Kala wu na uupambepo wa kola, sho to longele Jehova moshitopolwa moka hamu popiwa elaka ekwiilongo
“Oohapu dhoye otandi dhi pungula momutima gwandje.” — Eps. 119:11.
OMAIMBILO: 142, 92
1-3. (a) Oshike tu na okupititha komeho kutya nduno oonkalo dhetu odha tya ngiini? (b) Omashongo geni gokondandalunde ga taalela mboka tayi ilongo elaka epe, naashika osha pendutha omapulo geni? (Tala kethano lyopetameko.)
KUNENA Oonzapo dhaJehova omayuvi ohadhi kutha ombinga megwanitho lyehunganeko lyokuuvithila “omihoko adhihe, omaludhi agehe, omalaka agehe niigwana ayihe” onkundana ombwanawa. (Eh. 14:6) Mbela oto ilongo elaka lilwe? Mbela owu li omutumwa nenge wa tembukila koshilongo hoka ku na ompumbwe onene? Mbela owa tameka okukala ho yi kokugongala hoka haku ningwa melaka ekwiilongo moshilongo sheni?
2 Tu li aapiya yaJehova, atuhe otwa pumbwa okupititha komeho uupambepo wetu nosho wo waanegumbo lyetu. (Mat. 5:3) Eeno, omathimbo gamwe ohashi kala oshidhigu okukala tu na ekonakonombiimbeli lyopaumwene tali ti sha, molwaashoka ohatu kala twi ipyakidhila unene. Nonando ongawo, mboka taya longele miitopolwa moka hamu popiwa elaka ekwiilongo, oya taalela omashongo galwe ga gwedhwa po.
3 Kakele kokwiilonga elaka epe, mboka taya longele kiitopolwa hoka haku popiwa elaka ekwiilongo, oye na okukala ya shilipaleka kutya ohayi ipalutha pandjigilile noondya dha kola dhopambepo. (1 Kor. 2:10) Mbela ongiini taya vulu oku shi ninga, ngele kayu uvite ko elaka ndyoka tali popiwa megongalo? Omolwashike aavali ye na okushilipaleka kutya Oohapu dhaKalunga odha adha omitima dhomaluvalo gawo?
SHOKA TASHI VULU OKUTULA UUPAMBEPO WETU MOSHIPONGA
4. Oshike tashi vulu okutula uupambepo wetu moshiponga? Gandja oshiholelwa.
4 Okwaavula kwetu okuuva ko Oohapu dhaKalunga melaka ekwiilongo, otaku vulu okutula uupambepo wetu moshiponga. Methelemumvo etitano K.E.N., Nehemia okwa koneke kutya aanona yamwe mboka ya li mokati kAajuda mboka ya zi kuBabilonia, kaya li taya vulu okupopya Oshihebeli. (Lesha Nehemia 13:23, 24.) Aanona mboka kaya li taya vulu okundhindhilikwa mo ye li oshigwana shaKalunga, molwaashoka kaya li yu uvite ko lela eityo lyOohapu dhaKalunga. — Neh. 8:2, 8.
5, 6. Aavali yamwe mboka ya tembukila kiitopolwa hoka haku popiwa elaka ekwiilongo oya ndhindhilika shike, nomolwashike?
5 Aavali yamwe mboka ya tembukila kiitopolwa hoka haku popiwa elaka ekwiilongo, oya ndhindhilika kutya aanona yawo ohaya ende taya kanitha ohokwe moshili. Aanona ihaya mono mo uuwanawa washa miitopolwa mbyoka hayi gandjwa pOshinyanga shUukwaniilwa, molwaashono ihaya kala lela yu uvite ko shoka tashi kundathanwa. Omumwatate Pedro, gwokoAmerika lyokUumbugantu, ngoka a tembukila koAustralia nuukwanegumbo we, okwa ti: “Uuna tatu popi kombinga yiinima yopambepo, otu na okuulika kutya otu hole oshili nosho wo kutya otu uvite ko shoka tatu ilongo noshi na oku tu inyengitha tu shi tule miilongo monkalamwenyo yetu.” [1] — Luke 24:32.
6 Uuna tatu lesha melaka ekwiilongo, omitima dhetu ihadhi kala naanaa dha gumwa ngaashi tatu lesha melaka ndyoka twa yama. Shimwe ishewe, uuna itaatu vulu okupopya nawa elaka ekwiilongo noku li uva ko, otashi vulu oku tu gwilila po pamadhiladhilo nopambepo. Onkee ano, sho tatu kambadhala okukaleka po ohokwe yetu yokulongela Jehova tu li koshitopolwa hoka haku popiwa elaka ekwiilongo, natu ninge ngaashi tatu vulu tu gamene uupambepo wetu. — Mat. 4:4.
OYA KALA NOKWIITUNGA PAMBEPO
7. Aababilonia oya li ya kambadhala ngiini okuningitha Daniel a taambe ko omuthigululwakalo gwawo nelongelokalunga lyawo?
7 Sho Daniel nookuume ke yatatu ya li muupongekwa, Aababilonia oya kambadhala oku ya longa omithigululwakalo dhawo nosho wo “elaka lyoshilongo” shawo. Shimwe ishewe, elenga ekuluntu ndyoka lya li tali ya longo, olye ya pe omadhina gOshibabilonia. (Dan. 1:3-7) Daniel okwa li hi ithanwa Beltshazzar, a lukilwa kalunga kAababilonia. Omukwaniilwa Nebukadnezzar otashi vulika a li a hala okuningitha Daniel a kale u uvite kutya Kalunga ke, Jehova, oku vulike koshikalunga shaBabilonia. — Dan. 4:8.
8. Oshike sha kwathele Daniel i itunge pambepo, sho e li muBabilonia?
8 Nonando Daniel okwa li ha pewa iikulya iitoye yomombala yomukwaniilwa, okwa li a “tokola ki inyateke” mokukala inee yi lya. (Dan. 1:8) Okwa kala hi itungu pambepo sho e li muBabilonia, mokukala ha konakona ‘omanyolo omayapuki’ melaka ndyoka a yama. (Dan. 9:2) Kungawo, nokonima yomimvo 70 ndhoka a kala muBabilonia, okwa kala natango e shiwikile edhina lye lyOshihebeli. — Dan. 5:13.
9. Ngaashi sha popiwa mEpisalomi 119, Oohapu dhaKalunga odha li dha kwathele ngiini omunyoli gwepisalomi ndyoka?
9 Omunyoli gwEpisalomi 119 okwa li a kwathelwa kOohapu dhaKalunga, opo a kale e na omukumo gwokukala a yooloka ko kuyalwe. Okwa li i idhidhimikile iikala yondhino mbyoka ya li yi niwe kaapangeli. (Eps. 119:23, 61) Natango okwa li a pungula oohapu dhaKalunga momutima gwe nokuvulika kudho. — Lesha Episalomi 119:11, 46.
KALA HO IPALUTHA PAMBEPO
10, 11. (a) Otu na okukala nelalakano lini, uuna tatu konakona Oohapu dhaKalunga? (b) Ongiini tatu vulu okwaadha elalakano ndyoka? Gandja oshiholelwa.
10 Nonando atuhe ohatu kala twi ipyakidhila unene niinakugwanithwa yetu yopaKriste nosho wo niilonga yokukonga omboloto, otwa pumbwa okukonga ethimbo lyokukonakona Ombiimbeli paumwene nolyokuninga elongelokalunga lyuukwanegumbo. (Ef. 5:15, 16) Elalakano lyetu inali kala owala lyokulesha omapandja ogendji nenge lyokwiilongekidhila owala omatyokosha, opo tu ka yamukule pokugongala. Otwa hala tu shilipaleke kutya Oohapu dhaKalunga odha adha omitima dhetu nodha koleka eitaalo lyetu.
11 Opo tu adhe elalakano ndyoka, otu na okukala nondjele mokukaleka momadhiladhilo oompumbwe dhayalwe nokudhiladhila kombinga yoompumbwe dhetu dhopambepo, uuna tatu konakona. (Fil. 1:9, 10) Uuna tatu ilongekidhile uukalele, okugongala kehe nenge iipopiwa, olundji ihatu kala tu wete twa pumbwa okutula miilonga shoka tatu lesha. Pashiholelwa, nonando omuteleki oha lolo iikulya ye manga inee yi gandja kaantu, ita vulu okukala owala ta hupile miikulya mbyoka ha lolo. Ngele okwa hala okukala e na uundjolowele, oku na okwiitelekela iikulya mbyoka tayi tungu olutu lwe. Sha faathana, otu na okukambadhala okwiipalutha pambepo niikulya mbyoka tayi tu tungu pambepo.
12, 13. Omolwashike oyendji mboka haya longo miitopolwa moka hamu popiwa omakala omakwiilongo haya mono uuwanawa mokukonakona pandjigilile momalaka gawo?
12 Aauvithi oyendji mboka haya longo miitopolwa moka mu na aantu haya popi omalaka omakwiilongo, oya mona kutya okukala haya konakona Ombiimbeli pandjigilile ‘melaka’ ndyoka ya yama, ohashi ya kwathele. (Iil. 2:8) Nokuli naatumwa oye shi mona kutya opo ya kale ya kola pambepo, sho taya longo kiilongo yilwe, itaya vulu okukala owala yi ikolelela kiikulya yopambepo mbyoka haya mono pokugongala.
13 Omuuvithi gwedhina Alain, ngoka a kala nokwiilonga elaka lyOshipersia konyala uule womimvo hetatu, okwe shi zimine a ti: “Uuna tandi ilongekidhile okugongalo mOshipersia, ohandi gandja owala eitulomo kelaka lyolyene. Omutima gwandje ihagu gumwa nando kiinima yopambepo mbyoka tandi lesha, molwaashoka ohandi gandja unene eitulomo kelaka. Onkee ano, ohandi kutha aluhe ethimbo li ikalekelwa ndi konakone Ombiimbeli niileshomwa yilwe melaka lyandje.”
SHILIPALEKA KUTYA OSHILI OYA GUMA OMITIMA DHAAMWOYE
14. Aavali oye na okushilipaleka shike, nomolwashike?
14 Aavali oye na okushilipaleka kutya Oohapu dhaKalunga odha guma omitima nomadhiladhilo goyana. Pashiholelwa, omumwatate Serge nomukadhi Muriel oya kala uule womimvo dhi vulithe pundatu, taya longele moshitopolwa moka hamu popiwa elaka ekwiilongo. Konima oya ndhindhilike kutya omwanamati gwomimvo 17 ka li we ha nyanyukilwa iinima yopambepo. Muriel okwa ti: “Omwanamati gwetu okwa li ha kala u uvite nayi, uuna tu uvitha melaka ekwiilongo, ihe okwa li e hole okuuvitha mOshifulaanisa, elaka ndyoka a yama.” Serge okwa yelitha a ti: “Sho twa mono kutya onkalo ndjika otayi imbi omwanamati gwetu a ninge ehumokomeho lyopambepo, otwa tokola tu shune kegongalo lyetu ekulu.”
Shilipaleka kutya oshili oya guma omitima dhaamwoye (Tala okatendo 14, 15)
15. (a) Iinima yini tashi vulika yi ningithe aavali ya shune komagongalo gawo omakulu, ngoka haga longitha elaka ndyoka oyana yu uvite ko nawa? (b) Aavali otaya kumagidhwa ya ninge shike muDeuteronomium 6:5-7?
15 Iinima yini tashi vulika yi ningithe aavali ya shune komagongalo gawo omakulu, ngoka haga longitha elaka ndyoka oyana yu uvite ko nawa? Shotango, oye na okutala ngele oye na ngaa ethimbo lya gwana nosho wo iilongitho ya gwana, ya kwathele oyana ya kale ye hole Jehova noku ya longa elaka ekwiilongo. Oshitiyali, otashi vulika ya mone kutya oyana kaye na we ohokwe miinima yopambepo nenge ihaya nyanyukilwa okulonga moshitopolwa moka hamu popiwa elaka ekwiilongo. Moonkalo ndhoka, aavali otashi vulika ya shune komagongalo ngoka haga longitha elaka ndyoka oyana yu uvite ko nawa sigo uupambepo wawo wa kolo. — Lesha Deuteronomium 6:5-7.
16, 17. Aavali yamwe oya pondola ngiini okulonga oyana iinima yopambepo, omanga ye li megongalo moka hamu popiwa elaka ekwiilongo?
16 Shimwe ishewe, aavali yamwe oya pondola okulonga oyana melaka lyawo, nonando ohaya ka gongala kegongalo nenge kongundu ndjoka hayi popi elaka ekwiilongo. Omumwatate Charles ngoka e na oyanakadhona yatatu ye li pokati komimvo 9 no 13, ohaya ka gongala kongundu yaapopi yelaka lyOshilingala. Okwa hokolola a ti: “Otwa tokola tu kale hatu konakona nayo nokuninga elongelokalunga lyuukwanegumbo melaka lyetu. Uuna tatu ningi iinima yilwe yopambepo notatu dhana omaudhano gontumba, otwa li hatu longitha elaka lyOshilingala, opo tu ya kwathele yi ilonge elaka momukalo tagu nyanyudha.”
Ninga oonkambadhala wi ilonge elaka lyomoshitopolwa nokukutha ombinga pokugongala (Tala okatendo 16, 17)
17 Omumwatate Kevin ngoka e na oyanakadhona yaali, gumwe oku na omimvo ntano nomukwawo hetatu, oha ningi ngaashi ta vulu, opo a kwathele oyana yu uve ko elaka ndyoka hali longithwa pokugongala. Okwa ti: “Tse nanekulu lyandje ohatu konakona noyanakadhona yetu mOshifulaanisa, elaka ndyoka ya yama. Otwi itulila po wo elalakano lyokukala hatu gongala kegongalo lyOshifulaanisa lumwe momwedhi, nuuna tu li mefudho ohatu yi kiigongi mbyoka hayi ningwa melaka lyetu.”
18. (a) Ekotampango lini tali adhika mAaroma 15:1, 2, tali vulu okukwathela aavali ya ninge etokolo lyomondjila, omolwuuwanawa woyana? (b) Omaetopo geni aavali yamwe ya gandja? (Tala enyolo lyopehulilo.)
18 Odhoshili kutya uukwanegumbo kehe owo wene wu na okutokola kutya oshike tashi ka kwathela oyana ya koke pambepo. [2] (Gal. 6:5) Omumwameme Muriel ngoka a tumbulwa metetekelo, okwa zimine kutya nonando ye nomulume oya li ya hala okulongela moshitopolwa moka hamu popiwa elaka ekwiilongo, oya tokola ya shune kegongalo lyawo ekulu, omolwuuwanawa womwanamati. (Lesha Aaroma 15:1, 2.) Omumwatate Serge naye okuuvite kutya oya ninga etokolo ewanawa. Okwa ti: “Okuza ngaa sho twa shuna kegongalo lyOshifulaanisa, omwanamati gwetu okwa humu komeho pambepo nokwa ninginithwa. Ngashingeyi oku li omukokolindjila gwondjigilile. Ota dhiladhila nokuli okushuna kongundu ndjoka hayi popi elaka ekwiilongo!”
ETHA OOHAPU DHAKALUNGA DHI NINGINE MOMUTIMA GWOYE
19, 20. Ongiini tatu vulu okuulika kutya otu hole Oohapu dhaKalunga?
19 Jehova okwa nyolitha Oohapu dhe Ombiimbeli momalaka ogendji, omolwohole ye, opo ‘aantu ayehe ya tseye oshili.’ (1 Tim. 2:4) Oku shi kutya aantu otaya vulu owala okugwanitha po ompumbwe yawo yopambepo, uuna taya lesha Oohapu dhe melaka ndyoka tali ya gumu komitima.
20 Kutya nduno oonkalo dhetu odha tya ngiini, otu na okukambadhala okwiipalutha niikulya ya kola yopambepo. Mokukala aluhe hatu konakona Omanyolo melaka ndyoka tali tu gumu komitima, otatu ka kaleka uupambepo wetu wa kola nosho wo wuukwanegumbo wetu. Otatu ku ulika wo kutya otwa lenga oohapu dhaKalunga. — Eps. 119:11.
