Omumwatate Jack nomukadhi Marie-Line, oya kala miilonga yethimbo lyu udha okuza mo 1988. Oya tseyikila haya igilile oonkalo dhi ili nodhi ili, noya kala nokutaamba ko iinakugwanithwa oyindji moGuadeloupe nomoFrench Guiana. Omahala agehe ngoka, ngashingeyi ohaga tonatelwa koshitayimbelewa shaFulaanisa. Natu ya pulapule omapulo gontumba.

Oshike she mu inyengitha mu ye miilonga yethimbo lyu udha?

Marie-Line: Onda putukila moGuadeloupe, nopethimbo nda li okanona olundji onda li handi uvitha esiku alihe nameme, ngoka a li Onzapo hayi uvitha nuulaadhi. Ondi hole aantu, onkee nziya sho nda mana osikola mo 1985, onda tameke okukokola ondjila.

Jack: Pethimbo nda li okamatyona, onda li aluhe handi kala naalongi yethimbo lyu udha, noya li ye hole uukalele. Uuna osikola ya fudha, onda li handi kutha uukwathelikokolindjila. Momahuliloshiwike, omathimbo gamwe otwa li hatu londo ombesa, opo tu ka wayimine aakokolindjila koshitopolwa shawo. Otwa li hatu uvitha esiku alihe, na lwanima otwa li hatu yi komunkulofuta. Otwa li lela hatu shi tyapula!

Nziya konima sho nda hokana Marie-Line mo 1988, ondi ipula nda ti: ‘Ngashingeyi otwa manguluka, mbela itatu vulu okuninga oshindji muukalele?’ Onda wayimine Marie-Line muukokolindjila. Omumvo gwa ka landula ko, konima sho twa hiti osikola yuukokolindjila, otwa langekwa po tu li aakokolindjila yi ikalekelwa. Manga inaatu pulwa tu tembukile koFrench Guiana, otwa li tu na iinakugwanithwa yontumba yituntula moGuadeloupe.

Momukokomoko gwomimvo, iinakugwanithwa yeni oya kala nokulunduluka lwiikando. Oshike she mu kwathele mu igilile oonkalo ndhoka oompe?

Marie-Line: Aamwatate moBetel yaFrench Guiana, oya li ye shi kutya enyolo ndyoka tu hole unene, oJesaja 6:8. Onkee ano, uuna ye tu dhengele, olundji ohaye tu pula momukalo omuyolithi, taya ti: “Otamu dhimbulukwa ngaa enyolo ndyoka mu hole?” Kungawo otwa li hatu kala nale tu shi kutya otatu pewa oshinakugwanithwa oshipe. Onkee ano, ohatu ti: “Otse mbaka! Tu tuma!”

Ohatu yanda okuyelekanitha iinakugwanithwa yetu yomonakuziwa naambyoka iipe, oshoka ngele otwe shi ningi, otashi ke tu imba tu nyanyukilwe mbyoka tu na. Ohatu kambadhala wo tu pange  uukuume naamwatate naamwameme yaampoka tatu longele.

Jack: Monakuziwa, aamwatate naamwameme yamwe kaya li ya hala tu tembuke, molwaashono ya hala tu ya kale popepi. Ihe sho twa zi mo moGuadeloupe, omumwatate gumwe okwe tu dhimbulukitha oohapu dhaJesus ndhoka dhi li muMateus 13:38, tadhi ti: “Epya olyo uuyuni.” Onkee uuna twa pewa oshinakugwanithwa oshipe, ohatu idhimbulukitha kutya natango otatu uvithile ngaa mepya lya faathana kutya nduno otu li peni. Shoka sha simanenena, aantu nosho wo oshitopolwa moka tatu longele!

Uuna twa yi moshitopolwa oshipe, ohatu mono kutya yalwe oya vula okukala mo ya nyanyukwa. Onkee ohatu kambadhala tu kale ngaashi aantu yomoshitopolwa. Nonando iikulya otashi vulika ya yooloka ko kwaambyoka twi igilila, shoka taya li osho ngaa tatu li, shoka taya nu osho ngaa tatu nu nohatu kutha wo uuhaku mboka tawu opalele. Ohatu kambadhala okupopila muuwanawa oshinakugwanithwa kehe tatu pewa.

Marie-Line: Ohatu ilongo wo oshindji kaamwatate naamwameme yomoshitopolwa. Otandi dhimbulukwa oshikando shotango, sho twa thiki moFrench Guiana. Ethimbo ndyoka okwa li taku lokwa noonkondo, onkee otwa li tatu dhiladhila tu tegelele omvula yi sheke, opo nawa tu ka uvithe. Ihe omumwameme gumwe okwa pula ndje ta ti: “Natu ye tu ka uvithe?” Onde mu yamukula nonkumwe nda ti: “Omvula otatu yi ende peni?” Okwa ti: “Kutha okalunda koye tu ye noombasikela dhetu.” Mpoka opo ndi ilongo okuhinga ombasikela nda kwata okalunda. Andola kanda li ndi ilonga oku shi ninga, ando inandi vula okukala handi uvitha pethimbo lyomvula!

Omwa tembuka iikando 15 lwaampo. Mbela otamu vulu okutulila mo yalwe shi na ko nasha nokutembuka?

Marie-Line: Kashi shi oshipu okutembuka. Nonando ongawo, osha simana okumona ehala mpoka to vulu okukala wa manguluka, ngele wa zi miilonga yokuuvitha.

Jack: Olundji ohandi paindulula egumbo lyetu meni. Uuna aamwatate koshitayimbelewa ye shi kutya otashi vulika kaatu ka kale noshinakugwanithwa shontumba ethimbo ele, omathimbo gamwe ohaya ti: “Jack, egumbo ndika ino li painda.”

Marie-Line okapyoko ngele tashi ya pokupakela! Iinima ayihe ohe yi pakele miipakete, e ta nyola ko “okaiyogelo,” “ondunda yokulala,” “okombitha,” nosho tuu. Onkee ano, uuna twe ya megumbo lyetu koshitopolwa hoka twa tuminwa, ohashi kala oshipu tu tule omapakete pehala mpoka iinima mbyoka yi  li mo yi na okulongithwa. Oha ningi omusholondondo gwiinima mbyoka yi li mepakete kehe, opo shi kale oshipu okumona shoka twa pumbwa.

Marie-Line: Ohatu vulu okutameka uukalele wetu nziya ngaashi tashi vulika, molwaashoka iinima yetu ohayi kala nale ya unganekwa nawa.

Ethimbo lyeni ohamu li longitha ngiini, opo mu vule ‘okugwanitha ayihe mokulongela Kalunga’? — 2 Tim. 4:5.

Marie-Line: Omaandaha kehe, ohatu vululukwa po nokwiilongekidhila okugongala. Okuza Etiyali ndongo Osoondaha, ohatu yi muukalele.

Jack: Nonando otu na oowili ndhoka twa tegelelwa tu longe, shoka hasho hatu ipula nasho. Okuuvitha okwo kwa simanenena kutse. Okuza ngaa sho tatu zi megumbo sigo ethimbo tatu galukile mo, ohatu kambadhala okupopya nakehe gumwe tatu tsakaneke.

Marie-Line: Uuna twa yi kehala lyontumba tu ki inyanyudhe, aluhe ohandi yi nuufo. Aantu yamwe ohaye ya kutse taye tu pula iileshomwa, nokuli nonando inatu ya lombwela kutya tse Oonzapo dhaJehova. Nomolwaashono hatu kala twa kotokela omukalo gwetu gwokuzala neihumbato lyetu. Iinima mbyoka oyo aantu haya konenene.

Jack: Ohatu gandja wo uunzapo, mokukala aashiinda aawanawa. Ohandi toola po oombapila ndhoka dha napakana pegumbo lyetu, ohandi ka ekelahi iiyagaya nohandi opaleke wo pondje. Shoka tandi ningi, aashiinda shetu ohaya kala ye shi wete, nomathimbo gamwe ohaya pula taya ti: “Ito vulu okupa ndje Ombiimbeli?”

Olundji omwa kala tamu uvithile kiitopolwa yokokule. Mbela otamu dhimbulukwa sha shi ikalekelwa kombinga yomalweendo ngoka?

Jack: MoGuiana, kiitopolwa yimwe ohashi kala oshidhigu okuya ko. Olundji otwa li hatu hingi oshinano shookilometa 600 moshiwike, moondjila oombwiinayi. Itatu dhimbwa oshikando shimwe sho twa ka talela po ko St. Élie, mokuti kwaAmazon. Osha li she tu pula oowili dhontumba tu thike ko, notwa li twa yi ko nohauto yobaki nombautu. Aantu oyendji yaahoka, oya li haya longo momina. Yamwe oya li ye tu pe uutandu woshingoli wu li omayambidhidho, sho ya pandula iileshomwa yetu. Kongulohi, otwa li twe ya ulukile kamwe komuuvidio wehangano. Aantu oyendji yomoshitopolwa oya li ye ya oku ka tala.

Marie-Line: Omimvo opo dha zi ko, Jack okwa li a pulwa a ka gandje oshipopiwa shEdhimbuluko moCamopi. Otwa yi ko nombautu, notwa li twa ende po oowili ne momulonga Oyapock. Olweendo ndwoka otwa li twe lu tyapula noonkondo!

Jack: Pompompolonga opwa li pwa nika oshiponga, unene tuu mpoka omeya ga li omafupi. Pompompolonga opu hokithi okutala, sho ombautu yi li pokuthika po. Omuhingi gwombautu oku na okukala a dheuka mokweenda po. Nonando ongawo, olweendo ndwoka otwa li twe lu tyapula. Nonando pEdhimbuluko opwa li owala Oonzapo 6, opwa li wo pwe ya aantu 50 lwaampono, mwa kwatelwa Aamerindiana.

Marie-Line: Aagundjuka otaya vulu okuninga sha faathana, ngele oya hala okupa Jehova oshindji. Moonkalo ndhika, owu na okukala wi inekela muJehova, shoka hashi koleke eitaalo lyoye. Olundji ohatu mono nkene Jehova te tu kwathele.

Omwi ilonga omalaka gontumba. Mbela oshipu kune oku shi ninga?

Jack: Hasho dha li. Ondi ilongo omalaka ngaka, molwaashoka opwa li pu na ompumbwe. Onda li ndi na okukwatela komeho ekonakono lyOshungolangelo mOshisranantongo, * manga nokuli inaandi pewa elesho lyOmbiimbeli melaka ndyoka. Onda pula omumwatate gumwe kutya onde shi enditha ngiini. Okwa ti: “Poompito dhimwe inatu ku uva, ihe owe shi enditha nawa lela.” Aanona oya li haya kwathele ndje shili. Uuna nda lesha epuko, ohaya pukulula ndje, ihe aakuluntu ihaye shi ningi. Ondi ilonga ko oshindji kaagundjuka.

Marie-Line: Moshitopolwa shimwe, onda li handi konakona Ombiimbeli nayamwe mOshifulaanisa, mOshiputu nomOshisranantongo. Omumwameme gumwe okwa ladhipike ndje kutya uuna tandi ningi omakonakonombiimbeli, tango nandi ninge lyomelaka ndyoka kaandi shi nawa, ngame tandi hugunine nolyomelaka ndyoka ndi shi nawa. Onde ke shi mona mo nziya kutya omayele ngoka oge li pandunge.

Esiku limwe, onda ningi tango ekonakonombiimbeli mOshisranantongo, konima e tandi ningi lyomOshiputu. Sho nda tameke okuninga ekonakono lyomOshiputu, omumwameme ngoka twa li naye, okwa ti:  “Marie-Line, ondi wete ngaa pwa fa pu na uupyakadhi wontumba!” Onde shi dhimbulula mo kutya onda li tandi konakona nomukiintu Omubrazilia mOshisranantongo, pehala lyoku shi ninga mOshiputu.

Omu holike shili kwaamboka mwa kala tamu longo pamwe nayo, sho mu li miinakugwanithwa yeni. Omwe shi ende ngiini mu kale mu na ekwatathano lya kola nayo?

Jack: Omayeletumbulo 11:25, otayi ti: “Omwenyo ngoka tagu yambeke, otagu kutithwa.” Ihatu kakadhala tu kwathele yalwe ngaashi tatu vulu. Ngele tashi ya pokukaleka Oshinyanga shUukwaniilwa monkalo ombwanawa, yamwe oya li haya ti: “Ethela po aauvithi.” Ihe onda li handi ya yamukula tandi ti: “Nangame omuuvithi. Onkee ano, ngele opu na iilonga ya pumbwa okulongwa, nangame ondi na oku yi longa.” Nonando atuheni ohatu kala twa pumbwa ethimbo lyokuninga iinima yetu yopaumwene, olundji ohatu idhimbulukitha kutya shoka kashi na oku tu imba tu ningile yalwe uuwanawa.

Marie-Line: Ohatu ningi oonkambadhala tu kale tu na ohokwe maamwatate naamwameme. Shoka ohashi tu kwathele tu tseye uuna ya pumbwa omuntu a tonatele oyana nenge e ke ya tale kosikola. Opo nduno, ohatu kambadhala okuunganekulula omaipyakidhilo getu, opo tu vule oku ya kwathela. Shoka ohashi tu kwathele tu kale tu na ekwatathano lyopothingo nayalwe, nokukala twi ilongekidha oku ya kwathela mpoka ya pumbwa ekwatho.

Omalalekonuuyamba geni mwa mona, sho mwa kala tamu longele hoka ku na ompumbwe?

Jack: Iilonga yethimbo lyu udha, oye tu etela omayambeko ogendji. Olundji ohatu mono ompito yokunyanyukilwa eshito lyaJehova. Nonando ohapu kala omashongo, otu na ombili yopamadhiladhilo, molwaashoka otu shi kutya kehe mpoka tu li, aamwatate naamwameme otaya vulu oku tu ambidhidha.

Pethimbo nda li omugundjuka, onda li nda tulwa mondholongo moFrench Guiana, omolwokwaakutha ombinga mopolitika. Inandi shi dhiladhila nando onale ngele esiku limwe onandi ka galukile ko ndi li omutumwa, nokupewa epitikilo ndi talele po aanandholongo noku ya uvithila. Odhoshili kutya Jehova oha yambeke aantu!

Marie-Line: Shoka hashi etele ndje enyanyu unene, okukwathela yalwe. Otwa nyanyukwa, sho tatu longele Jehova. Shoka oshe tu kwathela wo tu kale tu na ekwatathano lya kola, tu li aaihokani. Omathimbo gamwe, Jack oha pula ndje ngele otatu vulu okuhiya aaihokani mboka ya teka omukumo, ye ye ya lye pamwe natse. Olundji ohandi mu yamukula tandi ti: “Nangame osho nda li tandi dhiladhila!” Osho sha li hashi ende ngawo.

Jack: Omimvo opo dha zi ko, onda monika okankela yootate. Nonando Marie-Line ke hole tandi shi popi, onde mu lombwele tandi ti: “Muholike, ngele ondi na okusa ngula, itandi si ando nda ‘kuta omwenyo.’ Ihe otandi ka sa nda nyanyukwa, molwaashoka okukalamwenyo kwandje akuhe onda lalakanene iinima yopambepo, ano iinima yi na oshilonga.” — Gen. 25:8.

Marie-Line: Jehova okwa kala noku tu pa iinakugwanithwa mbyoka twa li inaatu tegelela, nokwe tu pitike tu ninge iinima mbyoka inaatu dhiladhila nando onale. Otwa kala shili nokutyapula iinima iiwanawa monkalamwenyo. Otwi inekela thiluthilu muKalunga, notatu ka ya kehe mpoka ehangano lye tali tu tumine!