ONDA pandula sho nda putudhwa kaavali Aakriste, tate Fred nameme Edna Molohan, mboka ya longo ndje etilokalunga. Sho nda valwa mo 1934, oya adhika nale ye li Aakonakoni yOmbiimbeli aalaadhi (Oonzapo dhaJehova) uule womimvo 20. Uukwanegumbo wetu owa li hawu zi moParsons, okandoolopa ke li muumbugantuzilo waKansas notwa li megongalo lyu udha Aakriste aagwayekwa. Otwa li tu hole okuya aluhe kokugongala nokuuvithila yalwe oshili yOohapu dhaKalunga. Olundji mOolyomakaya, otwa li hatu ka uvitha mepandaanda omutenya. Pethimbo ndyoka, uunzapo womontaneho otwa li hatu wi ithana iilonga yokuuvitha yomepandaanda. Omathimbo gamwe otwa li hatu kala twa loloka, ihe tate okwa kala he tu landele oaiskilima, ngele twa mana, opo tu kale twa talalelwa.

Egongalo lyetu eshona, olya li li na oshitopolwa oshinene shokuuvithila, mwa kwatelwa uundoolopa uushona noofaalama dhopopepi. Uuna tatu uvithile moofaalama, olundji otwa li hatu pe aantu iileshomwa, yo taye tu pe iikwamboga, omayi nenge oondjuhwa. Molwaashoka tate okwa li ha kala a gandja nale omayambidhidho giileshomwa komeho yethimbo, iikulya mbyoka oya li hayi ningi po yetu.

Aavali yandje oya li ye na ongalamathona, ndjoka haya longitha muukalele. Onda li omushona noku yi longitha, ihe onda li ndi hole oku ya kwathela, sho taya dhana iipopiwa mbyoka ya kwatwa yomumwatate Rutherford pomaishunoko nopaakonakonimbiimbeli.

Tate okwa li a tula embako enene pombanda yohauto yetu yo-Ford, yomodela 1936. Ohauto ndjika oya li hayi kwathele lela mokutaandelitha etumwalaka lyUukwaniilwa. Olundji, otwa li hatu dhana tango omusika, opo tu nane aantu, nokonima tatu dhana ihe oshipopiwa shopaMbiimbeli. Ngele sha pu, otwa li hatu gandja iileshomwa kaantu mboka ye na ohokwe.

Mokandoolopa kedhina Cherryvale moKansas, aapolisi oya li ya lombwele tate kutya itaya pitike ohauto yembako yi ye moparka, moka mwa li aantu oyendji taya vululukwa mOsoondaha. Oya li owala ya pitikilwa kondje. Tate ina nyenyeta, okwa tula owala ohauto mepandaanda ndyoka lya taalelathana  noparka, opo aantu mboka ye li mo ya vule okuuva etumwalaka nuupu, e ta tsikile okudhana oshipopiwa. Osha li aluhe shinyanyudha okukala pamwe natate nosho wo nomumwamememati omukuluntu, Jerry, pomathimbo ngoka.

Mo 1930 nasha, otwa ningi iikonga yokuuvitha yi ikalekelwa momahala moka mwa tegwa oomboma, moka mwa li mu na omapataneko ogendji. Otwa li twe shi ningi, opo tu mane ko nziya iitopolwa mbyoka. Otwa li hatu penduka manga eluwa inaali tenda nokutula uufo nenge uumbo kohi yomiyelo dhomagumbo. Lwanima, otwa kala hatu tsakanene kondje yoshilando, opo tu mone ngele opu na gumwe a monika e ta kwatwa po kopolisi.

Pethimbo ndyoka, otwa li ishewe twa mono po omukalo gumwe omwaanawa gwokuuvitha, hatu gu ithana olweendo lwokugandja uuyelele (information march). Opo tu humithe komeho Uukwaniilwa, otwa li hatu zala omapulakata e tatu ende noshilando ashihe tu li momukweyo. Otandi dhimbulukwa oshikando shimwe sho ookuume kandje ya li taya ende mondoolopa yetu, ya zala omapulakata ga nyolwa “Omalongelokalunga oga kwata ko aantu notage ya yugu iimaliwa.” Oya li ye ende mondoolopa oshinano shokilometa 1,6 lwaampono, e taya galukile paandjetu. Elago enene, inaya patanekwa nando oshikando shoka, ihe oya tsakaneke aantu oyendji ye na ohokwe.

Olundji uukwanegumbo wetu owa li hawu zi koKansas tawu yi koTexas, opo tu ka kale piigongi yoshitopolwa. Tate okwa li ha longele ehangano lyedhina Missouri-Kansas-Texas Railroad. Onkee ano, otwa li hatu vulu okuya neshina lyokolutenda tatu longitha o-pass yatate (ombapila ndjoka hayi pitike omuntu a ye molweendo a manguluka). Omolwo-pass, otwa li hatu talele po aakwanezimo nokuya kiigongo yoshitopolwa. Omumwayina gwameme omukuluntu, tatekulu Fred Wismar, nanekulu lye, Eulalie, oya li haya zi moshilando Temple, moTexas. Tatekulu Fred okwi ilongo oshili petameko lyomumvo 1900 nasha, manga e li omugundjuka, e ta ninginithwa. Okwa li a uvithile aamwayina ye, mwa kwatelwa meme. Aamwatate oyendji moTexas oya li ye mu shi nawa, oshoka okwa li omupiya gwoshitopolwa (omutonatelishikandjo). Okwa li omunahenda, omunyanyukwi nonda li ndi hole okukala naye. Okwa li e hole oshili nokwa tulila ndje po oshiholelwa oshiwanawa, pethimbo nda li omugundjuka.

Mo 1941, otwa yi neshina naanegumbo yaandjetu koshigongi shoshitopolwa, sha li moshilando St. Louis, moshitopolwa Missouri. Aagundjuka ayehe oya li ya pulwa ya kuutumbe moshitopolwa shi ikalekelwa mokapale, opo ya pulakene koshipopiwa shomumwatate Rutherford shi na oshipalanyolo: “Aanona yOmukwaniilwa.” Pehulilo lyoshipopiwa, okanona kehe oka pewa omagano ngoka inaaka tegelela, embo epe lyedhina Children, ngoka ga li taga gandjwa komumwatate Rutherford naayakuli ye. Aanona mboka ya pewa embo ndyoka oya konda 15 000.

MuApilili 1943, otwa kala poshigongi shoshikandjo, shi na oshipalanyolo: “Otamu ithanwa koshilonga,” moshilando Coffeyville. Opwa tseyithwa Osikola yOkudheula Aauvithi ompe, ndjoka ya li tayi ka kala hayi ningwa momagongalo agehe. Poshigongi shoka opwa piti wo okambo ke na iileshwa 52, hoka ka li taka ka longithwa mosikola ndjoka. Lwanima, momumvo mono,  onda gandja oshipopiwa shandje shotango. Oshigongi shoka osha li shi ikalekelwa kungame, oshoka opo nda ninginithilwa pamwe naamwatate yaali, mokandombe ke li mofaalama yopopepi.

Onda mana osikola yongula mo 1951, nonda li ndi na okuninga omatokolo gamwe kombinga yonakuyiwa yandje. Onda li nda halelela okuya koBetel, hoka kwa li nale omumwamememati, Jerry. Ofooloma yandje yeindilo oya tuminwa nziya kombelewa yaBrooklyn. Etokolo ndyoka nda ningi, olye etele ndje uuwanawa wopambepo. Meni owala lyethimbo efupi, onda taambwa, e tandi lombwelwa ndi tameke mo 10 Maalitsa 1952.

Elalakano lyandje olya li okulonga moshinyanyangidho, ndi kuthe ombinga mokupilinta iileshomwa. Ihe onda pulwa tango ndi kale omugandji gwiikulya, nokonima onda ka longa mokombitha, moka ndi ilongo iinima oyindji iipe. Moshinyanyangidho moka nda li nda hala, inandi longa mo sigo onena. Molwaashono aaniilonga mokombitha oya li hayi ikulile mo, oshe etele ndje uuwanawa, oshoka onda li handi mono ethimbo mesiku ndi ninge ekonakonombiimbeli lyandje lyopaumwene, tandi longitha ongulumambo yaBetel. Osha kwathele ndje ndi koke pambepo nondi kale ndi na eitaalo lya kola. Osha tsu ndje omukumo ndi kale nda tokola toko okulongela Jehova moBetel ngaashi tandi vulu. Mo 1949, Jerry okwa zi mo moBetel. Okwa hokana Patricia, noya kala haya zi popepi naBrooklyn. Oya kala nokukwathela ndje nokutsa ndje omukumo, sho opo nde ya moBetel.

Konima owala yethimbo sho nde ya moBetel, opwa ningwa omalolelo, momusholondondo gwaagandji yiipopiwa moBetel mu gwedhwe aamwatate. Mboka ye li momusholondondo ngoka, oya li haya pewa oshinakugwanithwa shoku ka talela po omagongalo ngoka ge li oshinano shookilometa 322 okuza koBrooklyn, opo ya ka gandje iipopiwa yomontaneho nokuuvitha pamwe nago. Onda li nda pewa uuthembahenda mboka. Sho nda tameke okugandja iipopiwa yomontaneho mbyoka ya li uule wowili pethimbo ndyoka, onda li nda tila. Olundji onda li handi yi neshina ndi ka talele po omagongalo. Otandi dhimbulukwa nawa Osoondaha yimwe omutenya mo 1954 pethimbo lyokufu, nda londo meshina lyokolutenda ndyoka lyu uka koNew York. Onda li ndi na ando okuthika koBetel, sho taku wiwile. Ihe opo tu li po, oshikungulu shombepo nolumi osha tukuluka. Oindjina yeshina oya dhimi noinali vula we okweenda. Hugunina, olya kala nawa, ihe otwa ka thika moNew York mOmaandaha, lwopontano yokoongulasha. Okuza posasiyona, onda taaguluka olutenda ndu uka moBrooklyn. Onda yi owala ndu ukilila kiilonga yandje mokombitha. Onda li nda lata kashona nonda vulwa noonkondo, oshoka uusiku awuhe onda kala nda kuutumba meshina ndyoka itaali longo nawa. Nonando ongawo, shoka itashi vulu okuyelekwa nenyanyu ndyoka nda mona, sho nda kala tandi kwathele aamwatate naamwameme nokutsakanena nookuume oyendji aape momahuliloshiwike ngaka gi ikalekelwa.

Sho opo nde ya moBetel, ondi ithanwa ndi ka longe mositaasi yoradio WBBR. Pethimbo ndyono, oostudio odha li pela etiyali lyopombanda metungo hali ithanwa 124 Columbia Heights. Oshinakugwanithwa shandje osha li shokukutha ombinga mopolohalama yekonakonombiimbeli ndyoka lya li hali kala ko oshiwike kehe. Omumwatate A. H. Macmillan, ngoka a longa moBetel ethimbo nuule, oye unene a li ha kutha ombinga moopolohalama ndhoka dhokoradio. Okwa li e hole aantu, nolundji aantu oya li haye mu ithana Mac. Okwa li oshiholelwa oshiwanawa sheidhidhimiko miilonga yaJehova kutse aagundjuka moBetel.

Mo 1958, onda hiywa ndi ka longe pamwe naamboka taya dheulwa mOsikola yaGilead. Oshilonga shandje osha li okukwathela mboka ya pita mosikola ndjoka, ya mone oovisa noku ya longekidhila olweendo. Molwaashono pethimbo ndyoka ondhila oya li yi na ondilo, aashona owala ya li haya yi nayo. Oyendji mboka ya li haya yi koAfrika nosho wo kUuzilo woKokule, oya kala haya yi noosikepa dhedhina cargo. Konima yomimvo dhontumba, oondando dhoondhila odha kuluka, naatumwa oyendji oya kala haya yi noondhila kiilongo hoka ya tuminwa.

Mo 1960, onda pewa iinakugwanithwa ya gwedhwa po. Onda longekidhile oondhila mboka ya li taya ka ya kiigongi yopaigwana mo 1961, okuza moAmerika okuya koEuropa. Ngame onda li nda yi koshigongi  shoshitopolwa nondhila, okuza moNew York okuya koHamburg, moNdowishi. Konima yoshigongi, ngame naamwatate yatatu yomoBetel, otwi indile ohauto tu longithe ko. Otwa hingi okuza moNdowishi tu uka koItalia, tu ka talele po oshitayimbelewa muRoma. Okuza mpono, otwa yi ishewe koFulaanisa, notwa piti poondundu dhaPyrenees tu uka moSpania, moka iilonga yetu ya li yi indikwa. Otwa faalele aamwatate moBarcelona iileshomwa yimwepo, notwa li twe yi gonyena moombapila ya fa omagano. Otwa li twa nyanyukwa shili oku ya mona. Opo ihe, otwa yi koAmsterdam, hoka twa mono ko ondhila ndjoka ye tu fala koNew York.

Konima yomumvo lwaampono, oshinakugwanithwa shandje moBetel osha li sha kwatela mo okulongekidhila aamwatate naamwameme yontumba, olweendo lwokuya kiigongi yopaigwana yi ikalekelwa muuyuni awuhe. Mo 1963, opwa ningwa oshigongi shi na oshipalanyolo: “Onkundana ombwanawa yaaluhe.” Aamwatate naamwameme 583, oya li ya hogololwa ya ye kiigongi kiilongo ngaashi Europa, Asia, kUumbugantu wEfuta lya Mwena, koHonolulu, koHawaii nokoshilando Pasadena, moCalifornia. Oya ulukilwa wo iilongo ngaashi Libanon naJordan, omahala ngoka ga popiwa mOmbiimbeli. Kakele kokulongekidhila aamwatate naamwameme oondhila noohotela dhokukala, Betel okwe ya monene wo oovisa dhokupita miilongo mbyoka.

Omumvo 1963, ogwa li gwa simana lela kungame, omolwetompelo lilwe linyanyudha. Mo 29 Juni, onda hokana omumwameme Lila Rogers, a za koMissouri, ngoka a kala moBetel uule womimvo ndatu, manga inaatu hokana. Oshiwike shimwe konima yohango yetu, ngame naLila otwa wayimine olweendo lwoku ka ulukilwa iilongo yi ili noyi ili notwa talele po iilongo ngaashi Greka, Egipiti naLibanon. Otwa zi nondhila moBeirut e tatu yi kokapale koondhila okashona muJordan. Molwaashoka iilonga yetu oya li ya ngambekwa muJordan, otwa lombwelwa kutya Oonzapo dhaJehova kadha li dha pitikwa okupewa oovisa dhokuya moshilongo shoka. Onkene otwa li tatu ipula kutya oshike tashi ka ningwa po, ngele otwa thiki ko. Sho twa thiki, otwa li twa kumwa notwa nyanyukwa okumona ongundu yaantu ya thikama pokapale ya yelutha epulakata lya nyolwa, “Otwe mu taamba ko Oonzapo dhaJehova”! Shimwe ishewe, otwa li twa nyanyukwa okumona iilongo mbyoka ya popiwa mOmbiimbeli. Otwa li twa talele po omahala moka mwa li hamu zi nale, Abraham, Isak naJakob nosho wo moka Jesus naayapostoli ye ya li yu uvithile. Otwa li natango twa vulu okumona ehala moka Uukriste wa tamekela sigo wa taandele muuyuni awuhe. — Iil. 13:47.

Omimvo adhihe 55, Lila okwa kala kuume kandje omudhiginini miinakugwanithwa yetu ayihe twa kala nokupewa. Otwa ka talela po wo Spania naPortugali iikando yontumba, pethimbo iilonga yetu yi indikwa miilongo moka. Sho tu li moka, otwa tsu omukumo ookuume ketu. Otwe ya etele iileshomwa niinima yilwe mbyoka ya li ya pumbwa. Otwa talele po wo aamwatate yamwe mondholongo moshilando Cádiz, moSpania. Omutima gwandje ogwa li tagu hunga kenyanyu, sho nde ya tungu noshipopiwa shopaMbiimbeli.

Okuza mo 1963, onda kala ndi na uuthembahenda okulongekidhila aamwatate naamwameme omalweendo gokuya koAfrika, koAustralia, koAmerika lyoPokati  nolyokUumbugantu, koEuropa, kUuzilo woKokule, koHawaii, koNew Zealand nokoPuerto Rico. Ngame naLila otwa li twa mono uuthembahenda wokukala piigongi oyindji yoshitopolwa, mwa kwatelwa shoka sha li moWarsaw, moPoland mo 1989. Iigongi mbyoka katu na siku tu yi dhimbwe! Aamwatate oyendji ya za koRusia, oya li ya vulu okukala poshigongi shoshitopolwa oshinene, oshikando shawo shotango. Aamwatate naamwameme yamwe mboka twa tsakanene nayo, oya li ya ninga uule womimvo moondholongo dhomoRusia, omolweitaalo lyawo.

Sho nda kala nokutalela po iitayimbelewa muuyuni awuhe nelalakano lyokutunga nokutsa omukumo omaukwanegumbo gaBetel nosho wo aatumwa, osha kala uuthembahenda wunyanyudha kungame. Hugunina, otwa ka talela po koSouth Korea, hoka twa tsakanene ko naamwatate 50, mboka ya li mondholongo moSuwon. Aamwatate mboka ayehe oya li ye na etaloko ewanawa noya li ya tegelela ya mone ishewe ompito ya ka uvithe. Osha li lela she tu tsu omukumo, sho twa tsakanene nayo. — Rom. 1:11, 12.

Onda mona nkene Jehova a indjipaleka omwaalu gwaapiya ye uule womimvo dha ka pita. Sho nda ninginithwa mo 1943, aauvithi oya li 100 000, ihe ngashingeyi otu vulithe po 8 000 000, tatu longele Jehova miilongo 240. Omwaalu ngoka ogwi indjipala, oshoka mboka ya piti Osikola yaGilead oyu uvitha oshitopolwa oshinene. Osha kala shinyanyudha okulonga pamwe naatumwa mboka oyendji, uule womimvo, noku ya kwathela ya gwanithe po iinakugwanithwa yawo, miilongo mbyoka ya tuminwa.

Onda nyanyukwa, sho nda ningi etokolo ndi tamunune mo uukalele wandje, mokuudhithila koBetel pethimbo omugundjuka. Jehova okwa yambeka ndje momikalo odhindji. Kakele kenyanyu ndyoka twa mona miilonga yaBetel, omimvo odhindji ngame naLila otwa kala nokunyanyukilwa uuthembahenda wokuuvitha pamwe nomagongalo moBrooklyn, moka twa mono ookuume yashili oyendji.

Otandi tsikile okulonga moBetel, omolweyambidhidho lyaLila esiku kehe. Nonando ngashingeyi ondi na omimvo dha konda 84, ondi hole natango iilonga ya simana, sho handi kwathele mokuungaunga nomapulo ngoka haga tuminwa koshitayimbelewa.

Onda nyanyukwa, sho ndi li oshitopolwa shehangano lyaJehova nokukala ndi wete eyooloko enene ndyoka li li pokati kaamboka haye mu longele naamboka ihaye mu longele. Shoka otashi tu kwathele tu uve ko nawa oohapu ndhoka dhi li muMaleaki 3:18, tadhi ti: “Aantu yandje otaa ka koneka ishewe eyooloko pokati komuyuuki nomukolokoshi, pokati komuntu ngoka ta longele ndje naangoka itee shi ningi.” Esiku kehe, otu wete nkene uuyuni waSatana tawu ende tawu nayipala, nowu udha aantu kaaye na etegameno noinaya nyanyukwa naanaa. Ihe mboka ye hole Jehova nohaye mu longele, oya nyanyukwa lela monkalamwenyo noye na etegameno lyonakuyiwa, nonando oye li momathimbo ngaka omadhigu. Katu na tuu uuthembahenda wokutaandelitha onkundana ombwanawa yUukwaniilwa! (Mat. 24:14) Otwa tegelela esiku ndyoka li li popepi, sho Uukwaniilwa waKalunga tawu ka hanagula po uuyuni mbuka, nokuya muuyuni uupe moka tatu ka mona omayambeko ogendji, mwa kwatelwa uukolele nomwenyo gwaaluhe. Odhoshili kutya aapiya yaJehova aadhiginini, otaya ka nyanyukilwa omwenyo gwaaluhe kombanda yevi.