OSHITOPOLWA SHOKUKONAKONWA 23
EIMBILO 28 Okukala kuume kaJehova
Jehova okwe tu hiya tu kale aayenda ye
‘Etsali lyandje otali ka kala puyo, notandi ka kala Kalunga kawo.’ — HES. 37:27, OB-1954.
SHOKA TATU KA ILONGA
Otatu ka ilonga nkene tu na okukokeka olupandu lwetu lwokupandula Jehova, sho he tu hiya tu kale aayenda metsali lye lyopathaneko nosho wo sho he tu sile oshimpwiyu tu li aayenda ye.
1-2. Uuthembahenda wuni Jehova a pa aalongeli ye aadhiginini?
JEHOVA ota dhana onkandangala yini monkalamwenyo yoye? Otashi vulika wu tye, ‘Jehova oTate, Kalunga kandje naKuume kandje.’ Oku na wo omadhinasimaneko galwe ngoka tashi vulika wu mu ithane. Ihe mbela oho mu tala ko ngaa kutya nangoye okwe ku hiya wu kale omuyenda gwe?
2 Omukwaniilwa David okwa li a yelekanitha ekwatathano, ndyoka hali kala pokati kaJehova naapiya ye aadhiginini, nekwatathano ndyoka hali kala pokati komuhiyi gwaayenda naayenda ye. David okwa li a pula a ti: ‘Omuwa, olye ta pitikilwa okuya metsali lyoye? Olye ta pitikilwa okugalikanena kondundu yoye ondjapuki?’ (Eps. 15:1) Movelise ndjika otatu ilongo kutya otatu vulu okukala aayenda metsali lyaJehova, ano okukala ookuume ke. Mbela kashi li tuu uuthembahenda uunene okuhiywa kuJehova?
JEHOVA OKWA HALA TU KALE AAYENDA YE
3. Olye a li omuyenda gwotango gwaJehova, noya li ye uvitilathane ngiini?
3 Manga Jehova inaa tameka okushita iinima ayihe, okwa li oye awike. Ihe pompito yimwe, okwa li a hambelele Omwana gwe gwosheeli metsali lye lyopathaneko. Jehova okwa li a nyanyukwa noonkondo okutaamba ko omuyenda gwe gwotango metsali lye. Ombiimbeli otayi ti kutya Jehova okwa li ‘a nyanyukilwa’ Omwana gwe, nOmwana okwa li wo aluhe a nyanyukilwa ‘okudhana koshipala she.’ — Omayel. 8:30.
4. Oolye lwanima Jehova a ka hiya ya kale aayenda metsali lye?
4 Jehova okwa shiti ihe iishitwa yilwe yopambepo nokwe yi hiya wo yi kale aayenda ye. Aayengeli ye ohaya ithanwa ‘aana yaKalunga’ notaya popiwa kutya oya nyanyukwa okukala pamwe naYe. (Job 38:7; Dan. 7:10) Uule womimvo odhindji, manga Kalunga inaa shitila ko aantu kombanda yevi, iishitwa yopambepo oyo owala ya li hayi panga uukuume naye. Lwanima, okwa tamununa mo etsali lye a kwatele mo aantu kombanda yevi. Konima yethimbo, aantu ngaashi Enok, Noa, Abraham nosho wo Job oya kala yamwe yomaayenda mboka. Aalongelikalunga mboka yashili oya li ya popiwa kutya ookuume kaKalunga, nenge kutya ‘oya ende pamwe naye.’ — Gen. 5:24; 6:9; Job 29:4; Jes. 41:8.
5. Oshike tatu vulu okwiilonga mehunganeko ndyoka tali adhika muHesekiel 37:26, 27?
5 Momukokomoko gwomathelemimvo, Jehova okwa li a tsikile nokuhiya ookuume ke ya ninge aayenda ye. (Lesha Hesekiel 37:26, 27.) Pashiholelwa, otatu ilongo mehunganeko lyaHesekiel kutya Kalunga okwa hala shili aapiya ye aadhiginini ya kale ye na ekwatathano lyopothingo naye. Okwa uvaneka okuninga ‘ehangano lyombili nayo.’ Ehunganeko ndyoka otali popi ethimbo, sho mboka ye na etegameno lyomegulu nosho wo mboka ye na etegameno lyoku ka kala nomwenyo kombanda yevi taya ka kala ya hangana metsali lye lyopathaneko, ye li ‘oshigunda shimwe.’ (Joh. 10:16) Shoka otashi ningwa ngashingeyi!
KALUNGA OHE TU SILE OSHIMPWIYU KUTYA NDUNO OTU LI PENI
6. Ongiini gumwe ta vulu okuninga omuyenda metsali lyaJehova, na mbela etsali lye otali adhika peni?
6 Pethimbo lyOmbiimbeli, etsali olya li ehala moka omuntu ta vulu okuvululukilwa mo nokukala a gamenwa konkalo yombepo. Omuyenda metsali lyagumwe oha kala a tegelela ngoka e mu hiya e mu yakule nawa. Uuna twa iyapulile Jehova, ohatu ningi aayenda metsali lye. (Eps. 61:4) Ohatu tyapula iikulya yopambepo oyindji nosho wo uukuume naamboka ye li wo aayenda yaJehova. Aantu muuyuni awuhe otaya vulu okukala aayenda metsali lye. Otashi vulika wa yile koshilongo shilwe, e to kala poshigongi shoshitopolwa shi ikalekelwa nowa tsakanene ko nayalwe mboka ya nyanyukwa okukala aayenda metsali lyaKalunga. Etsali ndyoka otali vulu okwaadhika kehe mpoka aalongeli ye aadhiginini ye li. — Eh. 21:3.
7. Otu shi shi ngiini kutya aantu mboka ya sa aadhiginini, oye li natango aayenda metsali lyaJehova? (Tala wo ethano.)
7 Ongiini kombinga yaapiya yaKalunga, mboka ya sa nale? Mbela otatu vulu okuthika pehulithodhiladhilo kutya nayo oye li natango aayenda metsali lyaJehova? Osho lela. Omolwashike tatu tile ngawo? Omolwaashoka Jehova ote ya dhimbulukwa nawa, onkene kuye oya fa natango ye na omwenyo. Jesus okwa yelitha a ti: “Moses naye okwa holola nokuli mehokololo kombinga yoshihwa sheno kutya aasi otaya ka yumudhwa, sho a popi kutya Jehova ‘oKalunga kaAbraham, Kalunga kaIsak naKalunga kaJakob.’ Oye Kalunga kaanamwenyo, ihe ke shi Kalunga kaasi, oshoka ayehe okwe ya tala ko ye na omwenyo.” — Luk. 20:37, 38.
Nokuli naapiya aadhiginini yaKalunga, mboka ya sa nale, otaya vulu okutalika ko ye li aayenda metsali lye (Tala okatendo 7)
OMAUWANAWA NIINAKUGWANITHWA YOKUKALA AAYENDA YAJEHOVA
8. Aayenda yaJehova ohaya mono uuwanawa ngiini mokukala metsali lye?
8 Ngaashi owala etsali lyo lyene hali vulu okukala ehala lyokuvululukilwa nokugamena omuntu konkalo yombepo, etsali lyaJehova ohali gamene aayenda ye pambepo noku ya pa etegameno lyashili li na ko nasha nonakuyiwa. Ngele otwa kala popepi naJehova, Satana ita ka vula oku tu etela oshiponga tashi kalelele. (Eps. 31:23; 1 Joh. 3:8) Muuyuni uupe, Jehova ota ka tsikila okugamena ookuume ke aadhiginini pambepo noku ya gamena keso. — Eh. 21:4.
9. Jehova okwa tegelela aayenda ye ya ihumbate ngiini?
9 Oshi li lela uuthembahenda uunene okukala omuyenda metsali lyaJehova, opo wu kale wu na ekwatathano lyopothingo naye notali tsikile. Mbela otu na okwiihumbata ngiini, ngele otwa hala okutsikila okukala aayenda metsali lyaJehova? Ngele owa hiywa kegumbo lyagumwe, oto ka kala wa hala okutseya shoka a tegelela wu ninge, opo wu mu nyanyudhe. Pashiholelwa, otashi vulika a kale a tegelela wu hule ko oongaku dhoye manga inoo ya megumbo lye, noto ke shi ninga nehalo ewanawa. Sha faathana, otwa hala okutseya shoka Jehova a tegelela kwaamboka ya hala okutsikila okukala aayenda metsali lye. Ohole yetu yokuhola Jehova ohayi tu inyengitha tu ninge ashihe shoka tatu vulu, opo tu ‘longe aluhe shoka she mu opalela.’ (Kol. 1:10) Odhoshili kutya Jehova okuume ketu, ihe otu shi wo kutya oye Kalunga ketu naTate yetu, ngoka a gwana okusimanekwa. (Eps. 25:14) Tu na oshinima shoka momadhiladhilo, natu kale aluhe tu na etilokalunga nokatu na okudhimbwa nando kutya oye lye. Ngele otwe mu simaneka otashi ke tu kwathela tu yande eihumbato ndyoka tali mu yemateke. Otwa halelela okweenda ‘meifupipiko naKalunga ketu.’ — Mika 6:8.
NKENE JEHOVA A ULIKE KUTYA KE NA OKATONGO, SHO AAISRAELI YA LI MOMBUGA
10-11. Omukalo moka Jehova a li a ungaunga nAaisraeli mombuga yaSinai ogwa ulike ngiini kutya ke na okatongo?
10 Jehova iha ungaunga naayenda ye nokatongo. (Rom. 2:11) Shoka otatu vulu oku shi mona momukalo moka a li a ungaunga nAaisraeli mombuga yaSinai.
11 Konima sho Jehova a hupitha oshigwana she muupika waEgipiti, okwa langeke po aayambi ya longe metsalihangano lye. Aalevi oya li ya pewa oshinakugwanithwa shokusila oshimpwiyu iilonga yilwe yometsali ndyoka eyapuki. Mbela Jehova okwa li a sile oshimpwiyu nawa mboka haya longo metsalihangano, nenge haya zi popepi nalyo shi vulithe yalwe? Hasho nando! Jehova ke na okatongo.
12. Jehova okwa li a ulike ngiini kutya ke na okatongo, sho Aaisraeli, opo ya ningi oshigwana she? (Eksodus 40:38) (Tala wo ethano.)
12 Kehe gumwe okwa li ta vulu okukala kuume kaJehova kopothingo kutya nduno oha longo metsalihangano, nenge oha zi kokule nalyo. Pashiholelwa, Jehova okwa li a shilipaleke kutya oshigwana ashihe otashi vulu okumona oshikumithalonga shoshikogo nosho wo shomulilo tagu yeta kombanda yetsalihangano. (Lesha Eksodus 40:38.) Uuna oshikogo sha tameke okwiinyenga sha uka kombinga yilwe, nokuli naamboka ya unga oontanda kokule netsalihangano oya li haya vulu oku shi mona, e taya gongele iinima yawo nokutembudha ootenda dhawo, opo ya ye pamwe noshigwana ashihe. (Num. 9:15-23) Kehe gumwe okwa li ha vulu okuuva omawi gomuule gomankuma gaali goshisiliveli, ngoka ga li haga londodha kehe gumwe kutya okwa pumbwa okutembuka. (Num. 10:2) Osha yela kutya okukala ho zi popepi netsalihangano kasha li tashi ti kutya omuntu ngoka oku na ekwatathano lyopothingo naJehova, e vule mboka haya zi kokule nalyo. Mepingathano naashoka, Omuisraeli kehe okwa li ta vulu okukala omuyenda gwaJehova nokukala nuushili kutya Jehova ote ke mu wilika noku mu gamena. Sha faathana, nokunena kutya nduno otu li peni muuyuni, Jehova oku tu hole, ohe tu sile oshimpwiyu nohe tu gamene.
Elongekidho lyaKalunga li nasha netsalihangano otali ulike kutya ke na okatongo (Tala okatendo 12)
IIHOLELWA YOKUNENA MBYOKA TAYI ULIKE KUTYA JEHOVA KE NA OKATONGO
13. Omomukalo gumwe guni Jehova ha ulike kutya ke na okatongo kunena?
13 Yamwe yomaalongeli yaKalunga kunena, ohaya zi popepi noombelewa oonene, nenge niitayimbelewa yOonzapo dhaJehova. Yalwe omo nokuli haya longele. Onkene, aantu mboka ohaya longo iilonga oyindji yi ili noyi ili mbyoka hayi longwa mo nohaya endathana naamboka haya kwatele komeho. Yamwe oye li aatonateli aayendi, nenge haya longo iilonga yilwe yethimbo lyu udha yi ikalekelwa. Ngele ngashingeyi ku li miilonga yethimbo lyu udha, kala wu na uushili kutya nangoye owu li metsali lyaJehova nonokutya oku hole aayenda ye ayehe. Jehova oku ku shi pauhandimwe nohe ku pe ashihe shoka wa pumbwa. (1 Pet. 5:7) Aapiya yaKalunga ayehe ohaya mono iikulya yopambepo, ewiliko nosho wo egameno ndyoka ya pumbwa.
14. Omomukalo gulwe guni Jehova e li omuyakuli gwaayenda ha ulike kutya ke na okatongo?
14 Oshiholelwa shilwe shoka tashi ulike kutya Jehova omuyakuli gwaayenda kee na okatongo, osho kutya okwe shi ninga tashi wapa kaantu muuyuni awuhe ya vule okukala haya lesha Ombiimbeli. Petameko, Omanyolo Omayapuki oga li ga nyolwa momalaka gatatu ngaashi: Oshihebeli, Oshiaramea nOshigreka. Mbela mboka haya vulu okulesha Ombiimbeli momalaka ngoka, oyo owala ye na ekwatathano lyopothingo naJehova, ye vule mboka ihaaya vulu oku ga lesha? Hasho nando. — Mat. 11:25.
15. Uumbangi wuni tawu ulike kutya Jehova ke na okatongo? (Tala wo ethano.)
15 Jehova ine tu hiya tu kale ookuume ke, molwaashoka andola twa mona elongo lyopombanda, nenge tu shi omalaka moka Ombiimbeli ya li ya nyolwa petameko. Ina gandja owala uunongo kwaamboka ya mona elongo lyopombanda, ihe uunongo we otawu vulu okumonika kaantu ayehe muuyuni kutya nduno aalongwantu, nenge hasho. Oohapu dhe dha nwethwa mo, Ombiimbeli, odha tolokwa momalaka ogendji, nomolwaashoka aantu ohaya vulu okumona uuwanawa momalongo gadho nosho wo okwiilonga nkene ye na okuninga ookuume ke. — 2 Tim. 3:16, 17.
Ongiini okutolokwa kwOmbiimbeli momalaka ogendji taku ulike kutya Kalunga ke na okatongo? (Tala okatendo 15)
KALA WA ‘OPALELA’ JEHOVA
16. Sha ikolelela kIilonga 10:34, 35, ongiini tatu vulu okutsikila okukala twa opalela Jehova?
16 Oshi li uuthembahenda uunene okuhambelelwa kuJehova tu li aayenda ye, metsali lye lyopathaneko. Omunambili, omunahole lela nomuyakuli a dhenga mbanda. Shimwe ishewe, ke na okatongo, ohe tu taamba ko kutya nduno otu li peni, eputuko lyetu olini, otwa longwa shi thike peni, otwomoludhi luni, otwomomuhoko guni, otu na omimvo dhi thike peni nenge uukashikekookantu wetu owuni. Ihe nando ongawo, oha taamba ko owala mboka haya gwanitha po omithikampango dhe oyo ya kale aayenda ye. — Lesha Iilonga 10:34, 35.
17. Openi tatu vulu okwaadha uuyelele wa gwedhwa po kombinga yokukala omuyenda metsali lyaJehova?
17 Ngaashi sha nyolwa mEpisalomi 15:1, David okwa li a pula omapulo taga landula a ti: ‘Omuwa, olye ta pitikilwa okuya metsali lyoye? Olye ta pitikilwa okugalikanena kondundu yoye ondjapuki?’ Omupisalomi okwa li a wilikwa kuKalunga a vule okuyamukula omapulo ngoka. Oshitopolwa tashi landula otashi ka kundathana iitegelelwa yontumba yokondandalunde, mbyoka tu na okugwanitha po, opo tu tsikile okukala twa taambiwa ko kuJehova.
EIMBILO 32 Gama kuJehova
