1. Aantu oyendji ohayi inyenge ngiini komayele gopandunge ngono ge li mOmbiimbeli? (Omayeletumbulo 1:20, 21)

 MIILONGO oyindji, otwa kala olundji hatu mono aauvithi yUukwaniilwa yi ipyakidhila momapandaanda ya nyanyukwa taya gandja iileshomwa kwaamboka taya ende puyo. Mbela nangoye owa kutha ombinga miilonga mbyoka iihokithi yokuuvitha? Ngele osho, nokaapu na omalimbililo owu na okukala wa dhiladhila kombinga yoohapu oohokithi dhi li membo lyOmayeletumbulo, ano owino tayi igidha aantu momapandaanda ya pulakene komayele gayo. (Lesha Omayeletumbulo 1:20, 21.) Ombiimbeli nosho wo iileshomwa yetu yopaMbiimbeli oyi na “owino yashili,” owino yaJehova. Uuyelele mboka wo aantu ya pumbwa opo ya ka mone omwenyo gwaaluhe. Ohatu kala twa nyanyukwa ngele omuntu gwontumba a taamba ko iileshomwa yetu. Ihe haayehe haye yi taamba ko. Yamwe ihaya kala ya hala okutaamba ko shoka Ombiimbeli tayi ti. Yalwe ohaye tu yolo. Ohaya dhiladhila kutya Ombiimbeli oya kwisha. Omanga yamwe haya popile muuwinayi omalongo gOmbiimbeli, ge na ko nasha neihumbato lyopamikalo taya ti kutya mbono haye ga landula oye na omikalo omiwinayi yo oyi ishi uuyuuki. Ihe Jehova ota tsikile nokugandja owino yashili kaantu ayehe. Ohe shi ningi momikalo dhini?

2. Openi tatu vulu okwaadha owino yashili kunena, ihe aantu oyendji ohaya hogolola okuninga shike?

² Omukalo gumwe ngoka Jehova ha longitha okugandja owino yashili okupitila mOohapu dhe, Ombiimbeli. Embo ndyoka konyala oli niwe kaantu ayehe. Ongiini shi nasha niifo yetu ya kankamena kOmbiimbeli? Otatu pandula Jehova, molwaashoka iifo mbyoka oyi li momalaka ge vulithe peyovi. Mboka haa pulakene, ano haya lesha nokutula miilonga shoka tayi ilongo otaya  ka mona mo uuwanawa. Ihe aantu oyendji oya tokola kaaya pulakene kuJehova. Uuna taya ningi omatokolo, ohayi igameke koondunge dhayo yene nenge ya pulakene kaantu ooyakwawo. Ohashi vulika kaaye tu simaneke, molwaashoka twa hogolola okulandula shoka Ombiimbeli tayi ti. Oshitopolwa shika, otashi ka kundathana kutya omolwashike aantu hayi inyenge ngaaka. Tango, natu ka taleni kunkene tatu vulu okumona owino ndjoka okuza kuJehova.

3. Owino yashili oya kwatela mo shike?

³ Owino otawu vulu okukala uukwatya wokuvula okulongitha shoka tu shi, opo tu ninge omatokolo omawanawa. Ihe owino yashili oya kwatela mo oshindji. Ombiimbeli otayi ti: “Etilokalunga olyo ekota lyowino, nokutseya Omuyapuki okwo uunongo wo wene.”(Omayel. 9:10) Onkee, uuna tu na okuninga etokolo lyontumba lya simana, otu na okulongitha ontseyo ‘yokutseya omuyapuki,’ ano omadhiladhilo gaJehova uuna tatu ningi omatokolo ngoka. Otatu vulu oku shi ninga mokukonakona Ombiimbeli niileshomwa yetu ya kankamena kOmbiimbeli. Ngele osho twa ningi, kungawo otatu ulike owino yashili. — Omayel. 2:5-7.

4. Omolwashike Jehova oye owala ta vulu oku tu pa owino yashili?

⁴ Jehova oye owala ha vulu okugandja owino yashili. (Rom. 16:27) Omolwashike Jehova oye onzo yowino? Shotango, e li omushiti gwetu oku shi kehe shimwe kombinga yaashoka a shita. (Eps. 104:24) Oshitiyali, kehe shoka Jehova ha ningi ohashi ulike kutya oku na oondunge. (Rom. 11:33) Oshititatu, omayele gaJehova gopandunge ohaga etele aluhe uuwanawa mbono haye ga tula miilonga. (Omayel. 2:10-12) Ngele otwa hala tu kale shili tu na oondunge, otu na okutaamba ko oshili yopetameko noku yi etha yi tu wilike uuna tatu ningi omatokolo nenge tatu katuka onkatu yontumba.

5. Oshizemo oshini sho aantu haya tindi okuzimina kutya owino yashili ohayi zi owala kuJehova?

⁵ Aantu oyendji mboka hatu tsakaneke muukalele ohaya zimine kutya omu na iinima iiwanawa meshito, ihe ohaya tindi okuzimina kutya oku na omushiti nohaya ti iinima oye ya po kuyo yene. Yamwe mboka hatu tsakaneke ohaya ti oyi itaala muKalunga, ihe oya tala ko Ombiimbeli yi li oshinima shonkulu yonale nohaya landula oondunge dhawo yene. Mbela oshizemo oshini? Mbela uuyuni ehala ngaa ewanawa sho tu wete aantu hayi inekele moondunge dhawo yene pehala lyokwiinekela muKalunga? Mbela oye na ngaa enyanyu lyashili nenge etegameno lyonakuyiwa? Shoka hatu mono mokati kaantu mboka ye tu kundukidha otashi ulike kutya “kape na owino, kape na oondunge nokape na omayele gokutinda Omuwa.” (Omayel. 21:30) Shika ohashi tu ladhipike tu tsikile okupula Jehova e tu pe owino yashili! Shiyemateka, aantu oyendji ihaye shi ningi. Omolwashike mbela?

6. Shi ikolelela kOmayeletumbulo 1:22-25, oolye inaaya hala okupulakena kowino yaJehova?

⁶ Aantu oyendji ohaya tindi okupulakena kowino yashili sho tayi ‘igidha momapandaanda.’ Shi ikolelela kOmbiimbeli opu na oongundu ndatu dhaantu mboka haya tindi owino: “aantu yanathangwa,” “aasheki,” nosho wo “aagoya.” (Lesha Omayeletumbulo 1:22-25.) Natu ka taleni kutya oshike hashi ningitha oongundu ndhono dhi tinde owino yaKalunga nosho wo kutya ongiini tatu vulu okuyanda okukala twe ya fa.

7. Omolwashike yamwe haya hogolola okukala “aantu yanathangwa”?

⁷ “Aantu yanathangwa” oomboka hayi itaale kehe shoka taya lombwelwa, nohaya pukithwa nuupu. (Omayel. 14:15) Olundji ohatu tsakaneke aantu ye li ngaaka miilonga yokuuvitha. Dhiladhila kwaashika, pashiholelwa aantu omamiliyona oya pukithwa kaawiliki yomalongelokalunga  noyopolotika. Yamwe ohaya kala ya kumwa, uuna yu uvu kutya aawiliki mboka oye ya fundja. Ihe mboka ya tumbulwa mOmayeletumbulo 1:22 ohaya hogolola okukala yanathangwa nenge tu tye okukala kaaye na owino, molwaashoka osho ye hole. (Jer. 5:31) Ohaya ningi kehe shoka ya hala noinaya hala okwiilonga shoka Ombiimbeli tayi ti nenge okuvulika koompango dhayo. Oyendji oyu uvite ngaashi omukiintu gumwe a pwila omutse nothingo melongelokalunga lyontumba moQuebec, moKanada ngoka a lombwele Onzapo yimwe a ti: “Ngele omusita gwetu okwe tu pukitha, ombedhi otayi ka kala ye ihe kayi shi yetu!” Inatu hala okuholela aantu mbono hayi ipwililike owina! — Omayel. 1:32; 27:12.

8. Oshike tashi ke tu kwathela tu mone owino yashili?

⁸ Omolwetompelo ewanawa, Ombiimbeli otayi tu ladhipike kaatu kale aantu yanathangwa ihe tu ‘ninge aakuluntu mokudhiladhila.’ (1 Kor. 14:20) Ohatu mono owino uuna tatu tula miilonga omakotampango gOmbiimbeli monkalamwenyo yetu. Ngele otwa ningi ngawo, otatu ka mona nkene Ombiimbeli tayi vulu oku tu kwathela tu yande omaupyakadhi notu ninge omatokolo ge li pandunge. Oshiwanawa tu kale hatu dhiladhila komatokolo ngoka twa ninga. Ngele otwa kala hatu konakona Ombiimbeli nokukala pokugongala ethimbo nuule, otatu vulu okwiipula kutya omolwashike inaatu katuka natango oonkatu tu iyapulile Jehova nokuninginithwa? Ngele otwa ninginithwa, mbela otatu ningi ngaa ehumokomeho tu kale aauvithi naalongi yonkundana ombwanawa ya pyokoka? Mbela omatokolo getu ohaga ulike kutya otatu wilikwa komakotampango gOmbiimbeli? Mbela ohatu ulike omaukwatya gopaKriste uuna tatu ungaunga nayalwe? Ngele otwa mono mpoka twa pumbwa okuninga omalunduluko, otwa pumbwa okudhiladhila muule kombinga yomadhimbulukitho gaJehova ngoka ‘haga gandja uunongo kumboka taa u pumbwa.’ — Eps. 19:7.

9. “Aasheki” ohaya ulike ngiini kutya ohaya tindi owino yaKalunga?

⁹ Ongundu ontiyali yaantu mboka kaaye na ko nasha nowino yaKalunga,“aasheki.” Omathimbo gamwe ohatu tsakaneke aantu ya tya ngaaka miilonga yokuuvitha. Oye hole okusheka yalwe. (Eps. 123:4) Ombiimbeli otayi tu londodha tayi ti pomasiku gopehulilo otaku ka kala aasheki oyendji. (2 Pet. 3:3, 4) Sha faathana, ngaashi owala iitenya yomulumentu omuyuuki Lot, aantu yamwe kunena ihaya pulakene komalondodho gaKalunga. (Gen. 19:14) Oyendji ohaya yolo nokuli mboka haya kala metsokumwe nomithikampango dhOmbiimbeli. Aasheki ohaya hwahwamekwa ‘kuuhalu wawo’ wuulunde. (Jud. 7, 17, 18) Shoka Ombiimbeli ya popya kombinga yomikalo dhaasheki otashi tsu kumwe nomikalo dhaashunimonima nosho wo dhaantu mboka ya tinda okuvulika kuJehova.

10. Ngaashi sha popiwa mEpisalomi 1:1, oshike tu na okuyanda opo natse kaatu ninge aasheki?

¹⁰ Ongiini tatu vulu okushilipaleka kutya natse inatu ninga aasheki? Omukalo gumwe tatu vulu oku shi ninga, okuyanda okweendathana naamboka haya nyenyeta kombinga ya kehe shimwe. (Lesha Episalomi 1:1) Shoka osha hala okutya katu na okupulakena nenge okulesha iinima yaashunimonima. Otwa pumbwa okukala twa kotoka kaatu tameke okukala hatu nyenyeta kombinga ya kehe shimwe nokukala twa limbililwa omukalo moka Jehova ha ningi iinima nomalombwelo ngoka he tu pe. Opo tu yande oku shi ninga, otu na okwiipula omapulo ngaka: ‘Mbela ohandi nyenyeta aluhe uuna twa pewa elombwelo nenge omayelitho omape? Mbela ondi na egamo lyokumona omapuko mwaambono taya kwatele komeho? Ngele ohatu etha po nziya iikala mbyono, Jehova ota ka kala e tu hokwa. — Omayel. 3:34, 35.

11. Omagoya oga tala ko ngiini omithikampango dhaJehova dhopamikalo?

¹¹ Ongundu ontitatu yaantu mboka haya tindi owino, ‘oyaagoya.’ Aantu mboka otaya ithanwa  aagoya molwaashoka ohaya tindi okukala metsokumwe nomithikampango dhaKalunga dhopamikalo. Ohaya ningi shoka shu uka momeho gawo. (Omayel. 12:15) Aantu mbono ohaya tindi owino ndjoka hayi zi kuJehova. (Eps. 53:1) Uuna twe ya tsakaneke miilonga yokuuvitha, ohaye tu popile muuwinayi noonkondo sho hatu simaneke omithikampango dhOmbiimbeli. Ihe itaya vulu oku tu pa shoka tashi vulu okuningitha onkalamwenyo yetu yi kale yi li hwepo. Ombiimbeli oya popi ya ti: “Owino oyi li omugoya pombanda, moshigongi shoposheelo shoshilando ita makula okana ke.” (Omayel. 24:7) Egoya itali vulu oku tu pa omayele ge li pandunge. Nomolwaashono Jehova te tu londodha kutya natu ‘kale kokule negoya.’ — Omayel. 14:7.

12. Oshike tashi ke tu kwathela twaa kale ngaashi omagoya?

¹² Tse inatu fa aantu mboka ye tonde omayele gaKalunga, pehala lyaashono, otwa ilonga okukala tu hole oondjila dhaKalunga mwa kwatelwa omithikampango dhe dhopamikalo. Otatu vulu okukoleka ohole yetu ndjoka mokutala kiizemo mbyoka hayi zi mokuvulika nosho wo mokwaavulika. Tala komaupyakadhi ngoka aantu hayi i etele yoyene molwaashoka ihaaya vulika komayele gaJehova gopandunge. Opo nduno to tala kunkene onkalamwenyo yoye yi li hwepo lela molwaashoka ho vulika kuKalunga. — Eps. 32:8, 10.

13. Mbela Jehova ohe tu kondjitha tu vulike komayele ge gopandunge?

¹³ Jehova oha gandja omayele kaantu ayehe, ihe iha kondjitha nando omuntu e ga taambe ko. Ihe nonando ongawo, ote tu lombwele kutya aantu mboka ihaaya vulika kowino ye ohaya adhika kiizemo ya tya ngiini. (Omayel. 1:29-32) Mbono haya hogolola kaaya vulike kuJehova otaa ka ‘lya oshiyimati shoondjenda dhawo.’ Konima yethimbo otaya ka adhika komauwehame nokokumona iihuna, omolweihumbato lyawo nopehulilo Jehova ote ke ya hanagula po. Ihe mboka haya pulakene komayele gaJehova gopandunge nohaye ga tula miilonga, okwe yu uvanekela a ti: “Ngoka ta pulakene ndje, ota kala megameno, niihuna yiiponga itayi mu adha.” — Omayel. 1:33.

14-15. Oshike tatu ilongo mOmayeletumbulo 4:23?

¹⁴ Ngele ohatu tula miilonga owino yaJehova, otatu ka mona mo aluhe uuwanawa. Ngaashi twa zi noku shi kundathana Jehova okwe shi ninga oshipu tu mone omayele ge li pandunge. Pashiholelwa, membo lyOmayeletumbulo, okwe tu pa omayele ngoka taga vulu okuhwepopaleka onkalamwenyo yetu, ngele otwe ga tula miilonga. Natu ka taleni kiiholelwa ine yomayele ngoka.

¹⁵ Gamena omutima gwoye gwopathaneko. Ombiimbeli otayi ti: “Tonatela omutima gwoye shi vule ayihe mbyoka yi na okutonatelwa, oshoka omo mu na ekota lyomwenyo.” (Omayel. 4:23) Natu dhiladhile kwaashoka tu na okuninga po, opo tu gamene omutima gwetu gwo  gwenegwene. Otwa pumbwa okukala hatu li iikulya yi na uundjolowele, hatu ningi omadhewo ga gwana nokuyanda omikalondjigilile omiwinayi. Ohatu ningi oshinima sha faathana tu gamene omutima gwetu gwopathaneko. Esiku kehe ohatu ipalutha nOohapu dhaKalunga. Ohatu ilongekidhile okugongala nokuya ku ko nosho wo okugandja omatyokosha puko. Ohatu kala twa ipyakidhila pandjigilile niilonga yokuuvitha. Onkee ohatu yanda okukokeka omikalondjigilile omiwinayi ndhoka tadhi vulu okuyona po okudhiladhila kwetu, ngaashi omainyanyudho ga nyata neendathano ewinayi.

16. Omolwashike Omayeletumbulo 23:4, 5 taga vulu oku tu kwathela lela kunena?

¹⁶ Natu kale twa gwanenwa naashoka tu na. Ombiimbeli otayi tu pe omayele ngaka taga ti: “Ino ihepeka nuuyamba . . . . Omeho goye ngele taga lambele omaliko, otaga pepuka po. Otagi izaleke omawawa notaga tukile kegulu ga fa ekodhi.” (Omayel. 23:4, 5) Iinima yopamaliko ihayi vulu okukalelela. Ihe aantu ayehe aayamba noohepele kunena ohaya kala tayi ipula unene nokulikola iimaliwa. Nomolwaashono olundji ohaya ningi iinima mbyoka hayi nyateke omadhina gawo, hayi yono po omakwatathano gawo nayalwe nuukolele wawo. (Omayel. 28:20; 1 Tim. 6:9, 10) Ihe owino yaJehova ohayi tu kwathele tu kale tu na etaloko li li pandjele lyiimaliwa. Etaloko ndyono ohali tu gamene kaatu kwatwe kolwiho nohali tu ningitha tu kale twa gwanenwa tse otwa nyanyukwa. — Omuuv. 7:12.

17. Ongiini tatu vulu okukala hatu popi “elaka lyaanawino,” ngaashi sha popiwa mOmayeletumbulo 12:18?

¹⁷ Dhiladhila manga ino popya. Ngele inatu kotoka otatu vulu okweehameka yalwe noohapu dhetu. Ombiimbeli oya popi ya ti: “Aanamalaka omadhigu otayu ulula ngegongamwele, ihe elaka lyaanawino olyo ealudho.” (Omayel. 12:18) Katu na okukala hatu popi kombinga yomapuko gayalwe, ngele otwa ningi ngawo otatu ka kaleka po ombili. (Omayel. 20:19) Ngele otwa hala oohapu dhetu dhi kale hadhi tsu yalwe omukumo, ihe haku ya ehameka, otu na okukala hatu lesha pandjigilile nokudhiladhila kOohapu dhaKalunga. (Luk. 6:45) Ngele ohatu tedhatedha kwaashoka Ombiimbeli tayi ti, oohapu dhetu otadhi ka kala dha fa ‘oluthithiya lwowino’ notadhi ka hekeleka nokutsa yalwe omukumo. — Omayel. 18:4.

18. Omayeletumbulo 24:6 otaga vulu oku tu kwathela ngiini miilonga yokuuvitha ngele otwe ga tula miilonga?

 ¹⁸ Landula omalombwelo. MOmbiimbeli omu na omayele taga vulu oku tu kwathela tu pondole taga ti: ‘Komayele oto vulu okuhinga iita, nesindano oli li maagandjindunge oyendji.’ (Omayel. 24:6) Natu taleni nkene okutula miilonga ekotampango ndika taku tu kwathele tu pondole miilonga yetu yokuuvitha noyokulonga aantu Ombiimbeli. Pehala lyokuuvitha nokulonga aantu momukalo gwetu yene, ohatu kambadhala okulandula omayele ngoka twa pewa. Ohatu mono omayele gopandunge pokugongala kwetu kwopaKriste, mpoka aapopi haye tu pe iipopiwa ya kankamena kOmbiimbeli nosho wo omauliko ye tu dheule. Shimwe ishewe, ehangano lyaJehova ohali tu pe iilongitho iiwanawa, ano iileshomwa nuuvidio mbyono tayi vulu okukwathela aantu yu uve ko Ombiimbeli. Mbela oto ilongo ngaa okulongitha nawa iilongitho mbyoka?

19. Owu uvitile ngiini owino ndjoka Jehova he tu pe? (Omayeletumbulo 3:13-18)

¹⁹ Lesha Omayeletumbulo 3:13-18. Otwa pandula lela komayele omawanawa ngoka taga adhika mOohapu dhaKalunga. Itatu vulu okukala twa nyanyukwa ngele katu na omayele ga za kuJehova. Moshitopolwa shika, otwa kundathana iiholelwa yimwe po yomayele omawanawa ngoka taga adhika membo lyOmayeletumbulo. Odhoshili kutya Ombiimbeli ayihe oyi na omayele omawanawa ngoka ga za kuJehova. Otwa pumbwa okutula miilonga owino ye mu kehe shimwe monkalamwenyo yetu. Aantu oyendji inaya lenga owino yaKalunga, ihe tse otwa tompwa kutya ‘aanelago oomboka taye yi dhiginine.’