Aamwatate koBetel oya kala taya longo uule wethimbo li vulithe pomumvo gumwe opo ya tunge oshitaasi shoradio shedhina WBBR mokantuntu Staten, moNew York. Konima sho ya kokola ehala, oya li ya tungu egumbo enene lyaaniilonga nosho wo etungo lyokupungula iilongitho. Sho ya mana iilonga mbyoka, aamwatate oya li ya gongele iilongitho mbyoka ya pumbiwa, opo oradio yi ye “mombepo.” Ihe nando ongawo, oya li ye na okukandula po omashongo gontumba.

Aamwatate oya li ya mono oshidhigu okutula mo owayela onene yoshitaasi. Owayela ndjoka yi na uule woometa 91 oya li ya pumbwa okutulwa pokati kiiti iyali. Kehe shimwe osha li shi na uule woometa 61. Sho ya li ya kambadhala oshikando shotango, kaya li ya pondola. Lwanima, sho ya kala ya inekela mekwatho lyaJehova, aamwatate oya pondola. Calvin Prosser, ngoka a li ta longo moproyeka ndjoka, okwa ti: “Ando onkambadhala yetu yotango oya pondolele, ando otashi vulika twa ipupula kombunda tatu ti: ‘Tala kwaashoka twa pondola po!’” Aamwatate oya li ya gandja olupandu aluhe kuJehova omolwaashihe shoka ya pondola. Ihe omaupyakadhi gawo hapo ga li ga hulile mpoka.

Oshitaasi shoradio osha li oshinima oshipe nokasha li oshipu okumona iilongitho mbyoka ya li ya pumbiwa. Onkene aamwatate oya li ya mono eshina lyokutuma omawi mombepo lya longa nale, ndyoka lya li moshitopolwa. Pehala lyokulanda embako, oya li ya longitha embako lya za mongodhi yokopaala. Ongulohi yimwe muFebuluali, aamwatate oya li ya tokola ya ninge omalolelo ya tale ngele iilongitho mbyoka ye na otayi longo. Molwaashoka  aamwatate oya li ya pumbwa okutuma opolohalama mombepo, oya li ya imbi omaimbilo gUukwaniilwa. Ernest Lowe okwa li a hokolola oshinima oshiyolithi, okwa ti kutya manga aamwatate ya li taya imbi, oya li ya dhengelwa ongodhi komumwatate Rutherford, b ngoka a li e ya uvite koradio ye sho taya imbi. Oya li ye lyaathane kokule nookilometa 25.

Omumwatate Rutherford okwa ti: “Mweneni manga, otamu imbi mwa fa tamu kugu!” Aamwatate oya li ya sa ohoni kashona, onkee oya dhimi ko meendelelo. Ihe oya li ye na uushili kutya oradio oya li tayi longo noya li ya ilongekidha okutuma omawi mombepo.

Momasiku 24 Febuluali 1924, pethimbo lyopolohalama yotango yopambelewa, omumwatate Rutherford okwa ti kutya oshitaasi shoradio osha li tashi ka longithwa “miilonga yi nasha nUukwaniilwa waMesiasa.” Okwa ti wo kutya elalakano lyoshitaasi shoka olyo “okukwathela aantu ya uve ko Ombiimbeli nosho wo ethimbo ndyoka tu li mulyo.”

Opolohalama ndjoka yotango oya li ya enda nawa lela. Oshitaasi shoka osha li sha longithwa uule womimvo 33 opo ehangano lyi tume oopolohalama dhoradio mombepo.

MuJuli 1924, Aakonakoni yOmbiimbeli oya li ya gongala poshigongi shoshitopolwa moColumbus, moOhio. Aakonakoni yOmbiimbeli, ya za koombinga noombinga muuyuni awuhe oya li ya pulakene kiipopiwa momalaka ngaashi: Oshiarabia, Oshiingilisa, Oshifulaanisa, Oshindowishi, Oshigreka, Oshihongaria, Oshiitalia, Oshilutuania, Oshipolanda, Oshirusia, omalaka gOshiskandinavia nOshiukrania. Aantu oya li ya vulu okupulakena kiipopiwa yimwe, okupitila moradio naamwatate oya li ya pula ehangano yiifokundaneki lyomoshitopolwa lyi nyole kombinga yopolohalama yoshigongi shoshitopolwa esiku kehe.

MEtine, 24 Juli, aamwatate ye vulithe 5 000 oya li ya uvithile moshilando moka mwa li mwa ningilwa oshigongi. Oya li ya gandja omambo ge li 30 000 lwaampoka noya li ya tameke omakonakonombiimbeli omayovi. Oshungolangelo oya ti kutya esiku ndyoka olyo lya li “ethimbo li nyanyudha unene lyoshigongi.”

MEtitano, 25 Juli, oshinima shimwe sha dhenga mbanda shoshigongi osha li sha ningwa, sho omumwatate Rutherford a lesha nomukumo odokumende ndjoka ya li ya pe uusama aawiliki  yomalongelokalunga. Okwa ti kutya aanapolotika, aawiliki yomalongelokalunga nosho wo aanangeshefa otaya imbi aantu ya ilonge oshili kombinga yUukwaniilwa waKalunga mboka Kalunga ta ka longitha a etele aantu omalalekonuuyamba. Oya ti wo kutya aalumentu mboka oya puka oshoka otaya “ambidhidha Oshipandi shIigwana notaya ti kutya ogo omukalo gwaKalunga gwokupangela.’” Aakonakoni yOmbiimbeli oya li taya ka pumbwa uulaadhi ya uvithe etumwalaka ndika.

Shi nasha naashoka sha ningwa poshigongi, Oshungolangelo oya ngongo ya ti: “Oshigongi shika shomuColumbus osha li sha koleke eitaalo lyongundu yaamwatate naamwameme aalaadhi. Osha li she ya tsu omukumo ya uvithe nonando otaya patanekwa.” Leo Claus, ngoka a li poshigongi shoka, okwa ti: “Poshigongi shoka otwa zi po tu na omukumo goku ka uvitha etumwalaka ndika.”

MuKotoba, Aakonakoni yOmbiimbeli oya li ya tameke okwaandjaganeka ookopi omamiliyona dhokafo Ecclesiastics Indicted, ke na etumwalaka ndyoka omumwatate Rutherford a li a lesha li nasha naawiliki yomalongelokalunga. Frank Johnson, okwa li a mana okwaandjaganeka uufo mokandoolopa komoCleveland, moOklahoma, manga ku na natango ominute 20 a pitulwe po kaauvithi ooyakwawo. Ka li ta vulu oku ya tegelela mokati kaantu, oshoka aalumentu yomokandoolopa mboka ya li ya geya sho ta uvitha, oya li taye mu kongo. Omumwatate Johnson okwa li a holama mongeleka yi li popepi. Mongeleka ina adha mo omuntu, onkee okwa li a tula uufo mOmbiimbeli yomuuvithi noposhipundi kehe. Okwa li a zi mo mongeleka nziya. Okwa li natango e na ko ethimbo, onkee okwa li a ningi sha faathana moongeleka mbali ishewe.

Frank okwa li a endelele a ye kehala hoka a li e na okupitulwa. Okwa li a holama konima yoshitaasi shomahooli, nokwa li ta lengalenga aalumentu mboka ya li taye mu kongo. Aalumentu mboka oya li ya hingi, e taya piti po, ihe inaye mu mona. Nziya konima sho ya yi, aauvithi ooyakwawo mboka ya li taya uvithile popepi, oye ya, e taya pitula po Frank noya yi.

Gumwe gwomaamwatate okwa ti: “Sho twa li tatu thigi po okandoolopa hoka, otwa piti poongeleka ndatu. Opwa li pu na aantu ye li 50 lwaampoka ya thikama pondje yongeleka kehe. Yamwe oya li taya lesha okafo, omanga yalwe ya li taye ka ulukile omuuvithi. Otwa li twa piti po nziya, opo tu yande uupyakadhi. Ihe otatu pandula Kalunga ketu Jehova omolwegameno lye, naasho e tu pe ontseyo yaashoka tu na okuninga kaatu kwatwe kaatondi mbaka yUukwaniilwa.”

Miilongo yilwe, Aakonakoni yOmbiimbeli oya li ya landula omukalo gwa faathana gwokuuvitha nuulaadhi. Muumbangalantu waFulaanisa, omumwatate Józef Krett okwa li a uvithile oontauki dha za koPoland ndhoka dha li hadhi longo momina. Okwa li a ilongekidha a ka gandje oshipopiwa shi na oshipalanyolo “Eyumuko lyaasi otali ka ningwa masiku.” Sho uufo wehiyo wa li wa gandjwa kaakalimo yomondoolopa, omusita gwomoshitopolwa okwa li a londodha aantu yomongeleka ye kaaya ye ko. Aantu kaya li ya pulakene kelondodho lye. Aantu ye vulithe po 5 000 oya li ya pulakene koshipopiwa, mwa kwatelwa nomusita ngoka! Omumwatate Krett okwa li a hiya omusita ngoka a popile shoka a itaala, ihe okwa tindi. Omumwatate Krett okwa li a pe aantu iileshomwa ayihe mbyoka a li e na, nokwa li a ndhindhilike kutya aantu oya li ya sa enota lyOohapu dhaKalunga. — Amos 8:11.

Omumwatate Claude Brown okwa yi kuAfrika koshilongo shedhina Gold Coast, shoka ngashingeyi hashi ithanwa Ghana, a ka uvithe onkundana ombwanawa. Iipopiwa ye niileshomwa mbyoka a li a andjaganeke, oya li ya kwathele mokutaandelitha oshili moshilongo moka. John Blankson, ngoka a li  ta ilongele uunamiti, opo a li poshipopiwa shomumwatate Brown. Okwa ndhindhilike nziya kutya okwa mona oshili. John okwa ti: “Oshili oya li ya nyanyudha ndje, nonda li handi popi kombinga yayo nda manguluka kosikola yetu.”

Esiku limwe, John okwa li a talele po ongeleka yaAngelikana nelalakano lyokupula omusita kombinga yelongo lyuukwatatu, ndyoka John ngashingeyi a li e uvite ko kutya ka li li pamanyolo. Omusita okwa li e mu tidha po puye, ta igidha ta ti: “Ku shi Omukriste, ngoye ogwa Satana. Za po nokuli mpaka!”

Sho a thiki kegumbo, John okwa nyolele omusita ontumwafo, te mu hiya e ye a popile elongo lyuukwatatu poshigongi shomontaneho. Omusita okwa li a yamukula mokulombwela John a ye kombelewa yomulongi omukuluntu gwosikola, nomulongi okwa li e mu pula ngele okwa nyolela shili omusita ontumwafo.

John okwa yamukula a ti: “Eeno, onde mu nyolela.”

Omulongi okwa li a pula John a nyolele omusita te mu pe ombili. Onkee John okwa nyola ta ti:

“Tatekulu, omulongi gwandje okwa pula ndje ndi ku nyolele opo ndi ku pe ombili. Onda ilongekidha oku ku pa ombili, ihe ongele owala wa zimine kutya oho longo aantu omalongo giifundja.”

Omulongi okwa li a kumwa, e ta pula ta ti: “Blankson, osho wa hala okunyola shino?”

“Eeno, Mestela. Shika osho owala tandi nyola.”

“Oto ka tidhwa mo mosikola. Ito vulu okukala mo mosikola yepangelo ngele owu li ompinge nomusita gwongeleka yepangelo.”

“Mestela, uuna to tu longo, ihe opu na iinima yimwe mbyoka kaatu uvite ko, mbela ihatu ku pula omapulo?”

“Osho naanaa, ohamu pula ndje.”

“Eeno, Mestela, naashono osho naanaa nda li nda ningi. Omusita okwa li te tu longo Ombiimbeli, e tandi mu pula epulo. Ngele ita vulu okuyamukula epulo, omolwashike ndi na okunyola ontumwafo tandi mu pe ombili?”

Blankson ka li a tidhwa mo mosikola, ye ka li a gandja ombili.

Oshungolangelo oya ngongo iilonga yokomumvo ya ti: “Otatu vulu shili okupopya ngaashi David tatu ti: ‘Oto pe ndje omukumo molugodhi, ndi sinde aatondi yandje.’ (Eps. 18:39) Omumvo nguka ogwa li shili tagu tsu omukumo noonkondo, molwaashoka otwa mona eke lyOmuwa. Aapiya ye aadhiginini oya kala nokunyanyukilwa iilonga mbika yokuuvitha.”

Lwanima momumvo ngoka, aamwatate oya li ya ningi omalongekidho opo ya tamunune mo iilonga yokuuvitha taya longitha oradio. Oya li ya tameke iilonga yokutunga oshitaasi shimwe shoradio popepi nondoolopa yaChicago. Oshitaasi shika oshipe osha li hashi ithanwa WORD. Oshikando shika oya li ya longitha iilongitho yi na oonkondo mbyoka ya li ya pitike etumwalaka lyUukwaniilwa lyi thike kokule, nokuli nokuumbangalantu waKanada.

Momumvo 1925, Jehova okwa li a kwathele aamwatate ya uve ko uuyelele uupe wu tuntula wu nasha nEhololo ontopolwa 12. Omolwuuyelele mboka uupe, yamwe kaya li we ya tsikile okulongela Jehova. Ihe oyendji, oya li ya nyanyukwa okuuva ko iiningwanima oyindji mbyoka ya li tayi ka ningwa megulu nankene shoka sha guma oshigwana shaKalunga shoka shi li kombanda yevi.