Ombiimbeli inayi shi popya. Ihe otayi tu lombwele uuyelele uuhokothi mboka tashi vulika tawu yelitha kutya omolwashike inaaya shuna kuNasaret pethimbo ndyoka.

Omuyengeli okwa li a lombwele Maria kutya ota ka ninga omusimba e ta mono okanona. Sho omuyengeli ngoka a lombwele Maria etumwalaka ndyoka, Maria naJosef oya li ya kala muNasaret, moshilando shaandjawo yaJosef, muGalilea. (Lukas 1:26-31; 2:4) Lwanima, sho ya galuka kuEgipiti oya shuna kuNasaret. Jesus oko a kokele e ta ningi Omunasareti. (Mat. 2:19-23) Sho osho molwaashono hatu dhiladhila kombinga yaNasaret, uuna tatu tumbula omadhina ngaashi lyaJesus, lyaJosef nolyaMaria.

Maria okwa li e na omukwanezimo gwedhina Elisabet, ngoka a li a kala muJudea. Elisabet okwa li omukulukadhi gwomuyambi Sakaria noye yina yaJohannes Omuninginithi. (Luk. 1:5, 9, 13, 36) Maria okwa li a talele po Elisabet nokwa kala puye oomwedhi ndatu muJudea. Opo nduno Maria okwa shuna kuNasaret. (Luk. 1:39, 40, 56) Osho molwaashono Maria a li e shi nawa oshitopolwa shaJudea.

Mokweendela ko kwethimbo Josef okwa vulika kelombwelo ‘lyoku ki inyolitha.’ Onkee ano, Josef okwa zi kuNasaret, e ta yi kuBetlehem, shoka sha li hashi ithanwa ‘oshilando shaDavid,’ nosho sha li ehala hoka kwa li taku ka valelwa Mesiasa. (Luk. 2:3, 4; 1 Sam. 17:15; 20:6; Mika 5:2) Konima sho Maria a valele Jesus hono, Josef ine mu dhenga mela lyondjila onde yokushuna kuNasaret nokahanona. Oya kala muBetlehem shoka sha li ookilometa omugoyi lwaampono okuza muJerusalem. Shoka osha li tashi ka kala oshipu kuyo okufala okanona kawo kotempeli, noku ka gandja omayambo ngaashi Ompango ya li ya tegelela. — Lev. 12:2, 6-8; Luk. 2:22-24.

Omuyengeli gwaKalunga okwa li a lombwele Maria kutya omwanamati ota ka pewa ‘uukwaniilwa ongaashi he David’ nosho wo kutya ota “ningi omukwaniilwa.” Otashi vulika Josef naMaria ya li ye shi tala ko oshindhindhilikwedhi sho Jesus a valelwa moshilando shaDavid. (Luk. 1:32, 33; 2:11, 17) Otashi vulika ya li taya dhiladhila kutya oshi li pandunge okukala moka sigo ya mono kutya Kalunga okwa hala ya ninge shike.

Katu shi kutya muBetlehem oya li ya kala mo ethimbo li thike peni sigo oosho aayanekelinyothi yamwe ye ya mo. Ihe pethimbo ndyoka, uukwanegumbo mboka owa li hawu zi megumbo limwe, nokamwanamati oka li “okanona” ihe ka ke shi okahanona. (Mat. 2:11) Osha fa shi li ngeyi kutya pehala lyokushuna kuNasaret, oya kala muBetlehem uule wethimvo dhontumba sigo mwa ningi maandjawo.

Herodes okwa gandja elombwelo “uunona auhe woomvula mbali naamboka uushona” wu dhipagwe. (Mat. 2:16) Omuyengeli gumwe okwa londodha Josef kombinga yoshinima shoka, opo nduno Josef naMaria oya yi ontuku kuEgipiti e taya kala hoka sigo oosho Herodes a si. Lwanima, Josef naanegumbo lye oya tembukile kuNasaret. Omolwashike inaaya shuna kuBetlehem? Pethimbo ndyoka omwanamati gwaHerodes, Arkelaus oye a li ta pangele muJudea, naJosef okwa li wo a landula elombwelo ndyoka a pewa kuKalunga. MuNasaret, omo Josef a li ta vulu okuputudhila Jesus a kale ta longele Jehova. — Mat. 2:19-22; 13:55; Luk. 2:39, 52.

Osha fa shi li ngeyi kutya Josef okwa si manga Jesus inaa sa noku shi ningitha tashi wapa opo aantu yalwe ya ye megulu. Onkee Josef ota ka yumudhwa a ka kale nomwenyo kombanda yevi. Aantu oyendji otaya ka vula oku ka tsakanena naye nokwiilonga oshindji kuye kutya omolwashike ye naMaria ya kala muBetlehem konima sho Jesus a valwa.