1. ‘Oluhepo lwokoomwenyo’ hatu kala tu uvite tu na olwashike, nolwa kwatathana ngiini nenyanyu lyetu?

 ENYANYU lyashili kali shi owala omaiyuvo ngoka hage ya po e taga kana po. Omuntu ota vulu okukala a nyanyukwa onkalamwenyo ye ayihe. Omolwashike tatu tile ngawo? Jesus okwa li e shi yelitha mEuvitho lye lyokOndundu a ti: “Aanelago oomboka yu uvite oyo oohepele koomwenyo.” (Mat. 5:3) Jesus okwa li e shi kutya aantu oya shitwa nehalo lela lyokutseya nokulongela Omushiti gwawo, Jehova Kalunga. Ndoka olwo ‘oluhepo lwokoomwenyo hatu kala tu uvite’ tu na. Shimwe ishewe, molwaashoka Jehova ‘oKalunga omunyanyukwi,’ mboka haye mu longele nayo otaya vulu okukala ya nyanyukwa. — 1 Tim. 1:11, NW.

2-3. (a) Shi ikolelela koohapu dhaJesus, oolye ishewe taya vulu okukala ya nyanyukwa? (b) Oshike tatu ka kundathana moshitopolwa shika, nomolwashike sha pumbiwa?

² Mbela otatu vulu okukala owala twa nyanyukwa uuna kaatu na omaupyakadhi? Hasho nando. Jesus mEuvitho lye lyokOndundu okwa li a popi oshinima shimwe oshikumithi. Aantu ‘mboka ya nika uuthigwa’ kutya nduno omolwaashoka oyu uvite unene ondjo omolwomayono gawo nenge omolwoonkalo tadhi yemateke monkalamwenyo yawo, otaya vulu okukala ya nyanyukwa. Jesus okwa popi wo oshinima sha faathana kombinga ‘yaamboka taa hepekwa molwaashoka taa longo uuwanawa’ nenge taya ‘shekwa’ sho ye li aalanduli yaKristus. (Mat. 5:4, 10, 11) Ihe mbela otashi vulika ngaa omuntu a kale a nyanyukwa shili moonkalo dha tya ngawo?

 ³ Jesus okwa li te tu longo kutya enyanyu lyashili ihali zi owala mokukala kaatu na omaupyakadhi, ihe omokugwanitha po ompumbwe yetu ndjoka tu na yokuwilikwa kuKalunga nosho wo okuhedha popepi naye. (Jak. 4:8) Ongiini tatu vulu oku shi ninga? Moshitopolwa shika, otatu ka kundathana iinima itatu mbyoka twa pumbwa okuninga opo tu kale twa nyanyukwa shili.

4. Oshinima shini shotango tu na okuninga opo tu kale twa nyanyukwa shili? (Episalomi 1:1-3)

⁴ ONKATU 1: Opo tu kale twa nyanyukwa shili, otu na okukala hatu lesha nokukonakona Oohapu dhaKalunga. Aantu niinamwenyo oya pumbwa iikulya yoyene yene, opo ya kale nomwenyo. Ihe aantu oyo owala haya li iikulya yopambepo. Noya pumbwa oku shi ninga. Nomolwaashoka Jesus a ti: “Omuntu ita kala e na omwenyo koshikwiila ashike, ihe okukehe ohapu tayi zi mokana kaKalunga.” (Mat. 4:4) Onkee, inatu kala hatu etha pu pite esiku inaatu lesha Oohapu dhaKalunga dhi na ongushu, Ombiimbeli. Omupisalomi gumwe okwe shi ndhindhilike a ti: ‘Omunelago oha nyanyukilwa okuvulika kompango yOmuwa nohe yi ilongo omutenya nuusiku.’ — Lesha Episalomi 1:1-3.

5-6. (a) Oshike tatu vulu okwiilonga mOmbiimbeli? (b) Okulesha Ombiimbeli otaku vulu oku tu kwathela momikalo dhini?

⁵ Molwaashoka Jehova oku tu hole, okwe tu ulukila mOmbiimbeli shoka tu na okuninga opo tu kale twa nyanyukwa monkalamwenyo. MOmbiimbeli ohatu ilongo mo kutya elalakano lye li na ko nasha nonkalamwenyo yetu olini. Ohatu ilongo mo nkene tatu vulu okuhedha popepi naye, naashoka tu na okuninga opo e tu dhimine po omayono getu. Ohatu ilongo mo wo kombinga yetegameno ewanawa ndyoka a uvaneka li na ko nasha nonakuyiwa. (Jer. 29:11) Oshili ndjoka  hatu ilongo sho tatu konakona Ombiimbeli ohayi tu etele enyanyu!

⁶ Otu shi kutya Ombiimbeli oyu udha omayele ngoka taga vulu oku tu kwathela esiku kehe. Ngele otwa landula omayele ngoka, otatu ka kala twa nyanyukwa. Uuna wu uvite wa teka omukumo omolwomaupyakadhi gonkalamwenyo, kala ho longitha ethimbo olindji mokulesha Oohapu dhaJehova nokutedhatedha kudho. Jesus okwa ti: “Aanelago oomboka taa uvu oohapu dhaKalunga e taye dhi dhiginine.” — Luk. 11:28.

7. Oshike tashi vulu oku ku kwathela wu mone mo uuwanawa owundji mOohapu dhaKalunga uuna to dhi lesha?

⁷ Sho to lesha Oohapu dhaKalunga, kala ho longitha ethimbo wu dhiladhile kwaashoka to lesha. Pashiholelwa, mbela owi iyadhele monkalo ndjika? Omuntu gwontumba e ku telekela iikulya mbyoka wu hole, ihe molwaashoka owa li wa endelela nenge to dhiladhila kiinima yilwe, iikulya mbyoka owe yi li owala to endelele na ino uva lela omulyo gwayo. Sho wa mana okulya owe shi ndhindhilike kutya owa li iikulya mbyoka to endelele. Nowa tameke to ipe uusama kutya ando owe endele kashona e to taasina nawa iikulya yoye. Shoka otashi vulu okufaathanithwa nuuna tatu lesha Ombiimbeli. Omathimbo gamwe, ohatu yi lesha tatu endelele noihatu kala tu uvite ko lela etumwalaka lyayo. Onkee kala ho longitha ethimbo wu leshe Oohapu dhaKalunga. Sho to shi ningi kala ho kala wa fa wu wete shoka to lesha; kala ho kala wa fa wu uvite omawi gaamboka taya popi mehokololo ndyoka to lesha, nokudhiladhila wo kwaashoka wa lesha. Ngele osho wa ningi, oto ka kala wa nyanyukwa shi vulithe nale.

8. ‘Omupiya omudhiginini nomunandunge’ oha gwanitha po ngiini oshinakugwanithwa she? (Tala wo enyolo lyopevi.)

⁸ Jesus okwa langeka po ‘omupiya omudhiginini nomunandunge’ e tu pe iikulya yopambepo pethimbo lya opala, notwa paluthwa nawa lela pambepo. c (Mat. 24:45, yelekanitha NW) Omupiya ngoka oha longitha Oohapu dhaKalunga mukehe shimwe shoka he tu longekidhile. (1 Tes. 2:13) Iikulya mbyoka yopambepo ohayi tu kwathele tu tseye nkene Jehova ha dhiladhila, ngaashi sha hololwa mOmbiimbeli. Nomolwaashoka hatu lesha iifo yOshungolangelo, yaPenduka mo nosho wo iitopolwa mbyoka yi li kepandja lyetu lyokointaneta, jw.org. Ohatu ilongekidhile okugongala kwomokati koshiwike nosho wo kwomehuliloshiwike. Omwedhi kehe ohatu tala wo opolohalama kotiivii JW, ngele oko yi li. Ngele otwa kala hatu lesha nokukonakona Ombiimbeli, otatu ka vula okutula miilonga oshinima oshitiyali, nongele osho otwa ningi otatu ka mona enyanyu lyashili.

9. Oshinima oshitiyali hashi tu etele enyanyu lyashili oshini?

⁹ ONKATU 2: Opo tu kale twa nyanyukwa shili, otwa pumbwa okukala metsokumwe nomithikampango dhaJehova. Omupisalomi gumwe okwa nyola a ti: “Aanelago oomboka haa simaneke Omuwa nohaa vulika kiipango ye.” (Eps. 128:1) Okutila Jehova otashi ti kutya okukala twe mu simaneka noonkondo shoka tashi ningitha tu yande okuninga kehe shimwe shoka tashi mu yemateke. (Omayel. 16:6) Onkee ohatu kambadhala okukala metsokumwe nomithikampango dhaKalunga dhaashoka sha puka naashoka shi li mondjila ngaashi dha yelithwa mOmbiimbeli. (2 Kor. 7:1) Otatu ka kala twa nyanyukwa, ngele ohatu ningi iinima mbyoka Jehova e hole nohatu yanda okuninga mbyoka e tonde. — Eps. 37:27; 97:10; Rom. 12:9.

10. Shi ikolelela kAaroma 12:2, otu na oshinakugwanithwa shini?

¹⁰ Lesha Aaroma 12:2. Omuntu otashi vulika a kale e shi kutya Jehova oku na uuthemba wokutokola shoka shi li mondjila naashoka sha puka, ihe oku na wo okutokola okulandula omithikampango dhaKalunga. Pashiholelwa, omuntu otashi vulika a kale e shi kutya epangelo  moshilongo oli na uuthemba wokutula po ondapo ndjoka omuntu e na okuhingila. Ihe otashi vulika a kale inaa hala okuvulika kondapo ndjoka. Oshizemo? Oha hingilile owala sha pitilila. Ohatu shi ulike meihumbato lyetu kutya otwa itaala lela kutya okulandula omithikampango dhaJehova osho oshinima sha dhenga mbanda. (Omayel. 12:28) David naye osho a li e uvite ngaaka. Nomolwaashoka a popi kombinga yaJehova a ti: “Ongoye to tseyithile ndje ondjila yomwenyo; pungoye opu na enyanyu lyandje nuunelago wandje sigo aluhe.” — Eps. 16:11.

11-12. (a) Uuna tu na omaipulo nenge twa teka omukumo, oshike tu na okukotokela? (b) Oohapu ndhoka dhi li mAafilippi 4:8 otadhi vulu oku tu kwathela ngiini uuna tatu hogolola omainyanyudho?

¹¹ Uuna tu na omaipulo nenge twa teka omukumo, otashi vulika tu kale tu uvite twa pumbwa okuninga sha shoka tashi tu kwathele kaatu kale we tatu ipula nomaupyakadhi getu. Shoka oshi shi okuuviwa ko, ihe otu na okukala twa kotoka kaatu ninge oshinima shoka Jehova e tonde. — Ef. 5:10-12, 15-17.

¹² Montumwafo ye ndjoka a li a nyolele Aafilippi, omuyapostoli Paulus okwa ladhipika Aakriste ya tsikile okudhiladhila kiinima mbyoka ‘yoshili, yo opala, yu uka, noya yogoka.’ (Lesha Aafilippi 4:8.) Nonando Paulus ina nyola kondandalunde kombinga yomainyanyudho, shoka a nyola oshi na oku tu inyengitha tu tale nawa uuna tatu hogolola omainyanyudho. Kambadhala okuninga ngiika: Uuna wa mono oshitya “iinima” shi li movelise, shi pingakanitha po noshitya “omaimbilo,” “oomuvi,” “uumbo womatotwahokololo” nenge “uudhano wuuvidio.” Ngele osho wa ningi, shoka otashi ke ku kwathela wu mone kutya owuni Kalunga tashi vulika a hokwa naamboka tashi vulika inaa hokwa. Otwa hala tu kale metsokumwe nomithikampango dhaJehova dha dhenga mbanda. (Eps. 119:1-3) Kungawo, otatu ka vulu okuninga oshinima sha landula ko tu na eiyuvo lya yela, shoka tashi vulu oku tu etela enyanyu lyashili. — Iil. 23:1.

13. Oshinima oshititatu oshini tashi tu etele enyanyu lyashili? (Johannes 4:23, 24)

¹³ ONKATU 3: Shilipaleka kutya okulongela Jehova osho oshinima shi li pondondo yotango monkalamwenyo yoye. Molwaashoka Jehova oye e tu shita, otu na oku mu longela. (Eh. 4:11; 14:6, 7) Onkee, otwa pumbwa okupititha komeho oku mu longela momukalo moka a hala tu mu longele “mombepo nomoshili.” (Lesha Johannes 4:23, 24.) Otwa hala ombepo ondjapuki yaKalunga yi tu wilike sho tatu mu longele, opo tu kale metsokumwe noshili ndjoka tayi adhika moohapu dhe. Oku mu longela kwetu okwa pumbwa okukala pondondo yotango kutya nduno otu li moshilongo moka iilonga yetu ya indikwa nenge inaatu manguluka oku shi ninga. Ngashingeyi, aamwatate naamwameme ye vulithe 100 oya tulwa moondjedhililo, molwaashoka owala ye li Oonzapo dhaJehova. d Nonando ongawo, ohaya ningi ngaashi taya vulu ya nyanyukwa, ya galikane, ya konakone Ombiimbeli noya lombwele yalwe kombinga yaKalunga ketu nUukwaniilwa we. Uuna tatu shekwa nenge tatu hepekwa, otatu vulu okukala twa nyanyukwa molwaashoka otu shi kutya Jehova oku li pamwe natse note ke tu pa ondjambi. — Jak. 1:12; 1 Pet. 4:14.

14. Oshike sha ningilwa omumwatate gumwe omugundjuka gwokoTajikistan, nomolwashike?

¹⁴ Aamwatate naamwameme yamwe oya li moonkalo oondhigu, ihe oya kala ya nyanyukwa shili molwaashoka oya ningi iinima itatu mbyoka twa zi nokukundathana. Natu taleni kwaashoka sha li sha ningilwa Jovidon Bobojonov, gwomimvo 19, gwokoTajikistan, ngoka a li a tindi okuya muukwiita. Momasiku 4 gaKotoba 2019, okwa li a kuthwa mo maandjawo kethiminiko, e ta tulwa mondholongo moka a kala uule woomwedhi, nokwa  li a ungaungiwa naye a fa omukolokoshi. Oshinima shoka kaashi li pauyuuki osha li sha popiwa moonkundana miilongo yimwe. Ehokololo otali ti kutya okwa li a dhengwa, opo aantu ya kambadhale oku mu thiminika a ninge egano lyokuninga omukwiita omudhiginini nokuzale omuzalo guukwiita. Konima yaashono, ompangu yimwe oya ti kutya oku na ondjo noya li ye mu tumine kokamba yimwe haku longithwa aantu iilonga iidhigu, sigo hugunina omupresidende gwomoshilongo shoka e te mu dhimine po nokwa li a gandja elombwelo a mangululwe. Momukokomoko gwethimbo alihe ndyoka, Jovidon okwa kala omudhiginini ye okwa nyanyukwa. Oshike she mu kwathele? Okwa kala aluhe e shi kutya okwa pumbwa ewiliko lyaKalunga.

15. Jovidon okwa li a tsikile ngiini okwiilonga kombinga yaJehova sho e li mondholongo?

¹⁵ Jovidon sho e li mondholongo, okwa tsikile okwiilonga kombinga yaJehova, nonando ka li e na Ombiimbeli nenge shimwe shomiileshomwa yetu. Okwe shi ende ngiini mbela? Aamwatate naamwameme yomoshitopolwa oya li haye mu faalele iikulya koompunda ya nyola ko enyolo lyesiku. Onkee okwa li ha vulu okulesha Ombiimbeli nokutedhatedha kuyo esiku kehe. Konima sho a mangululwa mo mondholongo okwa gandja omayele ngaka kwaamboka inaaya adhika natango komashongo ga kwata miiti a ti: “Osha simana unene okulongitha thiluthilu emanguluko ndyoka wu na, wu kokeke ontseyo yoye yokutseya  Jehova mokulesha Oohapu dhe nosho wo iileshomwa yetu.”

16. Jovidon okwa kala ha dhiladhila kombinga yashike?

¹⁶ Omumwatate Jovidon okwa kala ha vulika komithikampango dhaJehova. Pehala yokukala ta dhiladhila kombinga yomahalo ga puka nokuninga iinima iiwinayi, okwa kala ta gandja eitulomo kuJehova nokwaashoka A lenga. Jovidon okwa li ha kuminwa eshito ewanawa lyaJehova. Ongulonene kehe okwa li ha pulakene kuudhila sho tawu imbi. Kongulohi okwa li ha tala komwedhi nokoonyothi. Okwa ti: “Omagano ngoka ga za kuJehova oga ningitha ndje ndi kale nda nyanyukwa nonda tsuwa omukumo.” Ngele ohatu kala twa pandula iinima mbyoka Jehova he tu pe nosho wo elongo lye, ohatu kala twa nyanyukwa, nenyanyu ndyoka oha li tu kwathele tu idhidhimike.

17. Oohapu ndhoka dhi li muPetrus gwotango 1:6, 7 otadhi vulu okukwathela ngiini omuntu ngoka tashi vulika e li monkalo ngaashi yaJovidon?

¹⁷ Jovidon okwa li wo a pititha komeho okulongela Jehova. Okwa li e shi kutya osha simana okukala omudhiginini kuKalunga kashili. Jesus okwa ti: “Omuwa Kalunga koye oye awike u na oku mu galikana noku mu longela.” (Luk. 4:8) Ookomanda nosho wo aakwiita oya li ya hala Jovidon a ethe po okukala Onzapo yaJehova. Ihe pehala lyaashono, okwa li ha galikana a mana mo esiku kehe omutenya nuusiku, ta pula Jehova e mu kwathele kaa sholole nokutsikile okukala omudhiginini. Nonando okwa li a ungaungiwa naye kaashi li pauyuuki, Jovidon ina igandja. Oshizemo? Ngashingeyi okwa nyanyukwa sho e na shoka a li kee na manga a li inaa kuthwa mo maandjawo kethiminiko, e ta dhengwa, nokutulwa mondholongo, ano eitaalo lya kola ndyoka lya yelekwa. — Lesha 1 Petrus 1:6, 7.

18. Oshike tatu vulu okuninga opo tu kale twa nyanyukwa?

¹⁸ Jehova oku shi shoka twa pumbwa, opo tu kale twa nyanyukwa shili. Ngele owa ningi iinima itatu mbyoka twa zi nokukundathana hayi etele omuntu enyanyu lyashili, nena oto vulu okukala wa nyanyukwa nonando owu li moonkalo oondhigu. Kungawo nangoye oto ka vula okupopya to ti: “Oshigwana shi na Omuwa, oye Kalunga kasho, oshi na elago.” — Eps. 144:15.