OMUTENGENEKI gwonkalo yombepo oha konakona oshuuliki shonkalo yombepo. Oha vulu okumona oshikungulu sha nika oshiponga shoka shi li pokuya mehala lyontumba moka mu na aantu oyendji. Molwaashono oku na ko nasha naantu mboka, ohe ya londodha manga kuyele.

Momukalo gwa faathana, Jehova ota londodha aantu ngashingeyi kombinga “yoshikungulu” sha nika oshiponga noonkondo, shi vulithe pukehe shoka tashi vulika ya uve kombinga yonkalo yombepo. Shoka ohe shi ningi ngiini? Omolwashike tatu vulu okukala nuushili kutya oha pe aantu ethimbo lya gwana, yi inyenge kelondodho lye? Opo tu mone omayamukulo, natu kundathaneni tango omalondodho gamwe ngoka Jehova a li a gandja monakuziwa.

Pethimbo lyOmbiimbeli, Jehova okwa li a londodha aantu kombinga “yiikungulu” nenge yepangulo ndyoka lya li tali ka adha mboka ya li ihaaya vulika owina komalombwelo ge. (Omayel. 10:25; Jer. 30:23) Kehe oshikando a li e ya londodha, okwe shi ningi komeho yethimbo noku ya lombwela ya ninge omalunduluko ngoka ga li metsokumwe nehalo lye. (2 Aak. 17:12-15; Neh. 9:29, 30) Opo a kwathele aantu ya ninge omalunduluko ngoka ga pumbiwa, olundji okwa li ha longitha aapiya ye aadhiginini kombanda yevi ya tseyithile aantu kombinga yomapangulo ge. — Amos 3:7.

Noa okwa li gumwe gwomaapiya aadhiginini mboka ya li ya longithwa kuKalunga. Uule womimvo odhindji, okwa li a londodha nuulaadhi aantu yopethimbo lye mboka kaaye na omikalo naakolokoshi, kombinga yEyelu ndyoka lya li tali ke ya muuyuni awuhe. (Gen. 6:9-13, 17) Okwa li wo e ya lombwele shoka ye na okuninga, opo ya hupe pEyelu ndyoka. Lwanima okwa ka ithanwa “omuuvithi guuyuuki.” — 2 Pet. 2:5.

Nonando Noa okwa li a ningi oonkambadhala, aantu mboka oya li yi ipwililikile etumwalaka lyaKalunga ndyoka e ya uvithile. Oya ulike kutya kaye na eitaalo. Oshizemo, oya si, sho Eyelu lye ya, “nolye ya hanagula po ayehe.” (Mat. 24:39; Heb. 11:7) Kaya li taya vulu okwiipopila kutya Kalunga ine ya londodha.

Poompito dhilwe, Jehova okwa li a londodha oohandimwe meni lyethimbo efupi, manga “oshikungulu” shetokolo lye inaashi tameka. Nonando ongawo, okwa li ha shilipaleke kutya aantu oya pewa ethimbo lya gwana ya ninge po sha, omanga inee ya geela. Pashiholelwa, okwa li a gandja omalondodho kuyele pethimbo lyOmageelo Omulongo ngoka ga li ga adha Aaegipiti. Oshiholelwa shimwe, oosho Jehova a li a tumu Moses naAaron ya ka londodhe Farao naapiya ye kombinga yegeelo etiheyali, ano oshikungulu shoompawe oshidhigu. Molwaashono oshikungulu shoka osha li tashi ka tameka esiku lya landula ko, mbela Kalunga okwa li e ya pe ethimbo lya gwana ya mone ehala mpoka taya kala, opo yi igamene kusho? Ombiimbeli otayi ti: “Omalenga gamwe gomukwaniilwa ngoka ga li ga tila oohapu dhOmuwa, oga fala aapika yawo niimuna yawo, yi ondame meni megameno. Gamwe inaga pupa ko kelondodho lyOmuwa noye ethele aapika yawo niimuna yawo pondje.” (Eks. 9:18-21) Osha yela kutya Jehova okwa li e ya pe omalondodho ogendji, opo mboka ya katuka oonkatu nziya, kaaya adhike kegeelo ndyoka.

Farao naapiya ye oya li wo ya londodhwa komeho yethimbo, omanga egeelo etimulongo inaali ya adha. Nonando ongawo, inaya pupa ko kelondodho ndyoka. (Eks. 4:22, 23) Oshizemo, oyanamati iiyeli oya si. Oluhodhi olu thike peni! (Eks. 11:4-10; 12:29) Mbela oya li taya vulu okuninga po sha, manga pu na ethimbo? Eeno! Moses okwa li a londodha Aaisraeli nziya kombinga yegeelo etimulongo, e te ya lombwele  nkene ye na okuhupitha aanegumbo lyawo. (Eks. 12:21-28) Aantu yangapi ya li ya vulika kelondodho ndyoka? Shi ikolelela komatengeneko gamwe, aantu omamiliyona gatatu, mwa kwatelwa Aaisraeli nosho wo “aantu yalwe aayeni” kaaye shi Aaisraeli nAaegipiti, kaya li ya geelwa kuKalunga, e taya zi mo muEgipiti. — Eks. 12:38.

Ngaashi iiholelwa mbyoka ye shi ulike, Jehova okwa li ha shilipaleke aluhe kutya aantu oya londodhwa sha gwana. (Deut. 32:4) Okwa li he shi ningile shike? Omuyapostoli Petrus okwe shi yelitha kutya Jehova “ina hala, ku kale nando ogumwe ta geelwa, ihe okwa hala, aantu ayehe ye ethe uulunde wawo.” (2 Pet. 3:9) Odhoshili kutya Kalunga okwa li e na ko nasha nayo. Okwa li a hala yi itedhulule noya ninge omalunduluko ngoka ga pumbiwa, manga inaa katuka onkatu. — Jes. 48:17, 18; Rom. 2:4.

Kunena, aantu ayehe oya pumbwa wo okuvulika kelondodho lya simana, ndyoka tali gandjwa muuyuni awuhe. Sho Jesus a li kombanda yevi, okwa li a londodha aantu kutya uuyuni mbuka otawu ka hanagulwa po ‘puudhigu uunene.’ (Mat. 24:21) Shi na ko nasha netokolo ndyoka lyomonakuyiwa, okwa gandja ehunganeko tali yelitha shoka aalanduli ye tashi vulika ya ka mone naashoka tashi vulika shi ke ya adhe, sho ethimbo ndyoka tali hedha popepi. Kungawo, Jesus okwa popi iiningwanima iinene mbyoka tu wete tayi ningwa muuyuni kunena. — Mat. 24:3-12; Luk. 21:10-13.

Metsokumwe nehunganeko ndyoka, kunena Jehova ota ladhipike aantu ayehe ye mu longele noya vulike kuye. Okwa hala mboka haya vulika kuye ya nyanyukilwe onkalamwenyo ngashingeyi nosho wo omalalekonuuyamba muuyuni uupe. (2 Pet. 3:13) Molwaashoka Jehova okwa hala aantu ya kale ye na eitaalo momauvaneko ge, okwe ya pa etumwalaka tali hupitha oomwenyo, ano “elaka . . . etoye lyOshilongo,” ndyoka Jesus a hunganeke kutya otali ka “uvithilwa aantu ayehe, li ningile iigwana ayihe onzapo.” (Mat. 24:14) Jehova okwa unganeka aalongeli ye yashili ya gandje ‘uunzapo’ nenge tu tye ya uvithe etumwalaka lyopakalunga, miilongo 240 lwaampo. Okwa hala aantu oyendji ngaashi tashi vulika, ya vulike kelondodho ndyoka nokaaya adhike ‘keyonuko.’ — Sef. 1:14, 15; 2:2, 3.

Epulo ndyoka lya simanenena, kali shi ando kutya ngele Jehova oha pe aantu ethimbo lya gwana, yi inyenge komalondodho ge. Omanyolo otage shi ulike kutya shoka osho ha ningi aluhe. Ihe epulo lya simanenena olyo ndika kutya: Aantu otaya ka pulakena ngaa kelondodho lyaKalunga, omanga pu na ethimbo? Tu li aatumwa yaKalunga, natu tsikile okukwathela aantu oyendji ngaashi tashi vulika, opo ya ka hupithwe, sho uuyuni mbuka tawu ka hanagulwa po.