1, 2. (a) Jesus okwa li a gandja unene eitulomo kiilonga yini monkalamwenyo ye, nomolwashike? (b) Oshike tu na okuninga, opo tu pondole tu li “aalongi pamwe naKalunga”?

JESUS KRISTUS okwa li omuhongi gwiipilangi nomuuvithi gwonkundana ombwanawa. (Mark. 6:3; Rom. 15:8) Okwa li a pyokoka miilonga ayihe mbyoka. E li omuhongi gwiipilangi, okwa li e shi nawa nkene e na okulongitha oshilongitho kehe, opo a longe sha okuza miiti. E li omuuvithi gwonkundana ombwanawa, okwa li a longitha ontseyo ye yOmanyolo a kwathele aantu oyendji ya uve ko oshili yOmbiimbeli. (Mat. 7:28; Luk. 24:32, 45) Sho Jesus e na omimvo 30, okwe etha po okuhonga iipilangi, oshoka okwa li e shi kutya okukala omukalele okwo oshilonga sha simanenena. Okwa ti kutya okuuvitha onkundana ombwanawa yUukwaniilwa waKalunga, okwo etompelo limwe Kalunga e mu tumu kombanda yevi. (Mat. 20:28; Luk. 3:23; 4:43) Jesus okwa li a gandja eitulomo unene kuukalele we, nokwa li a hala yalwe ye mu wayimine moshilonga shoka. — Mat. 9:35-38.

² Tse otashi vulika tu kale kaatu shi aahongi yiipilangi, ihe nonando ongawo, aauvithi yonkundana ombwanawa. Eithano ndyoka olya simana lela, oshoka Kalunga naye okwa kwatelwa mo. Onkee ano, ohatu ithanwa “aalongi pamwe naKalunga.” (1 Kor. 3:9; 2 Kor. 6:4) Otu shi kutya “oohapu [dhaJehova] adhihe odhoshili.” (Eps. 119:159, 160) Omolwetompelo ndyono, otu na okushilipaleka kutya uuna tu li muukalele, otatu “longo aantu oshili ya yela yomoohapu dhaKalunga.” (Lesha 2 Timoteus 2:15.) Onkene, ohatu hwepopaleke omukalo gwetu gwokulongitha Ombiimbeli, oshilongitho shoka sha simana hatu  longitha unene, sho tatu longo aantu oshili kombinga yaJehova naJesus nokombinga yUukwaniilwa. Opo tu pondole muukalele, ehangano lyaJehova olye tu longekidhila po iilongitho mbyoka twa pumbwa okukala tu shi okulongitha nawa. Iilongitho mbyoka otatu yi adha kepandja lyetu lyokointaneta, moshitopolwa: Okaketha kiilongitho yokulonga aantu.

3. Okushike tu na okugandja eitulomo pethimbo ndika lya hupa ko lyokugandja uunzapo, nongiini Iilonga 13: 48 tayi tu kwathele tu ninge ngaaka?

³ Otashi vulika wu kale to ipula kutya omolwashike haki ithanwa Okaketha kiilongitho yokulonga aantu, ihe kake shi Okaketha kiilongitho yokuuvithila aantu. Oshitya “okuuvitha” otashi ti kutya okuthikitha etumwalaka komuntu, ihe “okulonga” omuntu otashi ti kutya okuthindila etumwalaka momadhiladhilo nomomutima gwe, opo a tule miilonga shoka ti ilongo. Onkee ano, pethimbo ndika lya hupa ko lyokugandja uunzapo, natu gandje eitulomo kokutameka omakonakonombiimbeli nokulonga aantu oshili. Shoka osha hala okutya, okukonga neitulomo ayehe mboka “ya hala oku ka mona omwenyo gwaaluhe” noku ya kwathela ya ninge ooitaali. — Lesha Iilonga 13:44-48. *

4. Ongiini tatu vulu okutseya mboka “ya hala oku ka mona omwenyo gwaaluhe,” nongiini tatu vulu oku ya mona?

⁴ Ongiini tatu vulu okumona kutya oolye ya “ya hala oku ka mona omwenyo gwaaluhe”? Ngaashi sha li methelemimvo lyotango, omukalo gumwe tatu vulu okumona aantu ya tya ngaaka, omokugandja uunzapo. Onkee ano, otu na naanaa okuninga ngaashi Jesus e tu lombwela. Okwa ti: “Ngele tamu yi moshilando shontumba nenge momukunda, puleni, olye e li mo e shi kwiinekelwa.” (Mat. 10:11) Ihatu kala twa tegelela mboka kaaye shi aanamitima omiwanawa, aanuuntsa nenge mboka kaaye na ko nasha niinima yopambepo ya pulakene konkundana ombwanawa. Otatu kongo aantu mboka aanashili, aaifupipiki noya sa ondjala yoohapu dhaKalunga. Omukalo ngoka gwokukonga aantu otatu vulu oku gu faathanitha naangoka Jesus, omuhongi gwiipilangi, a li a longitha mokukonga iiti tayi opalele a ninge iikwapundi, omiyelo, oondjoko niinima yilwe. Uuna a mono iiti, okwa li ha longitha iilongitho ye nosho wo ontseyo ye, opo a nduluke po oshinima. Natse natu ninge sha faathana, sho tatu kwathele aanamitima omiwanawa ya ninge aalongwa. — Mat. 28:19, 20.

5. Oshike twa pumbwa okutseya kombinga yOkaketha kiilongitho yokulonga aantu? Gandja oshiholelwa. (Tala omathano gopetameko.)

⁵ Ngaashi owala okaketha kehe kiilongitho, oshilongitho kehe shi li mo, oshi na oshilonga shasho. Natu dhiladhile owala kiilongitho mbyoka Jesus a li a pumbwa e li omuhongi gwiipilangi. * Okwa li a pumbwa ometa nopena yokundhindhilika iiti. Okwa li wo a pumbwa iilongitho yokuteta, yokumboola, yokuhonga iipilangi, yoku yi yelekanitha, yoku yi kweya noyoku yi tula kumwe. Sha faathana, oshilongitho kehe mOkaketha kiilongitho yokulonga aantu, oshi na elalakano lyasho. Ngashingeyi natu ka taleni mokaketha ketu nokutala nkene tatu vulu okulongitha iilongitho mbika ya simanenena twa pewa.

6, 7. (a) Okakalata kokufala aantu kepandja lyetu, owe ka longitha ngiini? (b) Omalalakano gaali geni ge li mokafo kokuhiya aantu kokugongala?

⁶ Okakalata kokufala aantu kepandja lyetu lyokointaneta. Okakalata hoka okashona, ihe oke li oshilongitho hashi pondola shoka hatu longitha mokutseyithila aantu kombinga yetu. Ohake ya fala wo kepandja lyetu lyokointaneta, hoka taya vulu okwiilonga oshindji kombinga yetu nokupula ekonakonombiimbeli. Sho tatu popi ngeyi, aantu ya konda 400 000 oya pula nale omakonakonombiimbeli kepandja lyetu lyokointaneta, jw.org, noyendji ohaye ga pula esiku kehe. Nangoye oto vulu okukala ho ende  nuukalata mboka, opo wu gandje uunzapo kaantu mboka to tsakaneke momukokomoko gwesiku.

⁷ Okafo kehiyo. Olundji ohatu ka ithana okafo kokuhiya aantu kokugongala noke na omalalakano gaali. Oke na oohapu tadhi ti: “Mbela ino hala okukala ho konakona Ombiimbeli nOonzapo dhaJehova?” Oka gandja ihe omaetopo nkene omuntu ta vulu oku shi ninga, taka ti kutya “gongala pamwe natse” nosho wo “konakona Ombiimbeli natse.” Okafo hoka itake tu tseyithitha owala kaantu, ihe otaka hiya wo mboka “yu uvite oyo oohepele koomwenyo” ya konakone Ombiimbeli. (Mat. 5:3) Aantu ayehe oya manguluka okuya kokugongala kwetu, kutya nduno ohaya konakona Ombiimbeli natse nenge hasho. Uuna taya gongala pamwe natse, otaye ki imonena ko nokwiiyuvila ko yo yene kombinga yelongo lyetu lyoshili yOmbiimbeli.

8. Omolwashike sha simana kaantu ye ye kokugongala kwetu kutya nduno oshikando shimwe? Gandja oshiholelwa.

⁸ Osha simana tu kale hatu hiya aantu kokugongala kutya nduno oye ya ko owala lumwe. Omolwashike mbela? Otaya ka mona eyooloko enene pokati kuuyamba wiikulya yopambepo mbyoka tu na nosho wo ondjala yopambepo ndjoka yi li muBabiloni Oshinene. (Jes. 65:13) Aaihokani yamwe, Ray nomukadhi, Linda, yomoAmerika, oya mono eyooloko ndyoka omimvo dhontumba dha ka pita. Oya tokola ya kale haya yi kongeleka. Oya kala yi itaala muKalunga noye na ondjala yopambepo. Onkee oya tameke okumana ko oongeleka adhihe moshilando shawo. Moshilando moka omwa li ondumba yoongeleka nomaitaalo ogendji. Okuza petameko, oya kala ya tokola nale kutya opo ya ninge iilyo yongeleka yontumba, opu na iinima iyali mbyoka ye na okutala kuyo. Shotango, oye na okwiilonga sha meuvitho lyomelongelokalunga ndyoka. Oshitiyali, iilyo yongeleka ndjoka nayi kale hayi zala ya fa aantu mboka taya ti kutya oye lile po Kalunga. Uule womimvo dhontumba, oya kala nokutondoka noongeleka, ihe shoka oshe ya yemateke owala. Inayi ilonga mo sha moongeleka ndhoka, yo iilyo yadho ihayi zala nawa. Sho ya zi mongeleka yahugunina ndjoka ya li momusholondondo gwawo, meme Linda okwa zi mo a uka kiilonga, omanga tate Ray a shuna kegumbo. Mondjila yokushuna kegumbo, tate Ray okwe ende pooha dhOshinyanga shUukwaniilwa. Opo ihe okwi ipopile a ti: ‘Oshike itaandi yi mo ndi ka tale shoka tashi ningwa mo?’ Shoka a mono mo, shivalelwe e shi mone! Aantu ayehe oya li aanambili, ye na ohamu noya zala nawa. Ray okwa kuutumba momukweyo gwokomeho nokwa li a hokwa shoka tashi popiwa po. Okwa gwanithilwa oohapu dhomuyapostoli Paulus ndhoka tadhi popi kombinga yomuntu ngoka e ya pokugongala oshikando shotango, e ta ti: “Kalunga oku li mpaka mokati keni.” (1 Kor. 14:23-25) Okuza mpono, Ray okwa kala he ya kokugongala Osoondaha kehe, nokonima okwa tameke okuya kokugongala kwomokati koshiwike. Omukadhi okwe mu wayimine wo. Manga ye na omimvo 70 nasha, oya zimine ya konakone Ombiimbeli nokonima oya ninginithwa.

9, 10. (a) Omolwashike uufo uupu okulongithwa? (b) Yelitha nkene tatu vulu okulongitha okafo: Oshilongo shaKalunga oshike?

⁹ Uufo. Ehangano lyetu olye tu longekidhila uufo uhetatu wa yoolokathana, mboka wu li iilongitho iipu yokutameka oonkundathana. Uufo mboka owa pitile mo 2013, nopwa pilintwa nale ookopi omabiliyona gatano lwaampono. Uuwanawa wuufo mbono owo kutya ngele owa tseya okulongitha po kamwe, nena oto ka vula oku wu longitha awuhe, oshoka ohawu longo momuhingo gumwe. Ongiini to vulu okulongitha okafo wu tameke oonkundathana nomuntu?

¹⁰ Otashi vulika wu longithe okafo: Oshilongo shaKalunga oshike? Ulukila omuntu epulo ndyoka li li kombanda yokafo e to mu pula kutya: “Owi ipulile nale kutya Oshilongo shaKalunga oshike? Oto ka tya ngiini uuna wa pulwa epulo ndyoka . . . ?” Opo ihe, mu pula a hogolole po eyamukulo limwe pwaangoka gatatu. Pehala lyoku mu lombwela kutya eyamukulo lye oli li mondjila nenge olya puka, inda mpoka pwa nyolwa: “Shoka Ombiimbeli tayi ti” meni lyokafo, e tamu lesha  Daniel 2:44 naJesaja 9:6. Ngele otashi vulika, tsikileni noonkundathana. Pehulilo, ulukila omuntu epulo ndyoka li li konima yokafo, mpoka pwa nyolwa: “Tala kepulo ndika”: “Onkalamwenyo kombanda yevi otayi ka kala ya tya ngiini ngele Uukwaniilwa waKalunga wa tameke okupangela?” Epulo ndyono otali ku kwathele wu kale wu shi shoka tamu ya mu kundathane nomuntu ngoka. Uuna wa shuna ko, otamu vulu okukundathana oshileshwa 7, mokambo Onkundana ombwanawa ya za kuKalunga. Okambo hoka oke li oshilongitho shetu shimwe shokutameka omakonakonombiimbeli.

11. Iifo yetu oya nyanyangidhwa nelalakano lini, noshike tu na okukala tu shi kombinga yayo?

¹¹ Iifo. Oshungolangelo no-Awake! oyo iifo mbyoka unene hayi nyanyangidhwa nokutolokwa apuhe muuyuni. Molwaashoka ohayi leshwa kaantu oyendji muuyuni, iipalanyolo yawo yokombanda ohayi tungwa momukalo ngoka tagu nana aantu kehe mpoka ye li. Otu na oku yi longitha yi li iilongitho mbyoka tayi pendutha ohokwe yomuntu kombinga yiinima mbyoka yi na oshilonga monkalamwenyo. Opo tu yi thige miikaha yomuntu ngoka to opalele, otu na okukala tu shi kutya oshifo kehe osha nuninwa oolye.

12. (a) O-Awake! oya nuninwa oolye, nelalakano lyayo olyashike? (b) Sho wa longitha o-Awake! oshimoniwa shini opo wa mono?

¹² O-Awake! oya nuninwa unene aantu mboka ye na ontseyo onshona yOmbiimbeli nenge kaaye yi shi nandonando. Otashi vulika ya kale kaaye na shoka ye shi kombinga yomalongo gopaKriste, kaaye na naanaa einekelo momalongelokalunga nenge tashi vulika kaaye shi kutya Ombiimbeli oyi na omayele ge na ongushu. Elalakano lya simanenena lyo-Awake! olyo okutompa omuntu kutya Kalunga oko e li. (Rom. 1:20; Heb. 11:6) Oya nuninwa wo okukwathela omuleshi a kale e na eitaalo kutya Ombiimbeli oyi li ‘shili oohapu dhaKalunga.’ (1 Tes. 2:13) Iipalanyolo yokombanda yoo-Awake! dhomo 2018 oyo: “The Way of Happiness,” “12 Secrets of Successful Families” nosho wo “Help for Those Who Grieve.”

13. (a) Oshungolangelo yomuukalele oya nuninwa oolye? (b) Sho wa longitha Oshungolangelo, oshimoniwa shini opo wa mono?

¹³ Oshungolangelo yomuukalele, oya nuninwa okukwathela aantu mboka ye hole iinima yopambepo noya simaneka Kalunga nosho wo Oohapu dhe. Nonando oye na ontseyo yontumba yOmbiimbeli, kayu uvite ko lela omalongo gayo. (Rom. 10:2; 1 Tim. 2:3, 4) Iipalanyolo itatu yokombanda yOoshungolangelo dhomo 2018, otayi yamukula omapulo ngaka: “Mbela Ombiimbeli oya simana nokunena?,” “Onakuyiwa otayi ka kala ya tya ngiini?” nosho wo “Kalunga oku na ko ngaa nasha nangoye?”

14. (a) Elalakano lyuuvidio une mboka wu li mOkaketha ketu kiilongitho yokulonga aantu olini? (b) Oshimoniwa shini wa mona, sho wu ulukila aantu uuvidio mbuka?

¹⁴ Uuvidio. Pethimbo lyaJesus, aantu oya li owala haya longitha iilongitho yokomake. Ihe kunena aantu ohaya longitha iilongitho yokolusheno ngaashi iisaaha, oomboola, omashina gokuhonga iipilangi, omashina gokutula mo oomboha nosho tuu. Kakele kiifo yetu mbyoka hayi pilintwa, otu na wo uuvidio uuwanawa mboka hatu ulukile aantu. Une womuwo mboka wu li mokaketha kiilongitho yetu, owo: Omolwashike wa pumbwa okukonakona Ombiimbeli?, Mbela Ombiimbeli ohayi konakonwa ngiini?, Oshike hashi ningwa pokugongala kwOonzapo dhaJehova? nosho wo Oonzapo dhaJehova odho oolye? Uuvidio mboka wu li meni lyominute mbali, uuwanawa nokulongithwa petalelopo lyotango. Omanga mboka uule, otawu vulu okuulukilwa mboka ye na ethimbo lya gwana nosho wo komaishunoko. Iilongitho mbika iiwanawa, otayi vulu okwiinyengitha aantu ya konakone Ombiimbeli noye ye kokugongala kwetu.

15. Gandja iiholelwa nkene uuvidio wetu hawu gumu aantu mboka taye wu tala momalaka gawo.

¹⁵ Natu tale koshiholelwa shimwe. Omumwameme gumwe sho a tsakaneke omukiintu gumwe a za koMicronesia, omupopi gwOshiyapese, okwe mu ulukile okavidio Omolwashike wa pumbwa okukonakona Ombiimbeli? melaka lye. Sho  okavidio ka tameke okudhana, omukiintu okwa ti: “Elaka lyandje ndika. Onda kumwa shili! Omukalo moka omulumentu ngoka ta popi, otagu ulike kutya okwa za kokantuntu hoka nda za. Oha popi elaka lyandje!” Okuza mpono, omukiintu ngono okwa ti kutya ota ka lesha nota ka tala kehe shimwe shoka shi li kepandja lyetu lyokointaneta, jw.org, melaka lye. (Yelekanitha Iilonga 2:8, 11.) Natu tale ishewe koshiholelwa shilwe. Omumwameme gumwe moAmerika okwa tumine omwanagona gwomumati, ngoka e li kombanda yomafuta okavidio oko tuu hoka melaka lye. Okwe ka tala, e te mu tumine etumwalaka ta ti: “Oshitopolwa shako shoka sha popya kutya opu na Omuhindadhi ngoka ta pangele uuyuni, osha guma ndje unene. Onda pula ekonakonombiimbeli.” Omumati ngoka oku li moshilongo moka iilonga yetu ya ngambekwa.

16. Hokolola elalakano lyokambo (a) Kala ho pulakene kuKalunga opo wu ka kale nomwenyo sigo aluhe. (b) Onkundana ombwanawa ya za kuKalunga. (c) Oolye taya longo ehalo lyaJehova kunena?

¹⁶ Uumbo. Ongiini tatu vulu okulonga gumwe oshili ngoka kee shi okulesha nawa nenge kaatu na iileshomwa melaka lye? Otu na oshilongitho shoka tashi opalele, okambo: Kala ho pulakene kuKalunga opo wu ka kale nomwenyo sigo aluhe. * Ihe oshilongitho sha dhenga mbanda shokutameka omakonakonombiimbeli, okambo: Onkundana ombwanawa ya za kuKalunga. Oto vulu okuulukila omuntu iileshwa 14 mbyoka yi li kepandja lyahugunina. Mu pula kutya oshileshwa shini a hala mu kundathane. Opo ihe, tamekeni ekonakono moshileshwa shoka. Mbela omukalo ngono owe gu kambadhala nale komaishunoko goye? Okambo okatitatu hoka ke li mokaketha kiilongitho yetu oko: Oolye taya longo ehalo lyaJehova kunena? Oka nyanyangidhwa nelalakano lyokukwathela omuntu a tseye ehangano lyetu. Opo wu mone nkene ke na okulongithwa pekonakonombiimbeli kehe, tala okafo Onkalamwenyo yopaKriste niilonga yetu yokuuvitha, kaMaalitsa 2017.

17. (a) Elalakano lyomambo ngoka hatu longitha tu konakone naantu Ombiimbeli olini? (b) Ayehe mboka taya ninginithwa oya tegelelwa ya ninge shike, nomolwashike?

¹⁷ Omambo. Konima ngele wa tameke ekonakonombiimbeli mokambo, otamu vulu okuya membo: Ombiimbeli otayi tu longo shike?, nonando inaka pwa ko. Oshilongitho shika otashi vulu okukwathela omuntu a kale e na ontseyo yopetameko yomalongo gOmbiimbeli. Ngele omwa mana ko embo ndyoka, tsikileni membo: ‘Ikalekeni mohole yaKalunga,’ ngele omukonakoni ota humu komeho. Embo ndika otali ke mu longa nkene ta vulu okutula miilonga omakotampango gOmbiimbeli monkalamwenyo ye kehe esiku. Dhimbulukwa kutya nokonima yeninginitho lyawo, mboka aape oya pumbwa okutsikila nekonakonombiimbeli lyawo, sigo ya mana ko omambo ngoka agehe. Ngele oye ga mana ko, otashi ke ya kwathela ya kale ye na eitaalo lya kola noya kale moshili. — Lesha Aakolossa 2:6, 7.

18. (a) Timoteus gwotango 4:16 ote tu ladhipike tu ninge shike tu li aalongi yoshili, notashi tu etele iizemo yini? (b) Sho tatu longitha Okaketha kiilongitho yokulonga aantu, elalakano lyetu oli na okukala lini?

¹⁸ Tu li Oonzapo dhaJehova, otwi inekelelwa “elaka etoye nolyoshili,” ndyoka tali vulu okukwathela aantu ya ka mone omwenyo gwaaluhe. (Kol. 1:5; lesha 1 Timoteus 4:16.) Otwa pewa wo Okaketha kiilongitho yokulonga aantu, hoka ku udha iilongitho mbyoka twa pumbwa. (Tala oshimpungu “ Okaketha kiilongitho yokulonga aantu.”) Natu longitheni iilongitho mbika nawa ngaashi tashi vulika. Omuuvithi kehe ota vulu okutokola kutya oshileshomwa shini shi li mokaketha kiilongitho, ta vulu okulongitha a tameke oonkundathana nomuntu ngoka a ulika ohokwe nosho wo kutya uunake. Ihe elalakano lyetu haku gandja owala iileshomwa; tse inatu hala wo okuthigila omuntu oshileshomwa, ngoka kee na ohokwe metumwalaka lyetu. Elalakano lyetu okuninga aantu aalongwa mboka aanashili, aaifupipiki naamboka ya sa ondjala yOohapu dhaKalunga, ano aantu mboka “ya hala oku ka mona omwenyo gwaaluhe.” — Iil. 13:48, yelekanitha NW; Mat. 28:19, 20.