1, 2. (a) Omukriste ota vulu ngiini okugumwa komalunduluko ngoka tashi vulika ga ningwe monkalamwenyo ye? (Tala kethano lyopetameko.) (b) Shi ikolelela kEpisalomi 131, iikala yini tayi vulu oku tu kwathela tu kale tu na ombili yokomwenyo?

OMUMWATATE Lloyd nomukadhi Alexandra, oya kala nokulonga moBetel uule womimvo dhi vulithe po 25. Lwanima oya tuminwa momapya. Petameko, shoka osha li she ya uvitha nayi. Lloyd ota ti: “Onda li ndi uvite kutya itandi vulu okutopolwa ko koBetel nokiilonga yandje mbyoka handi longo. Onda taamba ko elunduluko ndyoka, ihe miiwike nomoomwedhi dha ka landula ko, olundji onda kala ndi uvite inaandi hala oku li taamba ko. Onda li lela nda ngwangwana. Ohandi ningi owala nda kala ndi uvite nda hala oku li taamba ko, omanga pethimbo limwe ondi uvite inaandi hala oku li taamba ko.”

² Uuna monkalamwenyo yetu mwa ningwa omalunduluko ngoka kaatwa li twa tegelela, onkalo ndjoka ohashi vulika yi tu ningithe tu kale tu na omaipulo notu kale twa gwililwa po. (Omayel. 12:25) Otashi vulika shi kale oshidhigu okutaamba ko omalunduluko ngoka. Monkalo ndjoka, ongiini tatu vulu ‘okuloteka nokungungumaneka’ omwenyo gwetu? (Lesha Episalomi 131:1-3.) Natu ka taleni nkene aapiya Jehova yamwe mboka ya popiwa mOmbiimbeli nosho wo  yopethimbo lyetu ya li ya vulu okukala nombili yokomwenyo, nonando oonkalo odha kala tadhi lunduluka.

3. Josef okwa li i iyadha monkalo yini?

³ Josef okwa li e na omimvo 17 lwaampono, sho aamwahe ye mu sile ondumbo e taye mu landitha po a ka kale omupika. Manga shoka inaashi ningwa, Josef oye a kala e holike unene kuhe. (Gen. 37:2-4, 23-28) Uule womimvo 13 lwaampono, Josef okwi idhidhimikile uupika nosho wo okutulwa mondholongo muEgipiti. Okwa li wo e li kokule nahe, Jakob. Oshike she mu kwathele kaa teke omukumo noku kale inaa geya?

4. (a) Josef okwa li a gandja eitulomo kushike, sho e li mondholongo? (b) Jehova okwa li a yamukula ngiini omagalikano gaJosef?

⁴ Sho Josef ta mono iihuna mondholongo, oku na okukala a li ta gandja eitulomo kunkene Jehova a li te mu yambeke. (Gen. 39:21; Eps. 105:17-19) Oondjodhi dhaJosef dhopahunganeko ndhoka a li a yaguma pethimbo a li omushona, nadho odha li dhe mu kwathele a kale e na einekelo kutya okwa hokiwa kuJehova. (Gen. 37:5-11) Otashi vulika a li a mbumbulile Jehova uudhigu we lwiikando. (Eps. 145:18) Jehova okwa yamukula omagalikano gaJosef taga zi komutima, sho e mu kwathele a kale e na einekelo kutya ota ka kala “pamwe naye” muudhigu we awuhe. — Iil. 7:9, 10. *

5. ‘Ombili yaKalunga’ ohayi gumu ngiini ehalo lyetu lyokwiitulila po omalalakano gopambepo?

⁵ Nonando otu iyadhe moonkalo oondhigu dha fa peni, natse kunena otatu vulu okukala tu na ‘ombili yaKalunga,’ ndjoka tayi gamene omadhiladhilo getu. (Lesha Aafilippi 4:6, 7.) Onkee ano, ngele otwa kala tatu pula ekwatho kuJehova uuna tu uvite twa gwililwa po kiimpwiyu, ombili yaKalunga otayi vulu oku tu nkondopaleka tu adhe omalalakano gopambepo noku tu gamena kaatu kwatwe kegamo lyokuteka omukumo. Natu taleni kiiholelwa yaantu yamwe yopethimbo lyetu, mboka ye shi ningilwa.

6, 7. Ongiini okugalikana kondandalunde taku vulu oku tu kwathela tu mone ishewe ombili yokomwenyo? Gandja oshiholelwa.

⁶ Sho omumwatate Ryan nomukadhi Juliette ya tseyithilwa kutya kaye shi we aakokolindjila yi ikalekelwa yopakathimbo, oshe ya uvitha nayi. Ryan ota ti: “Otwe shi tseyithile Jehova megalikano. Otwa li tu shi kutya ndjika oyo ompito yokuulika kutya otwi inekela muye. Oyendji megongalo lyetu oya li aape moshili, onkene otwa galikana kuJehova e tu kwathele tu tule po oshiholelwa oshiwanawa sheitaalo.”

⁷ Jehova okwi inyenge ngiini kegalikano lyawo? Omumwatate Ryan ota ti: “Nziya konima owala sho twa galikana, omaiyuvo omawinayi nosho wo omaipulo ngoka twa li tu na petameko, oga kana po. Ombili yaKalunga, oya gamene oomwenyo dhetu nomadhiladhilo getu. Otwe shi dhimbulula mo kutya otatu vulu okutsikila okulongithwa kuJehova, ngele otwa kala tu na etaloko lyomondjila.”

8-10. (a) Ongiini ombepo yaKalunga tayi vulu oku tu kwathela tu ungaunge niimpwiyu? (b) Omomikalo dhini Jehova tashi vulika e tu kwathele, ngele otwa kambadhala okugandja eitulomo kuupambepo wetu?

⁸ Kakele owala koku tu ngungumaneka, ombepo yaKalunga otayi vulu wo oku tu kwathela tu gandje eitulomo komanyolo ngoka taga vulu oku tu kwathela tu kale twa pititha komeho iinima yopambepo. (Lesha Johannes 14:26, 27.) Natu taleni koshiholelwa shaaihokani yamwe, Philip naMary, mboka ya kala moBetel uule womimvo 25 lwaampono. Meni lyoomwedhi ne, ayehe yaali oya silwa ooyina nosho wo omupambele gwawo gumwe. Oya tameke okusila oshimpwiyu he yaMary, ngoka e na omadhiladhilo ga za pehala.

⁹ Philip ota dhimbulukwa ta ti: “Onda li ndi  shi ondi li nawa, ihe nani opwa li pwa kambela sha. MOshungolangelo yimwe yokukonakonwa, ondi tsu mo enyolo lyAakolossa 1:11. Eeno, onda li tandi idhidhimike, ihe kanda li tandi shi ningi pakuudha. Onda li nda pumbwa ‘okwiidhidhimikila ashihe shoka tashi adha ndje nokudhiginina nenyanyu.’ Ovelise ndjika oya dhimbulukitha ndje kutya enyanyu lyandje monkalamwenyo, inali ikolelela koonkalo dhandje, ihe okekwatho lyombepo yaKalunga.”

¹⁰ Nonando Philip naMary oya kala ya taalela oonkalo oondhigu, oya kambadhala ya gandje eitulomo kuupambepo wawo. Onkee ano, Jehova okwe ya yambeke momikalo odhindji. Nziya konima sho ya zi moBetel, oya mono aakonakonimbiimbeli taya humu komeho, mboka nokuli ya pula ya kale haya konakona lwiikando yi vulithe pushimwe moshiwike. Okutala konakuziwa, omumwameme Mary ota ti: “Aakonakonimbiimbeli mboka oya li haye tu nyanyudha, nosha li wo omukalo gwaJehova gwoku tu lombwela kutya kehe shimwe otashi ka enda nawa.”

11, 12. (a) Ongiini Josef a ningi oshinima shoka she mu lalekitha nuuyamba kuJehova? (b) Josef okwa yambekwa ngiini kuJehova, omolweidhidhimiko lye?

¹¹ Uuna oonkalo dha lunduluka inaatu shi tegelela, otashi vulika shi tu ningithe tu kale tatu ipula unene kombinga yonakuyiwa, e tatu kala twa gwililwa po. Shika osha li tashi vulu okuningilwa Josef. Ihe okwa li a tokola kaa ethe onkalo ye yi mu gwilile po, nokungawo okwa ningi oshinima shoka she mu lalekitha nuuyamba kuJehova. Nonando Josef okwa li mondholongo, okwa kala ta longo nuudhiginini, opo a gwanithe po oshilonga kehe ta pewa komukuluntu gwondjedhililo, ngaashi owala a li ha ningi, sho ta longele Potifar. — Gen. 39:21-23.

¹² Esiku limwe Josef okwi inekelelwa a tonatele aalumentu yaali, mboka ya li ye na oondondo dha simana muuwa waFarao. Molwaashoka aalumentu mbaka yaali oya li ya hokwa eihumbato ewanawa lyaJosef, oye mu hokololele uudhigu wawo noondjodhi ndhoka ya yaguma. (Gen. 40:5-8) Josef ka li e shi ndhindhilika, ihe oonkundathana ndhoka odhe mu etele iizemo yinyanyudha. Nonando okwa li e na natango okwiidhidhimikila omimvo mbali mondholongo, konima yaashono okwa ka mangululwa mo, nesiku olyo tuu ndyoka, okwa langekwa po e li omupangeli omutiyali kuFarao. — Gen. 41:1, 14-16, 39-41.

13. Ongiini tatu vulu okupa sha Jehova e tu yambeke, nonando otu kale monkalo ya fa peni?

¹³ Ngaashi Josef, natse otashi vulika tu iyadhe monkalo ndjoka itaatu vulu lela okuninga po sha. Ihe ngele otwa tsikile okwiidhidhimika nokulonga nuudhiginini, nonando otu li monkalo ondhigu, otatu ka pa sha Jehova e tu yambeke. (Eps. 37:5) Odhoshili kutya omathimbo gamwe, otashi vulika tu kale “momalimbililo,” ihe ngaashi omuyapostoli Paulus e shi popi, itatu ka “teka omukumo.” (2 Kor. 4:8) Oohapu dhaPaulus otadhi ke tu gwanithilwa shili, unene tuu ngele otwa kala tatu gandja eitulomo kiilonga yokuuvitha.

14-16. Ongiini omuuvithi Filippus a kala ta gandja eitulomo kiilonga ye yokuuvitha, nonando onkalo ye oya li ya lunduluka?

¹⁴ Omuuvithi Filippus okwe tu tulila po oshiholelwa oshiwanawa, sho a gandja eitulomo kuukalele we, nonando onkalo ye oya li ya lunduluka. MuJerusalem omwa li mwa holoka omahepeko ga kwata miiti, nokonima Stefanus okwa dhipagwa. * Pethimbo ndyoka, Filippus okwa li ta nyanyukilwa oshinakugwanithwa she oshipe. (Iil. 6:1-6) Ihe sho aalanduli yaKristus ya halakana, Filippus ka li owala a tala onkalo e ta mwena. Okwe ku uvitha kuSamaria, oshilando shoka kaasha li shu uvithilwa lela onkundana ombwanawa pethimbo ndyoka. — Mat. 10:5; Iil. 8:1, 5.

¹⁵ Filippus okwa li e na ehalo lyokuya kehe mpoka ombepo yaKalunga tayi mu wilike a ye. Onkene, Jehova okwe mu kwathele a vule okuuvithila miitopolwa iipe. Molwaashoka ka li a ungaunga nayo nokatongo, shoka osha li epepelelo kAasamaria mboka ya kala nokuungaungiwa nayo nondhino kAajuda. Onkee ano, itashi kumitha sho ya tsu [“ompango yimwe,” OB-1954]. — Iil. 8:6-8.

¹⁶ Filippus okwa wilikwa kombepo yaKalunga a ye kuAzdod nokuKesarea, iilando iyali mbyoka ya li yi na omwaalu ogundji gwaantu mboka kaaye shi Aajuda. (Iil. 8:39, 40) Konima yomimvo 20 lwaampono, sho Filippus a uvithila muSamaria, onkalo ye oya lunduluka ishewe. Okwa li a tula moshitopolwa she shoka shokuuvitha, oshoka ngashingeyi okwa li e na uukwanegumbo. Nonando onkalo ye oya li ya lunduluka, Filippus okwa kala ta gandja eitulomo kiilonga ye yokuuvitha. Oshizemo? Ye nuukwanegumbo we, oya lalekwa nuuyamba kuJehova. — Iil. 21:8, 9.

17, 18. Okugandja eitulomo kuukalele ohaku tu kwathele ngiini tu kale tu na ondjele, uuna oonkalo dha lunduluka?

¹⁷ Oyendji mboka ye li miilonga yethimbo lyu udha, otaya vulu oku shi koleka kutya okugandja eitulomo kuukalele, okwe ya kwathela ya kale ye na etaloko li li pandjele, nonando oonkalo dhawo odha kala tadhi lunduluka. Sho omumwatate Osborne nomukadhi Polite, yomoSouth Afrika, ya zi mo moBetel, oya li taya dhiladhila kutya otaya ka mona nziya iilonga yokulonga omalupita nosho wo ehala lyokukala. Omumwatate Osborne ota ti: “Mupyamunene, katwa li twa mono iilonga nziya ngaashi twa li twa tegelela.” Omukulukadhi gwe, Polite, ota ti: “Katwa li twa mono iilonga uule woomwedhi ndatu nokatwa li twa pungula po okamaliwa kasha. Osha li eshongo shili.”

¹⁸ Oshike she ya kwathele ya ungaunge nonkalo yawo ndjoka ondhigu? Omumwatate Osborne  okwa ti: “Okuuvitha pamwe negongalo, okwe tu kwathele noonkondo tu pule komeho nokukala netaloko ewanawa. Otwa tokola tu kale twi ipyakidhila niilonga yokuuvitha, pehala lyokukuutumba nokukala tatu ipula unene, noshinima shoka oshe tu etele enyanyu enene. Otwa li twa kongo iilonga kehe pamwe, nahugunina otwe yi mono.”

19-21. (a) Oshike tashi ke tu kwathela tu kale tu na ombili yokomwenyo? (b) Uuwanawa wuni tatu ka mona pauhandimwe, ngele otwa taamba ko omalunduluko?

¹⁹ Ngaashi iiholelwa ye shi ulika, ngele otwa kala tatu ningi ngaashi tatu vulu moonkalo moka tu li nokutegelela Jehova neidhidhimiko, otashi ke tu kwathela tu kale tu na ombili yokomwenyo. (Lesha Mika 7:7.) Otashi vulika tu ke shi mone mo kutya omalunduluko ngoka tatu iyadha mugo, otage tu kwathele tu kale tu na uupambepo wa kola. Omumwameme Polite, ngoka a popiwa muutendo wa zi ko, ota ti: “Okutuminwa muukalele, okwa longa ndje kutya okwiinekela muJehova otaku ti lela shike, nonando onkalamwenyo oyi kale tayi monika ya fa ondhigu. Ekwatathano lyandje naye, olya kolekwa.”

²⁰ Omumwameme Mary, ngoka a popiwa petameko, onkee ngaa ta sile oshimpwiyu he ngoka a kulupa, ye ta kokola ondjila. Ota ti: “Ondi ilonga kutya uuna tandi ipula unene, onda pumbwa okumwena po, e tandi galikana, opo nduno tandi pepelelwa. Okweethela iinima momake gaJehova, oshinima sha simana shoka ndi ilonga, nosha pumbiwa monakuyiwa.”

²¹ Omumwatate Lloyd nomukadhi Alexandra, mboka ya tumbulwa petameko, oye shi zimina kutya sho onkalo yawo ya lunduluka, osha makele eitaalo lyawo momikalo ndhoka ya li inaaya tegelela. Ihe oya ti: “Okumakelwa kweitaalo ohaku ulike ngele eitaalo lyetu olya kola noli na oonkondo dhoku tu ambidhidha noku tu hekeleka, uuna tu li moonkalo oondhigu. Oshe tu kwathele tu kale aantu ye li hwepo.”

22. Ngele otwa kambadhala okuninga ngaashi tatu vulu monkalo yetu moka tu li, otatu vulu okukala nuushili wuni?

²² Ngele pwa ningwa omalunduluko e to iyadha moonkalo ndhoka inoo tegelela, ngaashi okupewa oshinakugwanithwa oshipe mehangano lyaJehova, okukwatwa kuuwehame nenge okukala nuukwanegumbo, natu kale tu na uushili kutya Jehova ote ke tu sila oshimpwiyu note ke ku kwathela pethimbo lyo opala. (Heb. 4:16; 1 Pet. 5:6, 7) Ngashingeyi, ninga ngaashi to vulu monkalo yoye. Hedha popepi naTate gwoye gwomegulu okupitila megalikano, ngoye to ilongo wo okwiinekela muye, opo e ku sile oshimpwiyu. Momukalo gwa tya ngeyi, nangoye oto ka kala wu na ombili yokomwenyo, nonando oonkalo odhi lunduluke.