1. Jehova okwe tu pa etegameno lini?

 JEHOVA okwe tu pa etegameno lya dhenga mbanda lyoku ka kala nomwenyo sigo aluhe. Yamwe oye na etegameno lyoku ka kala nomwenyo sigo aluhe megulu ye li iishitwa yopambepo. (1 Kor. 15:50, 53) Ihe aantu oyendji oye na etegameno lyoku ka kala nomwenyo sigo aluhe kombanda yevi ye na uukolele wi ihwapo noya nyanyukwa. (Eh. 21:3, 4) Kutya nduno otu na etegameno lyoku ka kala nomwenyo sigo aluhe megulu nenge okombanda yevi, etegameno lyetu oli na lela ongushu kutse.

2. Etegameno lyetu olya kankamena koshike, nomolwashike tatu tile ngawo?

² Oshitya ‘etegameno,’ ngaashi sha longithwa mOmbiimbeli otashi vulu okuyelithwa kutya “okukala neinekelo kutya iinima iiwanawa otayi ka ningwa.” Otatu vulu okukala nuushili kutya etegameno ndyoka tu na lyonakuyiwa otali ka gwanithwa shili, oshoka Jehova oye e li uvaneka. (Rom. 15:13) Otu shi kutya oku uvaneka shike, notu shi wo kutya oha gwanitha po aluhe omauvaneko ge. (Num. 23:19) Otwa tompwa kutya Jehova oku na ehalo noonkondo dhokugwanitha po kehe shimwe shoka ta ti ote ke shi ninga. Onkee etegameno lyetu ndyoka tu na inali ikolelela kokufekela, ihe okiinima mbyoka tu shi kutya oyoshili.

3. Oshike tatu ka kundathana moshitopolwa shika? (Episalomi 27:14)

³ Tate gwetu gwomegulu oku tu hole, nokwa hala tu kale twe mu inekela. (Lesha Episalomi 27:14.) Uuna einekelo nosho wo etegameno lyetu muJehova lya kola, otatu ka vula okwiidhidhimikila omamakelo notatu vulu okutaalela onakuyiwa tu na omukumo notwa nyanyukwa. Natu ka taleni nkene etegameno lyetu hali tu gamene. Tango otatu ka tala nkene etegameno tali faathanithwa nohangela nosho wo negala lyosheela. Opo nduno otatu ka kundathana nkene tatu vulu okukoleka etegameno lyetu.

4. Omolwashike etegameno tali faathanithwa nohangela? (Aahebeli 6:19)

⁴ Montumwafo ye ndjoka omuyapostoli Paulus a li a nyolele Aahebeli, okwa yelekanitha etegameno lyetu nohangela. (Lesha Aahebeli 6:19.) Olundji okwa li hayi momalweendo noosikepa, onkee Paulus okwa li e shi kutya oohangela ohadhi longithwa okukwata osikepa kaayi falwafalwe. Pompito yimwe sho a li omufaalelwa mosikepa yimwe, mefuta omwa li mwa tukuluka oshikungulu sha pindjala. Pethimbo lyoshikungulu shoka, okwa li a mono aathayili taya umbile oohangela momeya opo dhi keelele osikepa kaayi idhenge komamanya ga nika oshiponga ngoka ge li kohi yomeya. (Iil. 27:29, 39-41) Ngaashi ohangela hayi kankameke osikepa, etegameno lyetu ohali tu kaleke popepi naJehova opo kaatu falwafalwe uuna tu na omaupyakadhi ngoka ga fa iikungulu ya pindjala. Ohali tu kwathele tu kale twa ngungumana, molwaashoka otu shi kutya shikukutu ona ka hule. Dhimbulukwa kutya Jesus okwe tu londodha a ti kutya otatu ka hepekwa. (Joh. 15:20) Onkee okutedhatedha ketegameno lyonakuyiwa ndyoka Jehova e tu uvanekela, ohaku tu kwathele tu tsikile oku mu longela.

5. Etegameno olya li lya kwathele ngiini Jesus sho a li a taalela eso?

⁵ Natu ka taleni nkene etegameno lya li lya kwathele Jesus a tsikile okukala omudhiginini, nonando okwa li e shi kutya ota ka dhipagwa momukalo tagu uvitha omwenyo omutoye. Mesiku lyOpentekoste 33 E.N., omuyapostoli Paulus okwa li a totha membo lyOmapisalomi ehunganeko limwe ndyoka tali popi kombinga yankene Jesus a li a ngungumana ye oku na omukumo a ti: “Otandi vululukwa nombili metegameno. Oshoka omwenyo gwandje ito gu ethele moshaasi. Ngoye ito pitika, omuntu gwoye omwiinekelwa a ole. . . . Ngame nonda nyanyukwa, oshoka ou li pungame.” (Iil. 2:25-28; Eps. 16:8-11) Nonando Jesus okwa li e shi kutya ota ka sa, okwa li e na etegameno lya kola kutya Kalunga ote ke mu yumudha nota ka kala ishewe a nyanyukwa sho ta ka hangana naHe megulu. — Heb. 12:2, 3.

6. Omumwatate gumwe okwa popi shike kombinga yetegameno?

⁶ Etegameno lyetu lyopaKriste olya kwathela aamwatate naamwameme oyendji yi idhidhimike. Natu taleni koshiholelwa shaLeonard Chinn, omumwatate omudhiginini ngoka a li a kala moIngilanda. Pethimbo lyIita yoTango yUuyuni, okwa li a tulwa mondholongo molwaashoka a tindi okuya muukwiita. Uule woomwedhi adhihe mbali okwa kala a tulwa mokandunda oye awike. Konima yaashoka, okwa li a thiminikwa a longe iilonga iidhigu noonkondo. Lwanima okwa nyola a ti: “Oonkalo ndhoka nde enda mudho odha kwathela ndje ndi mone kutya otwa pumbwa lela etegameno, opo tu idhidhimike. Otu na iiholelwa ngaashi shaJesus, shAayapostoli, shaahunganeki notu na wo omauvaneko omawanawa lela ge li mOmbiimbeli. Iinima ayihe mbyoka ohayi tu kwathele tu kale tu na etegameno lyonakuyiwa nohatu kala tu na omukumo gwokwiidhidhimika.” Etegameno olya li ohangela kuLeonard, notali vulu wo okukala ohangela kutse.

7. Omamakelo ohaga koleke ngiini etegameno lyetu? (Aaroma 5:3-5; Jakob 1:12)

⁷ Uuna tatu idhidhimikile omamakelo nokumona nkene Jehova te tu kwathele, ohatu mono kutya okwe tu hokwa, naashika ohashi koleke etegameno lyetu. (Lesha Aaroma 5:3-5; Jakob 1:12.) Kungawo, ohatu kala tu na etegameno lya kola shi vulithe nale sho opo twa taamba ko onkundana ombwanawa. Satana okwa hala omamakelo getu ge tu gwilile po, ihe kekwatho lyaJehova otatu vulu okwiidhidhimikila emakelo kehe nomupondo.

8. Omolwashike etegameno tali yelekanithwa negala lyosheela? (1 Aatessalonika 5:8)

⁸ Ombiimbeli otayi yelekanitha etegameno lyetu negala lyosheela. (Lesha 1 Aatessalonika 5:8.)  Omukwiita oha zala egala lyosheela li gamene omutse gwe kiikuti mbyoka ta umbwa kaatondi ye. Molugodhi lwetu lwokukondjitha Satana, otwa pumbwa okugamena omadhiladhilo getu komaponokelo ge. Oha longitha iinima yi ili noyi ili e tu makele, noha kambadhala okunyateka omadhiladhilo getu. Ngaashi owala egala lyosheela hali gameme omutse gwomukwiita, etegameno lyetu ohali gamene omadhiladhilo getu, opo tu kale aadhiginini kuJehova.

9. Aantu ngele kaye na etegameno ohaya ningi shike?

⁹ Etegameno lyetu lyoku ka kala nomwenyo sigo aluhe otali vulu oku tu kwathela tu ninge omatokolo ge li pandunge. Ihe ngele etegameno lyetu olya nkundipala e tatu etha omadhiladhilo gopantu ge tu tone oonkondo, otatu ka dhimbwa etegameno lyetu ndyoka lyomwenyo gwaaluhe. Natu ka taleni koshiholelwa shAakriste yamwe mboka ya li muKorinto shonale. Oya li ya kanitha eitaalo meuvaneko lyaKalunga lya simana, lyetegameno lyeyumuko. (1 Kor. 15:12) Paulus okwa nyola kutya aantu mboka inaaya itaala meyumuko, ohaya gwanitha po owala omahalo gawo yene. (1 Kor. 15:32) Kunena aantu oyendji mboka kaaye na etegameno momauvaneko gaKalunga, ohaya ningi kehe shimwe monkalamwenyo opo ya kale ya nyanyukwa. Ihe tse otwa yooloka ko kuyo molwaashoka otwi inekela monakuyiwa ndjoka Kalunga e tu uvanekela. Etegameno lyetu olya fa egala lyosheela lyopathaneko, ndyoka hali gamene okudhiladhila kwetu noku tu kwathela kaatu dhiladhile owala kombinga yetu, shoka tashi vulu okuyona po ekwatathano lyetu naJehova. — 1 Kor. 15:33, 34.

10. Etegameno otali vulu ngiini oku tu gamena komadhiladhilo ga puka?

¹⁰ Etegameno lyetu otali vulu oku tu kwathela kaatu dhiladhile kutya itatu vulu nando okunyanyudha Jehova. Pashiholelwa, yamwe otashi vulika ya tye: ‘Ngame itandi ka kala nando ogumwe gwomwaamboka taya ka kala nomwenyo sigo aluhe. Kandi shi nando omuntu lela e li nawa. Itandi ka vula okuninga shoka Kalunga a hala ndi ninge.’ Dhimbulukwa kutya omuhekeleki omufundja gwaJob, Elifas, okwa li a longitha omatompelo ga faathana sho a li ta popi naJob. Elifas okwa ti: “Omuntu a wape ngiini okukala omuyelele?” Okwa popi ishewe kombinga yaKalunga a ti: ‘Maayapuki ye ini inekela mo nando ogumwe, negulu lyo lyene inali yela momeho ge.’ (Job 15:14, 15) Kayi shi tuu iifundja iikukutu! Dhimbulukwa kutya Satana oye a hala wu dhiladhile ngaaka. Oku shi kutya ngele owi iyethele mokukala to dhiladhila ngawo, etegameno lyoye otali ka enda tali kana po. Onkee yanda iifundja mbyoka e to gandja eitulomo komauvaneko gaJehova. Ino limbililwa nando kutya okwa hala wu ka kale nomwenyo sigo aluhe nosho wo kutya ote ku kwathele wu adhe elalakano ndyoka. — 1 Tim. 2:3, 4.

11. Omolwashike tu na okwiidhidhimika sho twa tegelela etegameno lyetu li gwanithwe po?

¹¹ Ihashi kala aluhe oshipu okukaleka etegameno lyetu lya kola. Otashi vulika tu tameke okukala itaatu vulu we okwiidhidhimika tu tegelele Kalunga a gwanithe po omauvaneko ge. Ihe molwaashoka Jehova oko a kala aluhe, ethimbo ndyoka tu wete ele kutse, kuye efupi. (2 Pet. 3:8, 9) Ota ka ninga shoka a uvaneka momukalo omwaanawa lela, ihe otashi vulika itee ke shi ninga momukalo moka twa tegelela e ke shi ninge. Oshike tashi vulu oku tu kwathela tu kaleke etegameno lyetu lya kola sho twa tegelela neidhidhimiko Kalunga a gwanithe po omauvaneko ge? — Jak. 5:7, 8.

12. Shi ikolelela kAahebeli 11:1, 6, etegameno olya kwatathana ngiini neitaalo?

¹² Ngele otwa kala popepi naJehova, otatu kaleke etegameno lyetu lya kola, molwaashoka oye ta ka gwanitha po etegameno ndyoka. Opo tu kale tu na etegameno ndyoka, otu na okukala twi itaala kutya Jehova oko e li nosho wo kutya oha “futu ayehe mboka taye mu kongo.” (Lesha Aahebeli 11:1, 6.) Ngele otwa itaala lela kutya Jehova oko  e li, otatu ka kala tu na lela omukumo kutya ota ka ninga shoka a uvaneka. Natu ka taleni komikalo tadhi tu kwathele tu kokeke ekwatathano lyetu naJehova nokungawo otatu ka kala tu na etegameno lya kola.

13. Ongiini tatu vulu okuhedha popepi naKalunga?

¹³ Galikana kuJehova nokulesha Oohapu dhe. Nonando itatu vulu okumona Jehova, otatu vulu okuhedha popepi naye. Otatu vulu okupopya naye megalikano, tu na einekelo kutya ota ka pulakena kutse. (Jer. 29:11, 12) Otatu vulu okupulakena kuKalunga uuna tatu lesha Oohapu dhe nokutedhatedha kudho. Sho tatu lesha kombinga yankene Jehova a li a kwathele aantu mboka ya li aadhiginini kuye monakuyiwa, etegameno lyetu otali tsikile okukola. Ashihe shoka shi li mOohapu dhaKalunga “osha nyolwa shi tu longe, opo tu kale tu na etegameno tali zi mokwiidhidhimika notu mone omukumo, ngele tatu lesha oohapu dhaKalunga.” — Rom. 15:4.

14. Omolwashike tu na okudhiladhila kwaashoka Jehova a ningila yalwe?

¹⁴ Tedhatedha kunkene Jehova a gwanitha po omauvaneko ge. Natu taleni kwaashoka Kalunga a li a ningile Abraham naSara. Oya li ya thika mepipi lyuukulupe, onkee kaya li taya vulu okumona aanona. Ihe Kalunga okwa li e ya uvanekele kutya otaya ka mona okanona. (Gen. 18:10) Abraham okwi inyenge ngiini? Ombiimbeli otayi ti: ‘Okwa li e na eitaalo kutya ota ka ninga he yiigwana oyindji.’ (Rom. 4:18) Nonando Abraham kali e shi kutya euvaneko ndyoka lyaKalunga otali ka ninga ngiini lyoshili, okwa li e na eitaalo kutya Jehova ota ka gwanitha po shoka a uvaneka. Omulumentu ngoka omudhiginini kali a yematekwa. (Rom. 4:19-21) Omahokololo ngoka ohage tu longo kutya otatu vulu aluhe okukala tu na einekelo kutya omauvaneko gaJehova otaga ka gwanithwa po, nonando oshi kale sha fa itaashi wapa.

15. Omolwashike tu na okudhiladhila kwaashoka Kalunga e tu ningila?

¹⁵ Dhiladhila kwaashoka Jehova e ku ningila. Dhiladhila kombinga yankene wa mona nale  uuwanawa pauhandimwe momauvaneko ngoka taga gwanithwa nale ge li mOohapu dhaKalunga. Pashiholelwa, Jesus oku uvaneka kutya He ote ke ku sila oshimpwiyu monkalamwenyo. (Mat. 6:32, 33) Jesus okwe ku shilipaleka wo kutya Jehova ote ku pe ombepo ondjapuki ngele owe yi mu pula. (Luk. 11:13) Jehova okwa kala nokugwanitha po omauvaneko ngoka. Otashi vulika to dhimbulukwa omauvaneko galwe ngoka e ku gwanithila po nale. Pashiholelwa, oku uvaneka kutya ote ku dhimine po, ote ku hekeleke, noku ku pa shoka wa pumbwa opo wu kale popepi naye. (Mat. 6:14; 24:45; 2 Kor. 1:3) Ngele owa tedhatedha kwaashoka Jehova e ku ningila nale, oto ka koleka etegameno lyoye mwaashoka te ke ku ningila monakuyiwa.

16. Omolwashike etegameno li li omagano ge na ongushu?

¹⁶ Etegameno lyetu lyomwenyo gwaaluhe omagano ge na ongushu ga za kuKalunga. Otwa tegelela nondjuulukwe onakuyiwa ombwanawa, ndjoka tu na uushili kutya otayi ke ya. Etegameno lyetu olya fa ohangela, oshoka ohali tu kwathele tu kale twa ngungumana sho tatu idhidhimikile omashongo, omahepeko, nokuli naasho twa taalela eso. Etegameno lyetu olya fa wo egala lyosheela, oshoka ohali gamene omadhiladhilo getu, opo tu yande shoka sha puka nokuninga shoka shi li mondjila. Etegameno lyetu lya kankamena kOmbiimbeli ohali tu hedhitha popepi naKalunga nohali holola kutya otu mu hole shi thike peni. Ohatu mono lela uuwanawa sho hatu kaleke etegameno lyetu lya kola.

17. Omolwashike etegameno lyetu hali tu etele enyanyu?

¹⁷ Oohapu “etegameno nali mu nyanyudhe,” odha li dha tsu omukumo omuyapostoli Paulus montumwafo ndjoka a nyolele Aaroma. (Rom. 12:12) Paulus okwa li ta vulu okukala a nyanyukwa molwaashoka okwa li e shi kutya ngele okwa kala omudhiginini, ota ka mona omwenyo gwaaluhe megulu. Natse otatu vulu wo okukala twa nyanyukwa omolwetegameno lyetu, molwaashoka otu na uushili kutya Jehova ota ka gwanitha po omauvaneko ge. Omupisalomi gumwe okwa nyola a ti: ‘Omunelago oye ngoka i inekela Omuwa, Kalunga ke. Oye omushiti gwegulu nogwevi, gwefuta noshaa shoka sha kala muyo. Omuwa ngoka omudhiginini aluheluhe.’ — Eps. 146:5, 6.