1-2. (a) Jehova okwa li ha popi naantu momikalo dhini? (b) Oshike tatu ka kundathana moshitopolwa shika?

JEHOVA oku hole okupopya natse. Monakuziwa, okwa li ha longitha aahunganeki, aayengeli nosho wo Omwana, Jesus Kristus, ya lombwele aantu shoka ta ti. (Amos 3:7; Gal. 3:19; Eh. 1:1) Kunena, oha popi natse okupitila mOohapu dhe, Ombiimbeli. Okwe yi tu pa, opo tu ilonge shoka ta dhiladhila notu uve ko oondjila dhe.

² Sho Jesus a li kombanda yevi, Jehova okwa li a popi okuza megulu iikando itatu. Natu ka taleni kwaashoka Jehova a popile piikando mbyoka, shoka tatu vulu okwiilonga moohapu dhe ndhoka nonokutya ongiini tatu vulu okumona mo uuwanawa mwaashoka a popi.

3. Jehova okwa popi shike muMarkus 1:9-11, sho Jesus a ninginithwa, noohapu ndhoka otadhi koleke shike?

³ MuMarkus 1:9-11 omwa popiwa oshikando shotango Jehova a popi okuza megulu, pethimbo Jesus a li kombanda yevi. (Lesha.) Okwa ti: “Ongoye Omumwandje omuholike, onde ku hokwa.” Oohapu ndhoka kadha li tuu dha gumu Jesus komutima, sho a uvu He ta popi kutya oku mu hole nokwe mu inekela! Oohapu ndhoka dhaJehova, otadhi koleke uuyelele wopatatu wu li paushili kombinga yaJesus. Shotango, Jesus Omwana. Oshitiyali, Jehova oku hole Omwana. Oshititatu, Jehova okwa hokwa Omwana. Natu ka konakoneni muule uuyelele mboka wopatatu.

4. Jesus sho a ninginithwa, okwa yi mekwatathano lini epe naKalunga?

⁴ “Ongoye Omumwandje.” Jehova sho a popi oohapu ndhoka, okwa ulike kutya Omwana omuholike, Jesus, okwa ya mekwatathano  epe naYe. Sho Jesus a li megulu, okwa li omwana gwaKalunga gwopambepo. Nonando ongawo, peninginitho lye, okwa li a gwayekwa nombepo ondjapuki. Pethimbo ndyoka, Kalunga okwa ulike kutya Jesus, Omwana omugwayekwa, ngashingeyi okwa li e na etegameno lyokushuna megulu, a ka ninge Omukwaniilwa nOmuyambi Omukuluntu a langekwa po kuKalunga. (Luk. 1:31-33; Heb. 1:8, 9; 2:17) Onkee ano, peninginitho lyaJesus, He okwa li e na etompelo ewanawa lyokupopya ta ti: “Ongoye omumwandje.” — Luk. 3:22.

5. Ongiini tatu vulu okuholela oshiholelwa shaJehova shokuulukila yalwe ohole noku ya tsa omukumo?

⁵ “Ongoye . . . omuholike.” Jehova sho a popi kutya oku hole nokwa hokwa Jesus, okwe tu tulila po oshiholelwa shokutsa yalwe omukumo. (Joh. 5:20) Ohatu shi enditha nawa, uuna gumwe ngoka tu na ko nasha naye a ulike kutya oku tu hole nuuna e tu pandula, omolwuuwanawa mboka hatu longo. Sha faathana, aamwatate naamwameme megongalo nosho wo aanegumbo lyetu, otwa pumbwa oku ya ulukila ohole noku ya tsa omukumo. Uuna tatu pandula yalwe, ohatu koleke eitaalo lyawo nohatu ya kwathele ya longele Jehova nuudhiginini. Aavali oya pumbwa unene okutsa omukumo oyana. Uuna taye ya pandula tashi zi komutima noku ya ulukila ohole, ohaye ya kwathele ya kale ye na eitaalo lya kola.

6. Omolwashike tatu vulu okukala tu na einekelo muJesus Kristus?

⁶ “Onde ku hokwa.” Oohapu ndhoka otadhi ulike kutya Jehova okwa li e na einekelo kutya Jesus ota ka gwanitha po ehalo Lye nuudhiginini. Ngele Jehova okwi inekela Omwana, natse otatu vulu okukala twi inekela Jesus thiluthilu kutya ota ka gwanitha po nuudhiginini omauvaneko gaJehova agehe. (2 Kor. 1:20) Uuna tatu dhiladhila koshiholelwa shaJesus, ohashi tu ningitha nokuli tu kale twa tokola toko okwiilonga kuye nokulandula oshiholelwa  she. Ngaashi owala Jehova a li e na einekelo mOmwana, nokunena oku na wo einekelo kutya aapiya ye otaya ka tsikila okwiilonga sha kOmwana. — 1 Pet. 2:21.

7. Shi ikolelela kuMateus 17:1-5, opompito yini Jehova a li a popi okuza megulu, nokwa ti ngiini?

⁷ Lesha Mateus 17:1-5. Oshikando oshitiyali Jehova a popi okuza megulu, oosho Jesus a li a “shituluka.” Shoka osha ningilwa kondungu yondundu, hoka Jesus a yi ko pamwe naPetrus, Jakob naJohannes. Manga ye li hoka, oya mono emoniko ekumithi. Oshipala shaJesus osha adhima ngetango, noonguwo dhe odha yele dha fa uuyelele. Puye opwa holoka aantu yaali taya thaneke Moses naElia. Oya tameke okupopya naye kombinga yeso neyumuko lye. Nonando aayapostoli mboka yatatu oya li “yu umbwa oomposi,” oya papudhuka mo noya mono emoniko ndyoka ekumithi. (Luk. 9:29-32) Konima yaashoka, oshikogo shuuyelele oshe ya siikile. Opo nduno, oya uvu ewi lyaKalunga tali zi moshikogo. Ngaashi owala Jehova a li a popi peninginitho lyaJesus, nopompito ndjika okwa holola kutya oku hole nokwa hokwa Omwana, sho a ti: “Nguka Omumwandje omuholike nde mu hokwa.” Ihe oshikando shika okwa gwedha ko a ti: “Mu uveni!”

8. Emoniko olya li lya gumu ngiini Jesus naalongwa ye?

⁸ Emoniko ndyoka olya ulike kutya Jesus okwa li ta ka kala e na eadhimo noonkondo, e li Omukwaniilwa gwUukwaniilwa waKalunga. Osha yela kutya emoniko ndyoka olya li lya tsu Jesus omukumo, nolye mu kwathele, opo e ki idhidhimikile omahepeko neso. Olya koleke wo eitaalo lyaalongwa ye. Olya li wo lye ya kwathele yi ilongekidhile omashongo ngoka ya li taya ka pita mugo noku ka longa nuudhiginini iilonga mbyoka ya li taya ka kala ye na. Konima yomimvo 30 lwaampono, omuyapostoli Petrus okwa li a popi kombinga yemoniko ndyoka, nokwa ulike kutya okwa li te li dhimbulukwa nawa natango. — 2 Pet. 1:16-18.

9. Omalombwelo geni ge na oshilonga Jesus a li a pe aalongwa ye?

⁹ “Mu uveni!” Jehova okwe shi ulike sha yela kutya okwa hala tu kale hatu pulakene kOmwana nokuvulika kuye. Jesus okwa popi shike, sho a li kombanda yevi? Okwa li a popi iinima oyindji iiwanawa okupulakenwa! Pashiholelwa, okwa li a longo aalongwa ye pahole nkene ye na okuuvitha onkundana ombwanawa nokwe ya dhimbulukitha lwiikando ya kale ya tonata. (Mat. 24:42; 28:19, 20) Okwe ya ladhipike wo ya kondje ya mana mo nokwe ya tsu omukumo kaaya shune omutse miipeta. (Luk. 13:24) Jesus okwa li a tsu omuthindo kutya aalanduli ye oya pumbwa okukala ye holathane, ya hangana nohaya vulika komalombwelo ge. (Joh. 15:10, 12, 13) Jesus ka li tuu a pe aalongwa ye omalombwelo tage ya kwathele! Omalombwelo ngoka oga simana wo nokunena, ngaashi ga li pethimbo Jesus e ga gandja.

10-11. Ongiini tatu vulu okuulika kutya otatu pulakene kuJesus?

¹⁰ Jesus okwa ti: “Kehe ngoka ha kala moshili, otu uvu ewi lyandje.” (Joh. 18:37) Ohatu ulike kutya otatu pulakene kewi lye, uuna tatu ‘kwathathana nokudhiminathana po oondjo ethimbo kehe.’ (Kol. 3:13; Luk. 17:3, 4) Ohatu shi ulike wo mokuuvitha nuulaadhi onkundana ombwanawa, “pethimbo ewanawa nenge edhigu.” — 2 Tim. 4:2.

¹¹ Jesus okwa ti: “Oonzi dhandje ohadhi uvu ewi lyandje.” (Joh. 10:27) Aalanduli yaKristus ihaya pulakene owala koohapu dhe, ihe ohaye dhi tula wo miilonga. Ihaya etha ya yiwe moshipala ‘kiimpwiyu yopauyuni.’ (Luk. 21:34) Pehala lyaashono, ohaya pititha komeho omalombwelo gaJesus, nuuna ye li moonkalo oondhigu. Aamwatate oyendji otaya idhidhimikile omashongo, ngaashi okuponokelwa  kaatondi, oluhepo lwa kwata miiti nosho wo iiponga yopaunshitwe. Nonando ongawo, ohaya kala aadhiginini kuJehova kutya nduno otashi ya pula shike. Jesus okwe ya shilipaleke a ti: “Kehe ngoka ta taamba omalombwelo gandje nota vulika kugo, oku hole ndje. Tate wo ota kala e hole ngoka e hole ndje.” — Joh. 14:21.

12. Omomukalo gulwe ishewe guni tatu vulu okuulika kutya otatu pulakene kuJesus?

¹² Omukalo gulwe tatu vulu okuulika kutya otatu pulakene kuJesus, omokulongela kumwe naamboka a langeka po ye tu kwatele komeho. (Heb. 13:7, 17) Omimvo opo dha zi ko, ehangano lyaJehova olya ninga omalunduluko ogendji. Omalunduluko ngoka oga kwatela mo okulongitha iilongitho iipe nomikalo omipe muukalele, omukalo omupe gwokuninga okugongala kwomokati koshiwike nosho wo omukalo gwokutunga, gwokwoopalekulula nogwokukaleka Iinyanga yUukwaniilwa monkalo ombwanawa. Inatu pandula tuu ewiliko ndyoka lyopahole nolya longekidhwa nawa! Otatu vulu okukala nuushili kutya Jehova ota ka yambeka oonkambadhala dhetu, sho tatu landula ewiliko ndyoka tali gandjwa kehangano lye.

13. Ohatu mono mo uuwanawa wuni mokupulakena kuJesus?

¹³ Ohatu mono mo uuwanawa mokupulakena kiinima ayihe mbyoka Jesus a longa. Jesus okwa li a shilipaleke aalongwa ye kutya omalongo ge otage ke ya talaleka. Okwa ti: “[Otamu] imonene evululuko. Oshoka ondjoko yandje ombwanawa nomutenge gwandje omupu.” (Mat. 11:28-30) Oohapu dhaKalunga, ndhoka dha kwatela mo Omavaangeli gane ngoka ga popya kombinga yonkalamwenyo yaJesus nuukalele we, ohadhi tu pe evululuko, ohadhi tu kwathele tu kale tu na ekwatathano lya kola naJehova nohadhi tu ningitha tu kale tu na oondunge. (Eps. 19:7; 23:3) Jesus okwa ti: “Aanelago oomboka taa uvu oohapu dhaKalunga e taye dhi dhiginine.” — Luk. 11:28.

14-15. (a) Shi ikolelela kuJohannes 12:27, 28, oshikando oshititatu Jehova okwa popi shike okuza megulu? (b) Omolwashike oohapu dhaJehova dha hekeleke Jesus noku mu tsa omukumo?

¹⁴ Lesha Johannes 12:27, 28. MEvaangeli lyaJohannes omwa popiwa oshikando oshititatu Jehova a popi okuza megulu. Sho kwa li ku na omasiku omashona a se, Jesus okwa li muJerusalem a dhane Opaasa ye yahugunina.  Okwa ti: “Omwenyo gwandje ogwa tukuluka.” Opo ihe, okwa galikana a ti: “Tate, simanekitha edhina lyoye.” Nena He okwa popi okuza megulu, a ti: “Onde li simanekitha notandi li simanekitha natango.”

¹⁵ Jesus okwa li e uvite uudhigu, omolwoshinakugwanithwa oshinene shokukala omudhiginini kuJehova. Okwa li e shi kutya ota ka sa eso tali uvitha omwenyo omutoye. (Mat. 26:38) Shoka sha simanenena, okwa li a hala okusimanekitha edhina lyaHe. Jesus okwa li a lundilwa kutya okwa tuka Kalunga nokwa li ti ipula unene kutya eso lye otali ka shekitha Kalunga. Jesus ka li tuu a tsuwa omukumo koohapu ndhoka dhaJehova! Okwa li e shi shi kutya edhina lyaJehova otali ka simanekithwa. Oohapu dhaHe ndhoka odhi na okukala dha li dhe mu hekeleke lela noku mu tsa omukumo, opo i idhidhimikile okumona iihuna hoka kwa li taku ke mu adha. Nonando Jesus otashi vulika oye awike a li e uvite ko shoka He a ti pompito ndjoka, Jehova okwa shilipaleke oohapu dhe dhi nyolwe, natse tu mone mo uuwanawa. — Joh. 12:29, 30.

16. Omolwashike omathimbo gamwe tashi vulika tu ipule kombinga yokushekitha edhina lyaKalunga?

¹⁶ Ngaashi Jesus, natse otashi vulika tu kale tatu ipula unene kombinga yokushekitha edhina lyaJehova. Otashi vulika wo tu ungaungiwe natse kaashi li pauyuuki. Nenge tashi vulika tu uvithwe nayi komahokololo giifundja kombinga yetu, ngoka ga taandelekwa kaapataneki yetu. Otashi vulika tu dhiladhile kombinga  yankene omahokololo ngoka taga shekitha edhina lyaJehova nehangano lye. Poompito ndhoka, oohapu dhaJehova otadhi vulu oku tu hekeleka lela. Inatu pumbwa okukala tatu ipula unene naashoka. Otatu vulu okukala nuushili kutya ‘ombili yaKalunga, ndjoka yi vule uunongo auhe wopantu, otayi gamene oomwenyo dhetu nomadhiladhilo getu muKristus Jesus.’ (Fil. 4:6, 7) Jehova ota ka simanekitha aluhe edhina lye. Okupitila mUukwaniilwa we, ota ka kutha po uuwinayi awuhe mboka Satana nuuyuni we ya etela aapiya Ye. — Eps. 94:22, 23; Jes. 65:17.

17. Shi ikolelela kuJesaja 30:21, Jehova oha popi natse ngiini kunena?

¹⁷ Jehova oha popi wo natse kunena. (Lesha Jesaja 30:21.) Nonando iha tu mu uvu ta popi natse okuza megulu, oha popi natse okupitila mOohapu dhe, Ombiimbeli, moka he tu pe omalombwelo. Shimwe ishewe, ombepo ye ohayi inyengitha “omupiya omudhiginini,” (NW), a tsikile okupa aapiya ye iikulya pethimbo. (Luke 12:42) Ohatu pewa lela iikulya oyindji molupe lwiinyanyangidhwa ya pilintwa, yi li kointaneta, uuvidio nosho wo iileshomwa mbyoka ya kwatwa momawi.

18. Oohapu dhaJehova ohadhi koleke ngiini eitaalo lyoye noku ku tsa omukumo?

¹⁸ Natu kalekeni momadhiladhilo oohapu ndhoka Jehova a popi, pethimbo Omwana a li kombanda yevi! Oohapu dhaKalunga nadhi tu tse omukumo kutya Jehova iinima ayihe oku yi wete nota ka kutha po uuwinayi awuhe mboka we etwa kuSatana nuuyuni we wa kolokosha, ngaashi sha popiwa mOmbiimbeli. Natu kale wo twa tokola toko okupulakena nomwenyo aguhe kewi lyaJehova. Ngele osho twa ningi, otatu ka vula okwiidhidhimikila nomupondo uupyakadhi kehe mboka tu na ngashingeyi naamboka tawu ke tu adha. Ombiimbeli otayi tu dhimbulukitha tayi ti: “Omu na okwiidhidhimika, opo mu gwanithe ehalo lyaKalunga ne mu pewe shoka e shi uvaneka.” — Heb. 10:36.