Onda valwa mo 22 Desemba 1929 moNoville, okamukunda hoka ke na oofaalama dhi li omugoyi ke li popepi noshilando Bastogne, moBelgian Ardennes. Onda li handi kala nda nyanyukwa pamwe naavali yandje mofaalama, sho nda li okanona. Ngame nokandenge kandje, Raymond, otwa li hatu kanda oongombe dhaandjetu esiku kehe, nokukwathela niilonga yomepya. Aantu ayehe momukunda gwetu oya li haya longele kumwe nokukwathelathana.

Aavali yandje, tate Emile nameme Alice oya li aakatoolika ya pwila mo omutse nothingo. Oya li haya yi kEmisa Osoondaha kehe. Ihe lwomo 1939, aakokolindjila ya za koIngilanda oye ya momukunda gwetu noya li ya pula tate a inyolithe a kale ha mono oshifo shOshiingilisa hashi ithanwa Consolation (ngashingeyi Penduka mo!). Tate okwa li a mono kutya ndjino oyo oshili nokwa tameke okulesha Ombiimbeli. Sho a etha po okuya kEmisa, aashinda, mbono ya li ookuume ke, oya tameke oku mu pataneka. Oya thiminike tate a kale Omukatoolika, nolundji oya li haya tsu oompata naye.

Onda li handi kala nda geya nayi sho aashinda taya thiminike tate noonkondo. Shono osha li sha ningitha ndje ndi galikane kuKalunga kondandalunde, a kwathele tate, ngaashi nda zi noku shi popya petameko. Omutima gwandje ogwa li tagu hunga kenyanyu, sho aashinda ya etha po okupataneka tate. Onda li nda tompwa kutya Jehova oye Kalunga ngoka ha “uvu omagalikano.”

Mo 10 Mei 1940, etanga lyaNazi moNdowishi olya ponokele Belgium, shoka sha ningitha aantu oyendji ya ye ontuku. Yaandjetu atuhe otwa yi ontuku kuumbugantu waFulaanisa. Mondjila otwi iyadha pomahala gomalugodhi, mpoka aakwiita yaNdowishi noyaFulaanisa taya umbathana.

Sho twa galukile kofaalama, otwa adha konyala iinima yetu ayihe ya yakwa po. Ombwa yetu Bobbie,  oyo owala ya li mo tayi tu hambelele. Oonkalo ndhoka odha ningitha ndje ndi ipule kutya omolwashike ku na iita nokumona iihuna?

Pethimbo mpono, otwa li twa mono uuwanawa metalelopo lyomumwatate Emile Schrantz, a ngoka a li omukuluntugongalo nomukokolindjila omudhiginini. Okwa li a yelithile ndje nawa kutya omolwashike hatu mono iihuna, nokwa yamukula wo omapulo gandje galwe kombinga yonkalamwenyo. Shoka osha ningitha ndje ndi kokeke uukuume wopothingo naJehova nokukala nda tompwa kutya oku li Kalunga omunahole.

Manga nokuli iita inaayi hula, aanegumbo yaandjetu otwa kala hatu kwatathana olundji naamwatate. MuAuguste 1943, omumwatate Jose Nicolas Minet, okwa li e ya oku tu pa oshipopiwa kofaalama yetu. Okwa li a pula kutya “olye a hala okuninginithwa?” Ngaye natate otwa ganeke. Otwa li twa ninginithwa mokamulonga okashona ke li popepi nofaalama yetu.

MuDesemba 1944 etangakwiita lyaNdowishi olya li lya tameke Iita Iitiyali yUuyuni muEuropa lyokuuninginino, mbyono hayi ithanwa “olugodhi lwaBulge. Otwa li hatu zi popepi nehala lyolugodhi, nuule womwedhi lwaampono otwa kala twa holama mela lyokohi yevi li li megumbo lyetu. Esiku limwe sho nda zi megumbo ndi ka pe iinamwenyo, aakwiita oya li ya umbu ooshela e tadhi gwile mofaalama yetu e tadhi fugula ko iipeleki kegumbo. Omukwiita gumwe gwaAmerika, ngoka a li popepi noshigunda, okwa igidha muule ta ti, “Mbeta!” Onda matuka e tandi mbete popepi naye, nokwa tula egala lye lyombaashiya komutse gwandje a gamene ndje.

Konima yiita otwa kala tu na ekwatathano negongalo lyomoLiège, ndyoka lye tu gama kuumbangalantu, li li ookilometa 90 lwaampono okuza paandjetu. Konima yethimbo, otwa li twa vulu okutota po okangundu kokukonakona moBastogne. Onda tameke okulonga mongeshefa yokutaamba iifendela, nonda li nda mono ompito yokwiilongela uutseyiveta. Lwanima, onda li nda mono iilonga mombelewa yomoshitopolwa yepangelo. Mo 1951, otwa li twa unganeke oshigongi shoshikandjo oshishona moBastogne. Opwa li aantu tayi ihilile pethele, mwa kwatelwa omumwameme, omukokolindjila gwondjigilile omulaadhi, Elly Reuter. Okwa hingi ombasikela uule wookilometa 50 a thike  koshigongi. Lwanima, otwa tameke okweendelathana e tatu yalekathana. Elly okwa li a yakula ombapila yehiyo a ye kOsikola yaGilead koAmerika. Ihe okwa li a nyolele koombelewa dhetu oonene muuyuni, a yelithe kutya omolwashike itaa vulu okuya. Omumwatate Knorr, ngoka a li ta kwatele komeho pethimbo ndyoka, okwa galula ontumwafo ye nombili kutya otashi vulika sikulimwe a ka hite Osikola yaGilead pamwe nomusamane gwe. Otwa hokana muFebuluali 1953.

Omumvo ogwo tuu ngoka, ngame nomukulukadhi gwandje, Elly, otwa li twa yi koshigongi shotango shoshikandjo, shono sha li sha ningilwa mokapale kaYankee, moNew York. Manga tu li hoka, onda tsakanene nomumwatate, ngono a li a monene ndje iilonga iiwanawa, nokwa li a hala ndi tembukile koAmerika. Konima sho twa kala nokugalikana kombinga yasho, otwa tokola kutya itatu vulu okukala moAmerika, notwa shuna koBelgium tu ka yambidhidhe okangundu okashona kaauvithi ye li omulongo lwaampono moBastogne. Omumvo gwa landula ko otwa li twa mono okanona kokamati, notwe ka luku Serge. Shiyemateka, konima yoomwedhi heyali, Serge okwa kwatwa kuuvu e ta si. Otwa li topolelathana naJehova oluhodhi lwetu megalikano, notwa li twa hekelekwa ketegameno lyeyumuko.

MuKotoba 1961, onda li nda mono iilonga yopakathimbo mbyoka ya li ya pitike ndje ndi kokole ondjila. Esiku olyo tuu ndyono, onda li nda dhengelwa ongodhi okuza koshitayimbelewa shaBelgium. Oya li ya pula ndje ngele otandi vulu okutameka okulonga ndi li omutonatelishikandjo. Onda pula nda ti: “Itatu vulu okulonga tu li aakokolindjila manga inaatu pewa oshinakugwanithwa shono?” Aamwatate oya ti kutya otatu vulu. Konima sho twa kala aakokolindjila oomwedhi dhi li hetatu, otwa tameke iilonga yuutonatelishikandjo muSeptemba 1962.

Konima sho twa kala omimvo mbali miilonga yuutonatelishikandjo, otwa hiywa tu ka longe koBetel, moBrussels. Otwa tameke okulonga hoka muKotoba 1964. Oshinakugwanithwa shika oshipe oshe tu etela omalalekonuuyamba ogendji. Konima sho omumwatate Knorr a talele po oshitayimbelewa shetu mo 1965, onda li nda kumwa sho nda langekwa po ndi li omupiya gwoshitayimbelewa. Lwanima, ngame naElly otwa li twa hiywa tu ka hite ongundu onti-41 yOsikola yaGilead. Shono omumwatate Knorr a li a popi omimvo 13 dha ka pita, osha gwanithwa. Konima sho twa pewa oonzapo, otwa shuna koBetel yaBelgium.

Uule womimvo onda kala tandi longitha ontseyo ndjoka ndi na yuutseyiveta, ndi popile uuthemba woshigwana shaKalunga shi mu longele sha manguluka muEuropa nomuuyuni awuhe. (Fil. 1:7) Shono osha li sha ningitha ndje ndi popye naanambelewa okuza miilongo yi vulithe po 55, mono iilonga yetu ya ngambekwa, nenge ya indikwa. Pehala lyoku ya lombwela kutya ondi li omutseyiveta, onda li handi ya lombwele kutya ondi li “omupiya gwaKalunga.” Onda li aluhe handi kongo ewiliko kuJehova megalikano, molwaashono ondi shi kutya “omutima gwomukwaniilwa [nenge gwomupanguli] ogu li miikaha yOmuwa ngaashi  omikanka dhomeya; ote gu gameke hoka a hala.” — Omayel. 21:1.

Natango otandi dhimbulukwa oonkundathana dhetu noshilyo shomutumba gwopashigwana gwaEuropa. Konima sho nda kala iikando oyindji tandi kambadhala ndi popye naye, lwanima okwa ka zimina tu tsakanene. Okwa ti: “Otandi ku pe owala ominute ntano, noitandi ka gwedha ko nando omunute gumwe.” Onda li nda sizimaneke omutse gwandje tandi galikana. Oshilyo shomutumba gwopashigwana osha pula ndje kutya otandi ningi shike, sha tila. Onda yelula omutse gwandje e tandi ti: “Otandi pandula Kalunga, molwashoka ngoye owu li gumwe gwomaayakuli ye.” Okwa pula ndje a ti: “Owa hala okutya ngiini?” Onde mu ulukile Aaroma 13:4. Shaashi okwa li Omuprotestande, ovelise ndjika yOmbiimbeli oya li ya gumu omutima gwe. Oshizemo osha li shini? Okwa ti nandi popye naye uule wetatawili, noonkundathana dhetu odha enda nawa lela. Okwa ti kutya okwa simaneka iilonga yetu.

Oshigwana shaJehova osha kala uule womimvo tashi kondjele uuthemba washo wopaveta moEuropa kombinga yokwaakutha ombinga mopolotika, okuputudha aanona, okugandja iifendela nosho wo tuu kombinga yiinima yilwe. Onda li nda kutha ombinga miipotha oyindji, nonde shi imonena nkene Jehova e tu kwathela tu pondole notu sindane. Oonzapo dhaJehova odha sindana iipotha ya konda pe 140 mOmpangu yUuthemba wOmuntu yaEuropa.

Mo 1990 nasha, onda longo pamwe nomumwatate Philip Brumley, a za koombelewa dhetu oonene muuyuni nosho wo pamwe nomumwatate Valter Farneti, a za koItalia, tu kwathele aamwatate moKuba, moka iilonga yetu ya indikwa, opo ya pewe emanguluko lyokulongela Jehova. Onda nyolele ontumwafo omukalelipo gwoshilongo shaKuba, moBelgium, nonda li nda tsakanene nomulumentu gumwe omunambelewa gwopombanda a ungaunge noshipotha shetu. Esiku lyotango twa tsakanena, katwa li twa vulu okukandula po okwaauvathana hoka kwa ningitha epangelo li indike iilonga yetu.

Konima sho twa pula Jehova e tu wilike okupitila megalikano, otwa pula epitikilo tu tume Oombiimbeli 500 koKuba, notwa li twe li pewa. Oombiimbeli odha thiki nawa e tadhi pewa aamwatate, onkee ano otwa li twa thiki pehulithodhiladhilo kutya Jehova ota laleke nuuyamba oonkambadhala dhetu. Otwa ka pula ishewe epitikilo tu tume Oombiimbeli 27 500 dha gwedhwa po. Otwa li twa pewa epitikilo natango. Onda li nda nyanyukwa sho twa kwathele aamwatate naamwameme moKuba ya kale ye na Oombiimbeli dhawo dhopaumwene.

Onda talela po Kuba lwiikando oyindji ndi ka popye naakwanepangelo, opo ya pitike iilonga yetu yi kale paveta. Sho nda kala tandi ungaunga noshinima shono, osha kwathela ndje ndi kale ndi na ekwatathano ewanawa naakwanepangelo oyendji.

Mo 1994 aantu ya konda po 1 000 000 oya li ya sile momadhipago gakiinahenda gAatutsi moRwanda, ngoka ga li pokati komihoko mbali. Shiyemateka, aamwatate naamwameme yamwe nayo oya li ya dhipagwa. Opwa li ongundu yaamwatate, ndjoka ya langekwa po nziya yi ka gandje iikwatha kaamwatate naamwameme.

Sho ongundu yetu ya thiki moKigali, oshilandopangelo shaRwanda, otwa adha etungo lyombelewa yokutoloka nosho wo etungo moka hamu thikile iileshomwa yetu ga yahagulwa, ga nyanyangwa nooholo. Otwa kundana oonkundana oombwiinayi kutya aamwatate naamwameme oya li ya dhipagwa nomakatana. Otwa uvu wo omahokololo omawanawa nkene aamwatate yomihoko ndhoka tadhi dhipagathana, ya ulukilathana ohole yopaKriste. Oshiholelwa shimwe, otwa li twa tsakanene nomumwatate Omututsi, ngoka a li a holekwa kaanegumbo yAahutu kohi yevi uule womasiku 28. Pethimbo lyokugongala moKigali, otwa li hatu hekeleke pambepo aamwatate naamwameme ya kondo po 900.

Okuza mpono otwa taaguluka oongamba dhaZaire (Orepablika yaKongo) tu ka konge Oonzapo dhaJehova odhindji ndhoka dha taukila mookamba dhoontauki moshilando shedhina Goma. Otwa kala nokukonga, ihe aamwatate inatu ya mona. Onkee otwa galikana Jehova tatu mu pula e tu wilike tu mone mpoka ye li. Opo tu li po, otwa mono omuntu ta ende a uka kutse, notwe mu pula ngele oku shi yamwe yomOonzapo dhaJehova. Okwa yamukula a ti: “Ngaye Onzapo. Otandi vulu oku mu fala kokomitiye yokugandja omakwatho.” Konima sho twa kundathana nokomitiye yokugandja omakwatho, otwa gandja ehekeleko lyopambepo koontauki dhi li 1 600 lwaampo. Otwe ya leshele wo ontumwafo ndjoka ya za kOlutuwiliki. Oya li ya gumu omitima dhaamwatate naamwameme, sho ye ya shilipaleke tayi ti: ‘Olutuwiliki otalu kala noku mu kwatela momagalikano. Otu shi kutya Jehova ke na siku e ke mu thige po.’ Oohapu ndhoka dhi li montumwafo ndjoka odhoshili, oshoka kunena moRwanda omu na Oonzapo dhaJehova dha konda po 30 000, tadhi longele Jehova dha nyanyukwa.

Mo 2011 onda silwa omukulukadhi gwandje, meme Elly, ngoka twa kala naye uule womimvo 58 mondjokana. Onda li nda lombwele Jehova megalikano nkene ndi uvite, nokwa hekeleke ndje. Shimwe ishewe, onda li nda hekelekwa, sho nda kala tandi uvithile aantu ooyakwetu oonkundana ombwanawa yUukwaniilwa.

Ngashingeyi ondi na omimvo 90 nasha, ihe ohandi kutha ombinga miilonga yokuuvitha oshiwike kehe. Onda nyanyukwa sho tandi kwathele Oshikondo shIikwaveta moshitayimbelewa shaBelgium. Ondi uvite wo nawa sho tandi hokololele yalwe oshimoniwa shandje nosho wo sho handi ningile aagundjuka omatalelopo guusita moBetel.

Ngashingeyi opwa pita omimvo 84, sho nda li nda galikana kuJehova oshikando shandje shotango. Osha li etameko ewanawa lyonkalamwenyo yandje ndjoka lya hedhitha ndje popepi naye. Onda pandula noonkondo sho Jehova a kala nokupulakena komagalikano gandje. — Eps. 66:19. b