Owe shi tseya ngaa?

DHANA

Owe shi tseya ngaa?

Mbela pethimbo lyonale omuntu okwa li ngaa shili ha vulu okukuna omawu mepya lyamukwawo?

Epandja 1468 lyembo Digest ndyoka lya nyanyangidhwa komupangeli Justinian, olyo limwe lyomomapandja ngoka ge na uuyelele wiinima yopaveta yopethimbo lyonale

MUMATEUS 13:24-26, Jesus okwa ti: “Oshilongo shegulu osha fa omuntu a kunu ombuto ombwanawa mepya lye. Ihe manga aantu ya kotha, omutondi okwe ya nokwa kunu omawu mokati kiilya e ta yi. Ano omimeno sho dha koko nodha vala, omawu oga holoka wo.” Aanyoli yi ili noyi ili oya kala nokupula ngele eyele ndika olyoshili ngaa. Nonando ongawo, omanyolo gaRoma gopaveta gopethimbo lyonale ogu ulika kutya eyele ndyoka olyoshili.

Embwiitya limwe lyOmbiimbeli olya ti: “Okukuna omawu mepya lyomuntu, omolwonkone, osha li eyono pampango yaRoma. Ompango ndjoka oya li ya simana, molwaashono oshinima shoka osha li hashi ningwa olundji.” Omukonakoni gwiinima yopaveta, Alastair Kerr, okwa yelitha kutya momumvo 533 E.N., Omupangeli gwaRoma gwedhina Justinian okwa li a nyanyangidha embo lyedhina Digest. Membo ndyoka omwa li mwa nyolwa ompango yaRoma nosho wo iinima mbyoka ya li ya tothwa kaanongompango yopethimbo ndyoka (momumvo 100-250 E.N. lwaampono). Shi ikolelela kembo ndyoka (Digest, 9.2.27.14), omunongompango gwedhina Ulpian okwa popi oshinima shoka sha li sha ningwa pethimbo lyomukwanepangelo gwaRoma gwedhina Celsus, gwomethelemumvo etiyali. Opwa li pu na gumwe ngoka a kunu omawu mepya lyamukwawo, naashoka osha ningitha iilya kaayi koke nawa. Membo Digest omwa li mwa nyolwa iifuta yopaveta mbyoka nakuyonenwa nenge mwene gwepya, ta vulu okupula yi futwe kwaangoka a kunu omawu mepya lye.

Omuyonena gunyanyalitha ngoka gwa kala tagu ningwa muRoma pethimbo lyonale, otagu ulike kutya shoka Jesus a li a popi meyele lye oshoshili.

Methelemumvo lyotango, Aaroma oya li ya pe aakwanepengalo Aajuda epitikilo lyokupangula iipotha yini muJudea?

PETHIMBO ndyoka, Judea osha li tashi pangelwa kAaroma, mboka ya li ye lilwe po komupangeli pamwe netangakwiita lye. Elalakano lye unene olya li okugongela oompale dhaRoma nosho wo okukaleka po ombili nelandulathano. Aaroma oya li ya hala okuhulitha po iilonga mbyoka kaayi li metsokumwe noompango dhaRoma nokugeela mboka taye eta omapiyagano. Nonando ongawo, Aaroma oya li ye etha aawiliki yomoshitopolwa yu ungaunge niinima mbyoka tayi ningwa esiku kehe muJudea.

Omutumba gwoshigongi shaatokoli Aajuda

Iilyo yoshigongi shaatokoli oya li hayi longo mompangu yopombandambanda yAajuda noya li hayi ungaunga niinima yi na ko nasha nompango yAajuda. MuJudea omwa li mu udha oompangu dhopevi. Iipotha oyindji yi na ko nasha naakwashigwana nosho wo naalongi yomiyonena oya li hayi ungaungwa nayo moompangu ndhoka, nokaapu na eidhopomo lyaapangeli yaRoma. Ngele tashi ya pokudhipaga aalongi yomiyonena, oompangu dhAajuda odha li dha tulilwa po omangambeko. Aaroma oyo owala ya li ye na uuthemba woku shi ninga. Kakele owala sho Stefanus a li a dhipagithwa kiilyo yoshigongi shaatokoli. — Iil. 6:8-15; 7:54-60.

Iilyo yoshigongi shaatokoli Aajuda oya li ye na oonkondopangelo odhindji. Nonando ongawo, omulumentu gwedhina Emil Schürer okwa ti: ‘Aapangeli yaRoma oya li hayi idhopo ya manguluka miinima mbyoka ya tokolwa koshigongi shaatokoli. Oya li haye shi ningi uuna taya fekele kutya opu na gumwe ta teya oompango dhawo dhopapolotika.’ Oshiholelwa shimwe moka aapangeli yaRoma ye shi ningile, oosho omuwiliki gwetangakwiita, Klaudius Lisias, a li a tula omuyapostoli Paulus mondholongo, sho u uvu kutya omukwashigwana gwaRoma. — Iil. 23:26-30.