1. Oshike tu na okuninga, opo tu ka hupe ‘mesiku lyOmuwa’?

 UUNA Ombiimbeli tayi popi “esiku lyOmuwa,” otayi ulike kethimbo ndyoka Jehova ta ka pangula aatondi ye, nokuhupitha oshigwana she. Omathimbo gamwe monakuziwa, Jehova okwa li a geele iigwana yimwe. (Jes. 13:1, 6; Hes. 13:5; Sef. 1:8) Pethimbo lyetu, “esiku lyOmuwa” otali ka tameka nehanagulo lyaBabilon Oshinene, e tali hulu niita yaArmagedon. Opo tu ka hupe ‘mesiku’ ndyoka, otwa pumbwa okwiilongekidha ngashingeyi. Jesus okwe tu longa kutya katu na owala okwiilongekidhila “uudhigu uunene,” ihe otu na wo okutsikila ‘okukala twi ilongekidha.’ — Mat. 24:21; Luk. 12:40.

2. Omolwashike tatu vulu okumona mo uuwanawa mAatessalonika yotango?

² Montumwafo ye yotango ndjoka a nyolele Aatessalonika, omuyapostoli Paulus okwa longitha omathaneko gontumba, opo a kwathele Aakriste ya kale yi ilongekidhila esiku enene lyaJehova lyepangulo. Paulus okwa li e shi kutya esiku lyaJehova kalya li tali ke ya pethimbo ndyoka. (2 Tes. 2:1-3) Nonando ongawo, okwa li a ladhipike aamwahe yi ilongekidhile esiku ndyoka, lya fa ando tali ya mesiku tali landula, natse otu na okutula miilonga omayele ngoka. Natu ka taleni iitsa tayi landula tu mone nkene e shi yelitha kutya: (1) esiku lyaJehova otali ke ya lya fa shike, (2) oolye itaaya ka hupa (3) nongiini tatu vulu oku li ilongekidhila, opo tu ka hupe.

3. Ongiini esiku lyaJehova tali ke ya lya fa omufuthi ta ende uusiku? (Tala wo ethano.)

³ “Otali ya ongomufuthi te ende uusiku.” (1 Tes. 5:2) Nguka ogwo omupopyothano gwotango, gwomomipopyothano ndatu ndhoka dha longithwa, okuyelitha kutya esiku lyaJehova otali ya lya fa shike. Aafuthi olundji ohaya endelele nohaya endele kumwe nomilema, opo ya adhe aantu ya kotha. Esiku lyaJehova nalyo otali ke ya ombaadhilila, notali ka adha oyendji inaaye shi tegelela. Nokuli  nAakriste yashili otashi vulika ya ka kale ya kumwa nkene iiningwanima yontumba tayi ningwa meendelelo. Ihe mepingathano naakolokoshi, tse itatu ka hanagulwa po.

4. Omomukalo guni esiku lyaJehova lya fa oshitheta?

⁴ Otali “ka kala ngaashi omusimba ta adhika koshitheta.” (1 Tes. 5:3) Omukiintu ngoka e li pokumona okanona, iha kala e shi kutya uunake ta adhika koshitheta. Ihe iha kala a limbililwa ngele otashi ke ya ngaa. Uuna tashi tameke, ohashi mu adha ombaadhilila, tashi ehama noiha vulu oku shi keelela. Sha faathana, natse katu shi esiku notundi ndjoka esiku lyaJehova tali ya. Ihe otu na uushili kutya otali ya, nonokutya epangulo lyaKalunga otali ka adha aakolokoshi ombaadhilila noitaya ka vula oku li ya ontuku.

5. Omeityo lini uudhigu uunene wa fa eluwa tali tende?

⁵ Olya fa eluwa tali tende. Methaneko etitatu, Paulus okwa popya natango kombinga yaafuthi taya yaka uusiku. Ihe pompito ndjika, Paulus okwa faathanitha esiku lyaJehova neluwa tali tende. (1 Tes. 5:4) Aafuthi mboka haya teya uusiku, otashi vulika ya kale ya ipyakidhila unene, e taya dhimbwa okutala kethimbo. Eluwa otashi vulika li tende inaaye shi tegelela, e taya monika omanga ya ipyakidhila nokuyaka. Sha faathana, uudhigu uunene nawo otawu ka aneka pomutenya mboka ya fa aafuthi, mboka taya adhika ya ipyakidhila niilonga mbyoka Kalunga e tonde. Mepingathano nayo, tse otatu vulu okukala twa ilongekidha, mokuyanda iilonga mbyoka Kalunga e tonde, nokulalakanena “uuwanawa, uuyuuki noshili.” (Ef. 5:8-12) Okuza mpono, Paulus okwa longitha omathaneko gaali ga pambathana, a popye kombinga yaamboka itaaya ka hupithwa.

6. Omeityo lini aantu oyendji ya kotha kunena? (1 Aatessalonika 5:6, 7)

⁶ “Aakothi.” (Lesha 1 Aatessalonika 5:6, 7.) Paulus okwa yelekanitha mboka itaaya ka hupa mesiku lyaJehova, naantu mboka ya kotha. Ihaya  kala ye shi shoka tashi ningwa momudhingoloko gwawo, nenge momukokomoko gwethimbo ndyoka tali piti po. Onkee, ihaya vulu okundhindhilika uuna iiningwanima mbyoka ya simana tayi ningwa, nenge ya ninge po sha. Aantu oyendji kunena, oya kotha meityo lyopambepo. (Rom. 11:8) Kaye shi wete kutya otu li ‘momasiku gahugunina’ nosho wo kutya uudhigu uunene owu li pokuya. Omalunduluko omanene ngoka taga ningwa muuyuni otaga vulu okutonatitha yamwe pambepo, nokuulika ohokwe onshona metumwalaka lyUukwaniilwa. Ihe nonando ongawo, oyendji ohaya shuna owala moomposi dhawo dhopambepo, pehala lyokukala ya tonata. Nokuli yamwe mboka ya itaala mesiku lyepangulo, ohaya dhiladhila kutya oli li natango kokule nokuya. (2 Pet. 3:3, 4) Ihe sho omasiku taga ende taga humu komeho, otu shi kutya otu na okukala twa tonata shi vulithe nale, ngaashi Ombiimbeli tayi tu ladhipike tu shi ninge.

7. Omeityo lini mboka taya ka hanagulwa po kuKalunga ya fa oonkolwi?

⁷ ‘Oonkolwi.’ Omuyapostoli Paulus okwa yelekanitha mboka taya ka hanagulwa po kuKalunga noonkolwi. Aantu mboka haya kala ya kolwa, ihaya ndhindhilike nziya shoka tashi ningwa momudhingoloko gwawo, nohaya ningi omatokolo kaage li pandunge. Sha faathana, aakolokoshi ihaya kala ye na ko nasha nomalondodho gaKalunga. Oye na eihumbato ndyoka tali ya ningitha ya ka hanagulwe po. Ihe Aakriste otaya ladhipikwa ya kale ye na eidhiliko, nenge tu tye, ya kale haya dhiladhila pandunge. (1 Tes. 5:6) Omulongwantu gumwe gwOmbiimbeli okwa ti kutya okukala wa tonata otashi kutya “okukala wa ngungumana, wu na omadhiladhilo ge li pehala notaga longo nawa, ngoka tage ku kwathele wu ninge omatokolo gopandunge.” Omolwashike tu na okukala twa ngungumana notu na omadhiladhilo ge li pehala? Opo kaatu ninge iihakanwa yomitotolombo dhopapolotika nenge dhomaipumomumwe ngoka haga holoka po muulipamwe waantu. Sho esiku lyaJehova tali hedha popepi lela, omathiminiko tu kuthe ombinga miinima mbyoka otaga ka indjipala. Ihe katu na okukala twa tila kutya natu ninge shike. Ombepo yaKalunga otayi ke tu kwathela tu kale twa ngungumana, tu na omadhiladhilo ge li pehala nokuninga omatokolo ge li pandunge. — Luk. 12:11, 12.

8. Omaukwatya ngoka taga vulu oku tu kwathela tu kale twa tonata notu na eidhiliko, oga yelekanithwa nashike mAatessalonika yotango 5:8? (Tala wo ethano.)

⁸ ‘Zaleni ehuyanza negala lyosheela.’ Pompito ndjino, Paulus ote tu yelekanitha naakwiita mboka ya tonata, noya zala ya ilongekidhila olugodhi. (Lesha 1 Aatessalonika 5:8.) Uuna pu na iita, aantu ohaya kala ya tegelela omukwiita a kale i ilongekidhila olugodhi ethimbo kehe. Natse otu li monkalo ya faathana. Otu na okukala twa ilongekidhila esiku lyaJehova, mokukala twa zala eitaalo nohole ongehuyanza, netegameno ongegala lyosheela. Omaukwatya ngoka otage ke tu kwathela noonkondo.

9. Eitaalo ohali tu gamene ngiini?

⁹ Ehuyanza ohali gamene omutima gwomukwiita. Eitaalo nohole ohayi gamene omutima gwetu gwopathaneko. Ohayi tu kwathele tu kale tatu longele Kalunga nokulandula Jesus. Eitaalo ohali tu kwathele tu kale tu na uushili kutya Jehova ota ka futa mboka taye mu kongo nomutima aguhe. (Heb. 11:6) Otali ke tu kwathela tu kale aadhiginini kOmuwiliki gwetu, Jesus, nonando otu li moonkalo oondhigu. Otatu vulu okukoleka eitaalo lyetu, opo tu vule okwiidhidhimikila omaupyakadhi, mokwiilonga kiiholelwa yaantu yopethimbo lyetu mboka ya li ya kakatela uudhiginini wawo, nonando otaya hepekwa, nenge taya hupu shokadhila. Otatu vulu wo okuyanda omwigo gwokuhola omaliko, mokuholela mboka ya kaleka onkalamwenyo yawo paunathangwa, opo ya vule okupititha komeho Uukwaniilwa. b

10. Ohole yokuhola Kalunga nosho wo aantu ooyakwetu ohayi tu kwathele ngiini tu idhidhimike?

 ¹⁰ Ohole oya simanenena wo, opo tu kale twa tonata notu na eidhiliko. (Mat. 22:37-39) Ohole yetu yokuhola Kalunga ohayi tu kwathele tu idhidhimikile uupyakadhi kehe tatu iyadha muwo sho tatu uvitha. (2 Tim. 1:7, 8) Molwaashoka otu hole aantu mboka ihaaya longele Jehova, otatu tsikile noku ya uvithila nokulonga miitopolwa yetu, mwa kwatelwa nokuli okuuvitha okupitila mokudhenga oongodhi nokunyola oontumwafo. Otu na etegameno kutya sikulimwe lyomomasiku, aantu otaya ka lundulula iikala yawo, nokutameka okulonga shoka sha uka noshiwanawa. — Hes. 18:27, 28.

11. Ohole yetu yokuhola ooitaali ooyakwetu ohayi tu kwathele ngiini? (1 Aatessalonika 5:11)

¹¹ Otu na okukala tu hole aantu ooyakwetu, mwa kwatelwa Aakriste ooyakwetu. Ohatu ulike kutya otu ya hole ‘mokukumagidhathana nomokukwathathana.’ (Lesha 1 Aatessalonika 5:11.) Ngaashi aakwiita haya kwathelathana molugodhi, natse ohatu tsaathana omukumo. Oshoshili kutya kapu na omukwiita ta ka ehameka owina omukwiita omukwawo, ihe otashi vulika e shi ninge kaashi shi oshiningilawina. Sha faathana, itatu ke ehameka owina aamwatate naamwameme, nenge tu ya galulile uuwinayi. (1 Tes. 5:13, 15) Ohatu ulike wo ohole yetu mokusimaneka aamwatate mboka taya kwatele komeho megongalo. (1 Tes. 5:12) Sho Paulus a nyolele Aatessalonika ontumwafo ndjika yotango, egongalo ndyoka olya adhika owala opo lya totwa po, inaali gwanithwa nomumvo gumwe. Aalumentu mboka ya li taya kwatele komeho megongalo ndyoka otashi vulika kaaya li ye na owino, notashi vulika ya li ya ningi omapuko. Ihe nando ongawo, oya li ya gwana okusimanekwa. Sho uudhigu uunene tawu hedha popepi, otashi vulika aakuluntugongalo yomegongalo lyetu oyo unene taye ke tu pa omalombwelo shi vulithe nale. Otashi vulika itaatu ka vula okukwatathana noombelewa dhetu oonene nosho wo noshitayimbelewa; onkee osha simana okwiilonga okukala tu hole notwa simaneka aakuluntugongalo, manga taku tiwa nena. Kutya nduno oshike tashi ningwa po, natu kale tu na eidhiliko, inatu kala owala tatu gandje eitulomo kokwaagwanenena kwaakuluntugongalo, ihe natu kale twa tompwa kutya Jehova ota wilike aalumentu mboka aadhiginini okupitila muKristus.

12. Etegameno lyetu ohali gamene ngiini omadhiladhilo getu?

 ¹² Ngaashi owala egala lyosheela hali gamene omutse gwomukwiita, etegameno lyetu lyehupitho nalyo ohali gamene omadhiladhilo getu. Etegameno lya kola ohali tu kwathele tu mone kutya uuyuni itawu vulu oku tu pa sha shi na ongushu. (Fil. 3:8) Etegameno ohali tu kwathele wo tu kale twa ngungumana noitaa tu tengauka. Shono osho sha li sha ningilwa Wallace naLaurinda, mboka ye li Aabetele moshilongo shimwe moAfrika. Kehe gumwe gwomuyo okwa li a silwa omuvali, sha ningwa owala muule wiiwike itatu. Omolwomukithi gwekomba, gwo-COVID-19, kaya li taya vulu okushuna koshilongo shawo ya ka kale pamwe noyaandjawo pethimbo lyoosa. Wallace okwa nyola a ti: “Etegameno lyeyumuko olya kwathela ndje ndi kale tandi dhiladhila kombinga yawo; ihe haasho ya li momasiku gawo gahugunina muuyuni mbuka, ihe okunkene taya ka kala ya tya momasiku gawo gotango muuyuni uupe. Etegameno ndyoka oha li ngungumaneke ndje, uuna nda nika oluhodhi, nenge nda yemata sho nda silwa.”

13. Oshike tatu vulu okuninga, tu pewe ombepo ondjapuki?

¹³ “Inamu dhima omulilo gwombepo.” (1 Tes. 5:19, NW) Paulus okwa faathanitha ombepo ondjapuki nomulilo gu li meni lyetu. Uuna tu na ombepo ondjapuki yaKalunga, ohatu kala tu na uulaadhi nehwamo lyokulonga shoka shu uka, nohatu kala twa halelela okulongela Jehova. (Rom. 12:11) Oshike tu na okuninga, opo tu pewe ombepo ondjapuki? Otwa pumbwa oku yi indila okupitila megalikano, okukonakona Oohapu dhaKalunga dha nwethwa mo, nokweendathana nehangano lye, ndyoka ta wilike nombepo ye ondjapuki. Okuninga ngawo, otaku tu kwathele tu kokeke “iiyimati yOmbepo.” — Gal. 5:22, 23.

14. Oshike tu na okuyanda okuninga ngele otwa hala tu tsikile nokupewa ombepo yaKalunga? (Tala wo ethano.)

¹⁴ Ngele Kalunga okwe tu pe ombepo ye ondjapuki, otu na okukala twa kotoka ‘kaatu dhime omulilo gwayo.’ Kalunga oha gandja owala ombepo ye ondjapuki kumboka ye na omadhiladhilo neihumbato lya yogoka. Ita ka tsikila oku tu pa ombepo ye ondjapuki, ngele otu na omadhiladhilo ga nyata nohatu ningi iinima mbyoka hatu dhiladhila kuyo. (1 Tes. 4:7, 8) Opo tu tsikile okupewa  ombepo ondjapuki, ‘katu na okudhina omahunganeko.’ (1 Tes. 5:20) Movelise ndjika, “omahunganeko” otaga ulike komatumwalaka ngoka Jehova he tu pe okupitila mombepo ye ondjapuki, mwa kwatelwa ngoka ge na ko nasha nesiku lye nosho wo kutya ethimbo ndyoka tu li mulyo olya endelela. Inatu dhiladhila nando kutya esiku lyaJehova, nenge Armagedon ite ya pethimbo lyetu. Pehala lyaashono, natu endelelithe esiku ndyoka, moku li kaleka aluhe momadhiladhilo, nokukala twa ipyakidhila esiku kehe niilonga mbyoka tayi ulike kutya otwa ‘igandjela’ Kalunga. — 2 Pet. 3:11, 12.

15. Ongiini tatu vulu okuyanda kokunwethwa mo kuuyelele wa puka nokomitotolombo dhoompwidhuli? (1 Aatessalonika 5:21)

¹⁵ Monakuyiwa yi li popepi, aatondi yaKalunga otaya ka igidha momukalo gwontumba taya ti: “Ope na ombili, naayihe oya gamenwa.” (1 Tes. 5:3) Omitotolombo dha nwethwa mo koompwidhuli otadhi ki ihanena evi alihe, nokupukitha oyendji. (Eh. 16:13, 14) Ongiini shi na ko nasha natse? Ngele ‘otwa konakona iinima ayihe,’ itatu ka pukithwa. (Lesha 1 Aatessalonika 5:21.) Oshitya shOshigreka shoka sha tolokwa “konakoneni,” osha li sha longithwa sho taku yelithwa omukalo moka aantu ya li haya tala iitenda ngaashi iingoli niiyela ngele oyolela ngaa. Onkee otwa pumbwa okukala hatu tala ngele shoka twa uvu nenge twa lesha oshoshili ngaa. Osha li sha simana kAatessalonika okuninga ngawo, nosha simanenena kutse, unene tuu sho uudhigu uunene tawu hedha popepi. Pehala lyokwiitaala kehe shoka yalwe taya popi, ohatu longitha oondunge dhetu dhokuyoolola nokutala ngele shoka twa lesha nenge twa uva oshi li ngaa metsokumwe naashono Ombiimbeli nosho wo ehangano lyaJehova tali ti. Ngele otwa ningi ngawo, itatu ka pukithwa komitotolombo dhoompwidhuli. — Omayel. 14:15; 1 Tim. 4:1.

16. Etegameno lini tu na, notwa tokola toko okuninga shike?

¹⁶ Oshigwana shaKalunga shi li ongundu, otashi ka hupa puudhigu uunene. Ihe katu shi kutya ongula oshike tashi ke tu ningilwa pauhandimwe. (Jak. 4:14) Nando ongawo, kutya nduno otatu ka pita mo muudhigu uunene, nenge otatu si omanga inaawu ya, otatu ka pewa ondjambi yomwenyo gwaaluhe, ngele otwa kala aadhiginini. Aakriste aagwayekwa otaya ka kala pamwe naKristus megulu, omanga oonzi dhilwe otadhi ka kala moparadisa kombanda yevi. Onkee ano atuheni natu gandjeni eitulomo ketegameno lyetu li tuntula, nokukala twa ilongekidhila esiku lyaJehova!