li sha kwathele Gideon i idhidhimike, neinekelo lini aakuluntugongalo taya vulu okukala ye na? (Jesaja 40:28-31) (Tala wo ethano.)

¹⁶ Kala wu na einekelo kutya Jehova ote ke ku nkondopaleka. Gideon okwa li i inekela kutya Jehova ote mu nkondopaleke, na Jehova osho a li a ningi. (Aatok. 6:14, 34) Oshikando shimwe, Gideon naakwiita ye oya li ya tidha aakwaniilwa yaali yAamidiana kolupadhi, mboka tashi vulika ya li ya londa koongamelo. (Aatok. 8:12, 21) Ihe Kalunga okwa li a kwathele Aaisraeli ye ya kwate e taye sindi. Sha faathana, aakuluntugongalo otaya vulu okwiinekela muJehova ngoka ‘ihaa vulwa ye iha loloka.’ Ote ke ya pa oonkondo uuna ye dhi pumbwa. — Lesha Jesaja 40:28-31.

¹⁷ Natu taleni koshimoniwa shaMatthew, ngoka e li oshilyo shOkomitiye yOkukwatathana nIipangelo. Oshike hashi mu kwathele i idhidhimike? Ota ti: “Ohandi kala ndi uvite Jehova ta koleke ndje, ngaashi naanaa Aafilippi 4:13 ye shi popya. Omathimbo gamwe ngele nda vulwa nondu uvite kutya itandi vulu we okutsikila, ohandi galikana nda mana mo, tandi pula Kalunga a pe ndje oonkondo dhopalutu nodhopamadhiladhilo, ndhoka nda pumbwa, opo ndi vule okuyambidhidha aamwatate. Pethimbo opo tuu mpoka, ondu uvu nkene ombepo yaJehova tayi nkondopaleke ndje notayi kwathele ndje ndi idhidhimike.” Ngaashi Gibeon, aakuluntugongalo ohaya longo nuudhiginini ya sile oshimpwiyu oshigwana shaJehova, nonando haaluhe oshipu. Odhoshili kutya oye na okukala aaifupipiki nokutseya kutya haaluhe taya vulu okuninga kehe shoka ya hala okuninga. Ihe otaya vulu okukala neinekelo kutya Jehova ote ku uva omagalikano gawo sho taye mu pula ekwatho note ke ya pa oonkondo yi idhidhimike. — Eps. 116:1; Fil. 2:13.

18. Mokweendulula, ongiini aakuluntugongalo taya vulu okuholela Gideon?

¹⁸ Opu na iiyilongomwa yi li pethimbo notayi longo, mbyoka aakuluntugongalo taya vulu okwiilonga kuGideon. Aakuluntugongalo oye na okuulika kutya oye shi omangambeko gawo noye na eifupipiko ngele tashi ya piinakugwanithwa mbyoka haya taamba ko nosho wo momukalo moka hayi inyenge uuna ya pewa uusama nenge ya pandulwa. Oye na okukala haya vulika noye na uulaadhi, unene tuu sho ehulilo lyethimbo lyomasiku gahugunina guuyuni mbuka tali hedha popepi. Oya pumbwa wo okukala ye na einekelo kutya nduno oyi iyadha ya taalela omaupyakadhi gontumba, Kalunga ota vulu oku ya pa oonkondo. Otwa pandula lela aakuluntugongalo mboka haya litha oshigunda nuudhiginini notwe ya ‘simaneka.’ — Fil. 2:29.