OSHITOPOLWA SHOKUKONAKONWA 40
EIMBILO 30 Tate, Kalunga kandje naKuume kandje
Jehova “ota aludha mboka ye ehamekwa koomwenyo”
“Ota aludha mboka ye ehamekwa koomwenyo, nota manga iilalo yawo.” — EPS. 147:3.
SHOKA TATU KA ILONGA
Jehova oku na ko nasha lela naamboka ya ehamekwa pamaiyuvo. Oshitopolwa shika otashi ke tu ulukila nkene he tu hekeleke uuna twa gwililwa po, nankene he tu kwathele tu hekeleke yalwe.
1. Jehova oha kala e uvitile ngiini aapiya ye?
JEHOVA oha mono shike, uuna a tala aapiya ye, mboka ye li kombanda yevi? Oha kala e shi wete uuna twa nyanyukwa nuuna twa yemata. (Eps. 37:18) Ohashi mu nyanyudha lela uuna e wete tatu ningi ngaashi tatu vulu tu mu longele, nonando otwa gwililwa po. Shimwe ishewe, okwa halelela oku tu kwathela noku tu hekeleka.
2. Jehova oha ningile shike mboka ya ehamekwa koomwenyo, nongiini tatu vulu okumona mo uuwanawa mekwatho lye?
2 Episalomi 147:3 otali ti kutya Jehova ‘oha manga iilalo’ yaamboka ya ehamekwa koomwenyo. Enyolo ndyoka otali yelitha nkene Jehova ha kwathele pahole mboka ya gwililwa po. Oshike tu na okuninga, opo tu mone mo uuwanawa mesiloshimpwiyu lyaJehova? Natu taleni kethaneko tali landula. Ndohotola omunawino oha ningi oshindji a kwathele omuntu ngoka a mona oshiponga, opo a tye po hwepo. Ihe opo omuntu ngoka a mone mo uuwanawa mekwatho lyandohotola, oku na okulandula nuukeka omalombwelo ge. Moshitopolwa shika, otatu ka tala kwaashoka Jehova a popya mOohapu dhe, kombinga yaamboka taya mono iihuna pamaiyuvo, nosho wo nkene tu na okutula miilonga omayele ge gopahole.
JEHOVA OHE TU SHILIPALEKE KUTYA OTU NA ONGUSHU KUYE
3. Omolwashike yamwe haya kala ye uvite kaaye na ongushu?
3 Otu li muuyuni moka mu na aantu kaaye na ohole. Shiyemateka, aantu oyendji ohaya ungaungiwa nayo nayi, naashoka oshe ya ningitha ya kale ye uvite kaaye na ongushu yasha. Omumwameme gwedhina Helen a okwa ti: “Onda putukila megumbo moka aantu ihaaya ulukilathana ohole. Tate okwa li e hole elongithonkondo, nokwa li he tu lombwele esiku kehe kutya tse aantu yowala.” Ngaashi Helen, otashi vulika nangoye wa li ho ningwa nayi, ho tukwa olundji, nenge wa li wu wete kutya ku holike. Ngele osho, otashi vulika ho mono oshidhigu okwiitaala kutya opu na ngoka e na ko nasha nangoye shili.
4. Sha ikolelela kEpisalomi 34:18, eshilipaleko lini Jehova te tu pe?
4 Nonando yamwe oya ungaunge nayi nangoye, oto vulu okukala nuushili kutya Jehova oku ku hole nokwe ku tala ko wu na ongushu. Oku “li popepi naamboka ya dhengwa pevi.” (Lesha Episalomi 34:18.) Uuna wu uvite wa “kanitha etegameno,” dhimbulukwa kutya Jehova okwa mona omaukwatya omawanawa momutima gwoye, e te ku nanene kuye. (Joh. 6:44) Okwa ilongekidha aluhe oku ku kwathela, molwaashoka owu na ongushu momeho ge.
5. Oshike tatu vulu okwiilonga komukalo moka Jesus a li ha ungaunga naamboka ya li ya dhinika?
5 Otatu vulu okwiilonga kombinga yankene Jehova ha kala e uvite, mokutala koshiholelwa shaJesus. Sho Jesus a li kombanda yevi, okwa li ha ungaunga nohenda naantu mboka ya li ya dhinika. (Mat. 9:9-12) Sho omukiintu gumwe a li ta hepekwa noonkondo komukithi, a gumu onguwo yaJesus, e na einekelo kutya ota aluka, Jesus okwa li e mu hekeleke noku mu pandula omolweitaalo lye. (Mark. 5:25-34) Jesus okwa li a ulike thiluthilu omaukwatya ga fa gaHe. (Joh. 14:9) Onkee oto vulu okukala nuushili kutya Jehova okwe ku lenga noha mono omaukwatya goye omawanawa, mwa kwatelwa eitaalo lyoye nosho wo ohole yoye yoku mu hola.
6. Oshike to vulu okuninga, ngele owu uvite kutya ngoye omuntu gowala?
6 Oshike to vulu okuninga po, uuna wu uvite kuu na ongushu? Kala ho lesha nokutedhatedha koovelise dhOmbiimbeli, ndhoka tadhi ku shilipaleke kutya owu na ongushu momeho gaJehova. b (Eps. 94:19) Ngele owa ndopa okwaadha elalakano lyontumba, nenge wa teka omukumo, molwaashoka itoo vulu okuninga oshindji ngaashi yalwe, ino kala to ipe unene uusama. Jehova ina tegelela wu ninge shoka itoo vulu okuninga. (Eps. 103:13, 14) Ngele opu na omuntu e ku hepeka monakuziwa, ino kala to ipe uusama, oshoka ndyoka ka li shi epuko lyoye. Dhimbulukwa kutya Jehova ota ka pangula mboka haya hepeke ooyakwawo, ihe haamboka taya hepekwa. (1 Pet. 3:12) Sandra, ngoka a li a hepekwa sho a li okanona, okwa ti: “Ohandi indile Jehova pandjigilile, a kwathele ndje ndi mone omaukwatya gandje omawanawa, ngoka ha mono mungame.”
7. Ongiini oonkalo ndhoka twa pita mudho tadhi vulu oku tu kwathela miilonga yaJehova?
7 Kala wu shi kutya Jehova ota vulu oku ku longitha a kwathele yalwe. Okwe ku pa uuthembahenda wokukala omulongi pamwe naye miilonga yokuuvitha. (1 Kor. 3:9) Oto ka vula okuuva ko omaiyuvo gaamboka taya mono iihuna, oshoka nangoye owa pita moonkalo oondhigu. Oto vulu okuninga oshindji wu ya kwathele. Helen, ngoka a popiwa metetekelo, okwa li a kwathelwa, nongashingeyi ota vulu okukwathela yalwe. Okwa ti: “Onda li handi kala ndi uvite kaandi na oshilonga. Ihe Jehova okwa li a ningitha ndje ndi kale ndi uvite ndi holike noha longitha ndje, ndi kwathele yalwe.” Helen okwa nyanyukwa sho ngashingeyi e li omukokolindjila gwondjigilile.
JEHOVA OKWA HALA TU TAAMBE KO EDHIMINOPO LYE
8. Eshilipaleko lini tatu adha muJesaja 1:18?
8 Aapiya yamwe yaJehova ohaya kala taya ipe uusama, omolwiinima mbyoka ya ninga monakuziwa, tashi vulika manga inaaya ninginithwa, nenge konima yokuninginithwa. Otu na okudhimbulukwa kutya Jehova okwe tu pa ekuliloyambo, molwaashoka oku tu hole noonkondo. Otatu vulu okukala nuushili kutya okwa hala tu taambe ko omagano ngoka. Jehova ote tu shilipaleke kutya konima ngele twa ‘tamanana’ nenge tu tye, twa kandula po uupyakadhi pokati ketu naye, c iha dhimbulukwa we omayono getu. (Lesha Jesaja 1:18.) Otwa pandula shili, sho Tate yetu omunahole, Jehova, ihaa dhimbulukwa omayono getu gomonakuziwa. Iha dhimbwa wo uuwanawa mboka twa longa. — Eps. 103:9, 12; Heb. 6:10.
9. Omolwashike tu na okuninga ngaashi tatu vulu tu gandje eitulomo kiinima mbyoka tatu vulu okuninga ngashingeyi naambyoka tatu ka ninga monakuyiwa, pehala lyokugandja eitulomo konakuziwa?
9 Ngele oto ipe uusama omolwiinima mbyoka wa ninga monakuziwa, kambadhala okukala to gandja eitulomo kwaashoka to ningi ngashingeyi nosho wo shoka to ka ninga monakuyiwa, pehala lyokukala to ipula nomapuko gomonakuziwa. Dhiladhila koshiholelwa shomuyapostoli Paulus. Nonando okwa li a ipe uusama, sho a hepeke nonyanya Aakriste, okwa li e shi kutya Jehova okwe mu dhimina po. (1 Tim. 1:12-15) Mbela okwa li a tsikile nokwiipula kombinga yomayono ge gomonakuziwa? Ngaashi owala inaa kala ta ipula naashoka a li a pondola sho a li meitaalo lyOshijuda, Paulus ina kala ta ipula nomayono ge gomonakuziwa. (Fil. 3:4-8, 13-15) Pehala lyaashono, okwa kala ta ningi ngaashi ta vulu miilonga yokuuvitha nokugandja eitulomo konakuyiwa. Ngaashi Paulus, ito vulu okulundulula onakuziwa. Ihe oto vulu okusimanekitha Jehova ngashingeyi nokukala to gandja eitulomo konakuyiwa yituntula, ndjoka e ku uvanekela.
10. Oshike tatu vulu okuninga, ngele shono wa ninga monakuziwa osha uvitha nayi yalwe?
10 Otashi vulika wu kale wu uvitile nayi iinima mbyoka wa ninga monakuziwa, mbyoka ya uvitha nayi yalwe. Oshike tashi vulu oku ku kwathela? Ninga ngaashi to vulu wu hwepopaleke onkalo, nokugandja ombili tashi zi komutima. (2 Kor. 7:11) Pula Jehova a kwathele mboka wa uvitha nayi. Ota vulu oku ku kwathela nosho wo mboka wa uvitha nayi, mu idhidhimike nomu pange ishewe ombili.
11. Oshike tatu vulu okwiilonga koshiholelwa shomuhunganeki Jona? (Tala wo ethano.)
11 Ilonga komapuko goye gomonakuziwa, nokukala wo wu na ehalo lyokweetha Jehova e ku longithe momukalo kehe ngoka a hogolola. Natu taleni koshiholelwa shomuhunganeki Jona. Pehala lyokuya kuNinive ngaashi Jehova e mu lombwele, Jona okwa li a yi kehala lilwe. Jehova okwa li a pe Jona egeeloputudho, nokwa li a ilongo kepuko lye. (Jona 1:1-4, 15-17; 2:7-10) Jehova ka li a etha po okulongitha Jona. Kalunga okwa li ishewe e mu pe ompito onkwawo a ye kuNinive, noshikando shoka Jona okwa li a vulika. Nonando okwa li e uvitile nayi omapuko ngoka a ninga, Jona okwa li a ningi shoka Jehova e mu pula a ninge. — Jona 3:1-3.
Konima sho omuhunganeki Jona a li a hupu mokana kohi onene, Jehova okwa li e mu lombwele ishewe a ye kuNinive a ka uvithe etumwalaka Lye (Tala okatendo 11)
JEHOVA OHE TU HEKELEKE OKUPITILA MOMBEPO YE ONDJAPUKI
12. Jehova ohe tu pe ngiini ombili uuna twa taalela oonkalo oondhigu? (Aafilippi 4:6, 7)
12 Jehova ohe tu hekeleke okupitila mombepo ye ondjapuki, uuna twa taalela oonkalo oondhigu. Natu taleni koshimoniwa shaRon naCarol. Shinikitha oluhodhi, omwanamati gwawo okwa li a ikutha omwenyo. Oya ti: “Otwa pita nale moonkalo oondhigu, ihe ndjika oya li ondhigu noonkondo. Katwa li hatu kotha uusiku, onkene otwa li hatu galikana kuJehova notwa li twa mono ombili ndjoka ya popiwa mAafilippi 4:6, 7.” (Lesha.) Ngele owa dhengwa pomutima omolweshongo lyontumba, oto vulu okumbumbulila Jehova omutima gwoye megalikano, to shi ningi lwiikando nosho wo ethimbo ele ngaashi wa hala. (Eps. 86:3; 88:1) Pula Jehova lwiikando ombepo ye ondjapuki. Ote ke ku kwathela aluhe. — Luk. 11:9-13.
13. Ongiini ombepo ondjapuki tayi vulu oku tu kwathela tu tsikile okulongela Jehova nuudhiginini? (Aaefeso 3:16)
13 Mbela owa pita monkalo ondhigu ihe ngashingeyi owu uvite kutya ku na we oonkondo dhokuninga sha? Ombepo ondjapuki otayi vulu oku ku nkondopaleka wu tsikile okulongela Jehova nuudhiginini. (Lesha Aaefeso 3:16.) Natu taleni koshiholelwa shomumwameme gwedhina Flora. Ye nomusamane gwe oya li taya longo ye li aatumwa, sho omusamane gwe a kala kee li we omudhiginini kuye noya li ya hengana. Okwa ti: “Onda li nda geya noonkondo, sho kaali omudhiginini kungame nonda kala handi ipula nasho. Onda li nda galikana kuJehova a pe ndje ombepo ye ondjapuki opo ndi idhidhimike. Jehova okwa li a hekeleke ndje. Nonando osha li tashi monika sha fa oshidhigu petameko, onda li nda mono oonkondo dhokwiidhidhimika kekwatho lye.” Flora oku uvite kutya Kalunga okwa li e mu kwathele a kale a inekela muYe shi vulithe nale noku na omukumo kutya ote ke mu nkondopaleka muudhigu we auhe. Okwa gwedha ko a ti: “Oohapu dhEpisalomi 119:32 odha li dha kwathele ndje. Odha ti: ‘Onda hokwa okuvulika kiipango yoye, oshoka omuyo to pe ndje euvoko lya gwana.’”
14. Ongiini tatu vulu okweetha ombepo yaKalunga yi longe mutse?
14 Konima ngele wa pula Jehova ombepo ye ondjapuki, oshike wu na okuninga po? Kutha ombinga miinima mbyoka tayi vulu okupitika ombepo yaKalunga yi longe mungoye. Iinima mbyoka oya kwatela mo okuya kokugongala nokuuvithila yalwe. Kala ho lesha Ombiimbeli esiku kehe, naashono otashi ke ku kwathela wu kale ho dhiladhila ngaashi Jehova. (Fil. 4:8, 9) Sho to lesha, ndhindhilika nkene aantu mboka ya popiwa mOmbiimbeli ya li ya piti momashongo nokutedhatedha nkene Jehova a li e ya kwathele ya idhidhimike. Sandra ngoka a popiwa metetekelo okwa li a piti momashongo ogendji monkalamwenyo. Okwa ti: “Ehokololo lyaJosef olya tsa ndje omukumo unene. Ina etha omashongo nokwaanuuyuuki hoka a li a piti muko ku nkundipaleke ekwatathano lye naJehova.” — Gen. 39:21-23.
JEHOVA OHE TU HEKELEKE OKUPITILA MOOITAALI OOYAKWETU
15. Oolye taya vulu oku tu hekeleka nongiini taya vulu oku tu kwathela? (Tala wo ethano.)
15 Uuna tatu mono iihuna, ooitaali ooyakwetu otaya vulu okukala “ekwatho enene” kutse. (Kol. 4:11) Jehova oha longitha aamwatate naamwameme shono tashi ulike kutya oku tu hole. Ooitaali ooyakwetu otaya vulu oku tu hekeleka moku tu pulakena nohenda nenge moku tu ambidhidha uuna ye li pamwe natse. Otaya vulu oku tu tsa omukumo novelise yOmbiimbeli nenge ya galikane pamwe natse. d (Rom. 15:4) Poompito dhimwe, omumwatate nenge omumwameme ota vulu oku tu dhimbulukitha nkene Jehova ha dhiladhila naashono otashi vulu oku tu kwathela tu tsikile okwiidhidhimika. Aakriste ooyakwetu otaya vulu wo oku tu kwathela okupitila miilonga yawo, ngaashi oku tu telekela iikulya uuna twa gwililwa po.
Ookuume aainekelwa noya koka pambepo, otaya vulu okugandja ehekeleko nekwatho (Tala okatendo 15)
16. Oshike tatu vulu okuninga tu taambe ko ekwatho lyayalwe?
16 Ngele otwa hala yalwe yetu kwathele, otu na oku ya pula ekwatho. Aamwatate naamwameme oye tu hole noya hala oku tu kwathela. (Omayel. 17:17) Ihe itaya ka kala ye shi nkene tu uvite nenge shoka twa pumbwa. (Omayel. 14:10) Ngele owa gwililwa po pamaiyuvo, kala wu na ehalo lyokulombwela ookuume koye mboka ya pyokoka pambepo omaiyuvo goye. Ya lombwela shoka tashi vulu oku ku kwathela. Oto vulu okupopya nomukuluntugongalo gumwe nenge yaali mboka wa mangulukila. Aamwameme yamwe oye shi mona kutya ohashi ya hekeleke uuna ya popi nomumwameme gulwe, ngoka a koka pambepo.
17. Omashongo gamwe geni taga vulu oku tu imba tu taambe ko etsomukumo, nongiini tatu vulu oku ga sinda?
17 Yanda okukala wa hala okwiikalela. Omolwomaiyuvo omawinayi, otashi vulika wu kale inoo hala okukala nayalwe. Omathimbo gamwe, otashi vulika aamwatate naamwameme ya kale kaaye uvite ko omaiyuvo goye nenge ya popye sha shoka tashi ku uvitha nayi. (Jak. 3:2) Ino etha omashongo ga tya ngaaka ge ku imbe wu taambe ko etsomukumo ndyoka wa pumbwa. Omukuluntugongalo gwedhina Gavin, ngoka e niwe kepolimano, okwa ti: “Ihandi kala naanaa nda hala okukala nekwatathano nookuume kandje.” Nonando ongawo, Gavin okwa li ha ningi ngaashi ta vulu a kale naamwatate naamwameme, noha mono mo uuwanawa mokweendathana nayo. Omumwameme gwedhina Amy okwa ti: “Omolwoonkalo ndhoka nda pita mudho monakuziwa, ohandi shi mono oshidhigu okwiinekela aantu. Ihe otandi ilongo nkene ndi na okukala ndi hole nokwiinekela aamwatate naamwameme ngaashi Jehova. Ondi shi shi kutya shono ohashi nyanyudha Jehova, nohashi nyanyudha ndje wo.”
TAAMBA KO EHEKELEKO OKUPITILA MOMAUVANEKO GAJEHOVA GO KU TU ALUDHA
18. Oshike twa halelela oku ka mona monakuyiwa, noshike tatu vulu okuninga ngashingeyi?
18 Otatu vulu okutaalela onakuyiwa tu na omukumo, tu shi kutya masiku Jehova ote ke tu aludha thiluthilu palutu nopamaiyuvo. (Eh. 21:3, 4) Pethimbo ndyoka, iinima ayihe mbyoka iiwinayi twa pita muyo “otayi ka dhimbiwa thiluthilu.” (Jes. 65:17) Ngaashi twe shi mono, nopethimbo lyetu Jehova ‘ohe tu sile oshimpwiyu uuna tatu mono iihuna.’ Longitha omalongekidho gaJehova gopahole, ngoka e tu longekidhila e tu hekeleke noku tu pe epepelelo. Ino kala nando wa limbililwa kutya Jehova “omusilishimpwiyu gweni.” — 1 Pet. 5:7.
EIMBILO 7 Jehova oonkondo dhetu
a Ngoka hago omadhina gawo.
b Tala oshimpungu “ Jehova okwe ku lenga.”
c Opo tu “tamanane” naJehova, otu na okuulika kutya otwa iyela shili ombedhi moku mu pula e tu dhimine po omayono getu nokulundulula eihumbato lyetu. Ngele otwa yono eyono lya kwata miiti, otu na wo okupula ekwatho kaakuluntugongalo megongalo. — Jak. 5:14, 15.
