1. Omuuvithi 3:1, 7, otadhi tu longo shike?

YAMWE yomutse otu hole okupopya unene. Yalwe oye hole okukala ya mwena. Ngaashi sha popiwa menyolo lyenenedhiladhilo lyoshitopolwa shika, opu na ethimbo lyokupopya nethimbo lyokumwena. (Lesha Omuuvithi 3:1, 7.) Ihe otashi vulika tu kale twa hala yamwe yomaamwatate naamwameme ya kale ye hole okupopya. Otashi vulika wo tu kale twa hala yamwe ya kale ihaaya popi unene.

2. Olye e na uuthemba wokutula po omithikampango dhi na ko nasha nethimbo ndyoka tu na okupopya nankene tu na oku shi ninga?

² Okupopya oku li omagano ga za kuJehova. (Eks. 4:10, 11; Eh. 4:11) Ohe tu kwathele okupitila mOohapu dhe, tu tseye nkene tu na okulongitha omagano ngoka nawa. Moshitopolwa shika, otatu ka kundathana iiholelwa yomOmbiimbeli, mbyoka tayi ke tu kwathela tu tseye kutya ethimbo lini tu na okupopya nethimbo lini tu na okumwena. Otatu ka tala wo nkene Jehova ha kala e uvitile shoka hatu lombwele yalwe. Tango, natu kundathaneni kutya uunake tu na okupopya.

3. Shi ikolelela kAaroma 10:14, uunake tu na okupopya?

³ Otu na okukala aluhe twi ilongekidha okupopya kombinga yaJehova noyUukwaniilwa. (Mat. 24:14; lesha Aaroma 10:14.) Ngele otwa kala tatu ningi ngawo, otatu holele Jesus. Limwe lyomomatompelo ga simanenena kutya omolwashike Jesus i ile kombanda yevi, okulombwela yalwe oshili kombinga yaHe. (Joh. 18:37) Ihe natu dhimbulukwe kutya omukalo moka hatu popi, nagwo ogwa simana. Onkee ano, uuna tatu popi nayalwe kombinga yaJehova, natu shi ninge “nombili nonesimaneko” (NW), notu na wo okuyaalela omaiyuvo gayalwe naashoka yi itaala. (1 Pet. 3:15) Kungawo,  itatu ka popya owala nayo, ihe otatu ke ya longa notashi vulika tu adhe omitima dhawo.

4. Metsokumwe nOmayeletumbulo 9:9, oohapu dhetu otadhi vulu ngiini okukwathela yalwe?

⁴ Aakuluntugongalo kaye na okukakadhala, uuna ye wete kutya omumwatate nenge omumwameme okwa pumbwa omayele. Odhoshili kutya otaya ka konga ethimbo lyo opala ya popye naye, opo kaaye mu sithe ohoni. Otaya ka kala ya hala okutegelela, sigo ya mono okampito ya popye naye, ye li po oyo ayeke. Aakuluntugongalo ohaya kambadhala aluhe okupopya nomuntu momukalo gwesimaneko. Nonando ongawo, ohaye mu lombwele omakotampango gOmbiimbeli, ngoka taga vulu oku mu kwathela a katuke pandunge. (Lesha Omayeletumbulo 9:9.) Omolwashike sha simanenena okukala tu na ehwamo lyokupopya pompito mpoka sha pumbiwa? Natu tale kiiholelwa iyali ya yoolokathana. Shimwe, okombinga yomulumentu ngoka a li a pumbwa okupukulula oyana, omanga shilwe, okombinga yomukiintu ngoka a li e na okupopya nomukwaniilwa.

5. Opompito yini Omuyambimukuluntu Eli a li e na okupopya?

⁵ Omuyambimukuluntu Eli okwa li e na oyanamati yaali, mboka a li e hole noonkondo. Ihe oyanamati mboka, kaya li ya simaneka Jehova. Oya li ye na oondondo dha simana, ano aayambi haya longo ketsalihangano. Ihe oya li ya longitha nayi oonkondopangelo dhawo, kaya li nando ya simaneka omayambo ngoka ga li haga pewa Jehova nokaya li haya tila okuya moluhondelo. (1 Sam. 2:12-17, 22) PaMpango yaMoses, oyanamati yaEli oya li ya gwana okudhipagwa, ihe Eli okwa li owala e ya ganda e te ya etha ya tsikile okulonga metsalihangano. (Deut. 21:18-21) Jehova okwa li a tala ko ngiini omukalo moka Eli a ungaunga noshinima shoka? Okwa ti kuEli: “Omolwashike to simaneke aamwoye shi vule okusimaneka ndje?” Opo nduno, Jehova okwa tokola aalumentu mboka yaali aakolokoshi ya se. — 1 Sam. 2:29, 34.

6. Oshike tatu ilongo kuEli?

⁶ Otatu ilongo ko oshiilongomwa sha simana kuEli. Ngele otwa mono kutya kuume ketu nenge omupambele gwetu okwa taaguluka ompango yaKalunga, natu popye naye, tu mu dhimbulukithe omithikampango dhaJehova. Otwa pumbwa wo okushilipaleka kutya okwa mona ekwatho kwaamboka Jehova a langeka po. (Jak. 5:14) Katu na nando okukala twa fa Eli, mokusimaneka kuume ketu nenge omupambele gwetu shi vulithe Jehova. Ohashi pula uulaadhi okupopya nagumwe ngoka a pumbwa okupukululwa. Nonando ongawo, ohashi eta iizemo iiwanawa. Natu tale keyooloko pokati koshiholelwa shaEli  noshiholelwa shomukiintu Omuisraeli gwedhina Abigal.

7. Omolwashike Abigal a li a popi naDavid?

⁷ Abigal okwa li omukulukadhi gwomulumentu omuyamba gwedhina Nabal. Sho David naalumentu ye ya li taya yi ontuku omukwaniilwa Saul, oya li ya kala okathimbo naasita yaNabal nokugamena oonzi dhe kaadhi yakwe po. Mbela Nabal okwa li ngaa a pandula ekwatho lyawo? Aawe. Sho a pulwa kuDavid a pe aalumentu ye iikulya nomeya, Nabal okwa geye noku ya ula nayi. (1 Sam. 25:5-8, 10-12, 14) Oshizemo? David okwa li a tokola a dhipage aalumentu ayehe yomegumbo lyaNabal. (1 Sam. 25:13, 22) Etiko lyombinzi ndyoka olya li tali vulu okuyandwa ngiini? Abigal okwa li a mono kutya ndyoka olyo ethimbo lye lyokupopya. Onkee okwa yi e na uulaadhi a ka tsakanene naalumentu 400 ya sa ondjala, ya geya noya homata noku popye naDavid.

8. Oshike tatu ilongo koshiholelwa shaAbigal?

⁸ Sho Abigal a tsakanene naDavid, okwa popi naye nuulaadhi, nesimaneko nonoondunge. Nonando epuko kalya li lyaAbigal, okwa pe David ombili. Okwa li a gandja eitulomo komaukwatya omawanawa gaDavid nokwa li i inekela Jehova e mu kwathele. (1 Sam. 25:24, 26, 28, 33, 34) Ngaashi Abigal, otwa pumbwa okukala tu na uulaadhi wokupopya, ngele otwa mono gumwe ta ningi oshinima shoka tashi vulu oku mu fala moshiponga. (Eps. 141:5) Otwa pumbwa okukala tu na esimaneko, ihe nuulaadhi wo. Ngele otwa pe omuntu omayele ngoka a pumbwa momukalo gwopahole, otatu ulike kutya otu li kuume kashili. — Omayel. 27:17.

9-10. Aakuluntugongalo oye na okudhimbulukwa shike, uuna taya pe yalwe omayele?

⁹ Aakuluntugongalo oyo unene ye na okukala ye na uulaadhi wokupopya naamboka taya katuka oonkatu kaadhi li pandunge megongalo. (Gal. 6:1) Aakuluntugongalo nayo ohaye shi zimine kutya nayo inaya gwanenena nonokutya nayo  esiku limwe otashi vulika ya kale ya pumbwa omayele. Ihe shoka kashi na oku ya imba ya pukulule mboka ya pumbwa okupukululwa. (2 Tim. 4:2; Tit. 1:9) Uuna taya pe omuntu omayele, ohaya kambadhala okulongitha omagano gawo gokupopya ye mu longe ngaashi sha tegelelwa noneidhidhimiko. Oye hole omumwahe, nohole ndjoka, ohayi ya inyengitha ya katuke onkatu. (Omayel. 13:24) Ihe shoka sha simanenena kuyo, okusimanekitha Jehova, mokudhiginina omithikampango dhe nokugamena egongalo kaali etelwe oshiponga. — Iil. 20:28.

¹⁰ Sigo opo mpaka, otwa kundathana kombinga yethimbo lyokupopya. Nonando ongawo, opu na wo ethimbo lyokukala twa mwena. Omashongo geni tashi vulika tu taalele pethimbo ndyoka?

11. Oshiholelwa shini Jakob a longitha, nomolwashike tashi opalele?

¹¹ Otashi vulu okukala oshidhigu okupangela okupopya kwetu. Omunyoli gwOmbiimbeli, Jakob, okwa longitha oshiholelwa tashi opalele, a ulike nkene hashi vulu okukala oshidhigu oku shi ninga. Okwa ti: “Omuntu ngoka ihaa puka moohapu, oye okwa pwa nokwa gwana okupangela okukala kwe akuhe.” (Jak. 3:2, 3) Oshitomo ohashi tulwa komutse nosho wo mokana kokakambe. Omukayili oha vulu oku ka wilika nenge oku ka thikameka, mokunana omiya dhoshitomo. Ngele omukayili okwe dhi etha, okakambe ohaka vulu okutsa mo dhako, e taki iyetele oshiponga nosho wo omukayili. Sha faathana, ngele otwa ndopa okupangela okupopya kwetu, otaku vulu oku tu etela omaupyakadhi ogendji. Natu ka kundathaneni oompito dhimwepo, mpoka twa pumbwa “okuhila omiya dhoshitomo” shetu shopathaneko nokukala twa mwena.

12. Ethimbo lini twa pumbwa “okuhila omiya dhoshitomo” shetu shopathaneko nokukala twa mwena?

¹² Oho ningi po shike, uuna omumwatate nenge omumwameme e shi uuyelele mboka wu  li oshiholekwa? Pashiholelwa, ngele owa tsakanene nagumwe ngoka ha zi moshilongo moka iilonga yetu yi indikwa, mbela oho kala wa hala e ku lombwele nkene aamwatate naamwameme haya uvitha moshilongo moka? Odhoshili kutya einyengotompelo lyoye ewanawa. Otu hole ooitaali ooyakwetu nohatu kala twa hala okutseya monkalo moka ye li. Otwa hala wo tu kale hatu ya tumbula kondandalunde, uuna tatu galikana. Nonando ongawo, ndika olyo ethimbo twa pumbwa “okuhila omiya dhoshitomo” shetu shopathaneko nokukala twa mwena. Ngele otwa thiminike omuntu ngoka e shi uuyelele mboka wu li oshiholekwa, kungawo otatu ulike kutya katu mu hole, mwa kwatelwa aamwatate naamwameme mboka ye mu inekela kutya ote ke shi mwenena. Odhoshili kutya kapu na gumwe gwomutse a hala okugwedha ko komaupyakadhi gaamwatate naamwameme mboka ye li miilongo moka iilonga yetu yi indikwa. Sha faathana, kapu na omumwatate nenge omumwameme miilongo moka, ta ka kala a hala okugandja uuyelele kombinga yankene haya uvitha nenge haya ningi omaipyakidhilo gawo gopaKriste.

13. Ngaashi sha popiwa mOmayeletumbulo 11:13, aakuluntugongalo oye na okuninga shike, nomolwashike?

¹³ Osha simanenena unene tuu aakuluntugongalo ya vulike kekotampango lyopaMbiimbeli ndyoka li li mOmayeletumbulo 11:13, mokukala itaaya popi iiholekwa. (Lesha.) Shoka ohashi vulu okukala eshongo, unene tuu ngele omukuluntugongalo okwa hokana. Aaihokani ohaya kaleke ekwatathano lyawo lya kola, mokukala haya popi pandjigilile, mokulombwelathana iiholekwa yawo, nkene ye uvite nosho wo iimpwiyu mbyoka ye na. Ihe omukuluntugongalo oku shi kutya ke na okulombwela omukadhi “iiholekwa” yaakwanegongalo. Ngele okwe shi ningi, itaya ka kala we ye mu inekela nota ka nyatekitha edhina lye. Mboka ye na iinakugwanithwa megongalo, kaye na okupopya “iifundja.” (1 Tim. 3:8) Shoka osha hala okutya, itaya vulu okukotokela yalwe nenge oku ya hokola. Ngele omukuluntugongalo oku hole shili omukadhi, ite ke mu lombwela uuyelele mboka inaa pumbwa okuuva.

14. Omukulukadhi gwomukuluntugongalo ota vulu ngiini okukwathela omusamane gwe, mokukaleka po edhina lye ewanawa?

¹⁴ Omukulukadhi ota vulu okukwathela omusamane gwe a kale e na edhina ewanawa, mokukala itee mu thiminike e mu lombwele kombinga yiinima mbyoka kaayi na okupopiwa. Ngele omukulukadhi okwa tula miilonga omayele ngoka, iha ambidhidha owala omusamane gwe, ihe oha ulike wo kutya okwa simaneka mboka yi inekelela omusamane gwe iiholekwa yawo. Shoka sha simanenena, oha nyanyudha Jehova, molwaashoka ota kaleke po ombili nuukumwe wegongalo. — Rom. 14:19.

15. Jehova okwa li e uvitile ngiini ookuume kaJob yatatu, nomolwashike?

¹⁵ Otatu vulu okwiilonga oshindji kemboMbiimbeli lyaJob, kombinga yankene tu na okupopya nosho wo ethimbo ndyoka tu na oku shi ninga. Konima sho Job a taalele omaupyakadhi ga kwata miiti, aalumentu yane oya li ye ya oku mu hekeleka noku mu pa omayele. Aalumentu mboka oya li ya kala ethimbo ele ya mwena. Ihe kokutala kwaashoka aalumentu yatatu, ano Elifas, Bildad naSofar ya ka popya lwanima, oshi iwetikile kutya ethimbo ndyoka ya li ya mwena, kaya li taya dhiladhila kombinga yankene ye na okukwathela Job. Pehala lyaashono, oya li taya dhiladhila kombinga yankene ye na okuulika kutya Job okwa ninga sha, sha puka. Oya li ya popi iinima yimwe yi li paushili, ihe oyindji mbyoka ya popi kombinga yaJob naJehova, kaya li ya dhiladhilwa nawa nokaya li paushili. Oya li ya pangula Job nonyanya. (Job 32:1-3) Jehova okwa ningi po shike? Okwa li a geele noonkondo aalumentu mboka yatatu. Okwe ya ithana omagoya, e te ya lombwele ya pule Job e ya galikanene. — Job 42:7-9.

16. Oshike tatu ilongo koshiholelwa oshiwinayi shaElifas, Bildad naSofar?

 ¹⁶ Otatu vulu okwiilonga oshindji koshiholelwa oshiwinayi shaElifas, Bildad naSofar. Shotango, katu na okupangula aamwatate. (Mat. 7:1-5) Pehala lyaashono, otu na oku ya pulakena nawa, manga inaatu popya. Kungawo opo owala tatu ka uva ko onkalo yawo. (1 Pet. 3:8) Oshitiyali, uuna tatu popi, otu na okushilipaleka kutya oohapu dhetu oombwanawa nodhi li paushili. (Ef. 4:25) Oshititatu, Jehova oha kala lela e na ohokwe mwaashoka hatu lombwelathana.

17. Oshike tatu ilongo koshiholelwa shaElihu?

¹⁷ Omulumentu omutine ngoka a li a talele po Job, oElihu, omupambele gwaAbraham. Okwa kala a pulakena, sho Job naalumentu yatatu taya popi. Okwa li lela a gandja eitulomo kwaashoka ya li taya popi, molwaashoka okwa li a vulu okugandja omayele omawanawa noge li paushili, ngoka ga kwathele Job a lundulule okudhiladhila kwe. (Job 33:1, 6, 17) Shoka sha li sha simanenena kuElihu, okusimanekitha Jehova, ihe haye mwene nenge omuntu gulwe. (Job 32:21, 22; 37:23, 24) Oshiholelwa shaElihu otashi tu longo kutya opu na ethimbo lyokumwena nethimbo lyokupulakena. (Jak. 1:19) Otwi ilonga wo kutya uuna tatu gandja omayele, shoka sha simanenena, okusimanekitha Jehova, ihe hatse yene.

18. Ongiini tatu vulu okuulika kutya otwa lenga omagano gokupopya?

¹⁸ Otatu vulu okuulika kutya otwa lenga omagano gokupopya, mokulandula omayele gOmbiimbeli kombinga yethimbo ndyoka tu na okupopya nankene tu na oku shi ninga. Omukwaniilwa omunandunge, Salomo, okwa li a nwethwa mo a nyole ta ti: “Oohapu tadhi popiwa pethimbo lyo opala, odho iiyapula yoshingoli moshiyaha shoshisiliveli.” (Omayel. 25:11) Ngele otwa kala hatu pulakene neitulomo kwaashoka yalwe taya ti nokukala hatu dhiladhila manga inaatu popya, oohapu dhetu otadhi vulu okukala dha fa omayapula ngoka goshingoli, ano ge na ongushu nomawanawa. kungawo, nonando ohatu popi kashona nenge unene, oohapu dhetu otadhi ka tunga yalwe notatu ka nyanyudha wo Jehova. (Omayel. 23:15; Ef. 4:29) Nguka ogwo omukalo dhingi moka tatu vulu okuulika kutya otwa pandula omagano ngaka ga za kuKalunga.