Omapulo ga za kaaleshi
Mbela oohapu ‘Omuwa ote ke ya gamena,’ ndhoka dhi li mEpisalomi 12:7, odha ukithwa kwaamboka taya ‘thiminikwa,’ mboka ya popiwa (movelise 5), nenge ‘okomauvaneko gOmuwa’ ngono ga popiwa (movelise 6)?
Oshikundathanwa shEpisalomi ndyoka otashi ulike kutya ovelise ndjoka oya ukithwa kaantu.
Episalomi 12:1-4 otali popi kutya “aayuuki inapu thigwa nando ogumwe.” Opo nduno mEpisalomi 12:5-7, okwa ti:
‘“Ngashingeyi otandi ya,” Omuwa osho ta ti,
“Oshoka omapongo oga thiminikwa
Naatidhaganwa otaa tongo kuuwehame.
Otandi ke ya pa egameno ndyoka ye li yuulukwa.”
Omauvaneko gOmuwa oge shi kwiinekelwa;
Oga yela ga fa oshisiliveli sha yelithwa momulilo luheyali.
Omuwa, tu gamena aluhe,
Ngu u tu keelela kaantu ya tya ngeyi.’
Ovelise 5 otayi popi shoka Jehova a ti shi na ko nasha naathiminikwa. Ote ke ya gamena.
Ovelise 6 oya gwedha ko ya ti kutya ‘omauvaneko gOmuwa oge shi kwiinekelwa, ga yela ga fa oshisiliveli.’ Aakriste aadhiginini otaya tsu kumwe noohapu ndhoka. — Eps. 18:30; 119:140.
Ngashingeyi tala ovelise ya landula ko, Episalomi 12:7: “Omuwa, tu gamena aluhe, ngu u tu keelele kaantu ya tya ngeyi.” Mbela oshitya “tu” osha ukithwa koolye?
Molwashoka ovelise 7 oya landula ovelise 6, moka mwa popi “omauvaneko gOmuwa,” yamwe otashi vulika ya thike pehulithodhiladhilo kutya oshityapeha “tu” osha ukitha kwaashoka Kalunga a popya. Otu shi kutya Kalunga okwa gamena Ombiimbeli, nonando opwa li aapataneki mboka taya kambadhala ya mana mo, ye yi hanagula po nokukeelela aantu kaye yi longithe. — Jes. 40:8; 1 Pet. 1:25.
Ihe nonando ongawo, shoka sha popiwa movelise 5 oshoshili. Jehova okwa kala nota tsikile okukwathela nokuhupitha ‘omapongo naathiminikwa.’ — Job 36:15; Eps. 6:4; 31:1, 2; 54:7; 145:20.
Mbela oshityapeha “yo” movelise 7 osha ukithwa koolye?
Ngele otwa tala nawa koshikundathanwa shEpisalomi ndyono, osha yela kutya oshitya “yo” osha ukithwa kaantu.
Petameko lyEpisalomi 12:1, 2, David okwa li ta popi kombinga ‘yaayuuki,’ mboka ya li ya fundjwa kaakolokoshi. Konima yaashono, otatu adha mo uutumbulilo mboka tawu ti Jehova ote ya okukatukila onkatu mboka haya popi iinima iiwinayi. Episalomi otali tu shilipaleke kutya otatu vulu okukala twa inekela Kalunga a katuke pehala lyetu, molwaashoka omauvaneko ge oge shi okwiinekelwa.
Onkee ovelise 7 otayi ti kutya Jehova ote ke ya wilika nokuya “gamena,” ano omapongo, ngoka ge li iihakanwa yaakolokoshi.
Oshityapeha “yo” osha longithwa movelise ndjono metsokumwe nookopi dhomanyolo ge shi okwiinekelwa gOshihebeli. O-Septuagint yOshigreka oya longitha uutumbulilo “tse” iikando iyali movelise 7, ya ukithwa kaantu aadhiginini mboka ye li omapongo naathiminikwa. Hugunina, ovelise 7 oya ti kutya Kalunga ota ka gamena “kehe gumwe” gwomwaamboka aadhiginini “kepipi ndika,” lyaamboka haya humitha komeho uuwinayi. (Eps. 12:7, 8, NW) Ovelise 7 mOshiaramea otayi lesha tayi ti: “OMUWA, oto ka gamena aayuuki sigo aluhe, kepipi ndika ekolokoshi. Aakolokoshi ohaya endagula ya fa ehundju, ndyoka hali thipi ombinzi yoyana yaantu.” Shika otashi gandja uumbangi wa gwedhwa po mboka tawu ulike kutya Episalomi 12:7 itali popi kombinga yomauvaneko gOmuwa.
Omolwomatompelo ngono, ovelise ndjono otayi gandja etegameno ‘kaantu aayuki,’ ano kutya Kalunga ota ka katuka onkatu.
