1-2. Kunena uupyakadhi wuni tu na mbono wa faathana nowaLot?

 SHI na ko nasha nomithikampango dhopamikalo ndhoka tadhi humithwa komeho kuuyuni mbuka, ohatu kala tu uvite ngaashi Lot a li e uvite. Okwa “li u uvite nayi kuukeeneidhiliko waakeenompango,” molwaashoka okwa li e shi kutya Tate yetu gwomegulu oku tonde eihumbato ewinayi. (2 Pet. 2:7, 8) Molwaashoka Lot okwa li a simaneka noonkondo Kalunga noku mu hole, oshe mu inyengitha a kale e tonde eihumbato inaali yogoka lyaantu mboka ye mu kundukidha. Ngaashi Lot, natse otwa kundukidhwa kaantu mboka inaaya simaneka lela nenge nandonando omithikampango dhaJehova dhopamikalo. Nando ongawo, otatu vulu okukala twa yogoka pamikalo, ngele otwa kala tu hole Kalunga nokwiilonga okukala twe mu simaneka noonkondo. — Omayel. 14:2.

² Jehova ohe tu kwathele tu shi ninge okupitila metsomukumo ndyoka tali adhika mOmayeletumbulo. Aakriste ayehe, aalumentu naakiintu, aagundjuka naakokele, otaya vulu lela okumona uuwanawa mokukonakona omayele gopandunge ngoka taga adhika mo.

3. Shi ikolelela kOmayeletumbulo 17:3, etompelo limwe lini tu na lyokugamena omitima dhetu? (Tala wo ethano.)

³ Etompelo lya simanenena lyokugamena omutima gwetu gwopathaneko olyo kutya Jehova oha konakona omitima dhetu. Shono osha hala okutya oha mono shono aantu ihaaya vulu okumona noku shi kutya tse aantu ya tya ngiini lela. (Lesha Omayeletumbulo 17:3.) Ngele otwa tsikile okukala hatu dhiladhila kombinga yomayele ge, ngono tage tu kwathele tu kale nomwenyo sigo aluhe, ota kala e tu hole. (Joh. 4:14) Itatu ka nwethwa mo nando keihumbato ewinayi, kiifundja yaSatana nosho wo kaakolokoshi yomuuyuni mbuka. (1 Joh. 5:18, 19) Ngele otwa hedha popepyeelela naJehova, ohole yetu yoku mu hola otayi ka koka notatu ka kala  twe mu simaneka. Molwaashoka inatu hala okuuvitha nayi Tate yetu, otatu ka kala tu tonde okudhiladhila okuninga oshinima kehe sha puka. Uuna tatu makelwa tu ninge sha sha puka, otatu vulu okwiipula ngeyi: ‘Omolwashike ndi na okuuvitha nayi Ngoka u ulukila ndje ohole onene?’ — 1 Joh. 4:9, 10.

4. Uumbanda wokutila Jehova owa li wa gamene ngiini omumwameme gumwe kaa ninge shoka sha puka?

⁴ Marta omumwameme gwokoCroatia ngoka a li a makelwa a ye momilalo dha nyata okwa nyola a ti: “Onda li handi mono oshidhigu okudhiladhila nawa nokukondjitha ehalo lyokuninga shoka sha puka, ihe uumbanda wokutila Jehova owa li wa gamene ndje.” b Etilo lyokutila Kalunga olye mu kwathele ngiini? Marta okwa ti kutya okwa tedhatedha kiilanduliko iiwinayi mbyoka hayi zi momatokolo ga puka. Natse otatu vulu okuninga sha faathana. Oshilanduliko shiyemateka noonkondo osho kutya otatu ka yemateka Jehova noitatu ka vula we oku mu longela sigo aluhe.

5. Oshike to vulu okwiilonga koshiholelwa shaLeo?

⁵ Ngele ohatu tila Jehova itatu ka panga uukuume naamboka haya ningi iinima iiwinayi. Leo, ngoka ha zi moCongo okwa li i longo oshiilongomwa shoka. Konima yomimvo ne sho a ninginithwa, okwa li a panga uukuume naantu mboka haya ningi iinima iiwinayi. Okwa li ta dhiladhila kutya inashi puka shampa owala itaa yono kuJehova. Ihe nziya aantu mboka a li he endathana nayo oye mu ningitha a tameke okunwa omalovu sha pitilila nokuya momilalo dha nyata. Okwa tameke okudhiladhila kombinga yaashoka aavali ye, Aakriste ya li ye mu longo nokenyanyu ndyoka a li e na, sho ta longele Jehova. Oshizemo osha li shike? Okwa tameke ishewe okuninga shoka shi li mondjila. Omolwekwatho lyaakuluntugongalo, okwa galukile kuJehova. Ngashingeyi ota longele Jehova a nyanyukwa e li omukuluntugongalo noku li wo omukokolindjila i ikalekelwa.

6. Aakiintu yaali yeni yopathaneko tatu ka kundathana ngashingeyi?

 ⁶ Natu ka konakoneni Omayeletumbulo 9 moka hatu lesha mo kombinga yaakiintu yaali, gumwe ota thaneke uunongo gulwe uugoya. (Yelekanitha Aaroma 5:14; Aagalati 4:24.) Sho tatu ningi ngawo, natu shi kaleke momadhiladhilo kutya uuyuni waSatana owa pikwa komilalo dha nyata nokomathano giipala. (Ef. 4:19) Onkee osha simana tu tsikile okukokeka etilokalunga nokugamuka ko kuuwinayi. (Omayel. 16:6) Kungawo, atuheni kutya nduno aalumentu nenge aakiintu, otatu vulu okumona mo uuwanawa montopolwa ndjika. Kehe gumwe gwomaakiintu mboka ya popiwa montopolwa ndjoka, ota popiwa pathaneko onga ta hiya mboka ‘kaaye na oondunge.’ Shaa gumwe gwomuyo okwa fa ta ti: ‘Ila megumbo lyandje wu lye.’ (Omayel. 9:1, 5, 6, 13, 16, 17) Ihe shoka hashi ningilwa mboka haya taamba ko omahiyo gawo osha yoolokathana lela.

7. Shi ikolelela kOmayeletumbulo 9:13-18, oshike hashi ningilwa mboka haya taamba ko ehiyo lyomukiintu omugoya? (Tala wo ethano.)

⁷ Lesha ehiyo ndyoka lya za ‘komukiintu omugoya.’ (Lesha Omayeletumbulo 9:13-18.) Ohi ithana muule mboka kaaye na oondunge ta ti: ‘Ileni muka’ tu lyeni. Oshike hashi ningwa po? “Aahiywa ye oye li muule woshaasi.” Otashi vulika nangoye to dhimbulukwa omupopyothano gwa fa ngoka gwa popiwa petameko lyOmayeletumbulo. Otatu londodhwa kombinga ‘yomukiintu omukwiilongo nomuholi gwiipala.’ Otatu lombwelwa kutya ‘egumbo lye otali fala muusi.’ (Omayel. 2:11-19) MOmayeletumbulo 5:3-10 omu na elondodho kombinga ‘yomukiintu omukwiilongo’ ngoka ‘oompadhi dhe tadhi kulukile muusi.’

8. Etokolo lini tu na okuninga?

⁸ Mboka yu uvite ‘omukiintu omugoya’ ti igidha, oye na okuninga etokolo kutya otaya taamba ko ehiyo ndyoka nenge itaye li taamba ko? Natse otashi vulika tu ki iyadhe monkalo ndjoka. Otatu ka ninga po shike ngele gumwe okwa kambadhala oku tu ningitha oshinima sha nyata nenge ngele otwi itsu momathano giipala?

9-10. Omolwomatompelo gamwe geni tu na okuyanda eihumbato ewinayi lyopamilalo?

⁹ Opu na omatompelo omawanawa kutya omolwashike tu na okuyanda omilalo dha nyata. ‘Omukiintu egoya’ okwa hokololwa ta ti: “Omeya ga yakwa omatoye.” “Omeya ga yakwa” oshike? Ombiimbeli otayi yelekanitha omilalo pokati komusamane nomukulukadhi nomeya gomothithiya. (Omayel. 5:15-18) Omusamane nomukulukadhi mboka ya hokana paveta oya pitikwa okunyanyukilwa pamwe omilalo mondjokana yawo. Ihe “omeya ga yakwa” oge li shimwe shi ili. Omeya ga yakwa otashi vulika tagu ulike komilalo dhi indikwa. Aantu mboka haya yi momilalo  dha nyata, olundji ohaya kambadhala oku shi ninga meholamo, ngaashi naanaa omufuthi ha kambadhala okuyaka. “Omeya ga yakwa” otashi vulika ga monike ga fa omatoye, unene tuu ngele mboka taye shi ningi otaya dhiladhila kutya kapu na gumwe ta ka mona shoka ya ninga. Shoka itashi yemateke tuu! Jehova oku wete kehe shimwe. Ngele otwa kala inaatu hokiwa we kuJehova, ohashi kala oshiwinayi noonkondo, oshinima shoka tashi vulu oku tu ningilwa nokashi shi oshiwanawa nando. (1 Kor. 6:9, 10) Ihe opu na ishewe oshindji tashi vulu oku holoka po.

¹⁰ Omilalo dha nyata otadhi vulu okuningitha omuntu a kale e uvite a sa ohoni, kee na oshilonga, a ninge etegelelo inee shi hala nokuteya po omaukwanegumbo. Oshi li pandunge okutinda ehiyo lyomukiintu omugoya, uuna te ku hiya wu ka lye ‘megumbo’ lye. Kakele kokukanitha uukuume wawo naJehova aantu oyendji mboka haya yi moluhondelo ohaya kwatwa komikithi ndhoka tadhi vulu oku ya dhipaga. (Omayel. 7:23, 26) Ovelise 18 yontopolwa 9 otayi hulitha tayi ti: “Aahiywa ye oye li muule woshaasi.” Omolwashike nduno aantu oyendji haya taamba ko ehiyo lye ndyoka tali fala moshiponga sha tya ngawo? — Omayel. 9:13-18.

11. Omolwashike okutala omathano giipala kwa nika oshiponga?

¹¹ Omwigo ngoka gwa tseyika nawa, omathano giipala. Yamwe ohaya dhiladhila kutya okutala omathano giipala inashi nika oshiponga. Ihe omathano giipala ohaga etele aantu uupyakadhi. Ohage ya ningitha ya kale inaayi isimaneka yo yene nosho wo yalwe, na oshidhigu noonkondo okweetha po oku ga tala. Omathano giipala oshidhigu oku ga dhima mo momadhiladhilo. Omathano giipala ihaga kwathele aantu ye ethe po omahalo ga puka, pehala lyaashono ohaga ningitha omahalo ngoka ga kale ge na oonkondo. (Kol. 3:5; Jak. 1:14, 15) Oshoshili kutya aantu mboka haya tala omathano giipala ohaya katuka oonkantu oombwinayi omolweihumbato lyawo ewinayi.

12. Ongiini tatu vulu okukala twa kotokela omathano ngoka ga nika iipala?

¹² Tu li Aakriste ngele otwa mono ethano inaali yogoka koshikwaelektronika shetu inaatu shi tegelela, otatu ka ninga po shike? Otu na okweetha nziya oku li tala. Otashi ka kala oshipu kutse oku shi ninga, ngele otwa dhimbulula kutya ekwatathano lyetu naJehova olyo lya simanenena. Nokuli nomathano gamwe ngoka kaage shi giipala otaga vulu okupendutha mutse omahalo giipala. Omolwashike tu na oku ga yanda? Omolwaashoka inatu hala nando okutameka okudhiladhila sha kombinga yiinima yopamilalo. (Mat. 5:28, 29) Omukuluntugongalo gwokuThailand gwedhina David okwa ti: “Ohandi ipula mwene te ti: ‘Nokuli nando omathano otashi vulika kaage shi giipala, mbela Jehova ote ke ga hokwa ngaa, ngele onda tsikile oku ga tala?’ Okwiitompa kwa tya ngawo okwa kwathele ndje ndi katuke pandunge.”

13. Oshike tashi tu kwathele tu katuke pandunge?

¹³ Okukala twa tila okuninga oshinima kehe oshiwinayi otashi ke tu kwathela tu ninge omatokolo gopandunge. Uumbanda wokutila Kalunga owo “ekota” nenge ekankameno ‘lyuunongo.’ (Omayel. 9:10) Shika osha thanekwa nawa moshitopolwa shopetameko shOmayeletumbulo 9, moka tatu lesha kombinga yomukiintu gulwe gwopathaneko ngoka a popiwa ta thaneke “owino.”

14. Ehiyo li ili lini tali adhika mOmayeletumbulo 9:1-6?

¹⁴ Lesha Omayeletumbulo 9:1-6. MOmayeletumbulo otatu lesha mo kombinga yehiyo ndyoka lya za kOnzo nokEkankameno lyuunongo washili, ano Omushiti gwetu omunandunge a shiga ko. (Omayel. 2:6; Rom. 16:27) Ethaneko ndika lya longithwa mpaka otali popi kombinga yegumbo enene li na oongudhi heyali. Shika otashi thaneke kutya Jehova oha gandja noha taamba ko ayehe mboka ya hala okutula miilonga owino ye monkalamwenyo yawo.

15. Kalunga ote tu hiya tu ninge shike?

 ¹⁵ Jehova oha gandja iinima oyindji nehalo ewanawa. Omaukwatya ngaka ogi iwetikile “mowino” yashili ndjoka tayi popiwa yi li molupe lwomukiintu mOmayeletumbulo ontopolwa 9. Ehokololo otali popi kutya omukiintu ngoka gwopathaneko okwa longekidha nawa onyama ye, e ta hanga omaviinu nokundeeka oshitaafula she megumbo lye. (Omayel. 9:2.) Shimwe ishewe, shi ikolelela kovelise 4 no 5 otayi ti: ‘Omukiintu [owino ya ntuumpekwa] ota lombwele mboka kaaye na oondunge ta ti: “Ileni, lyeni oshikwiila shandje.”’ Omolwashike tu na okuya kegumbo lyowino yashili noku ka lya pamwe nayo? Jehova okwa hala aanona ye ya kale aanandunge noya gamenwa. Ina hala tu ninge omapuko ngoka tage ke tu uvitha nayi. Oshoka Jehova okwa popi kutya: “Aayuuki ote ya kwatha.” (Omayel. 2:7) Ngele otwa kala tu na uumbanda uuwanawa wokutila Jehova, otatu ka kala twa hala oku mu simanekitha. Ohatu uvu omayele ge, notwa halelela oku ga tula miilonga. — Jak. 1:25.

16. Ongiini uumbanda wokutila Kalunga wa li wa kwathele Alain a ninge etokolo lyomondjila, noshizemo osha li shini?

¹⁶ Tala nkene okukala nuumbanda wokutila Kalunga kwa kwathele Alain a ninge etokolo lyopandunge. Alain oku li omukuluntugongalo noha longo osikola, okwa ti: “Oyendji yomaalongi pamwe nangame oya tala ko oofilima dhomathano giipala kutya otadhi longo aantu kombinga yomilalo.” Ihe Alain okwa li e shi kutya shoka kashi shi shoshili. Okwa ti: “Molwaashoka ondi hole nonda simaneka Jehova, onda tindi thiluthilu okutala oofilima ndhoka. Onda li wo nda yelithile aalongi pamwe nangame kutya omolwashike.” Okwa li a tula miilonga omayele ngoka ga za “mowino” yashili, opo a ‘ende momapola goondunge.’ (Omayel. 9:6) Yamwe yomaalongi pamwe naAlain oya li ye mu kuminwa nongashingeyi oya tameka okukonakona Ombiimbeli nohaya yi kokugongala.

17-18. Omayambeko geni taga nyanyukilwa kwaamboka haya taamba ko ehiyo ‘lyowino’ yashili, netegameno lini taya vulu okukala ye na? (Tala wo ethano.)

¹⁷ Jehova okwa longitha iiholelwa yaakiintu mboka yaali yopathaneko, opo e tu ulukile nkene tatu vulu oku ka kala nonakuyiwa ombwanawa. Mboka taya taamba ko ehiyo ‘lyomukiintu egoya’ noha igidha muule ohaya gandja eitulomo kokutyapula ‘uutoye’ womeholamo. Ihe paushili wo wene, shoka haya ningi otashi ka guma shoka taya ka ningilwa monakuyiwa. Oonkantu dhawo otadhi fala “muule woshaasi.” — Omayel. 9:13, 17, 18.

¹⁸ Mboka haya taamba ko ehiyo lyomukiintu ngoka ta thaneke “owino” yashili, otaya ka kala ye na onakuyiwa ya yooloka ko. Aayenda ye oya nyanyukwa, molwaashoka oye na shoka ya pumbwa tashi ya kaleke popepi naJehova. (Jes. 65: 13) Jehova okwa popi okupitila momuhunganeki Jesaja a ti: “Uvii ndje, opo mu lye iikulya yuuyamba, noomwenyo dheni otadhi ka kutithwa kuutoye.” (Jes. 55:1, 2) Otatu ilongo okukala tu hole Jehova nokukala tu tonde shoka e tonde. (Eps. 97:10) Otwa nyanyukwa wo molwaashoka ohatu vulu okuhiya yalwe ya mone uuwanawa ‘mowino’ yashili. Otwa fa aapiya mboka taya “igidha muule wopombanda moshilando: ‘Ngoka gwanathangwa ne ye huka.’” Uuwanawa mboka tatu mono mo nosho wo mboka taya pulakene kawu shi owala wongashingeyi. Otawu kalelele notawu tu ningitha tu ‘kale nomwenyo’ sigo aluhe sho tatu ‘endeni momapola goondunge.’ — Omayel. 9:3, 4, 6.

19. Metsokumwe nOmuuvithi 12:13, 14, otu na okukala twa tokola toko okuninga shike? (Tala wo oshimpungu “ Etilokalunga ohali tu etele uuwanawa.”)

¹⁹ Lesha Omuuvithi 12:13, 14. Etilokalunga lyetu nali tsikile okugamena omitima dhetu noku tu kwathela tu kale twa yogoka pamikalo nokukala popepi naJehova, unene tuu sho tu li momasiku ngaka gahugunina ga kolokosha. Etilo ndyoka otali ke tu kwathela tu tsikile okuhiya oyendji ngaashi tashi vulika, ya konge “owino” yashili nokumona uuwanawa muyo.