1-2. Oshike sha li sha ningilwa aalongwa yaali yaJesus, sho ya li taya ende ya uka kuEmmaus?

 OSHA LI omasiku 16 Nisan, 33 E.N. Aalongwa yaJesus oya li ya gwililwa po koluhodhi noya li ya tila noonkondo. Aalongwa yaali oya zi mo muJerusalem, e taya yi komukunda gwedhina Emmaus, ngoka gwa li ookilometa 11 lwaampono, okuza muJerusalem. Aalumentu mboka oya li ya teka omukumo molwaashoka Jesus ngoka ya kala nokulandula, opo a li a dhipagwa. Etegameno lyawo lyaashoka Mesiasa a li ta ka ninga olya li tali monika lya fa kaali po we. Opo ihe, opwa li pwa ningwa oshinima inaashi tegelelwa.

² Omulumentu omuyendanandjila okwa hedha popepi nayo, e ta ende pamwe nayo. Aalongwa oya li ye mu hokololele nkene ya uva nayi kombinga yaashoka sha li sha ningilwa Jesus. Opo ihe, omuyendanandjila okwa tameke oku ya lombwela iinima mbyoka kaaye na esiku ya ka dhimbwe. Okwa longitha omanyolo nomahunganeko gago, e ya yelithile kutya omolwashike Mesiasa a li e na okumona iihuna nokusa. Sho aalumentu mboka yatatu ya thiki kuEmmaus, omuyendanandjila okwa li e ya ihololele kutya oye lye, ano Jesus omuyumudhwa. Dhiladhila owala kenyanyu ndyoka ya li ye na, sho ya tseya kutya Mesiasa oku na omwenyo! — Luk. 24:13-35.

3-4. Oshike sha li sha ningilwa aalongwa yaJesus, notatu ka ilonga shike moshitopolwa shika? (Iilonga 1:3)

³ Jesus okwa li a ihololele aalongwa ye lwiikando, momukokomoko gomasiku ge 40 gahugunina kombanda yevi. (Lesha Iilonga 1:3.) Pethimbo ndyoka, Jesus okwa li a tsu omukumo aalongwa ye mboka ya li ya nika oluhodhi noya tila, opo ya kale ya  nyanyukwa noya kale ye na uulaadhi woku ka uvitha onkundana ombwanawa yUukwaniilwa. a

⁴ Otatu vulu okumona uuwanawa mokukonakona kombinga yethimbo ndyoka li tuntula monkalamwenyo yaJesus. Moshitopolwa shika, otatu ka tala nkene Jesus a li a longitha ethimbo ndyoka (1) a tse omukumo aalongwa ye, (2) e ya kwathele ya kale ye uvite ko Omanyolo nawa, na (3) e ya dheulile iinakugwanithwa mbyoka taya ka kala ye na monakuyiwa. Otatu ka tala nkene tatu vulu okuholela oshiholelwa shaJesus momikalo ndhoka.

TSA YALWE OMUKUMO

5. Omolwashike aalongwa yaJesus ya li ya pumbwa etsomukumo?

⁵ Aalongwa yaJesus oya li ya pumbwa etsomukumo. Omolwashike mbela? Omolwaashoka yamwe oya li ya thigi po omagumbo gawo, uukwanegumbo wawo noongeshefa dhawo opo ya landule Jesus. (Mat. 19:27) Yamwe oya li ya ungaungiwa nayo kaashi li pauyuki, sho ya ningi aalongwa ye. (Joh. 9:22) Oya li ya ningi omaiyambo ngoka, molwaashoka oya li ya itaala kutya Jesus oye Mesiasa, ngoka a li a uvanekwa. (Mat. 16:16) Ihe sho Jesus a dhipagwa, oya li kanitha etegameno lyawo noya li ya teka omukumo.

6. Jesus okwa li a ningi shike konima sho a yumudhwa?

⁶ Sho aalongwa ye ya li ya nika oluhodhi, kapu na omalimbililo kutya Jesus ka li e ya tala ko kutya oya nkundipala pambepo, ihe okwa li e uvite ko nkene ya li ye uvite, omolweso lye. Onkee mesiku olyo tuu ndyoka a li a yumudhwa, okwa tameke okutsa omukumo ookuume ke. Pashiholelwa, okwa li a ihololele Maria Magdalena manga a li ta lili pombila ye. (Joh. 20:11, 16) Okwa li wo a ihololele aalongwa ye yaali mboka ya popiwa petameko lyoshitopolwa shika. Okwa ihololele wo omuyapostoli Petrus. (Luk. 24:34) Oshike tatu vulu okwiilonga koshiholelwa shaJesus? Natu taleni kwaashoka sha li sha ningwa po, pethimbo sho a ihololele Maria Magdalena.

7. Ngaashi sha popiwa muJohannes 20:11-16, ongula onene yomasiku 16 Nisan, Jesus okwa li a mono Maria ta ningi shike, nosha li she mu inyengitha a ninge shike? (Tala wo ethano.)

⁷ Lesha Johannes 20:11-16. Ongula onene yomasiku 16 Nisan, aakiintu oyendji aadhiginini oya li ya yi kombila yaJesus. (Luk. 24:1, 10) Natu  gandjeni eitulomo koshimoniwa shomukiintu gumwe gwomuyo, gwedhina Maria Magdalena. Sho Maria a thiki pombila, omudhimba gwaJesus ine gu adha mo. Okwa matuka a ka lombwele Petrus naJohannes, nokwe ya landula sho taya tondoka ya uka kombila. Sho ya shilipaleke kutya omudhimba gwaJesus kagu mo mombila, oya shuna kegumbo. Ihe Maria ka li a shuna, okwa kala mpoka, ta lili. Ka li e shi ndhindhilike kutya Jesus okwe mu tala. Jesus okwa mono kutya omukiintu ngoka ota lili omolwe, nokwa li a hala oku mu hekeleka. Onkee okwa ihololele Maria, opo nduno okwa ningi oshinima shontumba shoka sha li she mu tsu omukumo noonkondo. Okwa li a popi naye noku mu pa oshinakugwanithwa sha simana shoku ka lombwela aamwahe kutya okwa yumuka. — Joh. 20:17, 18.

8. Ongiini tatu vulu okuholela Jesus?

⁸ Ongiini tatu vulu okuholela Jesus? Ngele otu shi uudhigu waamwatate naamwameme nohatu popi nayo nohenda, ngaashi Jesus, otatu vulu okuninga oshindji tu ya ladhipike ya tsikile okulongela Jehova. Natu taleni koshimoniwa shomumwameme gwedhina Jocelyn, ngoka omumwayinakadhona a sile moshiponga oshinyanyalithi. Okwa ti: “Uule woomwedhi odhindji, onda li handi kala ndi uvite oluhodhi olunene ethimbo alihe.” Ihe omumwatate gumwe nomukulukadhi gwe oya li ye mu hiya kegumbo lyawo nokupulakena kuye nolukeno, nosho wo oku mu shilipaleka kutya oku na ongushu momeho gaKalunga. Jocelyn okwa ti: “Onda li ndi uvite nda fa ndi li moshikungulu shomefuta naJehova okwe ya longitha a nane ndje mo nokuhupitha ndje. Oya li ya kwathele ndje ndi kale ishewe ndi na ehalo lyokutsikila okulongela Jehova.” Natse otatu vulu okutsa yalwe omukumo mokupulakena kuyo neitulomo sho taye tu mbumbulile omitima dhawo nomokupopya nayo nolukeno, nelalakano lyoku ya kwathela opo ya tsikile okulongela Jehova. — Rom. 12:15.

KWATHELA YALWE YA UVE KO OOHAPU DHAKALUNGA

9. Aalongwa yaJesus oya li ya taalela eshongo lini naJesus okwa li e ya kwathele ngiini?

⁹ Aalongwa yaJesus oya li ya taamba ko oohapu dhaKalunga noya li ya ningi ngaashi taya vulu ye dhi tule miilonga mokukalamwenyo kwawo. (Joh. 17:6) Nonando ongawo, kaya li ye uvite ko kutya omolwashike Jesus a li a dhipagwa a fa omukolokoshi. Jesus okwa li e shi kutya aalongwa ye oye na eitaalo noye hole Jehova, ihe oya li ya pumbwa okuuva ko nawa Omanyolo. (Luk. 9:44, 45; Joh. 20:9) Onkee okwa li e ya kwathele ya uve ko eityo lyaashoka ya lesha mOmanyolo. Tala nkene a li e shi ningi sho a ihololele aalongwa ye yaali mondjila sho ya uka kuEmmaus.

10. Jesus okwa li a kwathele ngiini aalongwa ye ya kale ya tompwa kutya oye a li shili Mesiasa? (Lukas 24:18-27)

¹⁰ Lesha Lukas 24:18-27. Ndhindhilika kutya Jesus ka li e ya lombwele nziya kutya oye lye. Pehala lyaashono, okwa li a pula omapulo. Omolwashike mbela? Omolwaashoka otashi vulika a li a hala ya holole shoka shi li momitima dhawo nomomadhiladhilo gawo. Noya li ye shi ningi. Oya li ye mu lombwele kutya oya li ya tegelela Jesus a mangulule Israeli muupika waRoma. Konima sho ya holola omaiyuvo gawo, Jesus okwa li a longitha Omanyolo a kwathele aalumentu mboka ya uve ko shoka sha li sha ningwa po. b Lwanima ongulohi ndjoka, Jesus okwa kala nokukwathela aalongwa yalwe ya uve ko thiluthilu eityo lyOmanyolo. (Luk. 24:33-48) Oshike tatu ilongo mehokololo ndika?

11-12. (a) Oshiilongomwa shini tatu ilongo komukalo ngoka Jesus a li a longo oshili yOmbiimbeli? (Tala wo omathano.) (b) Ongiini Nortey a li a kwathelwa kwaangoka ha konakona Ombiimbeli naye?

¹¹ Ongiini tatu vulu okuholela Jesus? Shotango, uuna to longo aakonakonimbiimbeli, pula omapulo  taga opalele ngoka taga vulu oku ya ningitha ya holole shoka shi li momitima nomomadhiladhilo gawo. (Omayel. 20:5) Uuna wa uvu ko omaiyuvo gawo, ya ulikila nkene ye na okumona omanyolo gokondandalunde ngoka taga opalele oonkalo dhawo. Pehala lyoku ya lombwela shoka ye na okuninga, ya kwathela ya uve ko Omanyolo nokumona nkene ye na okutula miilonga omakotampango gOmbiimbeli mokukalamwenyo kwawo. Tala koshimoniwa shomumwatate gwokoGhana, gwedhina Nortey.

¹² Sho Nortey a li e na omimvo 16, okwa li a tameke okukonakona Ombiimbeli. Nziya, uukwanegumbo we owa li wa tameke oku mu pataneka. Oshike she mu kwathele a tsikile okukonakona? Ngoka a li ha konakona naye Ombiimbeli, okwa li a longitha Mateus ontopolwa 10 a yelithe kutya Aakriste yashili otaya ka hepekwa. Nortey okwa ti: “Sho omapataneko ga tameke, onda li nda tompwa kutya onda mona oshili.” Ngoka a konakona naye okwe mu kwathele wo a mone nkene Mateus 10:16 te mu kwathele a kale a kotoka noku na esimaneko sho ta kundathana kombinga yeitaalo lye noyaandjawo. Konima sho a ninginithwa, Nortey okwa li a hala okukokola ondjila, ihe he okwa li a tegelela a ye kelongo lyopombanda. Pehala lyokulombwela Nortey shoka e na okuninga, ngoka ha konakona naye okwa li e mu pula omapulo, opo e mu kwathele a dhiladhile kombinga yomakotampango gOmbiimbeli nokuninga etokolo lyomondjila. Oshizemo? Nortey okwa li a tokola okuya miilonga yethimbo lya udha. He okwa li e mu lombwele a ze mo megumbo. Nortey okwa li e uvitile ngiini shoka a ningilwa? Okwa ti: “Onda tompwa kutya onda ninga etokolo lyomondjila.” Ngele natse ohatu kwathele yalwe ya dhiladhile kOmanyolo, otatu vulu oku ya kwathela ya ninge Aakriste ya kola meitaalo. — Ef. 3:16-19.

KWATHELA AAMWATATE YA KALE YA GWANA OKUNINGA “AANTU YE LI OMAGANO”

13. Jesus okwa li a ningi shike a shilipaleke kutya iilonga yaHe otayi ka tsikila nokulongwa nokuli nuuna a shuna megulu? (Aaefeso 4:8)

¹³ Sho Jesus a li kombanda yevi, okwa li a longo shoka He e mu lombwele a ninge. (Joh. 17:4) Ihe Jesus ka li nando ha dhiladhila kutya oye owala a li ta vulu okulonga ehalo lyaJehova. Momukokomoko gwomimvo ndatu netata ndhoka a kala ta uvitha, okwa li wo a dheula yalwe. Manga inaa shuna megulu, Jesus okwa li a inekelele aalongwa ye, nokuli naamboka ya li ye na omimvo omilongo mbali nasha, oshinakugwanithwa shokusila oshimpwiyu oonzi dhaJehova dhi na  ondilo nosho wo okukwatela komeho iilonga yokuuvitha noyokuninga aantu aalongwa. (Lesha Aaefeso 4:8.) Jesus okwa li a longitha ngiini omasiku ge 40 gahugunina, a kwathele aalumentu mbaka aadhiginini ya kale ya gwana okuninga “aantu ye li omagano”?

14. Jesus okwa li a kwathele ngiini aalongwa ye ya koke pambepo, momukokomoko gwomasiku ge 40 gahugunina kombanda yevi? (Tala wo ethano.)

¹⁴ Jesus okwa li a pe aalongwa ye omayele ngoka ya li ya pumbwa okuuva, ihe omomukalo gwopahole. Pashiholelwa, okwa li a ndhindhilike kutya oya li ye na omukalondjigilile gwokukala ya limbililwa, onkee okwe ya pe omayele. (Luk. 24:25-27; Joh. 20:27) Okwa li e ya kwathele ya gandje eitulomo kiilonga yokusila oshimpwiyu oshigwana shaKalunga pehala lyokugandja eitulomo kiilonga yokwiikongela omboloto. (Joh. 21:15) Okwa li e ya dhimbulukitha kaaya kale taya ipula unene niinakugwanithwa mbyoka yalwe tashi vulika ya pewe miilonga yaJehova. (Joh. 21:20-22) Okwa li wo e ya pukulula shi nasha neuvoko lya puka ndyoka ya li ye na kombinga yUukwaniilwa noku ya kwathela ya gandje eitulomo kokuuvitha onkundana ombwanawa. (Iil. 1:6-8) Aakuluntugongalo otaya vulu okwiilonga shike kuJesus?

15-16. (a) Omomikalo dhini aakuluntugongalo taya vulu okuholela Jesus? Shi yelitha. (b) Patrick okwa li a mono mo ngiini uuwanawa momayele ngoka a li a pewa?

¹⁵ Ongiini aakuluntugongalo taya vulu okuholela Jesus? Oya pumbwa okudheula aamwatate, mwa kwatelwa naamboka aagundjuka, opo ya kale ya gwana okupewa iinakugwanithwa yilwe megongalo. c Aakuluntugongalo oye shi kutya mboka taya dheulwa inaya gwanenena. Oye na oku ya pa omayele gopahole opo aamwatate mboka aagundjuka ya mone owino noya kale aaifupipiki, aadhiginini noye na ehalo lyokuyakula yalwe. — 1 Tim. 3:1; 2 Tim. 2:2; 1 Pet. 5:5.

¹⁶ Tala nkene omumwatate Patrick a li a mono mo uuwanawa momayele ngoka a li a pewa. Sho a li omugundjuka, okwa li ha popi noha ungaunga nayi nayalwe, mwa kwatelwa nokuli naamwameme. Omukuluntugongalo gumwe okwa li a ndhindhilike uunkundi waPatrick, nokwa li e  mu pe omayele ga yela, ihe omomukalo gwombili. Patrick okwa ti: “Onda pandula sho e shi ningi. Onda li handi kala nda teka omukumo sho ndi wete aamwatate taya pewa iinakugwanithwa mbyoka nda li handi kala nda hala. Ihe omayele gomukuluntugongalo oga kwathele ndje ndi mone kutya onda li nda pumbwa okugandja eitulomo kokukwathela aamwatate naamwameme neifupipiko, pehala lyokugandja eitulomo kokupewa iinakugwanithwa megongalo.” Oshizemo, Patrick okwa li a langekwa po e li omukuluntugongalo sho e na omimvo 23. — Omayel. 27:9.

17. Jesus okwa li a ulike ngiini kutya okwa inekela aalongwa ye?

¹⁷ Jesus okwa li a pe aalongwa ye oshinakugwanithwa shokuuvitha nosho wo shokulonga aantu. (Mat. 28:20) Aalongwa ye otashi vulika ya li ye uvite inaaya gwana okugwanitha po oshinakugwanithwa shoka. Ihe nonando ongawo, Jesus ka li a limbililwa ngele otaya vulu ngaa oku shi gwanitha po. Okwa li e na einekelo thiluthilu muyo, nokwe ya lombwele a ti: “Ngaashi owala Tate a tuma ndje muuyuni, nangame wo otandi mu tumu muuyuni.” — Joh. 20:21.

18. Ongiini aakuluntugongalo taya vulu okuholela Jesus?

¹⁸ Ongiini aakuluntugongalo taya vulu okuholela Jesus? Aakuluntugongalo yamwe ohaya inekelele yalwe iinakugwanithwa. (Fil. 2:19-22) Pashiholelwa, aakuluntugongalo otaya vulu okweetha aagundjuka ya kuthe ombinga mokwoopaleka nokukaleka po Oshinyanga shUukwaniilwa. Konima ngele omukuluntugongalo a pe gumwe oshinakugwanithwa, ota vulu okuulika kutya okwe mu inekela moku mu dheula noku shi mu inekelela sigo e shi manitha. Matthew, ngoka opo a ningi omukuluntugongalo, okwa ti kutya ota pandula aakuluntugongalo ye na owino mboka ye mu dheula nawa opo a vule okugwanitha po oshinakugwanithwa she noya li ye mu inekele kutya ote ke shi gwanitha po nawa. Okwa ti: “Oya li ya kwathele ndje ndi mone nkene nda li tandi vulu okwiilonga sha komapuko ngoka nda li handi ningi, nokukwathela ndje ndi hwepopale.” d

19. Oshike twa pumbwa okukala twa tokola toko okuninga?

¹⁹ Jesus okwa li a longitha omasiku ge 40 gahugunina kombanda yevi a tse yalwe omukumo, e ya longe nokudheula yalwe. Onkee, natu kale twa tokola toko tu landule oshiholelwa she thiluthilu. (1 Pet. 2:21) Ote ke tu kwathela tu shi ninge. Molwaashoka, okwa uvaneka a ti: “Otandi kala pamwe nane aluhe, sigo omasiku gahugunina guuyuni mbuka.” — Mat. 28:20.